4 Nov 2008

معضله الحق



فى يوم مشمس من ايام الشتاء كنت شايل شنطتى و مسافر من أسكندريه للقاهرة اللى منها هروح للعاشر من رمضان ، تفاصيل مالهاش لزمه غير انها تعرفك شكل اللحظه اللى انا فيها فى محطه رمسيس و خرمان معيش سجاير و مستعجل أروح العاشر.

رحت لأقرب كشك سجاير و طلبت بكل ذوق علبه روثمان أزرق ... كان فى اتنين واقفين ... قاللّى واحد منهم إن مفيش روثمان... شفت أن فى فايسروى فطلبت علبه قام الراجل مديهالى و محاسبنى عليها بأربعه جنيه و نص.

لغايه هنا الموضوع مفهوش حاجه غير أنه أخد منًى ربع جنيه زياده على تمن العلبه اللى تمنها أربعه و ربع بس، انا بكل ذوق برضه قلتله أن العلبه دى بأربعه و ربع مش و نص و أن انا ليا ربع جنيه كمان ، انا كنت مصر على حقى و هو اتنرفز ... و عاجبك عاجبك مش عاجبك أخبط دماغك فى الحيط ... بقولك ايه مبنبعش سجاير و خد فلوسك يلا من هنا.

هبيت فى الراجل و قولتله: انت بتزعق ليه .. انا معليتش صوتى عليك و مطلبتش حاجه اكتر من حقى ... انت مالك ... خد يا عم سجايرك ... الله الغنى.

رحت الكشك اللى جنبه و انا متنرفز ... لو سمحت علبه روثمان أزرق ... لقيت عنده علبه .. إدهالى و أخد خمسه جنيه و نص ... يا فتاح يا عليم يا رزاق يا كريم ... العلبه اساساً بخمسه جنيه .. بكل ذوق سألته ليه بتبعهالى بخمسه و نص و هى تنمها خمسه ... الراجل بكل ذوق قاللى و اللهى مفيش سجاير فى السوق و إحنا بنجيبها من بره و لو مش عايز خلاص بلاش تشتريها.

مسكت اعصابى و اديته الخمسه جنيه و نص، و مشيت بتحسر على حقى الضايع ... و خلاص هركب أروح العاشر ... بس مقدرتش ... حسيت بطعم مراره جامد فى زورى .... مخنوق جداً... رحت على قسم الازبكيه... وقفت قدام القسم ومش عارف أعمل ايه ... انا مش عارف أيه عواقب الخطوه دى.
المهم دخلت القسم و قابلت عسكرى على الباب.

العسكرى : أيوه يا أستاذ عايز أيه
انا: يا سيدى القصه أن انا رحت أشترى علبه سجاير و كذا كشك أصر أنه يبعهالى أغلى من سعرها
العسكرى: يعنى أنت عايز تعمل محضر تسعيره ... جوه على الشمال
انا: إذا كان إسمه كده .. ماشى

المهم دخلت جوه ده قابلنى صول طلع إسمه إبراهيم بعد كده

الصول: أيوه يا أستاذ
انا: انا عايز اعمل محضر تسعيره
الصول: يعنى أيه محضر تسعيره
( المهم حكيت تانى القصه)
الصول: جوه على اليمين عند النقيب

دخلت للنقيب و لقيت ناس كتير و الراجل وراه شغل ... المهم بصللى و قاللى بكل صرامه .. أيوه يا أستاذ

انا: سعادتك انا كنت جلى من أسكندريه و رايح أشترى علبه سجاير
النقيب: انت هـتهزر ...جاى من أسكندريه تشترى علبه سجاير
انا: لا سعادتك انا قصدى إنى أفهمك إن انا مش من المنطقه ... المهم ان انا رحت كشكين علشان أشترى سجاير الاول مغللى عليا ربع جنيه فى العلبه و التانى مغللى نص جنيه و مش راضيين يبيعوها بسعرها الاصلى و علشان كده انا جيت هنا علشان أخد حقى.
النقيب: يا محمدج روح مع الاستاذ و هاتلى العيال دى هنا ... روح معاه يا أستاذ و وريه العيال دى ... و إياك تتنازل عن حقك.

المهم رحنا أنا و محمد و فعلا شاورت على اللى زعق معايا فى الاول و اللى فى الكشك التانى و رجعنا القسم ... انا كنت متضايق قوى إن الموضوع وصل للمرحله دى ... انا مفيش حد يعنى تحرش بيا زى نهى ... و الموضوع كلله فى نص جنيه ... انا و الله مش فارق معايا النص جنيه ... بس اللى فارق معايا هو حقى فى إنى أتعامل بأحترام فى أم البلد دى.

النقيب : انت ياد أنت و هو ... أنتوا بعتوا للراجل ده سجاير أغلى من تمنها
الراجل التانى (الاول هو الكشك الاول و التانى هو الكشك التانى): أيوه يا باشا
الاول : انا مبعتلوش حاجه
انا: سعادتك انا رحت أشترى منّه و مرضيش يبعللى إلا لو دفعت ربع جنيه زياده و التانى كذلك فأضطريت أشترى من التانى العلبه أغلى نص جنيه
النقيب: صحيح الكلام ده
الاتنين ( حطوا وشوشهم فى الارض): أيوه مزبوط
النقيب: يا إبراهيم ... اعملهم محضر غش تجارى ( مطلعش يعنى محضر تسعيره) و روح معاهم يا أستاذ و إياك تتنازل.

خرجت مع إبراهيم لفناء القسم .. و هنا عرفت ليه النقيب فضل يقوللى إياك تتنازل عن حقك ... الضغط كان كتير .. اللى يقولك حرام و اللى يقولك إيه الواد البخيل،كل ده على ربع جنيه .... بصراحه اللى إدالى العزيمه هو ملازم موجود فى القسم ... داخل بيسأل إبراهيم هو فيه إيه... شرح له إبراهيم القصه ... قام مطلع المحفظه و قاللى يا سيدى ادى الربع جنيه .. مين اللى عايز ربع جنيه.

انا إنفجرت فى وشه ... يعنى بذمتك انا ههز طوللى و اعطل مصالحى على ربع جنيه .. انت باين عليك مش فاهم حاجه ... انا عايز حقى مش عايز أتصالح ... القصه مش فى الربع جنيه القصه فى مبدأ بس يظهر إنك مش فاهم حاجه خالص... و قبل ما اديله فرصه يرد قمت داخل على النقيب تانى و قايله ... يا باشا الناس اللى بره عماله تتحايل علّيا علشان أتنازل و منهم ناس عندك فى القسم.

النقيب قام من الكرسى و طلع بره و تقريباّ سبلهم الدين و الدنيا و اللى هيقرب من الأستاذ أو يقولله إتنازل هيعرف شغله معايا.

طبعاً .. إبراهيم إبتدى يشتغل على طول و بطل دلع ... وهاتك سين و جيم .. سين و جيم ... زى الافلام بالضبط.

جيت فى النص ... و ضعفت ... يا ترى اللى انا بعمله ده يستحق... كل ده على نص جنيه ... الموضوع مش مستاهل... هم كده خلاص إتعلموا الدرس ... كفايه كده ... و ابتدى الاولتنى يدمع كده شويه ... صعب عليا قوى .. انا على فكرة مشتكيتش قلله أدبه .. انا إشتكيت إنه بس مبعليش العلبه بتمنها... قمت داخل تانى للظابط ... قولتله ...و الله انا مش عايز الربع جنيه ... انا كل اللى عايزه إنهم يتعلموا درس و يفهموا إن الظلم وحش حتى لو فى ربع جنيه ... قاللى عارف لو انا سبتهم ... هيرجعوا و مش هيتعلموا حاجه .... انا بشوفهم بيسرقوا الناس بس محدش بيشتكى ... فمقدرش أعمل حاجه .. كل شويه أجيبهم و أهزئهم شويه ... لكن مفيش حد بيشتكى من اللى بيحصل ... دول يترموا فى التخشيبه للصبح و بكرة يدفعوا غرامه و يعرفوا إن الله حق ... و غيرهم هيعرف كده كمان .. انت كده بتساعدنى فى شغلى ... مش مهم إنهم يعرفوا الصح من الغلط ... ممكن جدا يطلعوا و هم مقتنعين إن هم اللى مظلومين ... بس شوف بقى السوق هيحصل فيه ايه بعد كده ... غيرهم كمان هياخد الدرس ... انت مش كتبت أقوالك ... و مضيت عليها ... يلا انت إلحق و مالكش دعوه ... سيبهومللى.

انا خرجت من عنده و مش عارف ياترى ده كان صح و لا غلط ... ياترى انا ظلمتهم و كنت قاسى و عملت ده للإنتقام و الا ده الصح بس علشان محدش بيعمله فانا حاسس بتانيب الضمير ... و يا ترى هما مسئولين عن الوضع ده و لا لأ.

بجد لسه محتار

50 comments:

uosland said...

i think u are soo tafeh

Bahz Baih said...

uosland

Thank you ya man ... really you added to me a new concept of being responsible :D

خمسة فضفضة said...

السلام عليكم ورحمة الله وبركاته

بالنسبه للي انت عملته فاطبعا صح مليون في الميه وياريت الناس كلها ماتسيبش حقها مهما كان تافه ومالوش قيمه والمفروض ان ما فيش اي حد يتنازل عن حقه حتي لو خمسة قروش ولو كل واحد في البلد دي مكان متمسك بحقه ومابيفرطش فيه اكيد كان حالنا هايتغير كتير وماكناش هانضطر اننا نقعد نسمع الاكاذيب والاوهام اللي بيغنوا وبيردوا علي نفسهم بيها بقالهم 3 ايام

بس المشكله في ايه ؟؟؟

المشكله ان اللي بيغلطوا وبينهبوا حق غيرهم في البلد دي كتير اوي وفيهم اللي بيسرق بيضه وفيهم اللي بيسرق جمل ، والجمل قاعد يزعق ويقول ياهووووووووووووووووه انا باتسرق بس ماحدش راضي يبص ولا يسمع ولا حتي يتحرك من مكانه عشان ينقذ الجمل من السرقه وفيه لا مبالاه فظيعه ، اللا مبالاه بتروح بس لما يكون الحرامي هو الغلبان ولما تكون السريقه حاجه مالهاش لازمه ،الغلبان هو اللي بيتقفش وبيتحاسب وبيروح في ستين الف داهيه
وميت صباع بيشاور عليه ويقول امسك حرامي امسك حرامي

وصدق سيدنا محمد صلى الله عليه وسلم لما قال: «إنما أهلك الذين قبلكم، أنهم كانوا إذا سرق فيهم الشريف تركوه، وإذا سرق فيهم الضعيف أقاموا عليه الحد وأيم الله لو أن فاطمة بنت محمد سرقت لقطعت يدها »


بس قولي انت ايه حكايتك مع الربع والنص جنيه مش كان فيه بوست قبل كده بتاع الاتاوه علي تذاكر القطار برضو وصممت تاخد الباقي ...:))))))))

ياريت كل الناس تعمل زيك كده

سلام

Bahz Baih said...

خمسه فضفضه
و الله انا اللى مضايقنى موضوع ان اللى شرق فيهم الضعيف
انا حاسس بأن انا جيت على الغلابه
بس زى مانت قولتى انا برضه جيت على السكه الحديد كمان و اخدت حقى منهم ... القصه انك لما تتابعى اللى بيحصل فينا تلاقى اننا بنظلم بعض كتير و عادى يعنى
و لازم نتحرك شويه ... بصراحه انا مش هبطل اخد حقى ... الموضوع فيه إحساس بالكرامه جامد جداً ...عامل كده زى القاضى اللى بيحكم على حد و ظروفه صعبه .. بس القانون قانون ... على الكبير و الصغير ... التحدى الحقيقى لما تيجى على الكبير ... و كل برغوت على قد دمه ... و غلا انت ايه رأيك ... شفتى الاستاذ اللى فوق اللى بيقول عليا تافه

mohamed fathi said...

اعتقد ان فعلا احساسك انك جيت على الغلابة دة حقيقى بس فى رائى انت صح و المفروض كلنا نبقى كدة . و التصحيح و التغيير الى كل البلد بتطلبوا المفروض يبدا من تحت لفوق . انا عجبتنى الفكرة مع انها محتاجة شوية قلب بس لو كلنا عملنا كدة حال البلد فعلا هينصلح ..

Bahz Baih said...

يا سلام يا توحه ... كنت فين لما كنت هناك ... لازم بقى انت كمان تعمل كده على طول

mohamed fathi said...

انا مش بقول ان الفكرة سهلة .. هى صعبة على اى واحد..بس فعلا لو كل الناس الغلابة و الطبقة المتوسطة اتعلمت انها متسيبش حقها هنعرف نقضى على الفساد فى كل حاجة فى حياتنا .. بجد احمد ربنا ان الصدفة ساعدتك و قدرت تكسر الرهبة فى انك ما تتنزلش عن حقك مهما كان حجمة او قيمتة .. و لا اية ؟

Bahz Baih said...

عندك حق يا فتحى

sarah zaaimi said...

hello bahz!

this situation is crazy whether to be humain or to be just! ? it means injustice and justice are relative fore human being but congratulations you reached justice loool so you r not humain you r from another specy: the bahz

Mizo said...

سيدي العزيز, بعد إذنك,اللي حصلك مكانش المشكلة, ده بس كان مظهر من مظاهر المشكلة الأساسية.

اللي حصل معاك أصله مش اعتداء على حقك, إنما محاولة في الاتجاه الخطأ للتعويض عن صعوبةالمعيشة عند الاتنين البياعين. المشكلة يا عزيزي الناس بقوا بيمدوا إيديهم في جيوب بعض عشان يعرفوا يعيشوا.

بس قي الآخر, انت عملت الصح, و النقيب اللي كان في القسم راجل محترم


معتز نصار

Ahmed Ragab Al-Kotby said...

walahi ya 7ag Bahz el kalam dah gamel w kois enak masebtsh 7a2ak

laken bgd elli medai2ni en el azma de kolaha 3ala sgair? ya3ni kont 5aliha 3ala 7aga testahel ya 3am

Foxology said...

اكتر حاجة فرحتنى انك اتعاملت فى القسم كويس :)

تحياتى :)

Om HAGAR said...

برافو برافو برافو. بجد موقف إيجابي و لازم تكون مقتنع انك عملت الصح و انك مش واد بخيل و لا حاجة زي ما اتقال لك بالعكس.

و كلام الضابط صح حتى لو الاثنين دول خرجوا و هم فاكرين نفسهم ضحية و رجعوا لغشهم و استغلالهم غيرهم هيكش و يخاف يظلم.

احنا للأسف مشكلتنا اننا بنسكت و بنقبل كل حاجة و أي حاجة لما بقى عادي جداً انه يتعمل فينا و معانا أي حاجة.

أكيد انت تعرف ان في حاجات مابنغلاش في الحقيقة لكن التجار بغشهم هم اللي بيكونوا السبب في غلوها و في أزمات اختفاء السلع و غيره غيره و احجنا علشان بنسكت و بنقبل بيستمروا

يا ريت كلنا نكون زييك و بعدين انت لازم تفرح دخلت القسم و خرجت منه و انت بيه يا بهظ بيه

Tarek said...

طب أنا عندي سؤال
على حد علمي و مع الأخذ في الإعتبار إننا مش بلد شيوعية ... التاجر من حقه يبيع بالتمن المناسب تبعا لقانون العرض و الطلب
فمن الأخر من إل قال إن العلبة بخمسة جنيه و لا خمسه و نص ... صاحب الكشك شايف إن من حقه يبيعها بخمسه و نص ... خلاص إل عاجبة يشتري منه و إل مش عاجبه يشتري من مكان تاني

عـلا - من غـزة said...

هاقولك بصراحة ,, يمكن الموقف لو حصل معايا ما كنتش هاعمل كدة .. بس هادا ما بيمنع انك اتصرفت الصح

يعني الراجل هادا صح غلبان واسمه في النهاية صاحب كشك سجاير لا راح ولا اجي ,, لكن شوف اذا اخد منك نص جنيه ومن واحد تاني كمان تص جنيه وتالت ورابع .. حاينتهي اليوم بكام جنيه حرام في جيبه !!

انت اكيد عملت الصح .. لكن زي ما قلت انو علشان ناس كتير بتستصغر طلب الحق في السرقات الصغيرة فا احنا احيانا بنحس بالشفقة وبنتراجع عن طلب حقنا

ان شالله تكون بنفس القوة اذا حصلت معك -لا سمح الله- بموضوع اكبر من علبة سجاير

ما تبطّل ندخين وخلاص :p

نحياتي

حَمُكْشَة said...

واجهت هذه المعضلة!
:)
وهذا ما وصلت إليه: بين البائع والشاري يفتح الله.

في نهاية المطاف، هذه ليست دولة، أعني ليست دولة حديثة.

لنسلم بهذه الحقيقة ولنفعل كما فعل أسلافنا بكل تواضع حتى وقت قريب. التجارة بنظام المقايضة.

سيبك بقى م الكلام بتاع خليك إيجابي ومسئول والكلام دا. التجار الصغيرين جدا دول جشعين عشان ربع جنيه؟ اعتبرها شحاتة مقنعة.

إشمعنى الأماكن "السياحية"؟ السينمات، الكافيهات، القطر، إلخ؟

أنا يوميا بادفع ربع جنيه أجرة عربية زيادة وربع أو نص جنيه زيادة ف جرنان من حين لآخر. ما بقيتش أعترض.

سلمى البنا said...

والله يا بهظ يا خويا كنت لسه حاطلب منك امبارح انك تحط القصة دي في بوست - وكانك بتقرا افكاري -دي الصداقة برده



لان حكايتها عجبتني جدا وان دلت على شئ فانما تدل على اننا دولة ضائع حقها في كل شئ مبسوطة انك حطيتها على البلوج

Sara Swidan said...

بهظ ..

إنت مش غلطان ..

لا على المستوى الانساني ، و لا على المستوى القانوني بطبيعة الحال ..

لكن سؤالي بس اللي بعده هقوللك رأيي ف الموضوع ؛ لو الموقف دة اتكرر ، هتعمل إيه ؟؟

Bahz Baih said...

Sarah Zaaimi
أنت هتعملى زى هيثم كامل ... مخلوق البهظ الذى يستوطن البلوجات و يتغذى على الحواوشى و الهامبرجر
ماشى يا ستى

Mizo
انا معاك إن لأول مره أشوف نقيب محترم ... و هل معنى كده إن البياعيين دول يستاهلوا الشفقه ... و لا انا اللى استاهل الشفقه ... بس بص هما بيكسبوا كام فى لاخر و انا بكسب كام .. اظن انت عارف

ahmed Ragab
يا اهلا و سهلا بيك فى المدونه يا باشا
خللى بالك اللى بيشرب السجاير ده مواطن صالخ ... اصله بيدفع فى تلات تربع تمن العلبه ضرايب ... يعنى انا بدفع من صحتى و شبابى علشان اعملك مستشفى ، رصيف ... علشان كده شرب السجاير مهم يا باشا

foxology
يعنى انت معندكش دم صحيح .. انت كنت عايزهم هما كمان يعاملونى وحش ... انا كنت رحت انتحر احسن

om hagar
انا سالت واحد صحبى قاللى إن اللى قالوه الظابط ده إسمه الردع القانونى الغير مباشر ... حاجه كده ... بس هو الطبيعى إن يببقى فى حاجه إسمها حقوق مستهلك و ندافع عنها يام هاجر ... إلا صحيح إزاى هاجر

Tarek
سؤالك من أهم الاسئله .... لان اه احنا مش فى دوله شيوعيه .. و قانون اعلرض و الطلب شغال ... بس فى النهايه ما يسمى بالغش التجارى ... و كمان فى سعر رسمى لمنتج ما ... على فكرة علبه الروثمان مكتوب جواها ورقه بتقول إن سعرها خمسه جنيه
ثم انا اساسا مرضيتش اشترى من الراجل الاولانى ... بس اعمل ايه إذا كان السوق كله متواطئ... فمقيش المكان التانى اللى تشترى منه اساسا

علا من غزه
اتمنى اننى اكون بالقوه دى لما يحصل اللى اكبر من كده بجد يا علا

حمكشه
و الله يا ريت ... انا اساسا نفسى اعيش فى البريه ورا اسد العالى و اكفى خيرى شرى و اكل اللى اصطاده.. و بس كده

Bahz Baih said...

سلمى
يا باشا القلوب عند بعضها

سارة
مش عارف هيبقى عندى طاقه اعمل ده كل مره ولا لأ ... انا كده مش هلاقى بياع واحد اشترى منه سجاير

اسكندراني في الغربة said...

اكيد الموضوع ميستهلش
واكيد وقتك الي ضاع اهم من الربع او النص جنية
و اكيد مش كل مرة حتلاقي ظابط فاهم
واكيد كان لاذم يصعبوا عليك في الاخر
بس الي انا متأكد جدا منة ان لو كل واحد عمل الي عملتة و هو مقتنع, بلدنا حتتغير كتييييييير

Bahz Baih said...

اسكندرانى فى الغربه
انا عن نفسى بعتبره خير و رميته البحر
بس أكيد مش كل الناس شايفاه خير قوى
بس شكرا على الدعم يا باشا

Amira Helmy said...

Very well written and the story is really interesting... back to reality I think you might seem wrong, but what you have done is sooo right! those people dont lie in 1/4 pound only , they do much more than this. so when they feel that they were punished for such a minor thing they will be aware that al nasb msh sahl!! :D

we kaman anta hazak 7elw an al zabet ragel malw hedomo!!

we ba3deeen matbatal al sagayer we testaraya7!! :P

Bahz Baih said...

أميره حلمى


اولا أهلا و سهلا بكم فى مدونتنا المتواضعه .... نشكر لكم حسن إستماعكم ... و نقدر أرائكم ... بس بجد بجد .. مش هبطل سجاير بالساهل كده ... فالتدخين الأيجابى أقل ضرراً من التدخين السلبى .. و انت عارفه .. انا طول عمرى إيجابى

Anonymous said...

awalan....i'm more than happy to read this...as usual you are the best to narrate a story ever...i feel myself there....n the middle of the incidents!!w da ra2yi feek min zaman ya rafeeq al 7ekayat!!
taaaaaaneyan.........you're never wrong....and hey....don't ask anyone...just follow yr judgement as you already have a kind&a clear heart that can judge right....trust yr heart ya Bahz beih;)

Anonymous said...

2a....that was me...i forgot to sign my name ...it's me.....Dima fm Amman :)))
w 3agabi!

bluestone said...

مشكلة بلدنا يا بهظ ان محدش بيهتم بالحقوق الصغيرة
المشكلة ان قضية الحقوق مش بتتجزء
المشكلة مش في ربع ولا نص جنيه
المشكلة في الاحترام واحترام حقوق الناس فعلا
انا معاك في احساسك بالقلق من انك كبرت الموضوع
بس ما افتكرش واحد من دول هيفكر يبيع باعلى من السعر

Zeryab said...

انت عيل زى العسل
آسف على تأخر التعليق
:**

Bahz Baih said...

ديما
ميرسى يا جميل المحايا على الدعم اللوجيستى ... بس الواحد مش عارف إمتى يمشى ورا قلبه و لا ورا عقله ... انا فى الموقف اللى فات لو كنت مشيت ورا قلبى كنت سبتهم ... بس العقل بيقول ان الحق لا يتجزأ

الحجر الأزرق
معاكى حق جدا فى موضوع الحقوق التى لا تتجزأ ... و الحق الصغير زى الحق الكبير بالظبط ... بس لما ناخد ده لحيز التنفيذ فى الواقع .. هنلاقى الوضع حاجه تانيه
ثانيا : ماذا عن الحديث اللى بيقول فيما معناه ويل لأمه إذا سرق فيهم الكبير تركوه و إذا سرق فيهم الضعيف أقاموا عليه الحد ... انا برضه خايف أكون عملت أو ساهمت فى عمليه الظلم الطبقى

زرياب
يا باشا انت تيجى فى أى وقت ... و زيارتك شرف مستديم لينا .... يا باشا اننت الخير و البكره ... يا باشا و الله العظيم .. و الله العظيم كمان مره ... انا بنبسط جدا لما بتيجى و تسيب كومنت بسيط كده على جنب .. و النبى متحرمنا من كومنتاتك

Laugh Story said...

ينصر دينك يا استاذ بهظ
نورت المحكمة
والله انت عملت حاجة نفسى فيها من زمان
ربنا يخليك لينا
انا مش بشرب سجاير
بس قولى فين الراجل ده عشان اشترى منه:D

Bahz Baih said...

laugh Story
الهى يا رب ينصرك انت راخر يا خويا ... لما تنزل معايا مصر مره هبقى اوريك الراجل جايز تشترى منه بسكويت أو شيبس

qwert anime said...

هو فى ضباط كده فعلا ؟؟؟؟؟؟

Bahz Baih said...

qwert anime
ايوه انا شفت واحد اسمه همام ... بس معرفش ايه نظام الباقيين

مش لازم ندخل فى مصيده التعميم بالنسبه للظباط كمان ..فى منهم ولاد الوسخه و فى منهم المحترم ... لازم منحكمش على حد من قبل ما نتعامل معاه

eZz said...

أنا مبسوط منك والله يا بهظ.. مش عشان فيه بنا سفر جاي وممكن ندفن بعض في صحراء النقب

ههههههههههه

لأ.. لكن لأنك شوفت منظر كويس وحركة حلوة من ظابط شرطة وجيت شاركتنا بيها وحكيتها.. أنا والدي ظابط شرطة سابق

واكيد زي ما فيه ظباط عايزة الحرق! فيه ظباط ولاد ناس محترمة قضوا حياتهم كلها بيشتغلوا بضمير وتعبوا عشان البلد دي

لكن السيئة بتعم زي مااحنا عارفين

جدع انك متنازلتش عن حقك
اللي جايب البلد دي ورا كلمة معلش

Bahz Baih said...

الهى ينصرك يا عز يا خويا .. بس قوللى انت عايش مع السيد الوالد إزاى

blackcairorose said...

انا برضه محتارة

وسألت اختى لقيتها مش قادرة توصل لرأى

وزميلتى مش عارفة اللى انت عملته صح
ولا لأ؟

وقريبتى برضه محتارة

ومتهيألى لو سألت بنت اختى هتبقى برضه محتارة ومش عارفه صح ولا غلط اللى انت عملته


مش غريبة ان فيه كتير قوى زيك وزيى مش عارفين اذا كنا لما نتمسك بحقنا ـ مهما كان صغير ـ نبقى بنعمل الصح ولا
بنزودها؟

والمشكلة ان الامور عندنا لازم تبقى مضخمة، يعنى البياع ممكن يغش بس لأ بيقى قليل الادب فوق الغش، والضابط ممكن يعمل محضر، لكن لأ هو عايز يخليها غش تجارى يعنى ممكن يبقى فيها سجن، وانت كنت ممكن تكتفى بقرص الودن فى القسم لكن فكرت تعمل محضر وتخليها رسمى
والضابط ممكن يزعق لكنه بيشتم ويسب

وهكذا

Bahz Baih said...

blackcairorose
انا الفكرة اللى مسيطره عليا دلوقتى هو إن الراجل الغلبان اللى فى الكشك اللى انا عرفت أخد حقى منًه ... هو مش هيعرف ياخد حقه من اللى ظلمه .. إزاى بقى انا ممكن اساعده علشان ياخد حقه ... و بالتالى ميتظلمش

ياريت لو تسأليلى بنت أختك

abeer said...

طبعا عملت الصح يا مان وأكثر الله من أمثالك كدة هما يتعلموا وغيرهم كمان يتعلموا.انتن ضميرك بيأنبك عشان محدش بقى يعمل الصح كمان المشكلة انك باصص على قيمة الحق المتنازع عليه فتلاقيها بسيطة وما تستاهلش لكن بص للسلوك نفسه تلاقى نفسك عملت صح الصح. انت رأيت منكر ورحت تغيره بيدك مش استسلمت وقلت حسبى الله ونعم الوكيل.
أحييك يا مان

Anonymous said...

برافو عليك
تستاهل جائزة اكبر جحش فى السباق
بس لازم تعرف الليلة ماشية ازاى من فوق يا نجم
وانا مش فاضى اقولهالك دلوقتى
لما اروح هكتبهالك
انا عند رفعت دلوقتى
سلام

بلال said...

يا صديقى طال غيابك
يا صديقى





كنباوى

NG said...

الوضع اللي هما فيه مش مسؤلين عنه لإنه وضع البلد كلها اللي ظروفها زي الزفت !
لكن اللي هما مسؤلين عنه هو الأمانة في التعامل مهما كان مدى احتياجهم.. ياما ظروفهم أصعب لكن أمناء.. التاجر لازم يكون امين في تجارته، مهما كان محتاج ، لإن إذا كان هو مش مسؤلون عن ظروفه الصعبة ، فإنت كمان مش مسؤول عنها ، ومش انت اللي تدفع ثمنها.. وإذا كان الربع جنيه الزيادة ما أثرش معاك ، حيأثر مع حد تاني غلبان..
انت بتساعد ناس تانية كتير قوي حيفرق معاها الربع جنيه ده، وبتساهم في إن واحد غشاش ياخد جزاءه لإنه ما احترمش الناس ولا احترم تجارته.
كلام كبير على ربع جنيه، بس دي مسألة مبدأ.
انجي

Bahz Baih said...

عبير
احييكى انت كمان ... انت من الناس الفاهمه و ده قليل

انونيمس
انا عارفك و هارشك و هجيبك لو رحت اى حته حتى لو كان عند رفعت

كنباوى
اراك عصى الدمع يا بتاع الكنبه

NG
المهم المبدأ يا ست الكل ...مش الفلوس أطال الله عزكم

بنت مصرية said...

Bahz, i got 2 comments:
1. Well Done :D wish i was a man and able to do this.
2. STOP SMOKINGGGGGGG THIS WOULD BE MUCH BETTER!!!!

محمود محمد حسن said...

والله جدع ، مشكلتنا إننا بنبص للموضوع انه ربع جنيه، الموضوع اكبر مليون من الربع جنيه موضوع المبدأ ، الراجل ده ربنا حكمه على رقبتك في ربع جنيه او في علبة سجاير فشفط دمك ،
نصيبه في الدنيا انه طلع بتاع سجاير فما قدرش يشفط من دمك غير ربع جنيه ،

ولو كان ربنا حكمه على رقبتك في اكتر من كده ماكانش حيقول لأ برضه ،

المسألة مسألة مبدأ والمبادي لا تتجزأ ، سيبك من العاطفية بتاعة شعبنا العظيم

على فكرة موقفك ده عجبني اوي الله ينور بجد

Bahz Baih said...

شكرا جدا على الدعم يا محمود
هى دى بقت عاده عندى انى احاول اخد حقى لو اقدر و احاول اتصرف دايما يارب انت كمان تعمل كده على طول

تانى مرة شكرا

MB said...

إنت صح يا أحمد

نوونة said...

المشكلة بس ان الواحد بيفكر ان الراجل ده هو كمان مظلوم من ناس تانية بس ارجع واقول لا اظلم حد ولا اسيب حد يظلمنى

SaSo said...

جــــــــــــدع

kms said...

‫النص جنيه ده يبقي حقك ... وحقك تروح الشرطه
بس لو ظروف و مرافق البلد في حاله طبيعيه

يعني تبقي متاكد ان الشرطي هيتعامل معه طبقا للقانون مش طبقا لحاجه تانيه خصوصا العقد النفسيه اللي بيطلعوها علي الناس

...الحاجه التانيه انك تبقي متاكد ان اعلان عن اي حاله فساد هتتعامل بنفس الاسلوب يعني اللي سرق نص جنيه و مالوش ضهر يتعامل زي اللي سرق نص مليار وليه ضهر

يعني لما تبقي عارف الشرطه بتعمل ايه ..... وتكون بتشوف حالات الفسلد الكبري علي وسائل الاعلام بالادله

يصبح نظام العداله المحتكم اليه فاسد

ويكو لجؤك اليه في هذه الحاله هو لجؤ الي نظام عداله فاسد

يرسخ مناخ الظلم والاحتقام وغياب العداله ... وتصبح مشاركا في جريمته

Bahz Baih said...

kms
انت معاك حق 100% فى الظروف دلوقتى و لكن انا كتبت البوست ده فى 2008 و مكانش الموضوع بتاع الشرطه بالسفاله بتاعه دلوقتى فى 2010 ... بس دلوقتى انا فعلا مش بروح للبوليس فى اى حاجه لان خلاص بقى الشعب فى خندق و الشرطه فى خندق تانى .. ربنا يسهل و نعرف نبنى جسور و نحقق العداله.. شكرا لتعليقك يا صديقى يابن الشعب