28 Dec 2007

قال بقر قال

كان فى نكته كده و كنت بحب أقولها بصراحه زمان و لكن النكته دى خلاص مش هقولها تانى ... النكته بتقول ان صعيدى و سعودى كانوا بيتكلموا فالسعودى قال انتوا المصريين بتاكلوا فول على الفطار فول على الغدا فول على العشا .. ايه اللى يفرقكم عن البهايم .. رد الصعيدى البحر الاحمر.

النكته على قد عنصريتها كانت بتبين قد ايه المصريين بيبصوا للسعوديين بدون إدراك للواقع و على انهم شويه بدو جالهم فلوس .. مع انكار مستمر لأى مثقف وسطيهم .. كان دايما الشيخ بن باز هو الممثل الحقيقى للشعب السعودى فى نظر المصريين .. علشان بس تعرفوا قد ايه كان جهلنا

لكن قريب قريت عن مدون سعودى تم اعتقاله ... قولت لما أدخل اتفرج على مدونته ... مصدقتش نفسى ... قد ايه حكمه و جمال ف الاسلوب و تمكن من اللغه ... هو فيه كده فى السعوديه ... مش ممكن ... اول مره اخرج بجد برا نطاق النظرة الضيقه اللى عندى ... حاسس ان انا عربى ... حاسس ان بجد ممكن نعمل وحده عربيه .. بس مستقله بعيد عن الحكام المعفنين اللى عندنا ... وحده فى الهم .. كلنا فى الهم سوا

كان فى نكته مصريه تانيه بتقول ان مبارك هو اللى وحد المصريين على دين واحد ... لأنه كفرهم كلهم ... متهيألى ان الحكام العرب وحدونا على كرههم ... و اللى يضايقك فى مصر هو اللى مضايق اخوك السورى و السعودى و التونسى و المغربى ... طب ليه نسكت و احنا عندنا المدونات ... ليه نسيب فؤاد يتحبس علشان قال رأيه ... رأى حر بجد ... رأى يخليك تحترمه و تقدرة .

من هنا بعلن انا مع الأفراج عن فؤاد أحمد الفرحان ... الرحمه يا حكام السعوديه ده مقالش حاجه غلط ... سيبوا اللى يقول يقول ... ده هيخلينا اقوى و أحكم ... يلا يا مصريين ... من غير مابقى واخد الامور عل جوه .. اتحركوا ... بانارات علشان فؤاد ... شويه هنا و شويه هناك جايز نفوق و يرجع فؤاد للتدوين تانى و نسجل انتصار تانى لصالح المدونين

أقروا بقا ليه فؤاد بيدون و أستمتعوا

اقروا النص ده لفؤاد عن الحريه

ده بقى موقع الحمله لتحرير فؤاد ... بحب اسميها تحرير مش افراج

27 Dec 2007

لما الشتا يهد الرجال

و أدى الشتا عاد من تانى ... كان زمان للشتا أحاسيس مختلفه عندى ... يعنى كنت بحب أوى البلوفرات و اللبس الشتوى عامه ... لسعه البرد مع كوبايه النسكافيه ... المشى فى محطه الرمل بعد المطرة (الشتا بالأسكندرانى) ... الأفلام و أنت تحت البطانيه.

لكن الملعون من ساعه ما نقلنا فى الشقه الجديده نسانى كل ده... بقى الشتا عباره عن ريحه نتنه شاممها و عارف أن انا مصدرها و بعمل نفسى مش واخد بالى ... الشتا دلوقتى يعنى قشف الأدين ... الشتا بقى لما يدق الباب أفتكر معاه أن حمامنا من غير سخان.

أصعب حاجه و أنت واقف قدام الدش ... زى ما نزلت من بطن مامتك و بتبص للميه اللى انت عارف انها عمرها ما هتسخن ... كأنك بالظبط هتخلع ظفر من أيدك ... تطلع بره الحمام ... تلبس هدومك كلها من غير ما تستحمى ... و تفضل تفكر .. و ذكائك ميسعفكش .. مالهاش حل ... ياتفضل نتن .. يا تستحمل و تستحمى ... تعرف ليه القطط بتخاف من الحموم ... تبتدى تفكر ... و تلاقى نفسك من غير ما تاخد بالك أبتديت تلحس دراعك ... يييييييع أيه القرف ده ... لا لا لا ... لازم تستحمى يا واد يا بهظ .

تدخل المقبره تانى ... تقلع تانى هدومك ... تمد أيدك برعب ... تصرخ ... و تسمع بلال بيضحك ... هو السخان بكام يعنى ... انا بعد الحمام ده هنزل أشترى سخان وش ... تمد أيدك كلها ... شويه ميه يجوا على صدرك ... بررررره.... اللعنه .... تراجع نفسك .. والله الريحه الوحشه مش وحشه قوى .... لا ... ماينفعش .. مش بعد ما بليت أيدك ... تمد كعب رجلك ... عادى ميفرقش .... تدوس فى الميه و تبتدى تيجى على فخدك .... أااااه ... تفهم معنى انا الحكومه بتاعه أحمد السقا فى فيلم الجزيره ...شجاعه فجائيه و روح زورو تلبسك ... يلا مبدهاش ... هوووووووووووووب ... تختبر لحظات الموت لثوانى ... كفايه كده ... تخرج من تحت الدش و انت ناسى انك تحط صابون أو أى حاجه و تجرى على السرير .... تحت اللحاف .. جميله بقى اللحظه دى ... مش لازم سخان خلاص انا أستحميت ... تبص على ضوافرك ... ياااه لسه وسخه ... طب أبقى أغسل ايدى .. اهم حاجه الريحه راحت .... تصبحوا على خير بقى.
-----------------------------
بلال بقى بيقول :
هييييه دنيا...رجعت ايام الشتويه يا بهظوظ

بجد بقى ومش تريقه الاستحمام فى ظروف خطرة زى ال بنمر بيها انا والسيد بهظ كأنه قفزة ايمانيه فى الخلاء لانك بتحتاج خطوة واحده للتحرك تحت طاولة الدش خطوة صعيبه بتشد فيها كل جلدك شهقة حد بيمارس لحظه انتشائيه مفاجأه او تعذيب مباغت واذا كان ده هيحصل فى بداية النهار يبقى اليوم هيبتدى برجة عنيفه بتكتسب لذه منها أو صدمه تخليك تمشي باستغراب

هو فى ايه ...مالها الناس ماشيه كده ليه ...انامين !!!؟هى الميه الساقعه عملتى أيه!!!؟

وتحس احيانا انه خالص لازم تلم الجاكت عليك شويه وانت ماشي كأن حد انتهك عرضك ولا حاجه وانت نايم متخدر ...وتبتدى تبص فى وشوش الناس انا ايه ال حصلى ...انا مكنتش كده ...ده مش جلدى ...ده جلد فرخه مسلوخه...طب رجعونى لامى ...اناعايز ماما تحمينى ...والناس متعزركش ...متقدرش انك اترميت تحت دش ساقع وبارد وتنح اوى ...وتبتدى تعاملك هلى انك اهبل نوتردام ...معلش يا حبيبي البس القميص ده...وتحط كفوفك جوة القميص ويشدوها بقسوة

تصرخ ...تصرخ ...تصرخ... لالالالالالالالا

انا مش مجنون انا مش واحد مستحمى ...انا كنت داخل احلق دقنى و النداهه ندهتنى وقالت الدش يا واد الدش....وتنشأ بعديك حركه جديده فى الادب الروائي الاستحمامى ويكون من اشهرها..روايات زى

المسام النتنه الضيقه...لبركليز

مائة عام من الجرب ...لحمص

مش عارف اقول ايه ...انا مستحمى حالا

-----------------------------------

انا زودت تعليق بلال علشان هو بيشاركنى المأساه اللى إحنا فيها فمش قليل عليه يشاركنى البوست و بصراحه التعليق أجمل من أنه يتساب فى الكومنتات كده و مات الكلام... يلا العواف

9 Dec 2007

بهظ على الهوا

انا سجلت حلقه مع راديو حريتنا على النت عن البلوج و التدوين و الحركات ... مع محمد عز اللى أتعرفت عليه فى منتدى جامعه الدول العربيه للشباب ... و لأنى مسطول بدرجه مستدامه ... فأنا نسيت لحد دلوقتى أحط لينك عن الحلقه و محمد هيقتلنى ... علشان كده أدى لينك الحلقه تحت و الراديو نفسه هتلاقوه فى السايد بار على اليمين أهوه... المهم انا معرفتش غير لما مجموعه من صحابى لقيتهم بيتصلوا بيا و بيقولولى أن الحلقه حلوه و بتاع ... الطريف أن انا أساساً مسمعتش الحلقه علشان كده عايزكم تسمعوها و تقولولى رأيكم يلا سلام

بلوج أون أير مع بهظ بيه

30 Nov 2007

تفاؤل



انا بصراحه مش عارف أبتدى ازاى ... و يا ترى أكتب بال فصحى و لا بالعاميه ... جوايا مشاعر كتيره بعد ما رجعت من العين السخنه
الاسبوع اللى فات... كنت بحضر منتدى جامعه الدول العربيه للشباب ... بصوا مش هتكلم عن التغطيه اليوميه و حصل ايه بالتحديد... بس تقدروا تشفوها هنا و بالنسبه للمنتدى نفسه هتلاقوه هنا


أيه شعورك لما تقابل عرب و الغريب أنهم لأول مره بيعرفوا يتكلموا... يعنى يعرفوا يتحاوروا و يسمعوا بعض و همهم المشترك هو النهوض (جمع نهد) (لا بجد بهزر) همهم النهوض بالدول العربيه و إنشاء وحده عربيه على أساس المصلحه بعيداً عن كل الهجص بتاع القوميه و الاسلاميه و المهلبيه ... أتفقنا فيما بيننا على أن الوسيله الوحيده لتحقيق الوحده العربيه المزعومه هو الاتفاق على مصلحه واحده تجمعنا كلنا


يمكن تكون دى الغلطه الكبرى اللى أرتكبتها جامعه الدول العربيه ... أصلهم لو بيحاولوا يجيبوا الشباب علشان الشكل الاعلامى و الحاجات دى و من غير ما يخلوا الشباب دى تعمل حاجه فهما أكيد فشلوا ... أصل كل واحد من الناس اللى كانت حاضرة أساساً نشط فى بلده بشكل ما ... و كل واحد بيعمل مشروعات فى بلده و مش محتاج معونه من حد ... فلما أتقابلوا ... بس هو ده اللى محتاجينه علشان يتفقوا على مشاريع مع بعض ... الميزة كلها مشاريع شبابيه ... همها هو عمل تغيير بجد من غير الدخول فى مهاترات و متاهات العمل السياسى ... اللى محدش مننا بينكر أهميته قد ماهم مقتنعين بأهميه العمل التنموى.

و لكن الصراحة معتقدش أن جامعه الدول العربيه كانت متأمرة فى موضوع المنتدى ... أظن أن القائمين على المنتدى كانوا فعلا صادقين فى موضوع تفعيل العمل الشبابى و الدليل على كده أن بعد تانى يوم الشباب أتخنقت من أن اللى بيرأسوا الجلسه بيبقوا كبار ففى تالت يوم خلوا الشباب يرأسوا الجلسه و كمان الجامعه متبنيه نهج جديد فى تشبيب الادارة (بمعنى جعلها كلها شباب ) ... أعتقد أن الغلطه الاكبر لو هم متأمرين أنهم يخلوا شباب زى هيثم كامل و لا بشير المغربى و لا عمرو أبو على يشتغلوا أساسا فى الجامعه ... انا قابلتهم و عارف أنهم عايزين الخير و التغيير الايجابى للعرب و الحمد لله متلوثوش بالسياسه العقيمه ... و هو ده اللى مخلينى متفائل

اللى يفرحك أكتر هو الشباب نفسهم ... كنزه و عز ... عوض و مجد ... عمر و تالا... هيثم و كامل ... منار و أميرة... كل واحد ساب فيا أثر و أخد حته منًى و هو مسافر ... بالذات سالينا ... من سوريا ... صاحبه أجمل وش مضحك شوفته فى حياتى ... و الناشطه فى سوريا بشكل بسيط نتيجه للقمع هناك ، المؤثر فى الكلام مع سالينا انك تلاقيها بتتفق معاك على المشروع و تقولك " هندير المشروع بها الكيفيه و إن مندرتش منى أخبار بعد كده اعرف انهم اعتقلونى بس انا معاكم فى المشروع " ... أكتر حاجه أحترمته فى سالينا هى انها لو إقتنعت بفكرة او مبدأ ممكن عادى جداً تتبناها و تشتغل عليها من غير تعصب و ده اللى خلاها تفتح البلوج ده بعد كام ورشه عمل عن التدوين رغم انها مكانتش مقتنعه بمبدا التدوين اساساً

أما عمر المغربى فده قصته قصه ... أتحبس سبع سنين فى المعتقل و فضل يسافر باسبور مزور و ده قبل الملك الجديد ... دلوفتى هو واحد من الناشطين المهمين فى المجتمع المدنى المغربى و بيشتغل فى الأمم المتحده و بيتطوع فى سبع تمن تسع جمعيات فى المغرب

حبيب قلبى أمين زيان من تونس و بيدرس هنا فى مصر و بلوجر تونسى و كان منسق مجموعه المدونين فى الورشه ... انا كنت فاكرة فى الأول داخلها واسطه .. بس بعد الورشه اللى عمالناها للبلوجرز أتأكدت انه بجد بنى أدم منظم و محضر كل حاجه علشان المشروع بتاعنا شبكه المدونين الشباب العرب و يستاهل كل خير و منصحكمش بزيارة مدونته علشان لسه محطليش لينك.

اما اهم واحد قابلته فى المؤتمر فكانت السفيرة نانسى بكير ... الصراحه الناس كانت ملانه من الخطبه الطويله اللى قالتها فى الافتتاح ... بس انا لقيتها معانا فى ورشه المدونين ... كنت متحفظ شويه من كونها من الجامعه و مساعده عمرو موسى شخصيا ... و لكن المفاجأه ان لقيتها هى كمان بلوجر ... أه و الله بلوجر و مرضيتش تقول على البلوج بتاعها علشان هو ليها مش للسفيره ... و قعدنا نتكلم عن أن التدوين أزاى فى حريه و أن الحكام العرب المفروض يهتموا بالتنميه الاقتصاديه و الاجتماعيه ... و عرفت منها ان فى قمه عربيه أجتماعيه و أقتصاديه بتحضرها الجامعه علشان تتعمل فى سوريا شهر مارس اللى جاى ... و فى الجامعه بيحضروا ليها بقوه ..يااااه بجد و من قلبى ربنا معاهم

نعود بعد الفاصل
.

16 Nov 2007

بابا

بابا راجل غريب طحن ... عصبى بشكل غير طبيعى معايا و مع أختى ... هادى جداً مع الناس ... جرب كل أنواع الحياه و هو صغير و مع ذلك لسه على نياته ... راجل عنده 64 سنه و مبيبطلش حكايات.

الذكريات عند بابا ليها طعم خاص ... رغم أن انا شبعت من القصص اللى هو بيقولها لأنى سمعتها أكتر من مره ... لما بيكلم عماتى ولا فى التاكسى مع السواق اللى مش هيعرفه لأكتر من مده المشوار ... إلا إن عنده دايماً اللى يحكيه.

لما تقعد مع بابا هيبتدى يحكيلك عن الايام فى السعوديه و أزاى إن ظابط الجوازات مصدقش إنه مسافر سنه 72 و ان بابا كان نفسه يخش الجيش بس نظرة مأسعفوش رغم إنه دخل مدرسه عسكريه فى السيده زينب و كان بيلعب ملاكمه و سباحه و كان من المتفوقين ... و يحكيلك عن نور الشريف اللى كان زميله فى المدرسه و بقى نجم بعد كده .... يتنهد و يقولك انه كان ممكن يبقى نجم سينمائى بس الحاجه مرضيتش تخليه يكمل و انه طلع فى مشهد مع فريد شوقى فى فيلم جعلونى مجرماً ... طبعا هيقولك عارف مشهد الدكتور لما اداله الحقنه و هو فى المستشفى أهو ده بابا ... كان مشهد كومبارس متكلم ... كان اياميها بابا شغال فى مصلحه الضرايب و طالب بكليه التجارة و لما جدى مات و كان زميل عبد الناصر فى الجبهه عبد الناصر بعت مندوب شخصى يحضر الجنازه ... بعد الجنازه راح هو و عمى نبيل و وقعوا فى سجل التشريفات.

باباه حكاياته لا تخلو من العنصريه ... يعنى مثلا مبيحبش الفلسطينين عموما ... أصل اتبهدل منهم فى السعوديه و بعد كده فى مصر ... لما أجر منه المحل واحد فلسطينى و بقا يتأخر معاه فى الأيجار... أفضل أقاوح معاه يا بابا مش كل الفلسطينين زى الراجل ده ... يقوللى لأ... أقوله لأ يا بابا انا أعرف فلسطينين كويسين ... بس هو راسه ناشفه.. جميل بابا فى العناد.

بابا عنده حكايات كتير خاصه... انا عارف انهم محصلوش كده بس هو بيحب يحشى الحكايه بشويه بهارات و يفضل يحكيها منتشى بمتعه السرد ... والله بابا كان ينفع حكاء .

أكتر حاجه بتبهرنى فيه هو أزاى بيبتدى الحكايه من لا شئ و يتفرع بيها لحاجات مالهاش دعوه و بعد كده يوجدلها دعوه ... عندك مثلا جوز أختى أول مره جالنا البيت ... المفروض اننا نتعرف فيها على الولد ... بابا أخد تلت تربع مساحه الحوار فى تفسير سوره يوسف من منظورة الشخصى ... هو مصدر معلوماته الوحيد إذاعه القرأن الكريم و الواد اساسا دارس تفسير .. وانا اللى معرفش حاجه عارف ان بابا بيهجص ... ماهو أصل سيدنا يوسف منفش ف القميص علشان يبعتوه لأبوه... بابا مصر انه نف فى القميص .. جوز اختى كان صايع مشاها نف فى القميص و بابا بعد كده بقى يقول انا أختبرته فى تفسير القرأن و لقيته فاهم علشان كده خليته يتجوز البنت ... ماهو أصل الرسول قال من جائكم ترضون دينه و ماله فزوجوه و إلا تكن فتنه فى الأرض و فساد كبير .. أقوله يا بابا مفيش ماله ديه ... يقوللى لأ و ماله يعنى انا أجوزها لواحد فقير.

بابا دلوقتى مصدر حكاياته هو العبد لله ... مانا كل أسبوع لما أنزله مصر لازم أقعد أحكى معاه ... عن أى حاجه ... عن مشكله التصحر و لا تغير المناخ... التدوين أو العمل الأهلى ... بيسمى الأنترنت طقطقه ... فيقوللى طقطق كده على الكمبيوتر أبو خمس تلاف جنيه و قوللى الاخبار بتقول ايه .. طبعا الكمبيوتر ده من خمس سنين بنتيوم 2 ... و مافهوش كارت فاكس و لا كارت نيتورك و مبيوصلش على النت اساسا لأن مفيش وصله فى بيت مصر ... و كل مرة أقوله كده و هو مالوش دعوه ... جميل بابا فى العناد

لما رجعت الأسبوع اللى فات من فنلندا .. قام مقعدنى معاه فى البلكونه و قاللى ... ها أحكى ... انا فضلت أحكى عن فنلندا و السقعه و أزاى هم أبتدوا يعملوا سخانات تحت الطرق علشان يدوبوا الجليد ... مفيش انا خلصت الحكايه و هو رفع سماعه التليفون و أتصل بعمتى ... اااه الواد رجع بالسلامه من فنلندا ... أه دى سقعه جداً ... تصدقى يا ناريمان ... دول بيعملوا سخانات تحت الأسفلت علشان يدوبوا الجليد .... أه و الله ... يكمل كلام شويه و يقفل السكه و يبصللى .. اللى قوللى يابو حميد ... هى السخانات دى غاز و لا كهربا

جميل بابا فى عناده و حكاياته

4 Nov 2007

جعلونى بهظاً

كتير عرفتهم فى حياتى و يمكن بعد سنين بقوا يسألونى انت أسمك الحقيقى أيه* ... أصل بقالى كتير و محدش بينادينى غير بهظ و الموضوع ده مش مرتبظ بالمدونه لأن الاسم طلع عليا تقريباً سنه 2000 و لأنى زهقت من السؤال المكرر قررت أنى أحكى الحكايه هنا و أبقى أحط اللينك على الكارت بعد كده.

فى سنه 1998 بعد ما خلصت ثانوية عامه جالى التنسيق على هندسه أسكندريه و بفرق 4 درجات عن هندسة القاهرة اللى كنت كاتبها أول رغبه ... كان ليا قريب من بعيد أكبر منًى بسنه و فى هندسه أسكندريه و قلت خلاص هقعد معاه ... كنت كتكوت خالص ... وش طفولى وصغنن كده و لسه مطلعتليش لا دقن و لا حبوب فسمانى صحابى بقلظ.

كنت طفل غرير و أتضحك عليا كتير و أتنصب عليا أكتر من شباب الكليه و لأنى كنت عايش مع شباب كله من القاهرة فحملت فى اعماقى كره للأسكندرانيه و أستخسار المدينه دى فيهم فى الأول أتغير بعد كده لما عرفت منهم الشباب الحلو ده.

كطالب هندسه كنت فاشل تماماً و ده لأنى مبذاكرش خالص بس كنت شاطر جداً فى الرسم الهندسى و الوصفيه و كل المواد المتعلقه بتشغيل الدماغ مش الحفظ و متفتكرش ان هندسه مفيهاش حفظ ... لا هى فيها من كل لون يا بطسطا ... المهم جت سنه أولى و دخلت هندسه مدنى و معايا فيزيا من اعدادى و مجموع يادوبك 52 فى الميه و كذا ماده مقبول و ضغيف ماعدا الرسم و الوصفيه أمتياز.

فى سنه أولى كان عندنا ماده رسم مدنى و فيها بنرسم كل أسبوع لوحه كانت بتاخد تقريبا فى المتوسط من ساعه و نصف الى ساعتين ... بس انا كنت بخلصها بسرعه فى تقريبا ساعه او ساعه الا ربع ... المهم جه يوم و واحد من زمايلى القاهرويه سألنى انى أعمله لوحه علشان هو هيسافر مصر .. قلت له أن اللوحه بخمسه جنيه على سبيل الهزار ... المهم لما جه تانى يوم اديته اللوحه و رحنا نشترى كتاب المساحه و مكانش معايا الا 15 جنيه و هو بعشرين فأستلفت منًه 5 جنيه على أساس إنى أردهم قام قالى أعتبرهم تمن اللوحه.

المهم بعد كام يوم جالى واحد من الأسكندرانيه اللى نصبوا عليا فى أول سنه و طبق نظاره اديداس كانت غاليه عليا قوى ... أصلها كانت الحاجه اللى بتمنظر بيها فى الدفعه... جالى الزبون و كان مزنوق فى أربع لوح علشان التسليم و مش عارف يعمل أيه فسأل مين ممكن يعمل اللوح دى و لو بفلوس قام صاحبى الأولانى قاله ده بقلظ بيعمل لوحات بفلوس... انا كنت شايل منًه طحن و قلت فى نفسى اللى يجيى منًه أحسن منًه و عملتله اللوح ... كانت العشرين جنيه منًه ليها طعم تانى ... المهم هو راح يسلمها و الدكتور مرضاش يستلمها منًه و حاول يرجعهالى و كنًا فى أزحم حته فى الكليه و فى أزحم وقت و هو بيقوللى أرجع العشرين جنيه و انا بقوله بالفصحى عفوا يا أستاذ البضاعه المباعه لا ترد لا تستبدل.

اليوم ده ناس كتير عرفت أن بقلظ بيعمل لوح و أبتدى ناس كتير تحاول تشترى منًى لوح... و كنت سمعت عن ترابيزه الفونسه و دى أختراع بسيط هو ترابيزه قزاز و تحتها لمبه نيون و تفرد عليها اللوحه الأصل و اللوحه الفاضيه فوقيها و تشغل اللمبه و بس يا معلم تبتدى نقل ... اللوحه اللى بتاخد ساعه و نصف بتاخد بالفونسه 10 دقايق بالضبط "انا كنت حاسبها" شغلى بقى.

طبعا التجارة دى كانت ممنوعه فعلشان كده بقا أصحابى اللى يعرفونى يقوللولى بقلظ بس و انا مببعش لوح للناس اللى معايا فى السكشن و بتجنب أن حد يشوفنى ببيع اللوح رغم أن الكل عارف.

فى شهرين و شويه من الترم الاولنى و بعد الميد تيرم جه دكتور المساحه فى محاضرة يوم الأثنين طلب حل مسأله فى لوحه ... المسأله كانت صعبه جداً ... لما روحت البيت لقيت شيكو "واحد من صحابى عامل اللوحه " عنيا قلبت فجأه دولارات .. قلتله لو عملتلى منها أربعين نسخه هبعهملك بكرة هوا .. مرضاش و شكك فى قدراتى التسويقيه ... أتفقت معاه انا هروح بكره أنشر الخبر و أرجع بالعدد المطلوب و هو يعمل اللوح ... انا هشترى منًه اللوحه بـ 5 جنيه و أبيعها بـ8 جنيه... و حصل فعلا يوم الثلاثاء أتفقت على أربعين لوحه و رحت وزعتهم يوم الاربع و اتفقت على أربعين كمان و رحت وزعتهم الخميس الصبح و من الساعه 10 صباحاً لحد الساعه أتنين ميعاد المحاضرة بقيت أستقبل طلبات لعمل اللوحه و كنت عامل حسابى و واخد موبايل "جو" و شيكو واخد موبايل سفسوفه وكل ما أرن لشيكو يعمل لوحه و جه علُى ميعاد المحاضرة و وزعنا اللوح.

كان الشغل فى الموضوع ده متقسم تقريباً عليا انا و شيكو و كام عمليه كده عملها الناس اللى ساكنه معانا ... كان مجهود جبار إنى أفضل فى الكليه طول اليوم و شيكو يفضل يعمل لوحات ... بس الناتج كان يستحق.... 100 لوحه أتباعوا فى ثلاثه أيام بصافى ربح حوالى سبعميه و خمسين بعد خصم تمن اللوح و الأقلام "كنا بنجبها مدعمه من الكليه " ... انا و شيكو عملنا إحتفال بالمناسبه دى و عزمنا شله مصر كلها و كام واحد من صحابنا السكندريين و جبنا من بيتزا هت 3 بيتزا سيسيليان الكبيره دى و ربع وقيه حشيش "انا والله بطلت بعد كده " و أجرنا فيلمين فيلم لجيم كارى و أتحدى إن حد فى اللى كانوا قاعدين يفتكرة أصلاً و فيلم الكيف ... بتاع الكيمى كيمى كا ... محمود عبد العزيز و يحيى الفخرانى و جميل راتب.

طبعاً الفيلم كان مؤثر جداً فى حالتنا دى .. فطلعنا أسامى على بعض من عين الشكروط لمزجانجى و الكرف ... و انا كان من نصيبى إنى أكون البهظ بيه ... تاجر اللوحات ... مصاص فلوس الطلبه.

كل الأسامى أتنست بما فيها بقلظ و فضل البهظ بيه كأسمى و لقبى ... بيه و بيبيع لوحات ... بس الدنيا شالت و حطت و العيال سافرت و أتجوزوا و انا سبت الهندسه و أشتغلت فى التنمية و بقيت أكتب فى بلوج تحت أسم البهظ بيه بس مش بببيع لوح خلاص انا ببيع سعاده :)

-----------

*البوست إهداء الى من سألتنى هذا السؤال قريباً جداً و وعدتها بالأجابه من خلال البلوج

31 Oct 2007

الثقوب السوداء

ماهو كان ممكن جداً أعمل حاجات كتير من اللى بشوفها بتتعمل ... كان ممكن جداً أخليها تنبهر بيا بشكل غير عادى ... أكلمها مثلاً عن مغامراتى فى الكليه و إزاى غيرت بشقاوتى لائحه النظام الاساسى للكليه ... و لا عن أبحاثى فى تطوير التعليم أو الشغل فى المجتمع المدنى و شله المخدرات بتاعه أعدادى و اللى معظمهم فى أمريكا دلوقتى... ممكن جداً أكلمها عن السفريات اللى طلعتها سواء بولندا و لا تركيا و الناس اللى شفتها و اللى رغم ثرائهم و إستعدادهم لإقامه أشد العلاقات خصوصيه بين البنى أدمين معرفوش يأسرونى و يشدونى لحياتهم زيها...كتير قوى يتمنوا حياه فى نص الثراء الى فيه حياتى .. و ده مش غرور انا اتمنى حياه ناس تانيه برضه ... بس الواقع إن حياتى ثريه بمعنى الكلمه واحد عايش فى إسكندريه بعيد عن أهله بيشتغل فى حاجه كده فى النص مابين العمل الاهلى و الفن و يعرف بشر الله ... مشهور نوعاً ما فى العديد من المجتمعات و يعرف نص البنات الاجانب للى فى أسكندريه - و اللى رغم حلاوتهم مالقيتش عندهم نفس التفاصيل الصغيرة اللى فى تدويره و شها و لا فى صوتها الشقى و هى بترد على التليفون- بيشتغل فى مجال جديد مبهم و صعب الادراك ... بدون مبالغه شخصيه ظريفه و ذات حضور و بتعرف تتفاعل مع الناس و تعبر عن نفسها ... ياترى أيه اللى ناقص شخصيه زى دى علشان يعرف يعلق البنت اللى هو مشدود ليها..!!؟

القضيه مش إنت بتعمل أيه و لاتعرف إيه ... القضيه هى بتبيعه إزاى ... منطق السوق و الماركتينج اللى مسيطر على كل حاجه فى حياتنا و اللى انت ذات نفسك بتستخدمه بمهارة فى إقناع واحد إنه يفتح بلوج و لا ينضم لقضيه إنت مؤمن بيها... إزاى تبيع لوحه الرسم للطلبه فى الكليه ... القضيه إنك تخللى الزبون دايما محتاجلك و عايز منًك اكتر " الطفل اللى بيلعب فيديو جيم .. أول ما يخلص لعبه يزهق على طول و يبطل يلعبها و كذلك الناس لما تعرف اللى جواك ببساطه هتبطل تشتريك ... السر إنك تعمل فيها غامض ... ثقب أسود

ياترى أيه سر جمال الثقوب السوداء... لو إن البشر يعرفوا يتحدوا الجاذبيه الشدبده على أطراف الثقوب السوداء و يقدروا يخشوا جواها و يطلعوا ... كانوا هيبطلوا يهتموا بيها و لكن لأن مفيش قوه على الارض تعرف تروح و تقول فى أيه بعد الثقوب السوداء هبفضل دايما العلماء بيحاولوا بعرفوا اللى جواها و يفضل الادباء بيحاولوا يتخيلوا ايه اللى بعديها... أصل فضول العلماء عامل زى فضول البنوته الصغيره أم ضفاير ... تموت فى الشاب اللى يتجاهلها و تفضل تديله فى إشارات و طول ماهو غامض بالنسبالها أو تقيل فى ترجمات أخرى تفضل هى مشدوده ليه .. ياترى بيفكر فيا ؟ ... طب و رأيه عنُى أيه ...؟ هو قال إنه عاجبه ابتسامتى .. يكونش معجب بيا... لا مستحيل دة كبير أوى .. بس و تفضل تهرى هيا فى نفسها و لما توصل لإجابه تزهق على طول و هو ده الفرق بين النضج و المراهقه

الناضج شخص حاسس بقيمه نفسه و خلاص وصل لمرحله إنه مش محتاج يعمل العاب ... هو بالعكس هادى و بيعبر عن مشاعرة بصراحه .. وده مقبول بين الناضجين ... لأنهم زهقوا من الألعاب.. بس المراهقين بيشوفوا ده ممل ... مش جديد و مبهر ... رغم إن له متعه خاصه

مش عارف بصراحه ... ماهو انا لو عارف كنت عملت شويه مقالب عبيطه ... كنت إتعاملت معاها كأنها زبون أو متدرب تحت إيدى ... كنت هجتذبها و انا واثق من ده و بسهوله ... و لكن لأنى فضلت اتصرف بشكل تقدر تقول عليه نقى و مقبلتش بمنطق السوق و فضلت أكون صريح مع نفسى مشاعرى شويه ... فحصل إنى فقدت البريق اللى فى عنيها... يظهر إن التعامل النقى مش كفايه.

لذا فوداعاً لبهظ بسيط ... منفتح ....و نقى

و ليبدأ عصر الثقوب السوداء

26 Oct 2007

بوكية ورد


يتناول بكل رقه بضعة أزهار بيضاء من كومه الزهور أمامه... الزهور البيضاء هى قلب البوكيه... ينظر لهم ملياً.. أحداهم منغلقه البتول .. يسحبها بكل رقه .. كطفله لازالت صغيره تحتاج الى رعايه و يضعها وسط الكومه و يسحب غيرها... ينظر مرة أخرى بتمعن... اللون الابيض لون نقى و حساس ... أقل الشوائب تفسده ليكس كالرمادى يتحمل لون التراب و لا كالأحمر الذى تبدو الذرات السوداء جزئاً من تكوين سطحه.... اللون الأبيض هو لون أبتسامتها بطعم الفانيليا ... لكم أحب أبتسامتها خاصة عندما أهدته ساعه بكاتينه فى أول علاقتهما كيلا ينسى موعدها قط... لم يتأخر فى حياته عليها ... إلا مرة واحده

يبدا فى رص أعواد الياسمين حول الورد الأبيض ... هاكذا أكتمل القلب ... قلب البوكية ...أمامه مجموعة مختلفه من الورود.. ماهو أحمر و بنفسجى وردى ..اصفر ... بدون تردد يتجه الى الورود الورديه... لون خدودها ... تؤلمه جداً الورود الورديه عند رصها ... أشواكها رفيعه و علية أن يظل قابضاً عليها حتى لا تفسد الربطه... كان يقبض على يديها عندما يعبران الطريق.. كان أختلاس هذه الضمه الصغيره على كفوفها الرقيقه بمثابه حلم سرعان ما يزول ... عبور الى الجنه لثوانى قليله... كانت أحياناً تترك يديها بين كفيةساكنه فى أستسلام .. أدمن تقبيل يديها و لم تتوقف خدودها مرة عن الأحمرار ... بتفس اللون الوردى

لسبب ما يضغط عليه لابد أن يكمل البوكيه بورود حمراء... يرهب الورود الحمراء دوماً ... ترتعش يدياه و هى تمتد الى الورود الحمراء... لقد زاد محيط البوكيه و زادت كمية الورود الحمراء المطلوبه.... للمحبين تمثل الورود الحمراء معانى الأشتياق و الرغبة... هو يشتاق اليها بشدة و يرغبها بشراهه... ها هو يتناول أول ورده... تتسرب من جفونه دمعه ... سريعه ... تسقط على البوكية ...يتناول ورده أخرى و تسقط دمعه ثانية أكبر و أكثف .... يستنجد بالاله... تستشيط ذكريات ذلك اليوم و تعصف بذاكرته كلما أمسك اللون الاحمر ... هذا اليوم الذى تأخر فيه عليها لأول و أخر مره ... ظالم هو هذا العالم... كان عيد ميلادها و قد قرر أن يعد لها بوكية مخصوص.. أحمر اللون .. ليشعرها بأشتياقه... أضطرته الظروف للتاخر و أستجاب لطلب و الثانى ... و تأخر عليها ....و عندما وصل لم تكن هناك ...لم تكن فى عالمنا أصلاً... كانت راحله .. أثر حادثه... لم يكن ليتحمل الذنب.. لكنه فضل أن يؤنب نفسه ليل نهار ...و ظل العالم يتأمر ليذكرة بها ... تتأمر الأشياء لترسم صورتها فى الشجر فى الأكواب و فى الورود... تتساقط دمعه أخرى من عيني هو هو يضع أخر ورده فى البوكية ... يحضر السلوفان و المقص ... يحيط البوكيه بالسلوفان كما الكفن ... تكاد عيناه تنفجران من الأحمرار... و هو يحكم الشريط الحريرى حول الربطه و يناولها للواقف أمامه

يتناول العميل البوكيه و يشكره منبهرأ بجمال البوكيه... لقد تعود على هذه النظرة... الانبهار ... سر البراءه ... يعتبره الناس عبقرى رص الورود فى مصر ... يدرك انه يائس ... و لا يلتفت اليهم
يدخل زبون أخر ..ممكن لو سمحت يا فنان بوكيه علشان عيد ميلاد مراتى أنهارده ... ياريت تتوصى باللون الاحمر ... الهى يارب تكون ليله حمراء

22 Oct 2007

سعيد...!!؟


فى ناس كتير قضيت عمرها كلٌه و عمرها ما حست بالانبساط ، كانت دايماً قلقانه ... خايفه بتفكر و تعمل الف حساب، فى حين إنها و الله ما مستاهله ... انا قلت بقى اساعدهم بشويه تمرينات بتعمل دماغ ... بس دماغ سعاده فى الحلال يا معلم
------------------------------
دماغ رقم واحد
درب نفسك على الأبتسام ... فاكر إعلانات كلوس أب ... أيوه هى دى... الابتسامه أم سنان قدمانيتان زى الارانب... الابتسامه بتيجى بتخللى حاجات حلوه تحصلك ، بص معايا على المعادله دى

حاجه حلوه = سعاده نفسيه = أبتسامه
يبقى أكيد لو عكسنا المعادله وحسب قوانين الرياضه يبقى
أبتسامه = سعاده نفسيه = حاجه حلوه

يبقى أضحك و انت هتلاقى حاجات حلوة بتحصلك، و لو مش مصدقنى أضحك برضه مش هتخسر حاجه
------------------------------
دماغ رقم أتنين
إتجنن عشر دقايق كل يوم... بمعنى أعمل حاجه مجنونه كل يوم لمده عشر دقايق حاجه متخجلش منها و متتصورش نفسك بتعملها، إمشى مثلا على البحر حافى ... جمع مجات نسكافيه ... أستحمى بميه ساقعه فى عز الشتا و انت بتغنى

الحاجات المجنونه دى هتخليك تكسر روتينك اليومى و ترفريشك كده زى الديسك توب بتاعت الويندوز ... بعد الكليك اليمين تلاقى الويندوز عمل كده زى الكلاب و هى طالعه من الميه . بررررره رفريش.

على الأقل هتلاقى حاجه تحكيها من وقت لأخر بدل مانت عايش فى حكايات غيرك
-------------------------------
دماغ رقم تلاته
إدهش نفسك من وقت للتانى... و دى سهله كيك... حضر شويه مفاجات لنفسك هبله و إندهش لما تيجى... مثلا إشترى بوكيه ورد و إدى العنوان لبتاع الورد و أقوله جيبه فى أى يوم من الاسبوع اللى جاى براحتك علشان انا عايز أندهش... هتقعد تخمن و بعد كده هتنسى فلما يجى البوكيه هتندهش

لما تخش مطعم خللى فى ساندويتش أو طبق على حسب مزاج الشيف و متخليهوش يقولك عليه ... انا و بدرى عملناها مره فى حلوان و بدرى بعد كده بقى يعملها على طول ... فى حاجه تانيه بعملها بما إننى تربيه قهاوى ... كل شويه كده أخللى اللى بينزل الطلبات هو اللى يختارلى اللى هشربه و بمزاجه و يجيبهوللى و اشربه و اندهش ... حتى لو شاى

الاندهاش ده أصله إحساس طفولى جداً مرتبط بالحاجه الجديده ... فالاطفال بيشوفوا كل حاجه جديده بس الكبار مش كده... علشان كده بقولك بص لكل حاجه كأنك أول مره تشوفها و هوب أندهش.
------------------------------
دماغ رقم أربعه
تأمر من أجل إسعاد حد تعرفه... ياسلام لو بتحبه.... انا عارف ان فى دماغ عندنا فى الشر و المؤامرات متتوصاش... وجه قدراتك التأمريه علشان تسعد حد بتحبه أو عزيز عليك ... حطه فى دماغك و أفضل نخور ورا الحاجات اللى بتخليه مبسوط أعملهاله... و لو لقيت حاجه بتسعد بنى أدم ايا كان أعملهاله ... دى صدقه روحك اللى هتطهرها

و رغم أن مهمتك الاساسيه ف ى الدماغ دى هى إسعاد الاخرين إلا ان ده هيخليك انت كمان تنبسط... هتلاقى نفسك كده مش انانى و رزل ...لأ عبيط و مبسوط و كمان الناس بتحبك

مثلا انا بابا بيحب اللى يوفر علشانه ... أقوم انا مثلا عايز ميه جنيه أطلب ميه و خمسين و لما اجيب اللى عايزه ... أقوم راجعله و أقوله ... بابا بابا... انا وفرت خمسين جنيه علشانك.... ينبسط ... ساعات كتير يبقى مش فارق معاه يقوم يقوللى حلال عليك.
------------------------------
دماغ رقم خمسه
حط فى دماغك ان اللى حصل حصل يلا بقى نستمتع بيه.. أسمع دى و صلٌى عللى يشفع فيك*

بابا يا سيدى كان متضايق قوى من أختى و جوزها قبل الدخله علشان طلبوا فلوس كتير علشان جهازها و هو ياعينى الفلوس كانت على القد بالضبط فجهزها و قعد على الحديده... و بقى خلاص مش طايقهم و أفتعل خناقات كتير معاهم من غير سبب واضح ... لحد يوم الدخله عملنا الفرح و الناس جت و مشيت و هو قافش و ماسك العكاز مالوش دعوة بالبشر... جبت تاكسى علشان نروح ورا الزفه للبيت ... وصلنا و بابا طلع يشوف بيتها لأول مره ... على السلم قلتله بابا خلاص اللى حصل حصل و اللى اندفع اندفع ... انبسط بقى و عيش اللحظه ... ابويا أساسا راجل مسخرة ... فلما طلعنا فوق و دخلنا أوضه الصالون و العريس و ابو العريس و ام العريس و كده قاعديين بابا بيحط ايده على الارض و بيحسس على السجاده.

مش هى دى السجاده أم الفين و سبعمايه يا هبه .. و الله فخمه .. لا تستاهل ... قومى يالا فرجينى أوضه النوم ... يخش يقعد على السرير ... و يهز .... لا جامد يستحمل يا حماده و يكلمنى .. خلاص يا بابا مالوش داعى ... طيب المهم خرجنا و احنا خارجين بص لأختى و لجوزها و قالها ... بقولك ايه تسمعى كلام جوزك و أوعاكى تزعليه ... و قام بص لجوزها كده بصه من فوق لتحت قال يعنى هيخوفه و يقوله نصيحه ... و سكت شويه علشان يكتسب كلامه أهمي زائقه ... و قاله و انت ابقى طاوعها

بس كده يا سيدى أعمل دماغ براحتك على رواقه.



LOVE IS IN THE AIR - More free videos are here
-----------------------
*رب السما و الأرض شايفك يا قليل الذكر على رأى مجاذيب أبو العباس

16 Oct 2007

كائنات درجه تالته تتغذى على البن




من الغرور يمكن أو الأنشغال الواحد مبقاش يقرا بلوجات جديده ... بقيت أكتفى بتصفح بعض و ليس كل البلوجات اللى عندى على السايدبار... لكن من يومين كده أقتحم حياتى
بلوج جديد و كاتبه أكثر من رائعه لسه عمله البلوج يادوبك من شهرين ... رجعتلى أحساس كنت فقدته ... من كتر الكتابات السيئه اللى الواحد بقى يشوفها فى حتت كتير ... و مش معنى كده ان انا كاتب رائع و لا حاجه ... بس فعلا فى حاجات بشوفها مالهاش لازمه تتقرى ... يكمن ده اللى جاب لى زهق من البلوجات ... لكن ساره ليها أسلوب كده يفكرك بالبلوجات القديمه و نوستالجيا الكتابات المعجونه بالذاتيه الشديده اللى تخليك تحس من أول لحظه جمال شخصيه الكاتب ... و هى تقدر تعتبر ده غزل لو حبت ... بس انا حبيت هنا أوثق لحظه معرفتى بشخص فقط من خلال كتاباته من قبل ما أقابله يمكن بعد كده نبقى أصحاب و يمكن لأ... المهم هحاول فى السطور اللى جايه أديكم لمحه من البلوج

أول حاجه تشد أنتباك فى البلوج هو الصور ... هى واخده الصور بعدستها مش جايباها من حته تانيه ... بس الغريب أن الصور معظمها مهزوزه ... بس لما تكمل قرايه تلاقى بوست "
معرفش ليه " و اللى سارة بتتكلم فيه عن التصوير عن الحيره اللى جواها لما بتصور و ده اللى بيخللى الصور مهزوزه


الشيء الحزين في التصوير إنه بيعزلك تماما أي جمال نفسك تشوفه في الحقيقة ؛ يعني مرة كنت بتفرج على راجل بيصطاد سمك على البلوكات ، كنت مستمتعة جدا و انا بتفرَّج عليه ، لكن في نفس الوقت نفسي أصوَّره. لما بّبُص ف الكاميرا مش بشوف نفس الجمال خالص...الحيرة بقى . أصوَّره ، و لاّ أتفرَّج عليه (غالبا بعد الصورة ما بتتلَقَط ، حتى لو من غير فلاش , اللى بيتصَوَّروا بياخدوا بالهم مش عارفة ازاي)...فوصلت لمرحلة مع نفسي ، بعنف كدة بقولها : "يا تبصي بعدسة الكاميرا يا تبصي بعينيكِ؟؟

انا شايف سارة كاتبه عفويه و تلقائيه و أراهن أنها مبتراجعش البوستات بتاعتها قبل ما تنشرها على البلوج... هى بتكتب كده و ده يمكن سر جمال كتاباتها هديلك مثل تانى فى بوست بلوفر موهير و حته سيراميك هى بتوصف سعر برطمان النسكافيه بأنه بخمسه جنيه و خمسين قرش كده :5.50 قرش" مع إنه لما تكتب رقم زى ده التعريف يبقى للجنيه يعنى المفروض يتكتب "5.50 جنيه بس ساره فضلت انها تكتب زى ما بتحكى أو بتتكلم

عايز بقى تقرا بجد حاجه رائعه أدخل أقرا عند سارة أزاى الست بتطبخ فى بوست
أندهى للبواب اللى خلانى أشتاق لمامتى بجد ... هو بوست عائلى جداً ...مامتها كاتبلها فى الكومنتات و أصحابها ...و المؤثر جداً احساس الست بالمطبخ حتى لو بتعمل بيض أومليت

إبشري البصلة و ادعكيها بالملح و الفلفل قبل ما تَسقطيها ف الشربة ... ماتحطيهاش صحيحة ، عشان طعمها يبقى أحلى
الأمومة تبدأ من المطبخ . مع أول ريحة طبيخ تطلع من المطبخ و أنا واقفة فيه ، مع أول معلقة شوربة دقتها عشان أشوف ملحها أد ايه ، مع أول لسعة على إيدي ... عرفت إن هوه دة سحر الأمومة بجد ، إني أدوِّب لأهلي حبي ليهم ف الأكل ، و أأكلهلهم بالمعلقة

اسلوب سارة فيه أسترسال فظيع فجأه تلاقى نفسك داخل من بوست على التانى و من غير متحس بتفتخ الكومنتات و عايز تكتب لها " أنت مجنونه... كفايه بقى ... حرام عليكى هموت من الضحك"

مش مصدقنى أقرا ليها بوست
خسارة و على ضمانتى.

صحيح... كائنات درجة تالتة ، متعددة الوظائف ، ضعيفة الذاكرة ، تسكن الخرصان ، و تتغذَى على البُن

26 Sept 2007

و ماذا بعد

ماذا سيحدث للمصريين بعد الثورة ، هذا إذا قامت الثورة لا سمح الله، فى وجود التيارات المختلفه ، العلمانيه و المسيحية ... اليمينيه و اليساريه ... الألحاديه و الأسلاميه، فى ظل غياب القاهر الأعظم ... و تساوى السلطات و القوى... أظنها حرباً أهليه بالتأكيد ... إلا إذا... و ليعذرنى القارئ إذا ما تسارعت أو تباطئت دقات مقالى ، فعلا إن الأفكار تعصف بذهنى.

فى مقال " لماذا لا يثور المصريين" المنشور بجريدة الدستور لهويدا طه، تقول أن هناك ثلاثه أسباب تقف وراء إحجام المصريين عن القيام بثورة ضد النظام الحاكم رغم ما فيه من عيوب نعلمها جميعاً.

غياب القائد ؛ و هو الشخصيه الكاريزما التى تتحرك الجموع على أثرها و تقود البلاد الى ثورة و حاله أنتعاش

غياب النخبه ؛ و التى تتبع القائد و تواصل معه مسيرة البناء

غياب فلسفه للثورة، فلا يوجد حتى الأن مشروع واحد متوازن لما بعد الثورة و ما الذى يجب أن تقوم هذه الثورة بتحقيقه ، بمعنى لا توجد حتى الأن رؤيه للبلاد بعد الثورة ، فالنخبه الحاليه هى نخبه مثقفه متذمرة و غير بناءه و فى رأيى هو قول صحيح مائه بالمئه.

و لأن هذا المكان هو مقر للبهجه ، دعونى أحلم بما بعد الثورة، نوع من الخيال العلمى ، أو الخيال الأجتماعى من الممكن حدوثه إذا رأيت عزيزى القارئ أنه ذو منطق و حيثيه.

--------------------------

نظام تعليم مصرى مئه بالمئه

ليس معنى أن مصر دوله من العالم الثالث أنها لا تستطيع بناء نظام تعليم قوى ، بل جبار يتنافس اغنياء العالم للألتحاق به. و لكن ما ينقصنا هو الطرح الواقعى لذلك، و قد رأيت فيما يرى النائم ياقظاً مصرنا و هى تمتلك نظام تعليم من مرحلتين أساسيتان الأبتدائى و الثانوى و مرحله أختياريه أخرى هى مرحلة الجامعة.

فى المرحلة الأبتدائيه يتعلم الأطفال عن طريق الألعاب و الأنشطه الحركيه المهارات و العادات و القيم الأصيله التى تربى الأنسان على : أحترام حقوق الانسان و البيئه و إحترام الأخر و التسامح ... و للعلم لقد تطورت المناهج التربويه فى هذا المجال بالفعل كثيراً و لا نحتاج إلا أن نوجه فعلاً جزءاً كبيرا من ميزانية البلاد الى التعليم و لكن مردود ذلك على المستقبل كبير للغاية.

فى المرحله الثانويه و هى الست سنوات بعد الابتدائى، هى مرحله يتم فيها منح الطالب حق أختيار المواد التى يريدها فإننا إذا إحترمنا رغبات النشئ فى التعليم سنجدهم هم الأخرين مهتمين بالتعليم ، و دعنى أسألك يا قارئى العزيز الم ترى كثيراً من الطلبه المستهترين فى جميع الحصص ماعدا الرياضيات على سبيل المثال أو الفيزياء أو حتى الألعاب، تحليل هذا أنه إذا درس المرء ما يحبه فإنه يحترم الحصه و المدرس و الماده و يعطيها كل جهده ، لى ثقه بأن معظم الطلبه "الفهلويه" هم طاقات مهدرة لأنه لم يتم إستغلالها فيما تحبه.

أرى نظام الثانوى هذا مقسم الى أربع مجموعات من المواد

مجموعه المواد الأساسيه؛ و التى يدرسها الطالب بمعدل ثابت لا دخل له فى أختيار توقيتاتها و لا المنهج المقدم بها ، و هى اللغه العربيه و الدين و اللغه الأجنبيه الأولى و تربيه رياضيه و تربيه أخلاقيه " و هى مزيج من سلوكيات و تربيه سياسيه و وطنيه و تاريخ مصر و تربيه جنسيه" و تكون بمعدل ساعتين صباحيا لمده خمس أيام أسبوعيا طوال الست سنوات و المنهج يقوم على الأبحاث و ورش العمل و الالعاب التعليميه و هى مواد نجاح و سقوط.

ifمجموعه المواد الأختياريه، و هى المواد المؤهله الى الجامعه و تختلف عن المواد الأساسيه فى أنها أكثر تخصصاً و يختار الطالب ما يدرسه فى أول كل عام عن طريق التسجيل، و هى فى خمس مسارات كل مسار له ثلاث فصول دراسيه أجباريه حتى يحوز على شهاده أتمام الدراسه الثانويه و عدد لا نهائى من الفصول المترتبه أو غير المترتبه على الفصول الأجباريه و تترك كليا للطالب لكى يختار ما يرغب فى دراسته، و الحافز هو دخول الجامعه ، و التى سناتى لشرحها فيمل بعد و لكنها لا تقوم على السباق الجنونى للمجاميع الحاصل حالياً و لكنها تعتمد على كم المواد التى درستها و مدى إتقانك لها. وهذه المسارات هى

مسار العلوم تبدأ إجبارياً بثلاث فصول كمقدمات للفيزياء و الكيمياء و الاحياء و يكمل فيها الطالب دراسته بناءاً على ما يرغب من مناهج متوفره فى الكيمياء و الأحياء و الفيزياء و التى لها علاقات بالدراسه فى الجامعه، و يقوم بتحديدها أساتذه الجامعه حيث تستطيع كل جامعه إشهار منهج متخصص فى جزء ما و تدرب المدرسيين عليه و من ثم يتم تطبيقه فى المدارس.

مسار اللغات و يدرس فيها الطالب لغه أجنبيه ثانيه لمده ثلاث فصول و إذا رغب يستطيع أن يستكمل الدراسه فى هذاالمسار بتوسع فى هذه اللغه أو أى لغه أخرى يريدها بما فى ذلك العربيه أو الأجنبية الأولى.

مسار الرياضيات و يدرس الطالب مقدمات الجبر و حساب المثلثات و الهندسه و إذا رغب أن يستكمل يستطيع دراسه الأحصاء و الميكانيكا و ما شاء أن يدرسه من تخصصات الهندسه.

مسار الأداب و فيه يدرس إجبارياً علم الأجتماع و التاريخ و الجغرافيا و يستكمل الدراسه بالمسار فى تخصصات العلوم الادبيه و الصحافه و الادب و علم النفسو فى هذا المسار يستطيع الطالب أيضا دراسه المواد الدينيه الأسلاميه أو المسيحيه أو كلاهما بتوسع "كما هى المناهج فى التعليم الازهرى" و تصبح هذه المناهج هى المؤهله الى جامعه الأزهر.

مسار العلوم الحديثه ، و التى يدرس إجبارياً فيها مقدمات الحاسب الالى و و أصول البحث العلمى و مقدمه فى علوم الادارة ... و يستكمل الدراسه فى تخصصات الأداره و الحاسب الألى.

مجموعه المجالات ؛ ووهى المعادل للدراسه فى المدارس الحرفيه، حيث يدرس الطالب الحرفه التى يريدها، و عليه إتقان حرغه ما خلال ثلاث فصول دراسيه و الخروج بمنتج نهائى فى نهايه كل فصل دراسى.

مجموعه الأنديه، و هى أنديه "كنادى الصحافه و الطاقه الشمسيه و العلوم و اليراضيات و خلافه" و يقوم فيها الطلاب بالتعاون مع مؤسسات المجتمع المدنى بعمل مشاريع تنمويه و مجتمعيه، لها تأثير فى المجتمع فى مجال النادى ÷‘ على سبيل المثال دليل للمدينه ، مجله ، موقع اليكترونى ، ورش عمل ، و هذه الانديه هى متروكه لأبداع المديريين و طاقم التدريس و على حجمها و أثرها يتم تقييم أدائهم.

نظام الاداره فى المدارس سيعتمد على اللامركزيه مع إتاحه المشروعات المشتركه على مستوى المحافظات و المستوى القومى أو حتى الدولى و ستتركز مهمه الوزاره على وضع العايير و الرقابه على أداء المدارس العامه منها و الخاصه طبقا للشروط و نشرها فى دليل قومى لأحسن المدارس أدائاً و كفائه ، و توفير التدريب للمدرسيين و عمل مشروعات أستثماريه خاصه بالوزاره تعمل على تمويل الوزاره بجانب مخصصات الحكومه.

المرحله الثالثه هى المرحله الجامعيه، و بكل بساطه ستكون الجامعات الحكوميه و الخاصه بمصاريف و عاليه الثمن مع توفير منح للطلبه المتفوقيين للألتحاق بالجامعه مجاناً أو بنصف التكلفه و كذا توفير قروض بنكيه للطلاب بتمويل من الحكومه ، و هذا لأن أفه مجتمعنا هى " أبو بلاش كتر منًه" فالطلبه لأنها لا تدفع شيئا لا تتحمل المسئوليه تجاه ما يقدم لها من خدمه تعليميه، و يتم الأستثمار فى التعليم فعلى أى جامعه أجنبيه تفتح أبوابها فى مصر أن تقدم منح مجانية بنسبه 15 فى المئه للطلاب المصريين، و لكن ما يهمنا هو كيفيه الحكم على أحقيه الطالب فى الحصول على منحه.

هذا سيتم من خلال نظام التقييم فى المرحله الثانويه فكل كليه عليها أن تنشر و بفتره كافيه قبل بدايه العام الدراسى متطلباتها من طلبه ثانوى فى المواد الأختياريه ، و يتم تقديم ملف الطلاب المصريين الى الكليات عباره عن ما يشبه السيره الذاتيه تحتوى على المحتوع العلمى الذى درسه و درجاته فيه و كذا المشروعات التى أشترك بها و قدمها للمجتمع و الوظائف التى إلتحق بها و الأهم مشروع تخرج الطالب من المدرسه و الذى يقوم بعمله تحت إشراف أحد مدرسينه فى المدرسه الثانوى مدى ترابطه بالدراسه الجامعيه التى يرغب فى دراستها، و بهذا لا يصبح المعيار هو كم الدرجات التى حصل الطالب عليها بل مدى مشاركته و أهتمامه بالمواد و الدراسه و أستعداده العملى للإستفاده من الدراسه الجامعيه و من ثم مدى إستحقاقه للمنحه، و إذا لم يأخذ الطالب منحه فالفرصه أمامه لأن يدرس بأمواله أو أموال أبيه إذا أستكمل الحد الأدنى من المواد المؤهله للكليه فى المرحله الثانوى.

-----------------------------

أعتقد أنك أيها القارئ تعبت من القرائه، و لكن لازال فى مشروع تطوير الوطن الكثير ... فجعبتى بها مشروع قومى إقتصادى و إجتماعى و دينى و تشريعى ...ز يووووه بلاوى

أراك على خير فى المقال القادم.

19 Sept 2007

على كورنيش أسكندريه

أمبارح كنت فى القهوه و معجبتنيش، معرفش ليه مجاليش أحساس أن لازم أقعد فيها ، كتير من صحابى سافروا بره و فى رمضان ده القهوه فاضيه، بس ياترى هروح البيت ليه بدرى... و مفيش تلفزيون ، الكمبيوتر بايظ ، قررت أنى أتمشى شويه على البحر لوحدى.

البدايه من المنشيه حيث القهوه و الأتجاه شرقا الى مدى لا يعلمه الا الله مش عارف هوصل مشى و لا هقف فين علشان أركب المهم حاليا ان انا أبتديت المشى ، انا فى عادتى لما اتمشى لوحدى أغرق فى أحلام اليقظه , و المرة ده الحلم كان متوهج.

انا هقدم على طلب للبنك يمول مشروعى الجديد ... يرد علًى مشروع ايه المرة دى!!!؟... انا هفتح فى الصحرا الغربيه محطه توليد طاقه كهربائيه من الطاقه الشمسيه .... يا سلام !!!... شايف محطه الرمل منوره أزاى ... و بعدين يا سيدى أبيع الطاقه دى للحكومه و هى هتشترى الطاقه و كمان توفر أنبعاث فتبيعه حسب معاهده كيوتو ... و انا بقى أكسب فلوس... انت شايف ان اللى بتقولله واقعى ... و انت حد قاللك اسمع ... طب أعمل أيه اذا كنت انا انت و انت انا.... خلاص بقى يا تبنى معايا على الحلم يا تخرص خالص... ماشى يا سيدى.

أه يا رجلى ... الجزمه ديقه قوى كده ليه

انا اصلا نفسى أعمل المحطه دى يابنى كمقدمه لمركز أبحاث طاقه شمسيه... هركز على تكنولوجيا تعبيه الطاقه فى بطاريات و تحويل العربيات اللى شغاله بالينزين انها تشتغل بالبطاريات دى.

حلوه قوى البنت دى ... هو انا فين .. اه دى مكتبه الاسكندريه ... رجلى هتموتنى

بس ده صعب قوى انت كده لازم تغير المواتير و تحط بدالها مواتير جديده علشان تشتغل بالكهربا ... أيوه كده انا احبك و انت بتبنى على الفكرة بدل ماتهدلى امها .. و ماله نحط المواتير الجديده و نخليها شبه المواتير القديمه و بتتوصل بنفس الكيفيه و نخللى دواسه البنزين بتوصل على مكثفات فتدى تيار أعلى و كده اللى سايق حاسس بالتحكم.

بص بقى انت لازم تشوفلك حل فى الجزمه احنا فى الشاطبى و الموضوع بقى أزمه.. ياعم لا أزمه و لا حاجه انا هقلع الجزمه و خلاص هنكمل مشى.... يأخى كأن الجزمه دى كانت واقفه فى زورى ... سجن بينى و بين التفكير ... هو مبدئيا انا تفكيرى أشتت فى ان انا دلوقتى حاضن أسكندريه و لامسها .. حاسسها بتترج رجه خفيفه على صدرى بعد نوبه أغتصاب حاده الفترة اللى فاتت.. الله اد ايه البحر كان جميل الليله دى ... حلوه قوى البنت دى ... شكلها كده 16 او 17 سنه ... علشان تشوفوها معايا هى لابسه بنطلون جينز محزق قوى و من فوق بتاع كده شبه الفساتين هو عامل زى فساتين شاكيرا طويل من ناحية و قصير من الناحية التانيه و مالوش كمام بس هى معوضه ده ببدى لونه بيج قال كأنه لون الجلد .. و ماسكه ايس كريم و عماله تقرب منًى و بتبصللى و انا ببصلها ... طز فى العيله اللى معاها.... لحد ما جينا جنب بعض... قرب منى و كأنها خلاص هتلمسنى و همست و قالتلى ... يأهبل

هنا أكتشفت أن انا ماسك الجزمه فى أيدى و ماشى على الرصيف ، قعدت أضحك من كل قلبى و خاصه أن انا ابتديت أركز أن الناس فعلا بتبصللى نظره أستغراب ... بس طز... انا هرجع تانى للحلم

عارف لو عملنا موضوع العربيات ده احنا ممكن نبيع نحول كام عربيه ... ملايين ... و هنبيع كام بطاريه ... قول تقريبا البطاريه هتكلفنا أنتاج 2 جنيه و هنبيعها بعشرة و نحول العربيات مجانا للناس علشان يستعملوا البطاريات بتاعتنا... هعمل أعلان بقى مفتكس... هنجيب صوره بنت حلوه و بعد كده نشيلها و بعدين صوره شط و بعدين نشيله و بعد كده خلفيه بيضا و مع كل ده صوت أحنا بنعمل أعلان من غير بنات و من غير شط و حركات .. كلامنا على ميه بيضا... علشان احنا هنكلمك بالمنطق بص يا سيدى احنا عملنا بطاريه بتمشى العربيات بالطاقه الشمسيه و ده يخللى العربيات توفر فى أستهلاك الطاقه و متطلعش عادم ... يعنى تخيل كده القاهرة من غير دخان الشكمنات ... بس علشان نعمل كده أحنا محتاجين نغير موتور عربيتك ... هنعملك ده ببلاش و الموضوع ده مبياخدش ساعتين زمن تيجى تشرب فيهم شاى معانا و تسمع كام نكته و تتوكل على الله ... و لو انت ميكانيكى هات خمسين زبون و أحنا نديلك دورة مجانية عن صيانه العربيات اللى من النوع ده ... بص ياسيدى الفاضل انت هتوفر هتستفيد و تفيد البلد و العالم ..حد يكرة ... بهظ بيه .. صاحب الفكرة و صاحب الشركه.

ايه ده انا على كوبرى أستانلى ... طب لما أقعد أخد سيجارة... ياه قد ايه البحر مليان اسرار ... ياترى الحته الهاديه اللى قدامى دى تحتيها فيها ايه ... هوب جه فى بالى فيلم عمليه أنقاذ نيمو السمكه ... ضحكت و وقعت منٌى السيجارة فى البحر ... قررت أنٌى أكمل تمشيه.

عارف ياد يا انا الموضوع ده ممكن يجيب كام ... عارف لو بكسب فى البطاريه الواحده تمانية جنية ... العربيه ممكن تحتاج تستهلك بطاريه كل ميه كيلو ... انا هعوض اللى دفعته فى تحويل لعربيات فى ظرف سنه ونص مثلا و بعدين يبتدى المكسب ... دانا ممكن يبقى معايا قد ميزانية مصر كلها... أأه ساعتها هعمل اللى نفسى فيه ... بص انا اول خطوه ههروح لجمال مبارك ... ماهو ساعتها هيبقى الريس ... و انا بقى واحد من أهم رجال الاعمال ... هعرض عليه ان يبيع الليله... بص يا جيمى انت اقلبها ديمقراطيه و مالكش دعوه بيها و انا هشيلك ... انت لو قلبت ميزانية البلد هتطل بكام يعنى .. كلام فاضى ... بص يا سيدى انا هزبطك عندك شويه خطوات تعملها تبقى بطل قومى و التاريخ هيسبح بحمدك .. انك تبقى قلبت البلد ديمقراطيه و سبتها ... اول حاجه تخرج المعتقلين و دى تمنها 2 مليار... تدعو لتغيير الدستور 3 مليار ... (مجموعه المواد الخاصه بالحريات كل ماده بمليار) المهم تطبق نظام تعليم بجد و متقوليش مفيش حلول ... انتوا بس مكنتوش بتحاولوا تحلوا لأن أى حل نظيف يعتمد على أن الطالب يبقى عنده حس نقدى و ده كان ضد سياسه الدوله... المهم يا جيمى... تخللى شيخ الأزهر بالأنتخاب... تخللى منصب العمده بالأنتخاب.. المحافظ ... كل دى مناصب بالأنتخاب.

بص يا سيدى هتطلع من الليله دى باللى كنت هتطلع بيه من مصر طول حياتك ... هديلك 5 أضعاف ميزانية مصر بس سيبها بقى تفوق... انت اصلك مجربتش تركب ميكروباص من رمسيس الساعه 3 العصر ... و لا تطوق فى قطر لأن مفيش حجوزات ... و لا تطلع ورقه من السجل المدنى... الا قوللى انت معاك بطاقه .. طلعتها أزاى!!!؟

أشتريت شويه ترمس من راجل واقف فى لوران على البحر... قعدت أقزقز شويه و أشرب سيجاره و عديت عليا شحاته عجوزه مش عارف حد فيكم عارفها .. هى بتمشى بكرسى معوقين قدامها وة بتحط فيه ورد... أشتريت منها ورده و أديتها سبجارة و فلوس المواصلات اللى كان المفروض أركبها

تخيل كده لو معاك فلوس أد ميزانية مصر مرتين مثلا ... مبدئيا همول جمعية زى أيكو جرين اللى بتعمل تمويل للمشروعات اللى بتبدأ بس .. و هعمل كمان كماله لمشروع توشكى ... بفلوسى حد له دعوه ... هنعمل فرع للنيل يمشى لغايه منخفض القطاره فيعمل بحيرة القطاره و يكمل لمرسى مطروح.... و نعمل على ضفاف النيل الجديد عشر مدن كل واحده تشيل خمسة مليون ... ناخدهم بس من القاهرة و الاسكندريه فى الاول ... نصفصف القاهرة على 3 مليون ... و نعمل عمليه أعاده بناء ... نهد المقابر اللى قدام القاهرة القديمه و نعمل فيها أحياء نظيفه و ننقل فيها كل اللى ساكنين فى القاهرة القديمه و نعملها محمية تاريخيه ... و نخلص على العشوائيات و نعمل مواصلات بجد متحضرة و نهد التلت أدوار كبارى الل بنيناهم و نعمل مدينه منظمه و سهله و نظيفه.

و نعمل مسابقه فى الريف لأكتر قريه طبيعيه .. يعنى البنا بطريقه حسن فتحى و استخدام طاقه شمسيه و الخ ... و نجيب ليها سياحه بس بشروطنا ... مش بشروطهم ..سياحه للى عايز يفسى دماغه مش للى عايز دعارة و الخ.. واحد يروح الريف يصطاد فى الترعه و يسهر بليل على الراكيه يقرا كتاب .. بتاع ... ياكل مشلتت و عسل أسود

انا ريقى جرى .. هانت انا خلاص فى سيدى بشر .. خمس دقايق و أوصل البيت ...اااه .... مسمار مصدى ... رجلى ... تيفود ... أحلامى ... يالهوى ... حد قالك تمشى حافى ... صيدليه

يا أستاذ ده مجرد خدش ... بس متزعلش منى انت محتاج تغسل رجلك كويس

8 Jul 2007

يخرب بيت الجمال


How it all started:
I'd been living in London when my world turned upside down and I'd had to come home. By the time my plane landed back in Sydney, all I had left was a carry on bag full of clothes and a world of troubles. No one to welcome me back, no place to call home. I was a tourist in my hometown.
Standing there in the arrivals terminal, watching other passengers meeting their waiting friends and family, with open arms and smiling faces, hugging and laughing together, I wanted someone out there to be waiting for me. To be happy to see me. To smile at me. To hug me.
So I got some cardboard and a marker and made a sign. I found the busiest pedestrian intersection in the city and held that sign aloft, with the words "Free Hugs" on both sides.And for 15 minutes, people just stared right through me. The first person who stopped, tapped me on the shoulder and told me how her dog had just died that morning. How that morning had been the one year anniversary of her only daughter dying in a car accident. How what she needed now, when she felt most alone in the world, was a hug. I got down on one knee, we put our arms around each other and when we parted, she was smiling.
Everyone has problems and for sure mine haven't compared. But to see someone who was once frowning, smile even for a moment, is worth it every time.
----------------------
Song: Sickpuppies "All the Same "

24 Jun 2007

عناد

بصوا بقا... مانيش كاتب تانى الا لما تعلقوا على البوست اللى تحت الاول
-----------------------------------------------------------
تحديث
خلاص أفراج... هنكتب تانى ... بس شويه لأنى مكسل
----------------------------------------------------------
تحديث 2
بما أن الموضوع أتطرح... تعالوا نفكر كده .. أيه لازمه الكومنت اللى انت بتسيبه.... ياترى هو منتدى من نوعيه مشكور يا أستاذ... أكيد لأ .. و لو انا عايز كده .. كنت بكل بساطه رحت كتبت على عشرينات و لا مكتوب و لا حتى منتدى الحريف و الزعيم و أبو لولو... القصه و ما فيها أن لما بوست يبقى معدل قرائته من ميه و عشرين ل ميه و ستين و محدش يهون عليه يسيب كومنت ... فده بيدل على أيه يا ترى... هو الموضوع ماشدكش و لا الموضوع وحش و مكسوف تقول... انا عايزك لو الموضوع مش عاجبك تقوللى بجد... فيه موضوعات كتير انا كتبتها و ماكانتش عجبانى و علشان كده مستغربتش لما مجالهاش كومنتات... الا الموضوع اللى فات ده بالتحديد... لانه أولا محاوله لكسر جمود الفصحى و الكتابه بيها فى نفس الوقت... ثانيا ناس كتير شافوا الموضوع قبل نشره و عجبهم... طب أيه بقى القضيه... هو ميشجعش على التعليق و لا علشان هو بالفصحى

و أخر حاجه و بدون أنكار أو ادعاء للفذلكه ... أكيد أضايقت لما كتبت موضوع و ميجيش عليه كومنتات بكل بساطه , بذمتك انت نفسك مبتضايقش لما يحصل معاك ده

19 Jun 2007

010 - 011 هل من فارق

أهدانى أحد الأصدقاء خط تصالات هديه.. انا فى الاصل أملك خط فودافون و مع أنى ضد مبدأ الأسراف الأهبل؛ الا إنه لم يسعنى الا أن أقبل الهديه و أضعها فى حقيبه الفنانين التى أملكها

و فى ذات المرات كنت مسافراً و أردت الأتصال بصديق لىّ، و أكتشفت نفاذ رصيدى... قررت تجربه خط أتصالات لأول مره .. كنت أعلم أنهم يوفرون بعض الدقائق المجانيه... وضعت الشريحه و طلبت الرقم... أجابتنى سيده- تدعى أنها رساله مسجله- بأننى قد كسبت بعض الدقائق الاضافيه المجانيه

أكملت مكالمتى و أغلقت الخط و أعدته لمكمنه فى الحقيبه و ركبت خط فودافون مره أخرى، و كالمطر أنهالت علّى المكالمات ، هذا الذى يريد عملا ما أن يتم و تلك التى تبغى رداً فوريا على الرساله الألكترونيه التى أرستها و تلك الأخت الوحيده التى أملكها فى الدنيا و التى تملأ حياتى صداعاً تبغى مرافقتها الى زياره عائليه أخرى سخيفه كالعاده

أقتربت من الجنون ... يالهى لكم أكره تلك الأجهزه اللعينه... وصلت سالماً الى الجهه التى أقصدها و أتممت أعمالى ،و أردت أن اتمم مكالمه هاتفيه أخرى ، ذهبت الى بائع بطاقات الشحن ، و جدت عنده بطاقات أتصالات فقط من فئه العشرين جنيه... هنا ؛ أبتسم الشيطان الراقد فى
أعماقى...هئ هئ هئ

فعلاً قمت بشراء بطاقه شحن أتصالات و شحنت الهاتف و أتممت مكالماتى... و لم أقم بتغيير الشريحه مرة أخرى عن عمد

الحق أقول؛ لقد أعجبنى نظام شركه أتصالات فى أحتساب المكالمات و أردت فعالً التغيير اليه لولا صعوبه أخبار كل الذين أعرفهم بالرقم الجديد لهاتفى، هل أقوم بتجاهل كل هؤلاء و أبدأ حياه أخرى، لو يضعوا خاصيه تتيح لك أرسال رساله قصيره تخبر معارفك بأن هذا هو خطك الجديد... الشاهد أننى قررت ترك هذا الخط بعض الوقت فى هاتفى

أستمر الخط فى هاتفى ثلاثه أيام.. يالها من سعاده ... لا يستطيع كائن ما الوصول اليك، يالهى لكم أكره تلك الأجهزه اللعينه, حتما البشريه كانت أسعد بدون الهواتف المحموله

أحسست بنشاط عقلى و قدرة على التركيز أعلى من ذى قبل،،،يالهى لكم أكرة تلك الأجهزة اللعينه

وأنتهت السكرة و جائت الفكرة... مكالمه غاضبه من أهلى... أين أنت بالله عليك... تباً لك... لقد زلزلت أعصابنا و أستمرئت فكرنا بالخواطر المفزعه...الم تدرك بالله عليك أن جهازك مغلق...يالهى لكم أكره

تقديم أعذار... و لكم أكرة تلك الأجهزه اللعينه... ياللعنه لقد أنتهت أيام الصفاء
و لكن كلا الفته

قرار بهظى: سيكون هاتفى مفتوحاً من الساعه التاسعه صباحاً الى السادسه مساء و على المتضرر ترك رساله...بعد سماع الصفارة...و شكراً

18 Jun 2007

طااااابور مين يا أستاذ

يوم الأربع اللى فات كنت خلاص... خلصت مشاوير القاهرة و راجع أسكندريه الجميله ... لسوء حظى الكلام ده كان لساعه أربعه العصر, رحت محطه القطر أحجز تذكره ، لقيت أول قطر الساعة سته بليل ، قلت خلاص.. عليك و على النعش الطائر يا بوبهظ


توضيح هام
لمن لا يعرف محطه رمسيس – البلوج أصله بقى دولى- فالمحطه من ساعه ما قدمنا ملف الصفر فى كاس العالم ، و التخطيط فيها بقى غير أدمى، بمعنى أسوار طويله و كتير بتحد من حركه المشاه ..بتخليك تمشى ما لا يقل عن ميه و خمسين متر من ساعه ما تنزل من مواصله علشان تروح لمواصله تانيه كل اللى يبعدك عنها فعليا هو عشرين متر، و برضه من ساعتها شالوا ميكروباص الاسكندريه بصوره رسميه، فقامت حركه ميكروباصات من أجل الأجرة ، و بقى فى جراج معفن يلم الميكروباصات و يحملها و يحميها من بلطجه أمناء الشرطه


نرجع تانى
انا كنت مسافر الاسكندريه الساعه أربعه العصر من رمسيس و دخلت الجراج المعفن علشان أركب – شوفتو التوضيح كان حلو أزاى- المهم ، لقيت بشر كتير واقفين قدام باب الجراج و جوه الجراج و فوق الجراج و لا كأننا فى يوم الحشر – خللى بالك أحنا فى الصيف- سوق و بشر و عالم قايمه و عالم نايمه .. جمهوريه كامله متكامله داخل الجراج، كل ده جميل و يحسسك بالحميميه لغايه ما يجى ميكروباص، هووووب... تطلع الانياب و تتشمر القمصان ، تلاقى الناس بتجرى تمسك فى باب الميكروباص و السواق يفضل يمشى بالحته بتاعته، و الناس بتلاحقه، و كأنه نبى ،و كأن باب الميكروباص فجاه بقى باب الكعبه ، و مش مهم اللى يداس و اللى تتفعص و اللى يضرب و اللى ينضرب


وسط كل ده لقيت ست كبيره لابسه عبايه سودا و قاعده على كرتونه و جنبها أكياس سودا شكلها تقيل
صعبت عليّا ، قلت لازم أتصرف، رحت رايح على المكتب الوحيد اللى فى الجراج


لو سمحت ممكن أكلم المدير
ينظر الىّ رجلان ببلاهه
أكمل : هو لو ممكن ننظم طابور بدل البهدله دى ، فى ستات كبيره و رجاله عواجيز و مش عارفين يركبوا
صوت ضحكه عاليه يتوسطها عين غريبه : هعا هعا هعا هعا ... أتفضل يا محترم


يتفضل المحترم اللى هو انا الى الداخل ،و ياخدنى الراجل لأوضه جوه، و يستقبلنى فيما يبدو مدير أو صاحب الجراج، تفضل يا أستاذ

بص يا باشا – أبدأ انا الكلام- ليه يا باشا ماتعملوش طابور علشان الناس تركب ،بدل البهدله و قله القيمه دى، يعنى نحترم نفسنا – أحنا يا باشا- و نبقى بنى أدمين

يرد الباشا: و الله يا محترم ماحدش يكره، بس مين يسمع، إحنا غلبنا نحاول فى ده، بس أصل شعبنا دة شعب -إبن ست مش نظيفه- و مبينفعش معاه الذوق و الأحترام، الكلام اللى سعادتك بتقوله ده سنه الفين و عشرين يدينا و يديك طوله العمر
فى سرى أهمس ياريت

المحترم: مين بس قالك كده، روح العباسيه موقف حلوان ، و شوف الاحترام... الناس بتيجى تقف طابور لغايه ما يجى الميكروباص ، و يقف الميكروباص قدام الطابور و يحمل أول أربعتاشر واحد و الكلام ده بيحصل فى رمضان قبل الفطار أحيانا ، و كل ده على حد علمى بسبب واحد أسمه سيد اللى ماسك الكارته بتاعت الموقف ، هو الى أجبر السواقين على أنهم ما يخدوش ركاب غير من الطابور ، فإضطرت الناس أنها تقف صف، و الكلام ده بقاله سبع سنين تقريباً ..سيد ساب الموقف و النظام فضل زى ما هو

الباشا: و اله محدش يكره... تعرف أنت توقف طابور
انا: بشرط... تخللى الميكروباصات متدخلش و تحمل من غير الطابور...بعد أذنك ، بس كده و أدينى خمس دقايق

قام الباشا من مكتبه و طلع فى فراغ الموقف ... يا سيد، يا كعبوره، فلافيلو... بصوا الأستاذ هيوقف الناس طابور و محدش يركب عربيه واحده من غير الطابور

بأعلى طبقه صوت عندى : يا جماعه ... لو سمحتو ... عاجبكم البهدله اللى أنتوا فيها دى... تعالوا نقف طابور ورا الحاجه – الست اللى لابسه أسود- و العربيات لما تيجى هنركب كلنا واحد ورا التانى من غير بهدله و قله قيمه

واحد رزل قعد يضحك بصوره هيستيريه، انا أتعصبت ، قمت مقرب منّه ... خير ، بتضحك ليه... هو انا بقول نكته ... انا بحاول أخليك تتعامل بأحترام... بتضحك ليه هو فيه حاجه انا قلتها غلط.... لو سمحت تعالى نقف طابور ورا الست الحاجه


واحد تانى قاللى طابور أيه يا أستاذ، انا كنت فعلاَ متنى الى زى أخينا ده، قلتله ؛طابور يا أستاذ يحترم كرامتك و كرامتى....طابور ميخليش الحاجه اللى زى والدتك دى تتبهدل ... أنت يرضيك أن أمك علشان تركب المواصلات يحصل فيها كده

كنت خلاص قربت أقنع الناس ، سكوت كامل يسود الجراج...ناس بتفكر و أتباع بدأت تظهر...هووووب ... دخل ميكروباص الموقف... و ظهرت الأنياب و أتشمرت القمصان و عادت ريما لعادتها القديمه

قلت فى سرى مش مهم... أخد الزباله و راح... المره دى غيرت الأستراتيجيه و خليت دعوتى حميميه، و رحت أول حاجه لمجموعه من الستات فى الاربعين أو أواخر الثلاثين ..أيه رأيكم فى حكاية الطابور دى.. قاللولى و الله جميله، قلتلهم طيب انا محتاج شويه مساعده.. ممكن أطلب منكم تقفوا ورا الحاجه و تصبروا شويه لغايه ما أجمع الناس

الحمد لله وقفوا ، كده الطابور أبتدى بأربع بنى أدمين... رحت لواحد تانى معاه واحده -شكلها خطيبته-ها ما تيجى معانا بدل البهدله... سمع الكلام و راح.. كده الطابور فيه سته أنفار

نقيت راجل كده شيك فى نفسه و رحتله .. ها تحب تجرب معانا الطابور...طااااابور مين يا أستاذ... البقف طلع جزار... انا مستعجل و مش بتاع طوابير، و انت فاكر ان الناس تنفع تقف طابور

رديت الطابور أهوه فيه سته... و معاك هنبقى سبعه...قاللى طب بص على الطابور بتاعك... لقيت ميكروباص جه و الناس اللى فى الطابور طلعت تجرى علي هو الحاجه لسه قاعده على الكرتونه

فوضت أمرى الى الله و قلت أروح أساعد الحاجه و خلاص... قربت منها ... لقيت راجل كبير كمان قرب منها و قالها... ياما انا جبت السنكوتشات... قامت الحاجه بكل نشاط و جريت هى كمان على الميكروباص

فجاه تحول الكون الى لأ كبيره، و انا مركزه و الكاميرا على الجريل بتبعد و انا فى منتصف الصوره أصرخ ياولاد الكلب... الرحمه

واحد أسكندريه عصافره... واحد أسكندريه عصافره... أفيق من غيبوبه الالم... أيوه انا واحد أسكندريه و رايح عصافره...أتفضل يا باشا و ركبت الميكروباص و ماكانش فاضل لا واحد و لا حاجه كان فاضل أتنين...ركبت و ركبت جنبى بنت شيك... بصيت للخلق فى الخلف و أبتسمت وغمزت للقدر السعيد، و لعنت فى سرى الشعب المصرى

5 Jun 2007

الرقص كالطيور المذبوحه




لا أعلم تحديداً لماذا أكتب هذه السطور... يمكنك أعتبارها تساؤلات ...خواطر...أرتجال على حدود اللامعلوم

-------------------------

لماذا فى بلادنا يقترن الفقر بالقذارة...؟

هنا أقتبس من صديق لىُ "عندما ذهبت الى الهند وجدت أننا ف حال يدعو الى شكر الله و لكن عندما زرت المكسيك رأيتنا و لاد وسخه..تسائلت لماذا..؟


لقد أمنت أن الفقر و القذاره لا يرتبطان ببعض بعلاقه ما فالبلاد التى ذكرتها كلتاهما فقيرتان و لكن شتان الفارق... ففى الهند كم هائل من القاذورات و روث البهائم و دعك من كل ما تسمعه أذنك عن العبق الهندى الاصيل فما هى الا روائح جلودهم التى خاصمتها المياه... فى حين أن أمريكا الاتينيه و المتمثله فى المكسيك يعانون من نفس الفقر المدقع ,من تدنى للموارد و كثافه سكانيه عاليه و بالرغم من هذا تجد شوارعهم و ملابسهم نظيفه... نعم قديمه و لكن نظيفه... دعك من هذا كله و لن أظلم المصريين بمثل هذه المقارنه ... المغرب ... مسلمين و عرب و أفارقه... و زى الفل... تشعر كأنك فى خمسينيات القرن الماضى فى القاهرة و عليهم نفس الظلم الواقع عليك و لكن للبشر قدرة غريبه على الابتسام

-------------------------


صحيح لماذا لا يبتسم المصرى فى وجه أخيه ...؟؟

الكل هنا يحمل نفس البلاء, نفس الخراء, نفس الهموم و القهر و الظلم و الامعقول... و لكننا كبشر - بعيدين كل البعد عن السياسه -بدلا من أن نتكاتف ... أصبحنا نتصارع فيمن يحمل هموما أكثر و نتفنن فى مضايقه الاخرين... أعرف يا هذا أن الدنيا بصمت عليك طابع الذل ..أعرف أنك تحمل من الهموم ما لا يطيقه بشر ..و أيقن أن جهنم لن تكون أسوأ حالاً و لكن لماذا لا تبتسم فى وجهى ... الا أشاركك نفس وصمه العار, الا أشاركك القهر و الظلم... أقسم لك أننى انام الى جوار فئران المناور... و لكن أعدك أن أتبسم فى وجهك و نحن نقف فى المصلحه الحكوميه ننتظر أحساناً من الموظف المسئول فى جو يونيو الخانق.. أرجوك و أتوسل اليك ... و النبى تبسم

-------------------------


أصحيح أننا السبب فيما نحن فيه من تردى... أعرف صديقاً يمتلك خط فودافون و أخر موبينيل و ثالث أتصالات, و يشتكى من الفاتوره و المكالمات... الا ترى معى أنه أبن وسخه...؟؟؟


هل أصبحت الحلول الفرديه فرض عين, هل أصبحت الهجره ضروريه و هل أصبح الفرار قمه الشجاعه... يالها من ملهاه


القاهرة... صيف 2007



21 May 2007

سواق محشش

أمبارح كنت راكب تاكسى ... و غريب جداً... كان فى بنت صغيرة و تخينه على غير المعتاد لابسة فانكي و بيئه شويتين ...و راجل قاطع الخلف (النسل) أو بالتحديد قاطع خلف المسكينه اللي متجوزاه... و سواق تاكسى شكله صعيدى و ضارب بوز عجيب 2 متر قدام

انا ركبت التاكسى العجيب ده لآن ماكانش في تاكسي غيره راضي يقفلى..مفيش و شويه و البنت قالتله خش يمين ياسطى... طلع فيها.. بصي هو جنيه اللي دافعه ابوكي يعنى تنزلي علي الشارع و تتصرفي تخشي يمين .. تخشي شمال ... اعمللي ما بدالك بس دخول انا مش داخل
البت ياعينى عنيها دمعت شويه كده و أخدت بعضها و نزلت... بصراحه ساعتها افتكرت النصايح الخالده لتكدير سواقين التكوسه و قعدت افكر ياتري اكدر الراجل ده ازاي

المهم شويه و الراجل اللي جنبي قعد يدخل التاكسي يمين و شمال ... قي شمال و طوالى... و هوب علي جنب هنا ياسطى... كان تنك بزياده مفتعله و هو بيدى الناكسى 2 جنيه
انا ماعرفش هو راكب منين بس السواق قعد يبص للفلوس و مط شفافيفه كده و قام ماشي

شويه و قعد يضحك... و يضحك... شويه بدأ قهقهه بصوت عالى انا فئران الدنيا بقت تلعب ثبت و النطه فى عبي
قلتله خير ياسطى ماتضحكنا معاك

بصلي و عنيه بتجيب دموع من كتر الضحك... تصدق... واحد صعيدى كبر دماغه ... ماعرفش يطلعها م
الجلابيه
بس يا سيدى .. و انا انهرت ضحك
رديت عليه...صعيديه برضه جت تسوى الهوايل ...حرقتها
قاللى قهوجى أشترى تاكسى ... طلع الكراسى بره
و بس يا سيدى انا اقول نكته قصيره و سريعه و هو كذلك لغايه ما المخزون اللى عندي خلص و هو
شغال و لا همه
وصلنا بالسلامه و احنا مسخسخين على روحنا من الضحك... كان المشوار يستاهل بتاع تلاته جنيه
قمت مطلع جنيه و نص و قولتله مش احنا راكبين مع بعض...يبقى النص عليا والنص عليك
هاهاهاهاها... و سبته و مشيت

29 Apr 2007

التنمية المستدامه ... مش المستديمه

فى تانى حلقاتنا فى برنامج تنمية على الهوا , خلينى يا حسن أكمل معاك موضوع التنمية ، أية هو بقى موضوع التنمية المستدامه, يص يا سيدى و صلُى علُى يشفع فيك ... طلع المصطلح ده فى أوائل التمانينات و كات بيعبر عن التنمية فى المجالات البيئيه، بمعنى أنك تاخد بالك من البيئه علشان الاجيال اللى جايه و حقها فى حياه نظيفه.. مش بتاعت حكومه نظيف ... و بعد كده أتطور علشان يشمل نواحى متعدده بنفس المفهوم ... و هو تنمية موارد الحاضر بدون الطغيان على حق الاجيال المستقبليه فى التنمية، و هتلاقى الكلام ده مشروح بالتفصيل الممل فى الموقع ده و هو خلاصه المؤتمرات الدولية اللى ليها علاقه بالتنمية المستدامه و اللى أخرها أهداف الألفية الأنمائيه

المهم بدون شرح كتير التنمية المستدامه ليها ثلاث شعب أساسيه ... أو مجالات عمل أساسيه لو مالكش فى الفصحى.. الأول هو الأجتماعى و التانى بيئى و الأخير أقتصادى ... و متفرع منهم
محاور كتيرر
كل ده علشان الحفاظ على حق الشباب و الاجيال القادمه فى مستقبل أفضل ... يمكن علشان كده بقى ده علم المستقبل ... فى فروع علم الاجتماع و التنمية الدوليه

فى المجال الاجتماعى .. تيجى برامج التعليم ... الفن و الثقافه ... المساواه بين الجنسين فى التعليم و العمل و الخ ... حقوق الأنسان ... و فى برامج كتير مصر لتطبيق ده .. أهمها
برنامج الشباب الأورومتوسطى و ده ناتج من إعلان برشلونه اللى أجتمع فيها وزراء الخارجية دول شمال أفريقيا و البحر المتوسط و أوروبا فى برشلونه و مضوا أتفاقيه للتعاون بينهم فى نواحى كتير منهم أقرب مثل متعرفهوش هو تطوير ترعه المحمودية و اللى متموله بتمويل أورومتوسطى , تانى أهم برنامج و هو برنامج مؤسسه فورد للتعليم و الثقافه , و ده برنامج أمريكى لتمويل العمل الثقافى فى دول العالم, على سبيل المثال مركز الجيزويت الثقافى متمول منه و مؤسسه المورد الثقافى كمان.

اما بقى المجال التانى و هو التنمية الأقتصادية فجواها مواضيع كتير مهمه لبلدنا بالذات .. أولها حركات القضاء على الفقر زى
حمله القضاء على الفقر و مواضيع عماله الشباب زى قمه عماله الشباب و شبكه عماله الشباب و أخيراً و أهمها فى رأى هى مشاريع الأقراض متناهى الصغر زى اللى بتعمله جمعية رجال أعمال الأسكندرية ... بس دى بالذات ليها عندى رساله مخصوصه ليك يا حسن.

أما المحور التالت فهو المحور البيئى ... و ده أهمهم بالنسبه للتنمية المستدامه... فى تمويل كبير للمشاريع البيئيه بس مصر للأسف فيها نقص فى الخبراء فى مجال الحفاظ على البيئه طبعاً بأستثناء
الدكتور أسماعيل سراج الدين مدير مكتبه الأسكندريه الحالى و نائب مدير البنك الدولى لشئون البيئه سابقا
هو أساسا مجال عايز إلمام بالعلوم الهندسيه و الأجتماعية علشان تعرف تصمم مشروع كويس... غير أنُه على أخر أهتمامتنا كمصريين نتيجه لقله وعينا بأهمية البيئه فبنعتبرها رفاهية ... رغم أنها مش بس بتأثر علينا .. الأكاده أنها بتأثر على العالم كله... خلينى أديك مثال واضح ... مشكله الطاقه تعتبر أهم مشكلات التنمية البيئيه المستدامه ،من دعم
للطاقه المتجدده على حساب الطاقه الناتجه عن أستخراج الوقود الأحفورى – حلو الكلام المجعلز ده- المقصود البترول ... فى مصر حسب تقرير التنمية البشريه لعام 2005 البترول هيخلص فى مصر كمان 23 سنه و أحنا لسه مأخدناش اللازم و بنصدر تقريبا كل مخزونا و الغاز الطبيعى كمان أربعين سنه... تخيل معايا الحياه بدون عربيه أو بوتجاز غاز أو مولدات الكهربا و خلافه... فمصر إن ماكانتش تتخذ أجرائات سريعه هترجع للعصر الحجرى و الكلام حرفياً
فى بقى حاجات تانية زى السيطره على التقلبات المناخية و ثقب الأوزون و مشكله المياه و منع إنتشار الأسلحه النووية ، الحفاظ على المحميات الطبيعية ، معالجه المخلفات الصلبه ... و لسته طويله مالهاش أخر

تعالى نربط أعمق كده بين ده و واقع حياتنا فى مصر ... بص ياسيدى البلد ملهية فى دوامه الأصلاح السياسى و الاخوان و الحكومه و كفاية ... بس حد فكر بعد كده هيحصل أيه ... يعنى لو الريس لبسته روح عمر بن عبد العزيز بكره الصبح ... هيعمل أيه... هنا بقى يجى دور المجتمع المدنى أنه ينزل الشارع من غير ما يخاف من حد يشده علشان بيعمل أحصاء مثلا... أنه يسد الفجوه بين اللى المفروض يتعمل و الغلط المتساب... هنا دوره فى تدعيم المؤسسات...وده مش معناه أننا نتخلى عن النضال السياسى ، بس نخلينا واعيين لمشاكل العالم .. زى عمنا
عمرو غربيه ... حقوق انسان تلاقى... بيئة تلاقى ... متطوع فى جرين بيس تلاقى

وجهه نظرى أن علشان أى إصلاح يحصل فى البلد اننا نهتم و ننضم لمؤسسات المجتمع المدنى و نبتدى نشارك بجديه علشان نحس بالمسئوليه لما نعمل حاجه غلط و نحس بقى إن أم البلد دى بتاعتنا مش عزبه أبو أمه

يلا سلام


http://www.un.org/esa/sustdev/index.html
http://www.un.org/arabic/millenniumgoals/
http://www.un.org/esa/sustdev/sdissues/sdissues.htm
http://ec.europa.eu/youth/priorities/euromed_en.html
http://ec.europa.eu/comm/external_relations/euromed/bd.htm
http://www.fordfound.org/
http://www.ceremedjesuits.com/index.php
http://www.mawred.org/
http://www.makepovertyhistory.org/
http://www.yesweb.org/
http://www.ilo.org/public/english/employment/strat/yen/
http://www.aba.org.eg/arabic/ABOUT-ABA-projects.htm#1
http://www.serageldin.com/
http://www.nrel.gov/learning/re_basics.html
http://hdr.undp.org/reports/detail_reports.cfm?view=1014
http://gharbeia.net/