24 Jun 2007

عناد

بصوا بقا... مانيش كاتب تانى الا لما تعلقوا على البوست اللى تحت الاول
-----------------------------------------------------------
تحديث
خلاص أفراج... هنكتب تانى ... بس شويه لأنى مكسل
----------------------------------------------------------
تحديث 2
بما أن الموضوع أتطرح... تعالوا نفكر كده .. أيه لازمه الكومنت اللى انت بتسيبه.... ياترى هو منتدى من نوعيه مشكور يا أستاذ... أكيد لأ .. و لو انا عايز كده .. كنت بكل بساطه رحت كتبت على عشرينات و لا مكتوب و لا حتى منتدى الحريف و الزعيم و أبو لولو... القصه و ما فيها أن لما بوست يبقى معدل قرائته من ميه و عشرين ل ميه و ستين و محدش يهون عليه يسيب كومنت ... فده بيدل على أيه يا ترى... هو الموضوع ماشدكش و لا الموضوع وحش و مكسوف تقول... انا عايزك لو الموضوع مش عاجبك تقوللى بجد... فيه موضوعات كتير انا كتبتها و ماكانتش عجبانى و علشان كده مستغربتش لما مجالهاش كومنتات... الا الموضوع اللى فات ده بالتحديد... لانه أولا محاوله لكسر جمود الفصحى و الكتابه بيها فى نفس الوقت... ثانيا ناس كتير شافوا الموضوع قبل نشره و عجبهم... طب أيه بقى القضيه... هو ميشجعش على التعليق و لا علشان هو بالفصحى

و أخر حاجه و بدون أنكار أو ادعاء للفذلكه ... أكيد أضايقت لما كتبت موضوع و ميجيش عليه كومنتات بكل بساطه , بذمتك انت نفسك مبتضايقش لما يحصل معاك ده

11 comments:

Anonymous said...

.........................................................(((comment)))
:) :) :)

Anonymous said...

صراحة حقك
بس عن نفسى هى المشكلة مش ان البوست عاجبنى او لأ المشكلة ان احيانا مابعرفش اقول ايه
ممكن يكون عاجبنى بس ماعنديش تعليق عاجبنى وممكن يكون مش عاجبنى بس بقول يمكن انا مش فاهماه فعلشان كده مابعلقش وبتابع التعليقات يمكن افهم
لكن بصفة عامة بوستاتك بتعجبنى

مجرد رأى

Alexandrian far away said...

أيه يا كابتن بهظ التناكه دي كلها؟!!!
فيه ايه يا عم؟
يعني طيبنا خاطرك وقلنا جبر الخواطر على الله عشان ما تبطلش كتابه أحسن يجيلك حصر في الكتابه ولا حاجه وتبقى مشكله
قوم تناكة جلالة سعادة فضيلة جناب سموك تقول أنك خلاص سامحتنا ومش حتحرمنا من عظيم ورهيب وبلاغة فخامة عظمة عبقرية بوستاتك، بس سعادتك كسلان شويه أو يمكن شعر حواجب جلالة سمو فخامتك مميل على تحت ومستنيه لما يتعدل عشان تبقى تكتب
ثم تعالي يا فخامة الكاتب اللوذعي الرهيب العجيب المهيب أيه موضوع محاوله لكسر جمود الفصحى والكتابه بيها في نفس الوقت، هو سعادتك ولامؤاخذه جلالة عبقرية سموك ما بتقراش حاجه خارج نطاق المدونات؟ أيه الجديد في موضوع البوست الى فات ده؟ وأيه الجديد في لغته أصلا
يا نهار اسود، ما يكونش فخامة سموك أستنساخ صغنن من محمد التابعي أو هيكل وأحنا مش عارفين
أرحمنا الله يسترك
أدوية المراره غاليه قوي

Alexandrian far away said...
This comment has been removed by the author.
Anonymous said...

الاخ فار اواى
هو حد قالك اقرا
انت عمال تتريق على الراجل كده ليه ياعم
تنكشه ماشى لكن تغلط اعلقك

Bahz.Baih said...

alexandrian far away
ياعم تشكر... انا ياعمى بكتب كده و بحب أتنك شويه و أعمل فيها متواضع شويه و طيب شويه و شرير أحيانا

فرحان يأخى ... انت زعلان ليه

بحب البلوج بتاعى و بس كده

مش معنى كسر جمود الفصحى و الكتابه بيها ان انا هفتكس حروف جديده ... و لكن انا بتكلم من جوه العالم بتاعى اللى كل كلامه بالعاميه

انا اسف لو كنت انت زعلت من شويه غرور انا فرحان بيهم... بس انا اسف من هفسد فرحتى علشان خاطرك

Alexandrian far away said...

عزيزي البهظ
صباح الخير على عيونك وعلى عيون كل محظوظ تشرق عليه شمس الأسكندريه
أظن أنك بعد تشريفك - بجد دي- لمدونتي عرفت إن بهججه من ضمن المدونات القليلة التي أتابعها وأعتز بها وأدعو الأخرين لزيارتها، وده أكيد لأننى معجب بها ومتابع لها، وليس لأنها سخيفه مثلا أو ممله لا سمح الله، وبما أنى معجب بها وبأتابعها فهو دليل على أعجابي وتقديري لكاتبها ولأسلوبه وللموضوعات التي يطرحها، وصدقني أن كل دقيقه بأقضيها على النت بتبقى مقتطعه من وقت شغلي أو نومي أو حياتي الخاصة وده وقت محدود جدا، ولولا أن (بهججه) تستحق الأهتمام ما منحتها ما أمنحها من وقت، أنا بألف وأدور تقريبا؟ لكن دي طريقتي عشان أقولك ما تزعلش، يمكن قرصت عليك شويه، أنا أسف، لكن ساعات العواجيز أللي زيي بيحتاجوا يقرصوا على الشباب الجامد اللي زيك، مش غتاته لكن للأطمئنان أنه فيه عضم ناشف لسه متوفر في الدنيا وأن ألى حيورثونا مش خرعين، وأنت أسكندراني وعارف نشفان الدماغ لما يحكم ، عموما بشرفي ما كان قصدي أضايقك لكن هي جت كده ومش حأعتذر عن الى كتبته ، لكن بأعتذر لو أنه ضايقك
وأشكرك مره أخرى على دماثة خلقك وأحترامك في الرد
أما الأخ المجهول فأيه تعلقني دي؟ ما تبطلوا ثقافة الصيع بتوع الداخليه بقى
تحياتي با بهظ مرة أخرى

أمل أسكاف said...

مساء الخير
أولاً أنا بخش تقريباً من عشرة.. لعشرين بلوج يومياً.. متنوعين من السياسي لليوميات والتعليقات ...ألخ
ومابعلقش إلا في أضيق الحدود ولما الموضوع يبقي هممني فعلاً زي سوال مدونة سيجارة عن سبب وضعهم لخانة الديانة في البطاقة الشخصية
وده ميمنعش أن يكون فيه مدونات بتعجبني لكن ما بيباش عندي كلام زي مثلاً (من كام شتاء ) ممكن فعلاً أخش وابقي في غاية السعادة وماكتبش ولا تعليق
ويمكن عشان كده عمري ما زعلت من أن محدش علق على موضوع نشرته .. يعني ممكن تسميها طريقة في شوف عالم المدونات

Wael El Nagar said...

بص ياعم بهظ
فى شغلى لما الزبون يسأف يعنى ايديه فاضية ودة مصيبة,قوم اية فى اول طلعة كدة كدة هيسأفو ترد تقول,شجرة الابداع لا تروى بدوى التصفيق.قول كدة يا بنى واضمنلك ان كل بنى ادم يخش المدونة هيسبلك ربع جنية مخروم خرمين

Ya Di Elneela said...

أولا أنا ما بضايقش لما ما حدش يسيبلى كومنت عشان ماحدش بيقرالى غير ساعدتك
أما ليه مكا بنسيبش كومن عشان ساعات بنبقى عايزين نقرا و بس
عايزين نستمكتع بدون ابداء اراء _كنوع مكن انواع التغيير على أساس ان احنا طول النهار بنقول فى ارائنا_
و بعدين مش كل مرة بتشرب حاجة ساقعة بتقول رأيك فيها و لا ايه ساعات بتكتفى بشعورك الداخلى بالانتعاش و بتعبر عن ده للشركة المنتجة عن طريق انك بتشترى تانى
و احنا بنقرا تانى
يا بهظ بيه

حابس نمله و بعذبها said...

الصراحه انا بقالى يوم بس عامل مدونه ولسه معرفش ممكن حد يرد على مواضيعى ولا لآ لانى مش عارف انا هى ممكن تعجبكم ولا لآ وعشان كده ياريت تزوروا مدونتى الجديده اللى اكيد لسه متواضعه وتقولولى رأيكم