28 Dec 2008

كلمه السر ... الزعبلاوى



المغنى : منه يا منه
كورس: هيجوزوكى
المغنى: منه يا منه
الكورس: الزعبلاوى
المغنى : منه يا منه
الكورس: عنده مكرونه

على هذه الأغنيه الشعبيه فى أفراح أهالى الأسكندريه بدأت رحلتى انا و احمد نصر بحثاً عن الزعبلاوى ... كنت أشعر انا و هو أن سكندريتنا ناقصه بدون معرفه الزعبلاوى ... فكل الأصدقاء من الكبير للصغير .. الذين قضوا طفولتهم او شرخ شبابهم او كهولتهم فى محرم بيك او بحرى يعرفون الزعبلاوى ... و كنا نشعر بالعار لجهلنا بالزعبلاوى ... من يكون هذا الزعبلاوى المشهور للغايه.

بدأت الرحله بأتصال بصديق عزيز مشهور بسكندريته ... هل تعرف الزعبلاوى ... أنكر أى سابق معرفه به ... و وبخنا للصق تهمه الزعبلاويه بالأنسان السكندرى المتحضر ... فما كان منّا إلا أن توجهنا بالسيارة تجاه محرم بيك و كلّنا أمل أن نجد من يدلنا .

بعد مرورنا بالكوبرى أبو عينين ( و هو الذى يعبر تحت قطار أبو قير واصلاً محرم بيك بالعالم الخارجى) توجهنا يساراً و سألنا أحد الماره ... "أخويا تعرف فين الزعبلاوى"

رد علينا: " يمين فى شمال هتلاقى الطريق الرئيسى ... هيقابلك الترام ... طوّل على طول ... و بعد كده إكسر شمال من عند كليه العلوم فى يمين تلاقى المبوله العامه ... شمال تخش على شارع إيزيس و قبل الأخر هتلاقى الزعبلاوى"

طبعاً و مما لا شك فيه ... إعتقدنا إن الراجل يضللنا الطريق ... لمعرفتنا أن السكندريين يكرهون فى القاهريين ( و حاشا لله أن نكون منهم) تضلليلهم للسكندريين عند ذهابهم الى القاهرة .. فبالتالى إتبعنا الأرشادات لمده شارع و بدأنا فى السؤال هناك مره أخرى.

للمرة الثانيه نفس الوصف بالتفصيل الممل ... و هنا كان لابد أن نثق بعض الشئ فى نفوس البشر السكندريين ...فأكملنا المسير حتى إشعار أخر ... و عند عبورنا الترام سألنا شخص أخر فأدلى بالوصف ذاته بالتفصيل أعلاه ... ثم سالنا رابعا ... و إتفق مع بنى جنسه ... و كان القوم قد تم تلقينهم فى نعومه أظافرهم مكان الزعبلاوى ... فقررنا لإشباع فضولنا سؤال شخص خامس ... فأكد لنا نظريتنا.

إن الزعبلاوى هذا هو برج إيفل فى محرم بيك ... و جلدنا أنفسنا لجهلنا بأحد أهم معالم الأسكندريه ...!!!

المهم وصلنا فى شارع إيزيس ... للعلم الشارع لا يزيد عرضه عن مترين و بالكاد تسير به سيارتان ... و فجأه نرى محل صغير لا يتجاوز الثلاث أمتار طولاَ و المترين عرضا و عليه يافطه أكبر منّه مكتوب عليها الزعبلاوى ... لم أصدق عيناى .. أهذا هو المحل الذى يعرفه أهالى محرم بيك و بحرى بالكامل ...للعلم منذ بدايه سؤالنا عن الطريق و حتى لحظه الوصول الى الزعبلاوى سرنا حوالى 6 كيلومترات و قطعناها فى حوالى نصف الساعه نتيجه للزحام ... !!!

المحل المعجزه يبيع المكرونه و الكشرى و حقاً لا أرى سبب واحد منطقى يجعله بهذه الشهرة ... لدرجه إنك تلاقيه موجود على الويكيمابيا هنــــا

المهم انا عملت بعدها إختبار سكندريه لصحابى ... و وجدت إن السكندرى بجد هو الذى يعرف الزعبلاوى و المدعى هو من يجهله ..لذا وجب التنبيه

23 Dec 2008

معرض صور











قلبى جاليرى رسومات بالزيت، كل رسمه هى تتويج لعلاقه ...و كل علاقه و لها إطار يحيط باللوحه ، و انا فنان عنده إطارات كثيره... إطارات للصداقه وأخرى للزماله و ثالثه للأخوه و إطار واحد فارغ لحب حقيقى فى الحياه .


كل واحده عرفتها فى حياتى بيننا لوحه مشتركه رسمناها سويا بألوان كتيره، مثل اللون الأزرق لمكالمه حلوه و اللون الأحمر لتحدى لذيذ و جميل و لون أصفر لحضن أخوى فى لحظه أشتياق و لون أخضر لشغل عملناه سويا و لون أبيض للحظات أعتراف على الأم أس إن


كل لوحه بعد ما نرسمها سويا أبدأ أدور لها على إطار يتلائم معها ، أول حاجه أُجربها هو الأطار الوحيد للحب الحقيقى ، أراه أيتناسب مع اللوحه أم لا يتناسب، هل يقدر أن يغطى على ثقوب الأطارات اللى فاتت و يحتويها، هل يشمل اللوحه كلها و أم سيمحى منها جزء مهم من الرسمه ، ساعات كثيره اترك رسومات من غير إطارات خالص، أستمتع بتجربه الاطارات مره تلو الأخرى ، بلا أدنى ذرة من الخداع و فى حالات كثيره أضع إطارات الصداقه كتتويج للوحه جميله من اللحظات و المشاعر.


انا أرى كل إطار كحاله فى حد ذاتها غير متكررة ... يعنى صداقتى مع أميره لا يمكن تكون هى صداقتى مع ديمه رغم إن الأثنين صداقه، و لكن كل واحده منهم لها الوان مختلفه اترسمت بها اللوحه معاهم و حتى لو وجدت التى ارسم معاها لوحه الحب الحقيقى .... أكيد لن أنسى اللوحات الثانيه التى رسمتها.


الغرض ... انا لست إلا صاحب إطار فارغ أبحث عمن تملأه بأبتسامتها ، و ساعتها سأرسم لها بالوان الربيع فرحه تركى للسجائر ... و غسيل الصحون سوياً ... و إنشغالى بأسعادها ... و ساحرص على إستدامه بريق الإطار.

4 Nov 2008

معضله الحق



فى يوم مشمس من ايام الشتاء كنت شايل شنطتى و مسافر من أسكندريه للقاهرة اللى منها هروح للعاشر من رمضان ، تفاصيل مالهاش لزمه غير انها تعرفك شكل اللحظه اللى انا فيها فى محطه رمسيس و خرمان معيش سجاير و مستعجل أروح العاشر.

رحت لأقرب كشك سجاير و طلبت بكل ذوق علبه روثمان أزرق ... كان فى اتنين واقفين ... قاللّى واحد منهم إن مفيش روثمان... شفت أن فى فايسروى فطلبت علبه قام الراجل مديهالى و محاسبنى عليها بأربعه جنيه و نص.

لغايه هنا الموضوع مفهوش حاجه غير أنه أخد منًى ربع جنيه زياده على تمن العلبه اللى تمنها أربعه و ربع بس، انا بكل ذوق برضه قلتله أن العلبه دى بأربعه و ربع مش و نص و أن انا ليا ربع جنيه كمان ، انا كنت مصر على حقى و هو اتنرفز ... و عاجبك عاجبك مش عاجبك أخبط دماغك فى الحيط ... بقولك ايه مبنبعش سجاير و خد فلوسك يلا من هنا.

هبيت فى الراجل و قولتله: انت بتزعق ليه .. انا معليتش صوتى عليك و مطلبتش حاجه اكتر من حقى ... انت مالك ... خد يا عم سجايرك ... الله الغنى.

رحت الكشك اللى جنبه و انا متنرفز ... لو سمحت علبه روثمان أزرق ... لقيت عنده علبه .. إدهالى و أخد خمسه جنيه و نص ... يا فتاح يا عليم يا رزاق يا كريم ... العلبه اساساً بخمسه جنيه .. بكل ذوق سألته ليه بتبعهالى بخمسه و نص و هى تنمها خمسه ... الراجل بكل ذوق قاللى و اللهى مفيش سجاير فى السوق و إحنا بنجيبها من بره و لو مش عايز خلاص بلاش تشتريها.

مسكت اعصابى و اديته الخمسه جنيه و نص، و مشيت بتحسر على حقى الضايع ... و خلاص هركب أروح العاشر ... بس مقدرتش ... حسيت بطعم مراره جامد فى زورى .... مخنوق جداً... رحت على قسم الازبكيه... وقفت قدام القسم ومش عارف أعمل ايه ... انا مش عارف أيه عواقب الخطوه دى.
المهم دخلت القسم و قابلت عسكرى على الباب.

العسكرى : أيوه يا أستاذ عايز أيه
انا: يا سيدى القصه أن انا رحت أشترى علبه سجاير و كذا كشك أصر أنه يبعهالى أغلى من سعرها
العسكرى: يعنى أنت عايز تعمل محضر تسعيره ... جوه على الشمال
انا: إذا كان إسمه كده .. ماشى

المهم دخلت جوه ده قابلنى صول طلع إسمه إبراهيم بعد كده

الصول: أيوه يا أستاذ
انا: انا عايز اعمل محضر تسعيره
الصول: يعنى أيه محضر تسعيره
( المهم حكيت تانى القصه)
الصول: جوه على اليمين عند النقيب

دخلت للنقيب و لقيت ناس كتير و الراجل وراه شغل ... المهم بصللى و قاللى بكل صرامه .. أيوه يا أستاذ

انا: سعادتك انا كنت جلى من أسكندريه و رايح أشترى علبه سجاير
النقيب: انت هـتهزر ...جاى من أسكندريه تشترى علبه سجاير
انا: لا سعادتك انا قصدى إنى أفهمك إن انا مش من المنطقه ... المهم ان انا رحت كشكين علشان أشترى سجاير الاول مغللى عليا ربع جنيه فى العلبه و التانى مغللى نص جنيه و مش راضيين يبيعوها بسعرها الاصلى و علشان كده انا جيت هنا علشان أخد حقى.
النقيب: يا محمدج روح مع الاستاذ و هاتلى العيال دى هنا ... روح معاه يا أستاذ و وريه العيال دى ... و إياك تتنازل عن حقك.

المهم رحنا أنا و محمد و فعلا شاورت على اللى زعق معايا فى الاول و اللى فى الكشك التانى و رجعنا القسم ... انا كنت متضايق قوى إن الموضوع وصل للمرحله دى ... انا مفيش حد يعنى تحرش بيا زى نهى ... و الموضوع كلله فى نص جنيه ... انا و الله مش فارق معايا النص جنيه ... بس اللى فارق معايا هو حقى فى إنى أتعامل بأحترام فى أم البلد دى.

النقيب : انت ياد أنت و هو ... أنتوا بعتوا للراجل ده سجاير أغلى من تمنها
الراجل التانى (الاول هو الكشك الاول و التانى هو الكشك التانى): أيوه يا باشا
الاول : انا مبعتلوش حاجه
انا: سعادتك انا رحت أشترى منّه و مرضيش يبعللى إلا لو دفعت ربع جنيه زياده و التانى كذلك فأضطريت أشترى من التانى العلبه أغلى نص جنيه
النقيب: صحيح الكلام ده
الاتنين ( حطوا وشوشهم فى الارض): أيوه مزبوط
النقيب: يا إبراهيم ... اعملهم محضر غش تجارى ( مطلعش يعنى محضر تسعيره) و روح معاهم يا أستاذ و إياك تتنازل.

خرجت مع إبراهيم لفناء القسم .. و هنا عرفت ليه النقيب فضل يقوللى إياك تتنازل عن حقك ... الضغط كان كتير .. اللى يقولك حرام و اللى يقولك إيه الواد البخيل،كل ده على ربع جنيه .... بصراحه اللى إدالى العزيمه هو ملازم موجود فى القسم ... داخل بيسأل إبراهيم هو فيه إيه... شرح له إبراهيم القصه ... قام مطلع المحفظه و قاللى يا سيدى ادى الربع جنيه .. مين اللى عايز ربع جنيه.

انا إنفجرت فى وشه ... يعنى بذمتك انا ههز طوللى و اعطل مصالحى على ربع جنيه .. انت باين عليك مش فاهم حاجه ... انا عايز حقى مش عايز أتصالح ... القصه مش فى الربع جنيه القصه فى مبدأ بس يظهر إنك مش فاهم حاجه خالص... و قبل ما اديله فرصه يرد قمت داخل على النقيب تانى و قايله ... يا باشا الناس اللى بره عماله تتحايل علّيا علشان أتنازل و منهم ناس عندك فى القسم.

النقيب قام من الكرسى و طلع بره و تقريباّ سبلهم الدين و الدنيا و اللى هيقرب من الأستاذ أو يقولله إتنازل هيعرف شغله معايا.

طبعاً .. إبراهيم إبتدى يشتغل على طول و بطل دلع ... وهاتك سين و جيم .. سين و جيم ... زى الافلام بالضبط.

جيت فى النص ... و ضعفت ... يا ترى اللى انا بعمله ده يستحق... كل ده على نص جنيه ... الموضوع مش مستاهل... هم كده خلاص إتعلموا الدرس ... كفايه كده ... و ابتدى الاولتنى يدمع كده شويه ... صعب عليا قوى .. انا على فكرة مشتكيتش قلله أدبه .. انا إشتكيت إنه بس مبعليش العلبه بتمنها... قمت داخل تانى للظابط ... قولتله ...و الله انا مش عايز الربع جنيه ... انا كل اللى عايزه إنهم يتعلموا درس و يفهموا إن الظلم وحش حتى لو فى ربع جنيه ... قاللى عارف لو انا سبتهم ... هيرجعوا و مش هيتعلموا حاجه .... انا بشوفهم بيسرقوا الناس بس محدش بيشتكى ... فمقدرش أعمل حاجه .. كل شويه أجيبهم و أهزئهم شويه ... لكن مفيش حد بيشتكى من اللى بيحصل ... دول يترموا فى التخشيبه للصبح و بكرة يدفعوا غرامه و يعرفوا إن الله حق ... و غيرهم هيعرف كده كمان .. انت كده بتساعدنى فى شغلى ... مش مهم إنهم يعرفوا الصح من الغلط ... ممكن جدا يطلعوا و هم مقتنعين إن هم اللى مظلومين ... بس شوف بقى السوق هيحصل فيه ايه بعد كده ... غيرهم كمان هياخد الدرس ... انت مش كتبت أقوالك ... و مضيت عليها ... يلا انت إلحق و مالكش دعوه ... سيبهومللى.

انا خرجت من عنده و مش عارف ياترى ده كان صح و لا غلط ... ياترى انا ظلمتهم و كنت قاسى و عملت ده للإنتقام و الا ده الصح بس علشان محدش بيعمله فانا حاسس بتانيب الضمير ... و يا ترى هما مسئولين عن الوضع ده و لا لأ.

بجد لسه محتار

12 Sep 2008

رمز التحرر

طول عمرى بركب القطار من القاهرة الى الأسكندريه و بالعكس و طول عمرى بدفع إجبارياً تبرع قيمته تتراوح ما بين الجنيه و الأثنين جنيه مره باسم الكسوة الشتويه ... مرة باسم معونه الشتاء ... الهلال الاحمر ... الصليب الاحمر ... نجمه داود الحمرا .... أى حاجه حمرا و السلام ... و طول عمرى و انا كارة فكرة إن انا بدفع تبرع غصب عنى ... لإنه شئ مش معقول .. لو هو تبرع يبقى بمزاجى مش كل مرة أجى أركب ياخدو منى و غصب عنى قيمه التبرع ... كانوا سموها ضريبه و خلصنا

أفتكر أن مرة أعترضت ... و مرضيش الموظف على الشباك انه يدينى تذكرة إلا لما ادفع التبرع .. و سلمت أمرى الى الله و قبلت الموضوع على مضض على أنه أحد أشكال القهر اللى كلنا متعودين عليها ... و قولت فى نفسى أهو قهر هيروح لحد محتاجه .. أحسن برضه من التبرع الاجبارى اللى بدفعه لكشك السجائر غصب عنى كل مرة أجى أشترى علبه سجاير... انا و الراجل عارفين إنها بأربعه جنيه و ربع و هو بياخد منه لنفسه كده أربعه و نصف ... أو النص اللى بيضاف اوتوماتيك على كروت الشحن أى كان فئتها ... حتى لو الشركه قالت أن الكروت بتتباع بالسعر المكتوب عليها.

أنهارده بقى حصلت فى حياتى نقله نوعيه ... كنت رايح القاهرة و رحت أحجز قطر الصبح ... كان معايا فوبو صاحبى ( فاكرينه اللى كان فى بوست الهرم المقلوب ... معلش مكتبتش عنّه كتير اصله كان مسافر الامارات و لسه راجع و كنا بنفتكر أيام الشتا الحزينه ) المهم انا و فوبو رحنا نحجز القطار و انا سالت واحد من اللى واقفين ... هى بكام التذكرة أسبانى درجه تانيه مكيف ... قاللى 29 جنيه ... يعنى قول 30 بالتبرع .... انا قولت .. أااه التبرع الاجبارى أياه ... و رحت فاتح فى قضيه الجبر و الاختيار و الحق و الحريه فى التبرع و خلافه ... فوبو بكل بساطه .. قاللى ماتطلب أنك تاخد الجنيه و ده حقك .. عادى يعنى ... انا فى سرى قولت تلاقيه لسه مرجعش كلّه من الامارات ... أديت للموظف 30 جنيه و قولتله انا عايز الجنيه الباقى ... قام باصصلى و ضاحك و اداهوللى .. كده بكل بساطه ... ياسلام ... أيه الحلاوه دى

أكتشفت أن انا بقالى أكتر من عشر سنين مضايق من حاجه تافهه و من حقى أن انا أطالب بيها و معملتش كده و لما طالبت بحقى ... أخدته ... الموضوع مفهوش كميا ... انا أخدت حقى لما طالبت بيه

خرجت و الجنيه الفضه اللى فى جيبى عامللى حاله إنتعاش ... حاله من الحريه و الانتصار ... وقفت تاكسى ( انا برضه من الحاجات اللى بتخنقنى هى المساومه مع التاكسيات على الأجرة نتيجه طبيعيه لأنقراض العداد) سالت السواق من الاول ... كام ... قاللى سبعه جنيه ... ركبت على طول من غير فصال

أصل الطبيعى لما تيجى تركب تاكسى من عند محطه القطار لازم التاكسى يبتدى معاك برقم مقفول كده ... زى عشره جنيه ... خمستاشر جنيه ... فتبتدى تساوم و توصلها لغايه سبعه أو تمانيه ,, بس الراجل ده جاب من الاخر و قال السعر اللى تحس أنه محسوب بالتنتوفه ... يعنى مثلا لو كان قال حداشر جنيه و نص ... مكنتش اتكلمت برضه

ركبت التاكسى انا و فوبو ... و اتكلمنا فى السكه عن الجنيه اللى أسترديته و عن الحق فى حريه التبرع ... و وصلنا الراجل و أخد أجرته و فوقيها نفس الجنيه التبرع اللى كان ممكن يروح بالعافيه لحته تانيه حمرا ... و روحت و انا فى مزبرنشق سعيد

20 Aug 2008

جائزة افضل مؤامرة



لو عندك قدرات شريره ... تامريه عملاقه .... بتمارس أحلام اليقظه .... متصور إن اليهود/ الاقباط/ إيران / الخليج / امريكا / الغجر / النازيين الجدد / سواقين المشاريع .... هم السبب فى اللى بيحصل فى العالم من كوارث و دايماً عندك التبرير الممنطقى للى بيحصل

إذن ... أنت مدعو لكشف الغيوم حول مؤامرة حريق مجلس الشعب الاخيره

فى سابقه فريده من نوعها اعلنت مدونه لنتعد الطبيعى لجائزه قدرها كارت شحن خمسين جنيه حته واحده الى صاحب لأحسن مؤامرة تفسر ما الذى حدث فى الحريق الاخير

للتفاصيل برجاء قراءه إعلان المسابقه ... أخر ميعاد للتقديم هو 10 رمضان ... ياترى هو ده له دعوه بنصر أكتوبر و لا شكل اللى كاتب البلوج ده مسيحى و بيستهزء بالأديان ... أو يهودى بيقول أنهم إنتصروا الكلاب فى الحرب

المهم إن المسابقه موجوده و اللى عايز يقدم يبعت على التعليقات فى المدونه

13 Aug 2008

البطل المهزوم



"مرسى الزناتى إنهزم يا رجاله" هى العباره اللى جت على دماغى لتلخص حال الادب المصرى من وجهه نظرى.

--------------------

توطئه

البطل فى الادب الامريكى هو السوبرهيرو ... شخص لوحده قادر على التغيير و تحدى قوى الطبيعه حتى الخالق... فى الأدب اللاتينى البطل بيتغلب على مصاعب الحياه باللجوء الى الواقعيه السحريه اللى ممكن تعطى للحياه طعم ما.... البطل فى الادب الاوروبى فيلسوف يميل لتحليل الاشياء و التفكير العميق ... أما البطل العربى- المصرى للأسف بطل مهزوم ... الحياه طحناه و لا يستطيع مقاومه التيار و حتى لو حاول... عاده ما تنتهى القطعه الادبيه بمأساه مفجعه تذكرة و تذكر القراء أنه لا خاب من مشى داخل الحائط.

---------------------

تساؤل

ياترى ... هل الادب إنعكاس لظروف المجتمع إنعكاس أعمى و لا الأدب محرك للتغيير فى المجتمع !!!؟

---------------------

رأى

لو لاحظت معايا كده الادب المصرى هتلاقى إن كان عندنا أبطال فاتحين فى عز الانهزام العسكرى و الاحتلال الانجليزى زى حمزه عند يوسف إدريس و غيرة كثيرين و ...لكن و من 52 جالنا بطل يعوض كل الخيالات اللى كانت عندنا قبل الثورة (جمال عبد الناصر) كان عنده مشروع سواء إتفقت مع أساليبه و سياساته أو إختلفت ... بس كان عنده مشروع و كاريزما ... بس المشروع مكملش و البطل إنهزم ... و إنهزم البطل فى الروايه المصريه من ساعتها ... من أبطال خيرى شلبى لبهاء طاهر و نجيب محفوظ و صنع الله إبراهيم وصولاً لأبطال علاء الاسوانى و مكاوى سعيد.

العامل المشترك فى كل الابطال إنهم دول بيعانوا و بينسحقوا تحت عجلات المجتمع اللى مش مستعد يتجاوب معاهم ... و مع إستمرار اللون ده من الأدب المهزوم فى مصر ... مبقيناش بنحترم أى لون تانى من الادب و نعتبرة تهريج أو نكته هزليه نقراه بس فى إطار التعرف على الثقافات الأخرى ...مثلاً خد عندك نبيل فاروق اللى تؤكد الأرقام إنه من أكثر الكتّاب إنتشاراً فى أوساط الشباب و المراهقين فى فترة عدت و له إعتراف شعبى من الشباب بجوده اللى بيكتبه رغم إن ابطاله من النوع المنتصر ( أدهم و نور و فارس ) و لكن لم يعترف به الأدب المصرى (على مستوى النقاد) إلا مؤخراً جداً و بعد ما أبتدى يكتب فى الدستور و إنتشارة يقل ... من الاخر الادب المصرى مقدرش يحتفى بانواع أخرى من الادب المحرض على البطوله و الاقدام .

--------

مثال

رواية الخيميائى لباولو كويللو لاقت إعجاب عالمى فى كل حته فى أوروبا علشان الفلسفه اللى فيها و فى أمريكا علشان فيها بطل منتصر و فى أمريكا اللاتينيه علشان الواقعية السحريه اللى فيها و لكن عندنا الناس كرهتها ... كتير قالوا عنها إنها سطحيه و عامله زى كتب إبراهيم الفقى و ديل كارينجى ... الناس محبتهاش فى مصر علشان ملقيتش نفسها فيها... ملقيتش حد بيشيل زلط !!!

-------------------

تساؤل تانى

التساؤل اللى عندى علشان مطولش عليكم ... ياترى البطل المصرى إنهزم الاول و لا أبطالنا فى البلد اللى إنهزموا الاول و لا المجتمع كلُه هو اللى إنهزم؟

و ياترى لو إن كتابنا المصريين... رجعوا الامل و نصروا البطل المجتمع هينتصر و هيظهر عندنا أبطال و الا اساسا محدش هيحترم اللى مكتوب و الا كل اللى انا بقوله ده مجرد هجص ملوش دعوه !!!!!؟

26 Jun 2008

مسابقه أجمد بريزنتيشن



من الحاجات الجامده اللى لقيتها على النت هى المسابقه دى لعمل أجمد بريزنتيشن قلب فى البريزنتيشن اللى فوق و شوف شروط المسابقه
و فى البريزنتيشن اللى تحت هتلاقى اجمد بريزنتيشن للسنه اللى فاتت
حظ سعيد لكل المتقدمين

21 Jun 2008

150 جمال عبد الناصر

كان ليا صديق بيقول عليا ان انا بياع كلام ... و أنفع أشتغل فى الماركتينج ... و أنى بعرف أتكلم عن أى قضيه بشكل كويس ... مش عارف بصراحه هو ده صح و لا أيه ... بس اللى انا متأكد منه أنى بعرف أسوق للقضيه اللى انا مقتنع بيها

الدليل على كده أن فى الشغل بتاعى (اللى هو فى 150 جمال عبد الناصر) أقنعتهم بالمدونات لغايه ما عملوا شويه مدونات

إشارة مرور

مدونه أشترك فيها مع أتنين معايا فى الشغل ... إحنا لما عملنا المدونه كان فى دماغى أنها تتكلم عن القضايا التنمويه و الأقتصاديه و المجتمعيه المصريه المختلفه ... بس الموضوع خرج من أيدى و أتحولت لمدونه فضفضة و كلام مختلف شويه ... هيتكلم فيها طوسون زى ما وعدنى عن نظريه كرسى الفرعون و نظريه تناكح الحضارات .. و هيتكلم فيها بوو عن الحاجات الغريبه الى شافها فى بلاد بره... تابعوا المدونه و حطوها على الفيد ريدر بتاعكم و يلا بينا

مدونه صبح صبح

مدونه تانيه عاملها بوجى ( المحاسب و زميلى فى الشغل ) لسه مش عارف هيتكلم عن أيه بس هو على السكه أنه يبقى مدون تمام... برضه حطوا بوجى على الفيد ريدر و تابعونا

مدونه حكى مش فارغ

و دى بقى ليها قصه ... فاكرين لما رحت العين السخنه و قابلت مجموعه من الشباب العربى ... عملنا هناك مبادره أسمها شبكه المدونون الشباب العرب ... و عملنالها ويب سايت و حركات ... بس بصراحه الموضوع فشل علشان المدونين أساسا ضد فكرة التجمع ( و انا نفسى واحد من دول) .... المهم قررنا بعد كده نعمل مدونه مش رسميه قوى زى اللى فاتت نجمع فيها مجموعه من المدونين العرب الجامدين و نتبنى فيها قضايا بتمس العالم العربى و نحاول نعمل تأثير ... المدونه بدايه طريق يارب ينجح ... المهم برضه تحطوا المدونه على الريدر و تتابعوها

----------------------

ملاحظه أخيره: انا بيجيللى فى الشغل متدربين بيساعدونى و انا ابتديت أشرط عليهم أنهم يعملوا مدونات ... فالقايمه لسه فيها مدونات جايه

ملاحظه بعد الاخيره : ده كان إعلان مجانى للمدونات اللى فاتت فياريت متنسوش تحطوهم فى الريدر الهى يكرمكم

أأأه كنت هنسى ... لو معندكش ريدر ممكن تشترك فى خدمه الجوجل ريدر

12 Jun 2008

أحرقوا وكر العصفور


لو سألتنى انت ايه يا بهظ اللى ممكن يضايقك فى الدنيا أكتر حاجه هقولك التعصب و التعميم ... انك تاخد الناس على بعض كده تقول عليهم صفه ما فيكون الصعايده كلهم أغبيا او المسيحين كلم متأمرين على المسلمين.

انا مش قصدى أى إهانه ... بس الموضوع و ما فيه إن من يومين كده واحد صاحبى ورانى فيديو على اليوتيوب عن فرقه راب مصريه و فرقه راب سعوديه ... واحده منهم إسمها وكر العصفور ... و الارجح إنها المصريه .... الاتين نازلين شتيمه فى بعض ... و بصورة يعجز اللسان عن وصفها .... منتهى السفاله و العنصريه و الكراهيه.

الكراهيه بتولد كراهيه و عجله العنصريه لو ابتدت عمرها ما هتقف ... و الشباب الهايفه من الناحيتين مش واخدين بالهم باللى بيجرونوا عليه ... بكم السفاله المنتشر على اليوتيوب و كم الناس اللى عماله تتفرج هيبقى من المستحيل تقبل شاب سعودى و تحس انه اخوك ... و بدل ما تعمل ام حاجه مفيده فى حياتك ... هتضيع وقتك فى أذى للبشريه.

انا أعرف سعوديين زى الفل ... و خليجيين بيحبوا مصر .. بس بدل ما ننمى الحب ده و نستقبل اخوات ... زى الهبل بنربى أعداء من نفس الفصيله المقهوره عالميا ... نفس النوع الغبى اللى بيتكلم لغه واحده و دين واحد و عادات و تقاليد واحده و مفيش بينهم حاجه تربطهم و تبقى اللغه بحر بيفرق بينا بدل ما تبقى جسر نتواصل بيه ... هو ده الغباء بعينه.

أعزائى المدونون .. تضامنوا معى ضد الغباء المصرى السعودى ... تعالوا نقول لأخواتنا أن اللى بيشتموا دول ... مش بيعبروا عن رأينا ... تعالوا نقولهم أن اللى هم بيعملوه مش من مبائنا ... و إلا هنبقى إحنا زيهم ... شايفين الغلط و سامعينه و عارفين انه غلط و مع ذلك قعدنا ساكتبن

نداء الى كل العقلاء من الجانين ... تحابوا تراحموا و تعاونوا ... و إلا أكلتكم السلعوه.


7 Jun 2008

يوم التدوينه الحمراء

إنت بتبلبع


فى تعريفات المعجم العربى الفعل بلبع مشتق من المصدر بلع أى أكل و تجشأ و أسم الفاعل منها هو بلبوع و هو الاكل المتجشإ و جمعها بلابيع ... و فى العاميه المصريه السكندريه يرمز للبلبع بأنه بيت الطعام المشوى ... و مرعى الكروش البارزه ... أرض اللذه و التجشأ.

-----------------------

كرشى بياكلنى يا جدعان ... بجد مش قادر ... ماشى بقالى يومين ببالونه قدامى...أصل انا بقالى يومين عمال أبلبع .... و بلبع ده للجاهل اللى ميعرفش أحد أهم معالم الأسكندريه الغذائيه تقترب شهرته من محمد أحمد و جاد و أبو ربيع و دهب و بندق... و يتميز عنهم بالشمول و الشموخ و تقديم مالذ و طاب من المشويات و المحمرات و ما زاد دهنها و سمن لحمها ... المطعم بيقدس اللحمه لدرجه أنه بيقدم الفراخ محشيه كفته ... شفتها دى قبل كده .. فرخه محشيه كفته.

----------------------

نحن نعتقد ان لكل شخص حق اساسي فى متعه التذوق وبالتالي فهو مسئول عن حمايه التراث الغذائى ، وكذا التقاليد والثقافة التي تجعل من هذا السرور ممكن. تقوم حركتنا على مفوم التغذيه الأيكولوجيه، إدراكاً منا بالعلاقه الوشيجه بين الطبق و الكوكب.

الاغذيه البطيئه، جيده و نظيفه و عادله . نحن نؤمن أنه لابد أن يكون للطعام الذى نأكله مذاق جيد، و يجب أن يتم إنتاجه بطرق نظيفه و غير ضارة بالبيئه أو برفاهية الحيوان أو صحتنا نحن و كذلك ينبغى أن يتلقى منتجى الاغذيه أجور عادله من أجل عملهم.

نحن نعتبر أنفسنا مشاركين فى عمليه الأنتاج ، و لسنا فقط مستهلكين ، لأنه بعلمنا لكيفيه إنتاج الغذاء و تشجيعنا له نصبح جزءا و شريكا فى عمليه الانتاج.

(المصدر) مترجم من موقع حركه slow food

--------------------

انا و خالد صاحبى أفتكسنا نموذج إقتصادى للوجبه فى بلبع .... فى قائمه مشتركه يتم تقسيمها على الحضور و قائمه منفصله لكل واحد

القائمه المشتركه تشمل

العنصر

عدد 2 فرد

عدد 3 فرد

السلطات

6

10

المياة

2

4

طبق النشويات*

10

10

الأجمالى

18

24

تكلفه الفرد

9 جنيه

8 جنيه

* طبق النشويات ده هو المحشى بأنواعه و الممبار

و بعد كده يجى مكان الطبق الرئيسى و اللى عاده هو نص فرخه (14 جنيه) أو ربع كباب و كفته (19 جنيه) أو ماشبه من انتركوت أو فيليه أو كفته بس .. كده

يعنى إجمالى اللى ممكن تدفعه فى بلبع حوالى 27 أو 28 جنيه ... يعنى 30 بالتبس .... شوف بقى أنت لو فى ماكدونالدز ممكن تدفع كام.

--------------------

خطتنا الدفاعيه يجب أن تبدأ من الطاوله عن طريق الغذاء البطئ ... لنعيد إكتشاف المذاق الاقليمى و المحلى للطعام و نقاوم التأثير المتزايد للطعام السريع.

باسم الانتاجيه ، تعمل أنماط الحياه السريعه لتغيير حقيقه ما نحن عليه كما أنها تهدد البيئه و المساحه الى نعيش فيها، لذا فالطعام البطئ هو الاجابه التقدميه الوحيده المطروحه على المائده.

و هذا هو المعنى الاصيل للثقافه، تنميه الذوق بدلاً من فرضه ، و أفضل وسيله لهذا هى التبادل الدولى للخبرات و المعرفه و المشاريع.

(المصدر) مترجم و بتصرف من منافستو حركه slow food

-------------------------

ده مش إعلان مدفوع الاجر ... بس السؤال اللى بيطرح نفسه، ليه مفيش للمحلات و البراندات المصريه المعتمده على الثقافه المصريه توكيلات أو فرنشايز يخليها تفتح فى حتت تانيه و بكثرة ... ليه مفيش بلبع فى القاهرة أو فى الصعيد ... البراندات المصريه اللى حاولت تعمل كده .. راحت قلدت البراندات الاجنبيه .. خد عندك مثلا مؤمن و كوك دور .. نموذج من ماكدونالدز و هارديز و كنتاكى و ما شابه... رؤيتى أن البرندات المصريه ممكن تفرقع مش بس محليا .. لا كمان دوليا ... و الموضوع مش بلبع و بس ... عندك محلات العصير زى مكه و القبيصى و خروب كليه الطب... المحلات دى لو بس عملت كود للمواصفات اللى هى شغاله بيها و أبتدت تعمل فرنشايز لأسمها هتاكل شهد ... بلاش شهد .. هتاكل من ورا الموضوع ده طرب

-------------------------

كل بلبع

Eat Balba3

Essen Balba3

Comer Balba3

먹는Balba3

食べるBalba3

manger Balba3

φάει Balba3

بلبع .. كرشى يحبه

أحد إعلانات بلبع إنترناشونال

2 Jun 2008

تأشيرة هجرة لعالم أفضل




تعرف أن قدرة القطاع الحكومى و الخاص على التوظيف فى مصر تصل الى حوالى 7% من حجم الشباب المؤهل سنويا للعمل فى مصر ( المصدر تقرير التنمية البشريه 2008) ...ده رقم مخيف مش كده ... بمعنى أن يا حلو لو ملحقتش تشوفلك واسطه تشتغل بيها أنت هتركن على جنب قفاك يقمر عيش و يبقى فاضلك زلطه و تطلع بره.

بس ياترى هى دى أختيارات الشباب بس ... تعاى معايا نحاول نحصرها شويه

الخيار الأول هو الهجرة

كتير من الشباب بيفكر جدياً فى الهجرة بره البلد و يقولك أهو أى بلد أتعامل فيها معامله مواطن درجه تانيه بدل مانا هنا بتعامل مواطن درجه تالته ... لدرجه أن فى الأرياف وصل سعر التأشيرة المضروبه لستين الف جنيه ( رقم غير موثق و كلا بقيقى من ناس عاشت التجربه) و ده طبعا ليه تأثير فظيع فى عمليه التنميه فى البلد و التحول الديمقراطى ( انا قصدى موضوع هجرة العقول) لأن مين اللى بيهاجر .. ببساطه هو العنصر الكفؤ فى البلد و اللى ممكن بجد يساهم فى عمليه التغيير بشكل إيجابى .

الخيار الثانى و هو إستكمال الدراسه العليا

و هو فى بعض الاحيان غير مبرر لكتير من الشباب اللى أساسا مش لاقى شغل ... انا بيجيللى فى الجمعية اللى شغال فيها إيميلات كتير من ناس فيها السيرة الذاتيه بتاعتها و كل اللى عملته فى حياتها هو الدراسه و الدراسه العليا و مشتغلش قبل كده .. انا مش ضد الدراسه العليا كهدف ... بس ضدها كوسيله للهروب ... يعنى مينفعش تعمل دراسه عليا على حسابك من غير ما تكون جربت بيئه العمل ... على الاقل تعرف أنت عايز تدرس و تتخصص فى أيه بالضبط

الخيار التالت هو أنك تعمل مشروع

طبعا فى بيئه إقتصاديه زى اللى إحنا عايشين فيها كل واحد بيقولك لا ياعم انا مدخلش مشروع ... طب لو عايز أعمل أيه ... لو مستعد يدخل التجربه هتلاقيه بيفكر فى مشروع من السبعه المقدسين ( قهوه – نت كافيه – مركز إتصالات – تاكسى – مطعم –محل هدايا – محل ملابس) ... و ده من غير دراسه جدوى بجد أو أنه يعمل نموذج إدارى مزبوط ... غير الجهل الواضح بنظام الضرايب و الحسابات و أساليب التسويق.

-----------------------------------

ى بلد أجنبيه عريب

ان هنا عيز أتكلم عن أصحاب الأختيار التالت .. الناس اللى بتختار أنها تعمل مشروع فى مصر .. أولا انا بجد بحترمهم جداً .. لأنهم مختاروش الاختيار الأسهل فى الهجرة .. أصل انت لو معرفتش تعمل فى البلد دى مش هتعرف تعمل حاجه فى حته تانيه ... لو أنت من الناس دى و عايز تعمل مشروع أو حتى بتفكر أن ممكن تعمل واحد فياريت تكمل قرايه المقال و شوف شويه اللينكات و أصبر شويه على طول المقال... لو مش عايز و شايف أن ده كلام فارغ ... مفيش حاجه هتقدر تقنعك فمن قصيرها بلاش تكمل قرايه.

---------------------------------------

بس الله الرحمن الرحيم و صلوا على النبى ( محمد نبى و عيسى نبى و موسى نيى و اللى ملوش نبى يصللى على داروين ... المهم ده مش موضوعنا) تعالى نمسك كده مراحل تطور أى مشروع

أولا الفكرة

زى ماقلنا قبل كده معظم شباب مصر بتعمل مشروع ميخرجش عن السبعه المقدسين لأنه بكل بساطه بيستسهل دراسه الجدوى .. يعنى لقى مشروع نجح .. خلاص يلا بينا نقلده... و طبعا ده نوع من الأستسهال ... لكن الفكرة اللى هيقوم عليها المشروع علشان تنجح لازم تكون بتلبى أحتياجات سوق ما أو بتخلق سوق جديد للاستهلاك، بمعنى متجيش فى دمياط و تقوللى هعمل مصنع موبيليا .. انا اسف بس لو مش ضامن إنك تبيع و عارف هتبيع لمين .. بلاش .. دمياط مثلا بلد محتاجه حد يعمل تسويق للمنتجات ... أعمل ويب سايت عليه الديزاينات أو حتى أعمل ديزاينات جديده و بيعها .. كده هتلبى حاجه فى السوق... القاهرة مثلا كسوق مليانه ناس بتصلح شاشات بس الصعيد كله مفهوش حد بيصلح شاشات .. متروح سوق جديده زى دى .. و بدل ما شركات الكومبيوتر هناك تروح لحد القاهرة تصلح شاشه .. هتجيلك و هتلاقى إقبال.

تانى حاجه فكر فيها هى أن مشروعك يكون إنتاجى مش خدمى ... بمعنى الصناعه هى قلب الاقتصاد و صعب قوى تلاقى فيها منافسه هى صعبه فى التأسيس لأنها قايمه على التخصص ... بس مربحه جداً ... و أهم حاجه هى دى اللى هتقوم البلد .. أما الحاجات الخدميه فبتاخد وقتها و بتروح ... موضه و بتعدى.

تانى حاجه الأدارة

مش مهم قد أيه فكرتك كويسه قد ما المهم هو أزاى هتيدرها و ازاى تتعرف إذا كنت بتخسر و لا بتكسب ... أزاى تجذب العملاء ... فى بلد كل حاجه بتيجى من الصين ... المشروع اللى هيكسب هو اللى هيقدر يضمن للعميل حقه فى الخدمه أو المنتج اللى شاريه ... خللى بالك نقطه تفوقك على الصين هى أنك هنا و تقدر تخدم عملائك بشكل فعال يديلهم الثقه لكن لو مش هتخدمهم كويس طب ما يشتروا الصينى الارخص ... الأدارة علم واسع .. بس و لا يهمك الامر محلول.... أنت تقدر تاخد شويه تدريبات فى الأدارة اللى تخليك تعرف تدير مشروعك كويس .. خد عندك اللينك ده لمبادره إنطلاقه تبع شركه شل و اللى بتدى تدريب لأى شاب مصرى بغض النظر عن مؤهله من سن 18 لغايه 32 فى إدارة المشاريع الصغيره و الاهم من غير فلوس خالص.

تالت حاجه التمويل

على عكس ما كتير فاهمين .. بيغتقدوا أن التمويل هو أهم عقبه فى طريق الواحد علشان يعمل مشروع صغير ... مبدئيا فى مصر الصندوق الأجتماعى بقى هو الهيئه المسئوله عن تنشيط و إقراض المشاريع الصغيره و متناهيه الصغر ( خللى بالك تعريف مشروع صغير يعنى مشؤوع تحت سقف المليون جنيه و مشروع متناهى الصغر يعنى تحت سقف الخمسين الف جنيه)، ده غير العديد من المؤسسات اللى ممكن تدياك فلوس و بنسبه إقراض صغيره. تانى حاجه هو أنت مش كنت هتشترى تاكسى بستين أو سبعين الف .. طب ماتعمل مشروع بالفلوس دى ... نسبه 93 من المشاريع اللى قامت من تدريب مشروع إنطلاقه قايمه على تمويل ذاتى. بص متقلقش ... لو أخدت التدريب هتلاقى أن أخر حاجه تفكر فيها هى التمويل إنما الاهم هو الأجرائات

رابعاً الأجرائات

طبعا إحنا فى بلد الرشاوى .. و الجنيه غلب الكارنيه ... انا مصدق أن الخوف من الأجرائات ممكن يكون عائق كبير .. بس خللى بالك الخوف ده جواك أنت بس .. أصل الصندوق الأجتماعى عامل نظام جديد أسمه الشباك الواحد ... بمعنى هو شباك تكتب مشروعك و يدولك جواب و خلال شهر يدولك هم التراخيص و لو مدولكش رد ...الجواب مكتوب عليه أنه يعمل كرخصه بعد مرور تلاتين يوم من إصداره ... يعنى هى مسافه شهر و تقدر تبتدى مشروعك .. وده حتى لو مش واخد منهم تمويل .. على العموم وزارةالماليه كمان عامله قائمه بكل الاجرائات اللى محتاج تعملها قبل و أثناء و المشروع.

خامساً التشبيك

يعنى أيه التشبيك ... يعنى تبقى عضو فى شبكه من الشركات أو المشاريع اللى زيك و الشبكه دى هتخدمك و تضمنك حل لمشاكلك اللى ممكن تقابلها ... انت لو ادربت عند حد من الطبيعى انك تلاقيه بيدخلك أوتوماتيك فى شبكه من العلاقات اللى تخليك مش حاسس انك لوحدك ... عندك مثلاً غرف التجارة و غيره ... الشبكات ده ممكن يكون مشروع لوحده تعمله.. انت بس محتاج شويه قرايه و شويه معلومات ... هتلاقى بدايه كويسه تبتدى منها تحت فى اللينكات

الخلاصه أن الرياده ثقافه و المخاطرة برضه ثقافه ... و هى اللى بتخللى الناس و البلاد تتقدم.. إن مكنتش هتعمل مستقبلك محدش هيعملهولك و اللى ميعرفش يعمل حاجه فى بلده مش هيعرف يعمل حاجه بره .. بص أول حاجه روح قدم فى برنامج زى إنطلاقه و انت هتعرف تعمل أيه ... يلا يا بطل .. صدقنى ...خللى شعارك فى الحياه ... إن فاتك الميرى ... تف عليه و أحمد ربنا.

-------------------

وصلات مهمه

مبادره إنطلاقه – شركه شل

http://www.intilaaqah-egypt.org/

http://www.intilaaqah-egypt.org/arabic/Registration/Register.aspx?id=2

وزارة الماليه – وحده تنمية سياسات المشروعات الصغيرة و المتوسطه

http://www.sme.gov.eg/

دليل الخدمات الحكوميه للمنشأت الصغيرة و المتوسطه

http://www.sme.gov.eg/Service_Guide/Service_Guide.htm

جهاز تنمية المشروعات الصغيرة

http://www.sedo.org/loans_a.asp

مؤسسات مصريه تعمل فى الأقراض متناهى الصغر

جمعية ليد

http://www.lead.org.eg/index_ar.html

جمعية رجال أعمال الأسكندريه

http://www.aba-sme.com/

جمعية رجال أعمال أسيوط

http://www.asba-assiut.com/

الهيئه القبطيه الانجيليه للخدمات الأجتماعية

http://www.ceoss.org.eg/

جمعية رجال الأعمال و المستثمرين لتنمية المجتمع المحلى بالدقهليه

http://www.dbacd-eg.org/

الجمعية المصريه للتنمية الشامله

http://www.dbacd-eg.org/

مصادر معلومات

بوابه معلومات مصر

http://www.eip.gov.eg/

البوابه العربيه للتمويل الأصغر

http://www.arabic.microfinancegateway.org/

وثيقه الاستراتيجيه القوميه للتمويل متناهى الصغر

http://www.arabic.microfinancegateway.org/content/article/detail/23007

مؤسسه التمويل الدوليه

http://www.ifc.org/arabic

30 May 2008

كتابه محرضه


الفترة اللى فاتت قريت روايتين من روايات الخيال العلمى و اللى لأول مرة ميكونش نبيل فاروق هو اللى كاتبهم ... أهميه الروايتين دول تكمن فى أنهم جم فى وقت البلد فيه بتغلى ... و طبعا الواقع بيأثر على الكتاب دول حتى لو بيكتبوا خيال علمى.

الكتاب الأولانى هو " ثورة 2052 ... البدايه" للكاتب محمود عثمان ... الروايه مبدئيا جامده جدا و على حسب كلام العاملين فى مكتبه البلد من أكثر الروايات مبيعا .. و هى بتحكى قصه مهندس مصرى سنه 2023 و اللى هو من الطبقه فوق المتوسطه و اللى بيبتدى يكتشف الفساد فى البلد و مدى إنسحاق الطبقه الفقيره و اللى دايما شايفها من ورا زجاج سيارته .. من خلال إنه بيقابل "غريب" المصور و المدون على النت و اللى بيكشف حقيقه المعاناه اللى بيعشها المصريين.

الكتب التانى و هو روايه "يوتوبيا" لأحمد خالد توفيق ... و اللى هى أكثر تشاؤم و سوداويه و اللى بتاخد التفاوت الطبقى فى مصر لأعلى طبقاته من خلال ان ظهور طبقه من رجال الاعمال الدوليين اللى عايشين فى قريه يوتوبيا فى الساحل الشمالى و اللى حواليها حراسه من المارينز و باقى الشعب المصرى اللى فى الحضيض و أزاى بقى أن هوايات الشباب اليوتوبى هى أصطياد الحيوانات من الشعب المصرى .. القصه عن ولد يوتوبى و صاحبته خرجوا يصدادوا و أتزنقوا وسط الشعب و واحد مثقف حاول ينقذهم ... أنصحك برضه لو مقريتهاش أنك تقراها

المهم بقى و هو أزاى أن كتاب الخيال العلمى فى مصر شايفيين مستقبل مصر بالسوداويه دى كلها ... و بشكل مباشر.. من غير توريه... من إنحلال للطبقات و ظلم إجتماعى و ده إن كان بيدى مؤشر فهو بيشير لحجم السخط المصرى عامه و الرغبه القويه فى التغيير ( كلام معاد و كل اللى بيقراه عارفه) و لكن المهم بالنسبالى إن الكتابين أو غيرهم مقدموش تصور للتغيير ... أخدوا الأمور على إمتدادها و بدل ما يوروا المجتمع تأثير الأشتراك فى عمليه التغيير ... وروه تأثير غياب الأشتراك فيها و كأننا معندناش حلم أو هدف ... بمعنى ليه مفيش تصور لمصر و هى حلوه أو و هى متقدمه أو هى متحده مع الدول العربيه .... كل التصورات سلبيه عن أيه اللى هيحصل لو معملناش حاجه ... ليه مفيش كتابه محرضه إيجابيه ؟؟؟؟

-----------------

تحديث

زودنى الف بتحليل طق حنك عن الروايتين .... تحليل البدايه و تحليل يوتوبيا... لازم تقراهم

27 May 2008

الرأسماليه الأنتقائيه




انا بقالى كتير مابكتبش لأنى خلاص فقدت الامل فى الكتابه ... بس ميضرش أقول شويه فسا لحسن بطنى وجعتنى.
---------------------------
مصر من ساعه الثورة كانت دوله إشتراكيه و بعد كده جه الانفتاح و أبتدينا من ساعتها التحول للرأسماليه .... بس بقينا زى اللى رقصوا على السلم .... بمعنى أخدنا من النظام الرأسمالى اللى إحنا عايزينه و سبنا المهم

أقدر أقول و انا حاطط بطيخه ربيعى فى كرشى أن دى أحد أهم مشاكلنا دلوقتى اللى بنعانى منها و اللى بتظهر فى شويه مظاهر.
---------------------------------------------
أن مثلا إحنا لسه عندنا أمل أن الدوله تعين البشر اللى بيتخرجوا من الكليه مع أن الدوله بالنظام الحالى رايحه فى سكه اللى يروح ميرجعش .. يعنى مفيش خلاص تعينات فى عمل فى القطاع الخاص و دة بيشهد عليه أرقام العماله –اللى هى مضروبه فى مصر أصلا- أن العماله معظمها فى القطاع الخاص ... أخدنا من الرأسماليه الخصخصة و سبنا تهيئه السوق فى الأساس للمنافسه من تشجيع الاستثمار و عمل نظام ضرايب محترم .. مش نظام زى الحالى بيساوى باللى بياخد أربعين الف جنيه فى السنه و اللى بياخد ملايين فى السنه.

--------------------------------------------
إنتشار الفساد بصورة منظمه و منهجيه ... لدرجه أن يطلع شيوخ مستقلون ( من التيار السلفى ) و يبيحللوا الرشوه للمضطر ... لأننا متجهناش و بدرجه فعاله لتغيير نظام الرواتب بشكل يشجع المهارات و العمل الجاد ... أخدنا من الرأسماليه إلغاء الدعم و مرفعناش الاجور اللى كانت قليله بسبب الدعم و محطيناش قواعد لنظام المرتبات و المكافئات
--------------------------------------
أخدنا من النظام الرأسمالى حريه السوق و سبنا حريه التجمع الاهلى لحمايه المستهلك ... بأمارة أن جهاز حمايه المستهلك حكومى ...مع إنه المفروض يكون جهاز أهلى ... نابع من الناس
طبعا سبنا الساحه لرجال الاعمال و مسمحناش لجماعات الضغط أنها تظهر و لسه بنعامل المجتمع المدنى ( حكومه و شعب على السواء) على أنهم عملاء

انا شخصيا مش ضد النظام الرأسمالى بس ضد غياب العداله الاجتماعيه ... بس بلا خيبه ... الناس نا عايزه تهلب و خلاص.
-------------------------------
غاظنى قوى اللى حصل فى أسعار السجائر فى أول أيام رفع أسعار السجاير ... اللى حصل أن شركات السجاير منزلتش فى السوق أى كميه لغايه السعر ما يتعرف حجم الضريبه ... فأتجهه التجار و بصوره عشوائيه لرفع سعر السجائر و بصورة عشوائيه و أهى فرصه .. لدرجه أن علبه الفايسروى الاحمر زادت لحد سته جنيه يعنى بنسبه خمسين بالمئه من سعرها الأصلى ... لما أحنا معندناش مشكله نسرق بعضنا ... عايزينا أزاى نقف فى وش اللى بيسرقنا ... انا بعد اللى حصل شايف أن الشعب مش سلبى ... الشعب المصرى حرامى

يارب تولع باللى فيها

23 May 2008

تفاحه


على ناصيه حلمى لقيتها واقفه و بتسرح خطوط يومى .... حركت راسها بسهوله و و رسمت بضفايرها شجرة ... أخدت منها تفاحه خضرا و بين كفوفها دعكتها بقت حمرا أمريكانى و أديتهالى و أبتديت يومى.... الحياه من غير بنت تحسسك إنك اله رومانى .... وحشه.

--------------

انا أسف لكل اللى زارنى و ملقاش حاجه جديده .... معلش الحياه كانت رمادى اليومين اللى فاتوا

14 Apr 2008

علشان متنضربش على قفاك



هوه البوست ده علشان تسجيل الحدث و تسجيل المكان الجامد ده
بلوج التعذيب فى مصر نشر الكتاب اللى إتصادر علشان تنضرب على قفاك

فبما ان انا بعتز بقفايا و بدعو الناس اللى بتقرا انها تعتز بقفاها

أقدم لكم علشان متنضربش على قفاك

كل سنه واحنا عايشين بقفا سليم

2 Apr 2008

أخيراً إضرااااااااب

أخيرا لقيت حاجه أكتبها

انا كنت أضربت عن الكتابه من فتره و لكن دلوقتى هضرب عن الحياه .... يااه أخيرا هصرخ براحتى ... هقف فى ميدان محطه مصر .... بعلو صوتى هصرخ


حرام عليكم بقى ... الرحمه يا كفره ... عايز أشارة مرور واحد سليمه ... الرحمه عايز تعليم عدل ... يا جدعان عايز أكل و انا مطمن ... عايز اشتغل من غير حكومه تعطلنى .... يارب توب علينا بقى


عاااااااااااااااااا عايز أتجوز ..... ااااااااااااااااه .... أعيش


الدعوه عامه للأسكندرانيه .... و المكان محطه مصر... و الميعاد 6 أبريل ... و تجنبوا الامن بأى شكل


أشفكم هناك

تحديث
عارفين أحسن حاجه فى اليوم ده ايه ... ان بعد ما نغير تاريخ مصر هيبقى عندنا عطله رسميه جديده فى مصر ... أسمها عطله 6 أبريل ... همتكم معانا علشان يوم أجازه جديد

12 Jan 2008

تلاتين يوم إسلام

حد فيكم سمع قبل كده عن مورجان سيبرلوك ... ده يا سيدى مخرج فيلم supersize me فيلم وثائقى بيتكلم عن الأضرار اللى ممكن تحصل لما تاكل ماكدونالدز تلاتين يوم ورا بعض

الراجل ده بعد النجاح اللى حققه مع الفيلم لدرجه انه قدر يغير صناعه الفاست فود بيعمل برنامج فى التلفزيون قايم على فكرة التعايش و التواصل .. بكل بساطه بيجيب واحد من معتقد أو من فئه و يقعده مع عائله من فئه تانيه خالص ... يعنى يجيب أمريكى مسيحى متشدد يقعده مع شاذ أو واحده لا تؤمن بالله يقعدها مع عائله مسيحيه.

تكنيك تنفيذ البرنامج ناجح جداَ فى القضاء غلى الستريوتايبس أو التنميط و القولبه بلغه التنمويين ... يعنى أنك تصنف شخص فى كاتيجورى أو تصنيف معين من غير متحاول تعرفه.

على السايت الجامد ده اتفرجت على حلقه من برنامج مورجان تلاتين يوم و اللى فيه جاب واحد أبيض مسيحى من ويست فيرجينيا الى حى مسلم فى أمريكا و هناك عاش مع عائله مسلمه لمد تلاتين يوم بشرط انه لازم يلبس زيهم .. ياكل أكلهم ... يصلى علشان ربهم ... و يبقى كمان شكله زيهم ... فربى لحيته و لبس جلابيه و سافر للحى ده.

الحلقه جامده جدا و اللى عايز يتفرج عليها يضغط هنا ... ابقوا ارجعوا نتكلم عن رأيكم فى الفيلم

5 Jan 2008

دعوا الحريه تتكلم



أحباط مزدوج – أهلا 2008


كنت دائما أتجاهل مسببات الاحباط لأجل التمسك بأهداب الامل فى واقع أفضل .. لكن بجد أستفزنى خبر مقتل جندى مصرى تانى على الحدود ... على الأرجح محدش هيتكلم عن الخبر ده فى الجرايد ... المستفز بالنسبالى هو خبر من نوع تانى ... هو أن الولايات المتحده الامريكيه بتطالب الحكومه السعوديه بالافراج عن فؤاد الفرحان ... ياسلام... تحس انهم بيشوهوا اى طلب داخلى جميل بجد للمعارضين .. يعنى دلوقتى اى سعودى على نياته هيقرا الخبر ده و من غير ما يعرف مين فؤاد هيقول ابن كلب عميل ...هو احنا بجد حالنا صعب حتى على الكافر؟؟؟.. حاجه وسخه.
انا مش عارف هو احنا هننزل فى الطين لحد أمتى .. ده حتى موريتانيا الغلابه عندهم أرهاب و الجزاير نازلين تقطيع فى بعض و الكويت أول ماجالهم وزيره تعليم عندها أستراتيجيه ... عملوا عليها أستجواب و شكلها كده هتستقيل زى اللى قبلها .
ده يقودنى الى تساؤل مهم ... هل الديمقراطيه هى فعلا الحل للشعوب العربيه ؟؟؟
أفيدونا أفادكم الله.