27 Dec 2006

التجاريه مالها و ماعليها

كشاب مصرى عادى ... أكيد بتروح قهاوى ، والقهاوى أنواع يعنى فى قهاوى بلدى ، قهاوى شبابى " ولادى يعنى " والتجارية.

البلاستيك هى الكافيهات زى اللى فى المولات والأماكن الراقية .. هى مناسبة للبنات والولاد يتقابلوا ويتبادلوا الرنات والهيافة.

أما بقى البلدى فدى دايما جنبها عربية فول أو كبده وتلاقى الطبقة العمالية بتروحها حيث الشاى أبو نص جنيه وحجر المعسل أبو ربع جنيه وعادة بتشتغل فى الصباحات المبكرة ، وفى الليل بتهش وبتنش.

ما علينا .. تعالى بقى نمسك قهاوى الشباب ، زى الكيخة والصباحى دايما تلاقى فيها اللى ماسك الشيشة هو حبيب الشباب ، وهتلاقى دايما نسخة مكررة من عم على الراجل العجوز المليان طاقة ورزالة بيصدرها فى أول وش للزبون الجديد بس بعد ما تعرفه تلاقيه طيب زى الخساية.

كل دى مقدمة لنروح تانى من القهاوى اللى أنت متعرفهاش ، التجارية ، قهوة المثقفين والفنانين والتنمويين والأجانب هى شكلا وسعرا قريب قوى من القهاوى البلدى بس على المستوى الفكرى والانسانى " كلام مثقفين " مختلفة تماما" والحاجة الرئيسية اللى بتتعمل هى الكلام ، يعنى لا فى دومينو ولا فى مزيكا ولا تليفزيون ، يعنى تقعد تتكلم ، والغريبة انك ممكن قاعد والترابيزة اللى جنبك ناس صوتهم عالى بس صدقنى ما بتحسش بيهم.

وفى التجارية الناس أشكال وألوان ، فى المحاسب أبو دقن وشعر طويل ، وهو مالوش دعوة بحد ، بيجى يطلع ورق كتيير ويقعد يكتب ويكتب والشيشة فى بقه والشاى فى ايد والقلم فى الأيد الثانية وهاتك يا كتابة .

وفى شلة الفنانين المسرحيين ، تلاقيهم قاعدين صوتهم عالى ، بيناقشوا مشاكل المسرح الحديث والمعاصر والدراما عند أرسطو و شكسبير ، ولما حد فيهم يعمل مسرحية يروحوا يتفرجوا ويرجعوا يقطعوا فروة أمه.

وفى شلة التنمويين ، دول بقى فاكرين ان الدنيا وردى ، يقعدوا يحلموا ويحلموا وفى الأخر ياخدوا المقلب المتين ، فأتجهوا أخيرا لأنهم يدوا المقالب لبعض.

أما بقى الفنانين ، فدول ناس فلة عماليين يفكروا فى ازاى يجيبوا تمويل للمشروع الجديد ، وبيكرهوا بتوع المسرح زى كرههم لاسرائيل، بس بيقولوا قدامهم العكس.
وفى التجارية تلاقى الأجانب كتيير ، بييجوا يتفرجوا وياخدوا رمان ولمون وبرتقان

آه نسيت أقولكم ان ما فيش فى التجارية حاجة ساقعة بيبسى – هما بييجوا يدردشوا مع الفنانين والأجانب اللى زيهم, و التجارية مجتمع زعيمه عم محمد ، وأتباعه ، مليان حوارات وناس أشكال وألوان ، مكان كده عامل زى محطة القطر ناس بتيجى وبتمشى وناس قاعدة مش لاقية حاجة ، ربنا ينتعنا منها بالسلامة.

22 Dec 2006

صدرها للى يقدرها

أيه هو تعريف كلمه ثقافه؟ - و أعذروا جهلى- هى شويه الحاجات اللى بتأثر على البنى أدم مننا فتخليه يتخذ ردود أفعال و حركات فى المواقف اللى بتقابله... يعنى انت معندكش مشكله انك تمشى و دراعك فى دراع صاحبك ... لأن المحتوى المعرفى عندك مافهوش حاجه ضد ده ... فى حين الغربى ثقافته بتخليه يشوف ده عيب... رغم إنه مافهوش حاجه أساساً ... تخيل أنت معايا كام حاجه إحنا شايفينها عيب و هى مافيهاش حاجه و تخيل معايا الصدمه اللى هيقابلها الفرد الطبيعى لما يكتشف ده

مين بقى اللى يقدر يقفش الحته دى ويحاول يفكر بتجريد و يحلل عناصر ثقافته و يقبل منها المنطقى و يرفض منها الغير منطقى.. طبعاً هم القرود ...علاء بيسميهم الهاكرز

وأيه بقى عناصر ثقافة القرود دولاً و لا هم مالهمش ثقافه أصلاً؟
سؤال غبى يدل على سطحية نفسى التى تكلمنى.. طبعاً ليهم ثقافة بس متلخبطة شويه... أزاى ؟

القرود أو الهاكرز متمردين بطبعهم... يعنى مايقبلوش السلطه الفاشيه و الأوامر المجرده من الفهم و شغل البصمجية ... يحبوا يحللوا و يفكروا ... و لأن مجتمعنا الفاضل مابيوفرش نظام تعليم محترم , فكل واحد منهم بيتعلم بالطريقه اللى يحبها أو يلاقيها الأول .. و بالتالى كل واحد منهم بيتمرد بالأيدلوجيه اللى هو شايفها صح (حلوه الأيدلوجيه دى)... و فى المجال اللى هو شايفه صح شويه فى مجتمع مدنى.. شويه قى السياسه... شويه فى الكمبيوتر...كده

المهم هو أزاى تنتشر الثقافة دى ؟
كنت سألت نفسى قبل كده سؤال ...هو ليه اللينكس مش سهل فى تنزيله... و ليه فى مواقع كتير فيها ديستريبيوشنس كتير للـلينكس ...بصراحه كنت متضايق قوى... كنت يعنى متأزم ... انا مقتنع بيه كنظام تشغيل بالفكره اللى وراه .. بس مش عارف أنزله و أتعامل معاه ... كم غامض مش عارف أفك أسراره... و لسه لحد دلوقتى قله مش فاهم حاجه... بس عمال أدور ... و أكتشفت حاجه مهمه

اللى بيجى بالساهل .. بيروح بالساهل ... اللينكس قايم على فكرة المشاركه ... كل واحدبيشارك باللى يقدر عليه و يحاول و يجرب و يستلذ بطعم الوصول لحلول ... لكن مش كل الناس تعرف تعمل ده ...أو مش عايزه تعمل ده ، مش عايزه تتعب.. علشان كده مايستاهلوش ... أصلهم أذا ماكانوش هيشتركوا فى الحل هيبقوا جزء من المشكله

أااه ممكن تسأل و تلاقى الف مين يدلك .. بس خد خطوه و أسأل أنت ... و هتلاقى ستميت حل كلهم أحلى من بعض اقعد نقى و أختار يا عبد الستار مادام عندك لينكس ستار (ينفع أسم أصدار لينكس) المهم تدور و أنت و شطارتك و على قد تعبك هتلاقى

الوضع كذلك فى السياسه و العمل الأهلى .. أذا ماكانش الناس تتعب علشان تحل اوضاعها اللى زى الزفت تبقى ماتستاهلش حاجه أنضف ... اللينكس موجود و أمن و أنضف مليون مره من الويندوز و مع ذلك الناس بتتعامل بالويندوز .. و الديمقراطيه أسلوب حياه أحسن و أفضل من الخرى اللى أحنا عايشين فيه لكن الناس مش عايزه تتعب

نصيحه لكل قرد
المعلومه اللى عندك بتاعتك... أنت تعبت فيها ..ماتديهاش الا للقدرها ... أو بمعنى أخر صدرها للى يقدرها.. و دمتم

21 Nov 2006

مصيبة جديده فى الأسكندرية

فى مصيبة جديده فى الأسكندرية.. فضيحه و انا عارفكم تموتوا فى جنازه و تشبعوا فيها لطم

فى حى أسمه المفروزه فى الأسكندرية و الحى ده أشترته هيئه المينا علشان توسع المينا ... و قالوا هيعوضوا الناس و يسكنوهم... لغايه هنا حلو بس اللى مش حلو أن فى منهم سكان عشوائيات بقالهم أكتر من أربعين سنه ساكنين ... الناس دى مجالهاش بيوت تسكن فيها أصلاً أما المحظوظ اللى سكنوه فى مساكن مبارك ( طيب الله ثراه) فده معرض للموت فى أى لحظه نتيجه لأن سلوك الكهربا فى البيوت عريانه و السقوف بتخر مياه أمطار و لغايه دلوقتى أربع أتكهبوا و ماتوا

هنا بقى ماينفعش نقول أهمال ده أسمه فساد و لو رحت هنا هتلاقى تفاصيل أكتر

16 Nov 2006

مذاق اللون الأحمر

من منطلق إن هذا المكان هو مقر البهججه , دعونا نتكلم بالفصحى عن أهم مسببات البهجه فى الغريزه الأنسانيه
طبعاً فى بنات و ولاد بيخافوا من منظر الدم و أنت ممكن تبقى منهم , لكن هل حاولت تتصور المتعه اللى ممكن تحس بيها لما تشوف نافوره دم منفجره من رقبه غير متكتمله

تصور المشهد و تخيل معايا نفسك فى رحى معركه طاحنة و فى ودانك بترن السيمفونيه السابعه و لا التامنه لبيتهوفن, و لا أقولك خليها الخامسة على رأى
سولو, و أنت شايل سيف عثمانلى كبير من النوع اللى بيختبروا حدته بخيط حرير مرمى على نصله من أعلى, و الحصان تحتيك بيصهل و بيقف على حوافرة الخلفيه و شعرك الطويل بيطير مع نسمات الهواء المحمله برزاز الدم اللى بيطرطش على وشك و بيتسلل القليل منه الى شفتيك و تشعر معه بالطعم اللاذع المميز للدم البشرى

لية يا ترى (على رأى
من كام شتا) عمرنا ما سمعنا عن جريمه قتل تلقى فيها القتيل طعنه واحده فقط نافذه , عاده (إلا فى حاله القاتل المحترف) يقوم القاتل بطعن الضحيه أول طعنه نافذه ثم يتبعها بالعديد من الطعنات التى يتناثر على أثرها الدم فى وجهه و على ملابسه ثم يصاب بالهيستيريا و فى النهاية تجد مكتوباً فى الجرائد " تلقى القتيل من 37 ال45 طعنه نافذه)

أكيد فى نوع من المعته مع زياده الأدرينالين فى الدم خاصه فى حالات الموت أو الأقتراب من الموت و الخطر الشديد, و إلا ماكانش ظهرت حاجه أسمها أدمان الخطر من تسلق جبال و تزحلق على الجليد و أنواع الرياضات الخطره, الأنسان لما بيقرب على الموت أو لما بيتفاعل مع الموت بشتى أشكاله بيتطهر نوعاً ما , و بيدرك جوانب تانيه فى نفسه, حتى و لو سوده ... و كتير من الفلسفات بتتعامل مع الموت و الحياه كوجهان لعمله واحده .. ده غير رعشه اللذه اللى ممكن تحسها لما تركب مع واحد بيغرز وسط الشارع بجنون أو بلمسه أذى مع وجبه جنس ناعمه, الجنس اللى مرتبطه بدايته فى فض البكاره بخيط رفيع من الدم.

الموت و الجنس أكبر محركات الحياه الأنسانيه
الموت و الجنس أكبر خطايا الأنسان و أعظم حسناته
الموت و الجنس أخوف المخاوف و أمتع الملذات

ياااااااااااه... أمتى بقى نبطل عنف و خوف و كبت
ياااااااااااه... أمتى بقى أم الأكتئاب ده يروح

و مما لا يدع مجالاً للشك , و لرقبه للدبح , قد توصلنا الى هذه النتيجه الظاهره على رووس الأشهاد, و التى لا تسمح حتى لمجرد طرحها للمناقشه مرة أخرى... فهى كالعقيده؛ أو أشد تعقيداً ... بل هى بالفعل أكثر عمقاً و تؤده
و لهذه الأسباب و أكثر مما طُرحت و مما لم تُطرح و مما فُهمت و مما لم تُفهم, فأننا نقر أن لكل ما سبق و كذا ما لحق, يثبت أن توتر النص أو توتر سطح النص قد لا يعنى بالضروره تساوى الأضداد و الأضلاع , و لا يمكن لهندسة على وجه الأرض حصر تلك الزاويه مهما تكن قائمه أو منفرجه
و كيفما إصطُلح عليه بين العامه و الخاصة و الدهماء و السفله و كلاب السكك... أن الكره أحياناً مستديره, و البيضه أحياناً بيضاويه, و هذا هو المطلوب أثباته
ولأن لكل فكره نخاع ...و لكل نخاع خلاصه ...و لكل خلاصه أوناصه ... فلمن لا يعرف من أين تؤكل الكتف و لمن يعرف اليه مايلى

قد يرفض الأنسان ماقبله بالأمس ,و قد يرضى بما رفضه أول أمس....و بين اليوم و الأمس لنا لحظه ...فى أمور متشابهات
و كما قال الشاعر القديم
يختى هاتى كحك و غريبه بسكومصر
ولعجن و خوته و رص صجات
و نتيجه حسب الحظ
ده كحك بسكومصر
ودى غريبه بسكومصر
ده مشلله عليه ده جميل
مصنوع و مغلف ألى


تمت


شارك فى الأعداد : بهظ, سولو, من كام شتا... و العبقرى حسن اللى ماعندوش بلوج

28 Oct 2006

عنف و فوضى و أشياء مشابهة

الموضوع اللى جاى ده من أرشيف المدونات ... مدونتين كتبوا على نفس الموضوع يمكن قبل مانا أدخل عالم المدونات الرائع ... انا مش عايز أطول عليكم بس الموضوع يستاهل يتقرا رغم طوله و انا كل اللى عملته انى قريت الموضوعين و رتبته من المدونتين بالشكل اللى هتشوفوه ده و تدخلت بالحذف فقط علشان التكرار و الاطاله بس اللى عايز يقرا النص الاصلى هيلاقيه عند الساحر سولو هنا و بعد كده يروح عند الكساندرا هنا و كفايه عليا لغايه كده بس أنصحكم تقروا النصوص الأصليه بعد كده لأن فيها أكتر
--------------------------------------------------------------------------------

أصعد الدرج وأدق الأرض بأقدامي عمداً . لم أنجح أبدا في أشعارك بالفرق بين الخصوصية والسرية . أنا أتي اليك . لا أتسلل الى غرفتك بل أعود الى مكاننا الخاص
فقط عندما تفتح الباب تهاجمني الرغبة في الإختباء في صدرك بالذات . أتنفس رائحتك . أجزم لك أن بأمكاني البقاء على صدرك للأبد . بالذات هذا الصباح . ولكن على أيضا , واليوم بالذات , ان أنزع نفسي منك سريعاً
------------------------------------
لم تنجحى أبداً فى إسكات هذا الكعب أو ربما لم تحاولى بالأساس , فقط تعبرين بهدوء مثير نحو غرفتى , لقد احترفنا الإثارة لنحصل على تلك الخلوة ..... أغلق باب الغرفة فترتمين فى صدرى
------------------------------------
أنه يومنا الأخير إذاً . الصباح الأخير لنا معاً . هكذا انت قررت . لن أرجوك لا أعرف على وجه اليقين إن كنت أرغب حقا في محاولة الأستمرار . ما أعرفه الأن فقط هو أني أتمنى ان تدوم هذه اللحظة . علي أن أحفظ كل تفاصيلها
-----------------------------------
تحبين تلك اللحظة ... أنا أيضاً أحبها و إن كنت أفضلها لحظة أطول ... أفضل لحظاتنا حين تصير مطاطة .... سيؤلمنا طولها هذه المرة .... لنجعلها محددةً إذن .... فقط اجلسى كعادتك بنفس الهدوء على حافة سريرى لأخلع عنك حذائك كعادتى
------------------------------------
أخلع الجاكيت الأزرق الذي أرتديه اليوم فقط لتذكرني دائما كما كنت انت تحب . أعلقه بعناية شديدة على المشجب فيجب أن تكون الصورة التي سأحفظها مثالية في تفاصيلها
عندما أستدير تكون انت قد خلعت قميصك . تحرمني كالعادة من متعة فك الأزرار
تخلع انت عني تنورتي وتحيط خصري بذراعيك. اقبلك لأمنع كلاما قد تقوله عن أن آخراً غيرك سيكون أكثر ملائمة لي وانك بحاجة لتواصل من نوع أخر مع غيري وأن علاقتنا - على جمالها كما تقول ربما من باب الشفقة - مدمرة لكلانا ,أرمي بقية ملابسي على الأرض غضباً ويبدو أنك لم تنتبه للغضب في حراكاتي . أعشق نور هذه الغرفة في الصباح . ضوء بالكاد يكفي لأتبين كل تفاصيلك ولكنه خافت بما يكفي لإكساب وجوهنا مسحة رومانسية أو شهوانية, لا فرق إطلاقا في هذه اللحظة
------------------------------------
غطاء سريرى ثقيل ... ينتظرنا نرفعه لنلتقى تحته و نبث فيه أسرار لذتنا ..... ينتظر إختلاط زفيرنا مرةً أخيرة..... أصبحتِ الآن ترتدين ثيابك أسرع و تقبلين شفتى بطريقة أفضل ..... لا بأس فحين أقبلكِ و أنزلق على سطحكِ الأملس سأشم رائحة صباح شتوي بارد .... ستظل الصباحات الشتوية طازجة هكذا طالما اقترنت بشفتى أنثى
------------------------------------
ترفع الغطاء السميك للإختباء تحته من البرد . لا أشعر بالبرد . ألم تنتبه أبدا أن اذناي ملتهبتان كعادتي عندما اتوتر . أختبىء مرة أخرى تحت الغطاء معك . أدفن وجهي في كتفك
هل تشعر بشغف قبلاتي وتأنيها اليوم بالذات ؟ هل تصلك رغبتي في الوصول الي كل ما قد لا أكون قد وصلت له من قبل في جسمك . يتحسس لساني طرف فمك وعيناك . تبتسم . واثق انت في تأثير أبتسامتك على الجميع
------------------------------------
بالأمس تذكرتك , كنا نتحدث عن الجنس ... اتفقنا على روعته فى الصباح ... لا شئ يماثل جنساً صباحياً نتبعه بفنجان قهوة ساخنة مع سيجارة حنونة .... هكذا يجب أن أبدأ عزف أيامى .... الجنس الصباحى يعنى اكتشافاً متجدداً لأسباب الراحة و الاسترخاء ... أن أفتتح يومى برائحة جسد طازج و ملمس بشرة ملساء يعنى تصالحاً مع نفسى و تمكناً من أدواتى طيلة المساء.
دعينا نفعلها مرةً أخيرة إذن فلن نلتقى مجدداً ... أصبح من العبث إستمرارنا فى لى الحقائق ... يكفينا ما اقتطفنا من العمر .... يكفينا عامان من المحاولة .... استمرارنا هكذا يعنى الاحتراق .... تحتاجين أحدهم كما أحتاج إحداهن ... لا تفهمين ما أقول لكنك توافقين عليه , أليس كذلك !!! ... لنبدأ إذن ما يفهمه كلانا و يوافق عليه أيضاً

------------------------------------
تحب رائحة المطر على رقبتي . ترسم بيداك وشفتيك خارطة جسدي كما رسمتها أنا لك دون ان تدرك بزيوتي العطرية وخلطات سحري التي أستعين بها لأحتفظ بإدمانك علي.
------------------------------------
امنحينى الآن شفتيكِ المرنتين .... إن أفضل حالاتنا حين تقبلينى و ذراعي يحيط بخصرك ... تصير الأمور ألطف و أخف وطأة ..... أصبحتِ تجيدين التقبيل و هذا جيد ... على الأقل صنعنا سوية ما لن ننساه.
------------------------------------
أريد أن أراك من أعلى . أريد أن أحفظ ملامحك حقا . هل تخشى أن أكرر تفاصيلنا مع غيرك؟ لا تخاف فتلك التفاصيل تستلزم شخصا يأس من فهمي كما يأست أنت . هل يخفى عليك حقا أن كل التواصل الذي ننجح فيه هنا هو جائزة ترضية نمنحها لأنفسنا عوضا عن فشلنا المتكرر في حل ألغاز نفسينا ؟
------------------------------------
سأريكِ شامتى مرةً أخيرة .... دعينى أرى شامتك أيضاً فرائحة إبطكِ شهية هذا الصباح
------------------------------------

تفتت كل ما سيبقى لي منك . تعلن بثقة ان كما ما كان لم يكن حباً وان كل ما سيبقى لي ليس حبا . لا . لم أتواطأ معك فالتواطؤ يعني عندي الوعي بأني أصنع معك شياء محدداً . وانا فقط أحببتك بالطريقة الوحيدة التي أعرفها
------------------------------------
كان الأمر يستحق المحاولة على أية حال .... و ليقبلك غيرى فى المصاعد , لكن أرجوكِ لا تطلبى منه هذا , دعيه يختبر رغباتك فى صمت , هذا سر المتعة ... و لكن لا تسمحى له بترك آثار أصابعه عليكِ ... هو لن " يزغزغك " كما أفعل و إن إدعى .... أليس فى الأمر مفارقة ... أن نتفاهم هنا فقط ... ألا نتفق إلا داخل هذه الغرفة .... ليكن , على أية حال لم تكن تلك أبداً غرفتى الحقيقية .... لم يدخلها أحد بعد .... و ربما لم أدخلها أنا أيضاً
------------------------------------
عندما يأتي غيرك - وهو قطعا سيأتي - سأحبه أيضا وإن كان بشكل مختلف, ولكن هذا لن يكون إلا لأن تفاصيلنا ستكون مختلفة
أغمض عيني على صورتك التي أتمنى الأحتفاظ بها . وجهك في أعلى حالته قبولك لي
------------------------------------
لنتوغل أكثر و نغزو مساحاتاً أبعد ..... و أنت تعتلينى هكذا , دعينى فقط أمشط شعرك .... دعينى أعقصه مرةً أخيرةً ..... تعلمين أنى أتوق الى شعر أسود طويل لا تملكيه , ليس خطؤك بالتأكيد فأنا أيضاً لا أمتلك ما رغبتِ فيه يوماً ... أرأيتى التناقض ؟ كفانا لياً للحقائق إذن .... أنتِ لا تحبين رائحة فمى يفوح تبغاً ..... لقد فقدنا تفاصيلنا مع الوقت و علنا لم نملك أياً منها منذ البداية ... علنا استعرناها من خيالات الآخرين .... أعرف هذا النوع من الخداع ..... أعرف الكثير ... لذا أفضل أن نلقى ما نعرفه خارجاً.
عندما تنكسر أكثر الأشياء أهمية فإصلاحها مستحيل لذا هى أكثر الأشياء أهمية ..... لا داعى للمزيد , نحن الآن أكثر وداعة و أكثر اقتراباً من الحقيقة ..... اللعنة على المفارقات
دعينا أيضاً نخرس الراديو , لا حاجة لنا به الآن بما يحدث خارج مكعبنا , يكفينا ما بداخله .... علهم سيذيعون يوماً ما حدث هنا .... عندها سأفتقد زيفنا هذا كثيراً .... لن تفتقديه ؟؟ تعتبريه حباً فاشلاً !! .... عزيزتى لم يكن هذا حباً .... ستذوقين الحب مع غيرى بالتأكيد , أتمنى لكِ حباً ممتعاً ..... ليس الحب بنزهات و لا بصور فوتوغرافية و خطابات و لا ببيتزا صباحية .... كانت تلك حيلاً مشتركة لا أكثر .... ينتظرك الآن شخص غيرى كما أنتظر أنا أخرى غيرك

------------------------------------

نعم سيرتعش جسمي كلما أذكر لمساتك . ستنقبض أجزاء مني أكتشفتها معك وسأبكي غصبا من نفسي لأني رغبت في من لم يفهم من إنفعالاتي سوى تلك الأنقباضات
------------------------------------
شاركينى فقط أنفاسى المتلاحقة مرة أخيرة لنعزف بها سوية فالس الوداع .... سيطاردكِ الجائعون فور خروجك من هنا ..... لتمنحيهم الرضا , و لتخبريهم مصدر بهائك , كان وجهك يزداد نوراً حين أراكِ ..... عذراً نسيت .... كدت أسترسل فى التذكر و أفسد الحفل .... فستنسين اسمى و شكلى و نظرة عينى , ستنسين ابتسامتى التى اشتهيتيها يوماً , ستنسين أيضاً تلك الشامة السوداء بجوار أنفى .... لكنك لن تنسى لسانى العابث و لمساتى اللاهية ... لن تنسى أصابعى و هى تناول الأرض بقايا ثيابك ..... لن ينسى أحدنا لذة اللهاث هنا.
لا زلت تجيدين كتم شهوتك و حبسها خلف عينين مغلقتين .... تتسارع أنفاسك و تبدأين فى طرد لسانك الى الخارج ببطء.
هذا غريب , هذه المرة ليست الأقل متعةً عن سابقاتها و ليست الأكثر أيضاً ... ألا يعنى هذا شيئاً لكِ ؟ ..... يبدو أننا على الطريق الصحيح , يبدو أن غيابنا المشترك لن يترك أثراً قاسياً أو ندبةً مميزة ... يبدو أن غيابنا لن يكون ملحوظاً ..... ينقصنا شئُ ما لنصير ذكرى ..... سنصير مجرد صورة نقف بداخلها شاباً و فتاةً مجهولين لأنهما غابا خارجها .... علاقتنا أصبحت سرية حتى عنا.
ها أنتِ الآن تقبلين أفضل ... و تحسنين إختيار التوقيت , قبلة الرحيل هذه ستصير المميزة لكِ فحافظى عليها .... سأظل هنا فى غرفتى منتظراً و لتعبثى أنتِ بأول شخص تريه خارجها .... فلا فرق بينه و بين من يليه .... صدقينى بعدى ستتساوى الاحتمالات و ستتشابه الاختيارات.
فقط عندما تصلين منزلك امنحينى رنةً أخيرة على هاتفى كى أطمأن أن الجميع فى سلام يكذبون و أن العرافة حين أخبرتنى - فى حضورك - أنى سأتزوج أنثى تكبرنى و لا تحمل كالعادة اسماً من ثلاث حروف كانت صادقة

------------------------------------
أعلم أني عندما أخرج من هنا سيكون وجهي مبتسما رغماً عني وسأحاول بكل طاقتي أن أكتم بكائي كما أكتمه الأن . من ضمن الفشل الكثير الذي طبع هذه العلاقة , فشلت في جعل لقائنا الأخير هو الأكثر تميزاً . لا بأس . لن يكون هناك أبدا ما هو أسوأ من أني فشلت في كشف أسرار علاقة كنت أنا نفسي أحد أطرافها
في طريق عودتي الى المنزل أتخبط بين رغبة في رمي هاتفي المحمول كي يصبح من المستحيل الأتصال بك وبين رغبة في تحقيق طلبك . رنة كي تطمئن على وصولي . بارع أنت فعلا في إضفاء لمسة حنان أخيرة على إحتفالية قتلي
---------------------------------
انا أطلب من ساندرا و سولو يتولوا بقى مهمه الرد على التعليقات لو جت اما انا فمعنديش أكتر من أن أقولهم أكيد أنتم كدا عارفين مدى تفاعلى مع البوستين

27 Oct 2006

الضوء فى أخر الماسورة - 2

أنهارده ليا مزاج أتكلم عن العلاقات, هو فية نموذجين للعلاقات نموذج الجواز و نموذج المرافقة, طبعاً أنت لو منفض دماغك من الدين ... خلاص مالكش فى اللى انا كاتبه , بس ممكن تكمل ... جايز توصل معايا لحل وسط أما لو أنت ليك فى الدين ... تعلالى بقى يا حلو ... أنت بقى قرد و لا جاموسة ( التعريفات مشروحه فى البوست اللى فات) ماهو أنت لو جاموسة فماعندكش مشكلة , هتصبر لغاية لما تتخرج و تشتغل و تخللى أهلك يدورولك على بنت الحلال و تتجوزها, و لغاية لما تعمل كده فمايمنعش أنك تعيش فى أزدواجية و تصاحب و تقضيها فى السكرته, أما بقى لو سعادتك قرد زى حلاتى و ليك فى الدين , هتسأل نفسك ياترى تتجوز و لا ترافق

أبقى اعرف واحده و حبها الأول يا منيل

و لا تاخد فى بالك ده صوت كريم فى دماغى , المهم أنت لو عايز ترافق يبقى هتخسر دينك أما لو هتتجوز فهتخسر كينونتك كقرد, لأنك بكل بساطه هتستك فى مجتمع مش عايزك تبقى قرد و أنت متجوز و هيقولولك ( انت عندك مسئوليه و لازم تشتغل علشان تصرف على البيت ) و بكده هتلاقى نفسك بتتحول واحده واحده الى جاموسة و بتتحول من كونك فنان مثلاً الى صنايعى جرافيكس و تبقى من الشغل للبيت و من البيت للشغل و أحياناً تروح التجارية تشرب شويه شاى

طب حد يقوللى المدام اللى أنت هاتتجوزتها دى أيه ...كيس جوافه لازم تتشال كمسئوليه شويه من أبوها و شويه من جوزها ... امال فين بقى المساواه ... و حقوق المرأه ... و الله اللى انا أعرفه أن كل حق يقابله مسئوليه ... و على فكره انا مش بكتب ده علشان أهرب من المسئوليه بس أصل العمليه بقت صعبه قوى على الشباب و بقوا بيصرخوا منها و لو مش مصدقنى روح هنا

فى أصل الدين كان الشاب بيبقى جاهز للجواز و هو عنده 16 سنه يعنى على سن 13 بيبقى أتعلم حداده ولا تجاره و لا رعىّ غنم و شغال و زى الفل, و بيتجوز ببلحه أو بسوره من القرأن و لو أهلها راضيين عن دينه يبقى قشطه يلا بينا جواز , لكن دلوقتى بيبقى قادر يشتغل على سن 22 و يمكن أكتر لو فى طب مثلا و حلنى بقى لما يبقى قادر على الجواز بتقاليدنا و أعرافنا الحاليه

أما فى المجتمع الغربى فالواد على سن 18 بيبقى مصاحب و البت من سن 16 تقدر تمارس الجنس بحريه تامه و ممكن ينقلوا لبيت تانى و يعيشوا مع بعض كأنهم متجوزين يشتركوا فى الأيجار و الفواتير و لما ربنا يكرمهم يبقوا يجيبوا عيال و عمليه الجواز, ده يوم ظريف بيقضوه لا بيأخر و لا بيقدم فى الواقع شئ

مش معنى كده أنهم عايشين فى نعيم لأن الحرية الجنسيه المطلقه اللى فى الغرب دى أدت لكوارث تانيه مجتمعيه مش مجالنا هنا اننا نتكلم عليها انا بس كنت عايز أخد مثال معتدل عندهم , اللى بيصاحب واحده و يفضل معاها لفتره طويله كأنهم متجوزين لأن هو ده المقابل للجواز فى الدين عندنا من غير تعقيدات مجتمعنا

فمجتمعنا للأسف مش عارف يوفق بين النظامين واللى بيطحن فى النص الشباب و البنات و تلاقيهم بيصرخوا الرحمه و الناس تبصلهم من فوق لتحت كأن المطلوب من كل شاب أنه يكبت غريزه ربنا خلقه بيها و بعد كده يستغربوا لما يلاقوهم عايشين على الأفلام و الصابون

طب فيها أيه غلط لو أن انا مثالاً بدل مانا عايش مع بلال, أعيش مع فراوله و قشطه أكمل دراستى كأننا فى العرف الغربى متصاحبين بس فى عرفنا العربى متجوزين و أهلها و أهلى عارفين و يبقى مصدر رزقى هو مصدر رزقى العادى و هى كذلك يعنى شغل صغنن أو مصروف أبويا و أدينا عايشين و لو انا عايش مع أهلى ماتيجى هى كمان تعيش معايا و البيت اللى بيأكل تلاته يأكل أربعه و شويه و ننفصل عن الأهل لما ربنا يجبرنا بشغل و مش لازم حكاية حفله الجواز الخمس نجوم و مالها الجنينه الصبح دى حتى شكل الحفله أجمل كفايه بقى حرمان ده الحرمان وحش ياجدعان ... مش كده و لا أيه

23 Oct 2006

الضوء فى أخر الماسورة

فى الأيام اللى فاتت ماكنتش فاضى بالمرة .. بس لما كنت بقعد أفكر فى مستقبلى - انا عارف أن الموضوع شخصى بحت بس أصطبر أنت و هتتكيف – كنت محتار و خايف جداً ... يا ترى أيه أخرة اللى بعملة دة – بالمناسبة أنا شغال فى جمعية أهلية – يا ترى ممكن يبقى ليا فى سكة الأدارة و الشفل قى المؤسسات الدولية و لا هينتهى بيا الحال و أتحول الى بق كبير من الأبقاق اللى مالية البلد, و ياترى هل هتحول الى جاموسة من الجواميس المنتشرين على الساحة و لا هبقى قرد كده من اللى قلبك يحبهم

و ده يدخلنى لنقطة تانيه , أيه بقى موضوع القرد و الجاموسة ده... و الله دى تقسيمة للبشر من تأليف أخونا القنان فوله – هو بالمناسبة ليه بلوج بس انا مش عارف اللينك بتاعة – ماعلينا, فوله قسم الناس لأربع أنواع أساسية قرود و قرود فضاء و جاموس و جاموس فضاء و هم
القرد: هو الى زى و زيك كده بيشتغل فى حته مختلفة و عايز يفير فى بلده و مهتم بالثقافة و الفن ... من الأخر حد حقيقى
قرد الفضاء : هو كده زى شباب القهاوى اللى كل أهتمامتهم تنحصر فى الموبايل و موديلاته و العربيات و أنواعها و المطربين الجداد و أخبارهم و ماشابه من أهتمامات بلاستيكيه
الجاموسة: و ده بقى اللى لا ليه لا فى الثقافه و لا فى البلاستيك ... جاموسة من الشغل للبيت و من البيت للشغل .. عقبالك كده لما تكُون نفسك و تبقى جاموسة
جاموس الفضاء: و دة بقى كل جاموسة أقصى أحلامها أنها تبقى قرد فضاء .. الشباب الروش اللى بيحب سيد الصفير و سيد قشطة من نوعية البلح البلح و العنب العنب و الفكهانى اللى بيحب الفاكهة

نرجع تانى لموضوعنا أعتقد انت كده هرشت منطق القرد و الجاموسة , المشكله بقى انك علشان تبقى قرد فى البلد دى بتتعب جداً من أهل رافضين شغل القرود اللى أنت بتعملة ... لجاموس باصصلك على أنك فاشل , لصحاب عايشين فى الفضاء من قرود و جواميس

تبقى حاسس كده أنك ماشى ف ماسورة صرف صحى .. أينعم أنت شايف النور اللى فى أخر الماسورة بس أنت رجلك لسة فى الخرى , عارف أنك ممكن تطلع بس يلعن أبو الوقت اللى لسة بدرى عقبال ما يعدى و الأمور تتصلح و تبقى كده قرد مكفى نفسك

كفاية كده دوقتى بس لسه فى كماله للموضوع بس أهم حاجه علشان تحس باللى انا كاتبه ياترى أنت قرد و لا لأ .. و للحديث بقيه أذا كان لحياه القرد بقية

19 Sep 2006

Day in Heaven

I am sorry that i will not write in Arabic as i used to do, as in where i am i don't have an Arabic keyboard and i hate too much the francoarab writing, and as well i would like to try writing in English.
In where I am, i can only see Green areas, even the mountains are green, in Poland every thing is nice, streets are nice, bars are nice, and girls are very nice.
Actually I started this trip with about 200 photos in the camera memory, and after about three hours the memory became full and i still need to document the moments i am having, this why i am writing now .... there is a lot to record.
we -6 countries group- started this trip at 9am, going to the mountains, which are really wonderful, the name is Szczelinies mountains , and they are located in the boarders of Poland and Czech Republic, it is considered as an environment protected area, where you can not smoke, climb trees, or even kill a snake, we have'nt met any snakes but it was some thing that we got afraid of... we had to climb 665 steps to get to the top of the mountain, then go through a heavy, slippy rocks, in which they call "Hell", to finally reach a very cool, smoothly place called "heaven", where you can feel that you are on the top of the world.
Now we are setting in a nice cafe, people from Egypt, Somalia, Netherlands,Germany, Israel and Poland, Drinking a very nice cafe latte in front of a blue lake, and a green park with some Polish rock music in the background, totally of-line, that i hardly found a pen and a paper to write this shit, now i have to go to join them at the lake and see you guys later.....:)

* By the way the city i am visiting right now called Kudowa Zdroj , but i am staying in another beautiful city called Warclow.

20 Aug 2006

*حا-لا-كه قراءات فى شعر الهايكو

بأى نظرة حاسدة
العصفور فى القفص
يلاحق بعينيه فراشة

الحسد – الجنس – السؤال الأبدى – أقدم مهنة فى التاريخ – الحب – أمرأه جميلة – الحرمان – من أعلى – تنوره بيضاء – أسفلت – دماء

حتى أمام جلالة الملك
*لا ترفع الفزاعة
قبعتها الطويلة

الديكتاتورية – الظلم – نوم الظالم عبادة – الشجاعة – التهور – الغباء – مجرد فزاعة – مفهوم البطل – النظام – الفوضى الخلاقة - المشاركه – وانا و انت

على جانب الطريق
أنبتت زهره
أكلها حصان

البساطه – الطبيعه – البيئه...ياااى – الجمال المطلق – الخير – العدل – الحريه – الزهره – الاحتواء
--------------------------
شعر الهايكو: أسلوب شعرى مستخدم فى اليابان يشبه الرباعيات و يعتبر من أقدم أساليب الشعر فى اليابان
الفزاعه: خيال المأته

18 Aug 2006

محاولة فاشله لكتابه بوست غامض

تنظر اليه بعيون تملأها النشوة، و تلتمع فى عينيها أحاسيس أمرأه محبه و تداعب يديه بطفوله يشوبها الشبق،
أجلس أراقبهما من بعيد و تمتزجنى المشاعر المختلفة، من نشوة لقاء الى أستنكار و محاولات لخداع النفس... الى قلق عارم

أتمنى أختفائهما و أخاف عليهما من الذئب، أرى الذئب يقف هناك متربصاً يلعق أنيابه و يسيل زبده، و يتدخل بكل براءه يُطالب بدوره فى المرح... انا لا ازال متفرج...و هو فاقد الاهتمام... ربما لا يثق بذاته... ربما لا يثق بها... هو فيما هو فيه من رفض و ثوره و... ترقب

يطلب الذئب مراقصتها.. تبتعد و تتوجه اليه بسهام النظرات... الذئب يتابع و انا أراقب... و يتمنع هو و لا تجد كرامتها إلا الإستسلام لأنياب الذئب

و هنا تـأتى فراشه و ورائها ذئب لا يخاف من الفراشات فيراقص الدب الفراشه و تخلو الساحه الضيقه... و يسقط من الدب الايقاع و تمر لحظه صمت... فأبادر بالحركة و أنتزع الفراشة أنتزاعاً... و لكن انتزاع نشوة ... و هنا يبدأ اللحن و تبدأ الرقصات الشبقيه و تزداد شاعريتها مع الألام المتصاعده و تتبعثر الأضواء و تتشنج الحركات و تدوى الموسيقى البنفسجية فى أحضان رقصه دمويه

أغلق عيناى جيداً و أحاول الأحتفاظ بالمشهد و أرانى أسبح وسط كرات بيضاء ضخمه و طريه... أشعر بالأحتواء و تمر الفراشه سريعاً و يسبح هو مبتعداً و يسقط الذئب لأسفل و يعلو الدب لأعلى و تبتعد هى و أطير انا...و القى نظرة أخيره خلفى لأجدهم صرعى...التفت الى أعلى و أكمل الصعود
--------------------------------
ده كان حلم مش فاهم منه حاجه يا جدعان

14 Aug 2006

الحياه أوف لاين

فى الأيام اللى فاتت كنت فاصل الشبكه و بستمتع بالحياه بوشها و ظهرها, و فى الوقت ده جاتللى الفرصه أنى أقابل ناس كتيير من عالم البلوج و العالم الواقعى و نظراً لضعف الذاكره الفظيع الل عندى أخدت للحياه سناب شوتس و سيفتها فى ماى دوكيومنتس و دلوقتى وقت الأب لوود
------------------------------------------
كنت قاعد مع ياسر و يحى و جيفارا و طاعت و عايش و حكالنا يحى عن راجل عجوز فى عابدين ( اللى من المفروض يعزلوها عن باقى البلد) كان بيعدى الشارع فى أغسطس و فجأه جت نسمه هوا نفخت الحلابيه شويه و عطرت الجو بأنتعاش ... فوقف العجوز لحظه و بص للسما و قال ... أيوه كده أثبت وجودك
------------------------------------------
مع الشله الظريفه عملنا تصويت على أحسن كومنت على البلوجات و كان تعليق جيفارا على بوست عند عماد شباك... و أحترت كتير لما اتكلمنا على تانى أحسن بوست ... بعد طبعا ما كان المركز الأول من نصيبى ... انتوا طبعا عارفيين أن أحسن صفه فيا التواضع
------------------------------------------
رغم أنف زنجى و كل المعترضيين ستظل فيروز كراويه هى الصوت اللى جمع البلوجرز من غير أتفاق ... بصراحه مع العدد الكبير الل كان قاعد خايف أعد الأسامى لحسن يتحسدوا و أنسى واحد بس مش هنسى أجتماع البلوجرز الأول بعدد من الداشات لمعرفتها يرجى التوجه لرحاب بسام
------------------------------------------
رحاب بسام... أهو اللى ماقعدش مع رحاب بسام ميعرفش الخام الأصلى للنكته و الضحكه الصافيه.. مش عايز أكمل لحسن تتغر علينا .. أيه ده ياخويا هى فاكره نفسها ميين ... رحاب بسام يعنى
------------------------------------------
مع مجموعه من صحاب واحد صاحبى كنا قاعدين و كنت أول مره أشوفهم فكانوا بالنسبالى فريسه أطلع عليهم مخزون النكت و اللى من كترها أبتدينا نرقمها ...و بقت الرسايل بينا مجرد أرقام تفطس من الضحك
------------------------------------------
أنك تكون كيس جوافه فى محاضره شئ سيئ للغايه بس اللى يصبرك أنك تشوف بطيخه بتتكلم و قال فاكره نفسها فاهمه حاجه... و المصيبه أنها تتطلع فاهمه بجد
------------------------------------------
لما أروح كافيه جديد أحب أطلب من الوييتر أنه يجيبللى اللى هو ممكن يطلبه لنفسه فى الموقف ده ... أصلهم عقدوا المنيو قوى أشى سايدر على نسكافيه بلاك ... أيه ياخويا ده ... خلاص الميلك تشيك موضته بطلت بس بصراحه الحكايه دى جامده قوى ... كل مره بيجيبوللى أحسن حاجه بيعملها المكان
------------------------------------------
أنثى الفيل الأسيوى اللى قتلت مدربتها من غير سبب مفهوم سبب ليحيى مجاهد كابه غير عاديه خلته يقفل البلوج... حد يعقله يا جماعه و يفهمه ان الدنيا فانيه و الزمن كباس و أن دى سنه الحياه
------------------------------------------
أسكتوا مش محمود طلع شيعى ... مش عارف ليه مش متصور أن فى واحد شيعى أسمه محمود الا لو كان محمود الدين أو حاجه كده بتبدى بأيه الله أو نصر الله
------------------------------------------
لو بهيس حد يقوللى و لا كفايه كده خللى عندى دم ...بصوا بقى مش قادر أحط لينكات اللى عايز هيلاقى الناس دى كلها فى السايد بار

1 Aug 2006

من أشد المجاهل الفكريه حلاكه

صديقى الادينى ،،، تحيه طيبه و بعد

لطالما كانت فكره التمرد على الدين و العرف السائد فى المجتمع تابوهاً يخشى الكثير الأقتراب منه، تماماً كجريمة الأنقلاب العسكرى ، إذا تمت أصبح المجرمون أبطالاً و إذا لم تتم ، عودوا فى عداد مرتكبى الخيانه العظمى، لهذا لم يقترب من فكره التمرد الا قلائل فى كل مجتمع.

فى الماضى كان المتمردون يُصنفون بالمارقين الهراطقه ، و لكن بعد أنقضاء العهود البائده أصبح العالم ينظر اليهم كشهداء الحرية، و فى المقابل من أستطاع منهم التمكين لفكرته أصبح فى عداد الأبطال المغاوير الفاتحين ، و أتجه العوام لتمجيدهم ... بل ربما لتأليههم فى حين أنهم وسط أهلهم و ذوييهم لادينيون .. مارقون .. ملاحده .. ديمقراطيون..الخ من النعوت السلبيه

و كما أن الأرض كرويه تدور حول نفسها فالتاريخ أيضا يدور و يعيد نفسه ، فكما قاتل السابقون أيماناً بفكره أو بحثاً عن معنى للحياه و تفسيراً لها .. يحاول بعض المثقفون الأن و لكن بطرق أخرى - رافضه لكل ما توصل أليه القدماء- ناعتين أياهم بالتأخر العلمى بالمقارنه لما وصلوا اليه.. أو على أضعف الأيمان ينادون بوحده الأديان .

من هنا تاتى فكره اللادينى و هو شخص يعتقد بوجود قوى عظمى تدبر أمر هذا الكون يسميها المسلمون الله و المسيحيون يسوع و ربما يطلق عليها الهندوس بوذا، فى النهايه هى مجرد الفاظ لكيان ما أعظم و اجل , فى نفس الوقت هو عنده من المشاكل مع الأديان ما عنده.. من رفض ربما للعنف فى الأسلام أو السلبيه فى الكنيسه المسيحيه أو ما يراه من مشاكل تطبيقيه فى كل دين، فأتبع هواه و اللٌف دينه الخاص لنفسه.

ربما يتهمنى البعض بالتناقض أذا أظهرت للادينيون الأحترام و التمجيد ... و لكن بكل صدق أحترم كل من أحترم عقله و لم يرضى بما لم يقتنع به.. كل باحث عن الحقيقه بصدق ..كل من تألم لمرأى الظلم فى العالم ، و الجوع و الحرب و الدمار..كل رافض للتناقض و الامنطق السائد و هذا طبعاً بأستثناء رافضى الدين لحبهم الشديد للجوافه

الى هؤلاء ... ربما لا أشارككم الرأى و الفكر و لكن أشارككم الرغبه فى معرفه الحقيقه، و لا أستطيع أن أدعى أننى أملك أجابات لفلسفات الكون أو مفاتيح أسرار الخليقه ألا ان عندى ملاحظه

وجدتكم غاضبين من الدين و تطبيقاته ، تبحثون عن الحقيقه معتمدين على أنفسكم تدفعكم طاقة غاضبه و لكن بدن طلب المساعده من القوى العظمى ، تنبهوا فأنتم غاضبون و هذا لم و لن يكون مفتاح الأجابه

هل جربتم التعامل مع الله -جل جلاله- كقوه هاديه و مرشده تمد يدها ذراعا لمن مدها شبراً، هل حاولتم التوكل عليه للوصول الى أجابه فلربما تتوصلون يوما للحقيقه المبتغاه و تصبحون صحابه من النوع الديجيتال

صديقى الادينى .. جرب و لن تخسر شيئا .. فليس فى الأمكان أسوأ مما كان و لك أن تعلم أننى لست مذيعاً و لا محاوراً و لا داعيه أو فقيه أو عالم... انا مجرد تاجر غلبان بضاعتى أكلان الدماغ

--------------------------
هوامش
العنوان أهداء الصديق محمد غوض
تشبيه الجوافه مأخوذ عن جيفارا
اشكر بصفه خاصه صديقى محمد رشاد للحوار الممتع الذى جئت منه بمضمون التدوينه

14 Jul 2006

بلكونه على روحى


كان الكلام زمان عندى زى الحريم المتداريه, فى بيت قديم ورا شباك بمشربيه و ماكنتش عارف ألاقى
سكه أفضى بيها الطاقة ديه , كنت فاكر إن مواهبى الأدبيه ... حاجه كده زى عجين المهلبيه , و إن ماليش فى حرفة الكتابة ديه... لغاية ما ظهرلى اللى ما يتسمى و دلنى على سكه تانيه ... صفحه حقيره فى سايت مستخبيه... يقرالى فيها تلات تلاف و ميه

كان التدوين بالنسبه لى زى هوايه ملكٌية... مفيش حد بيمارسها و يطلع نص لبه مقليه و علشان الكلام كان جميل, كانت صورة البنى أدمين فى دماغى قال أية ألهة رومانية...يأما شيطان يا ملاك يا بنت حورية...و لما أبتديت أعرفهم بشكل شخصى لقيت كل واحد منهم فى سكة تانية, اللى ماكنتش طايق بلوجه بقى صديق ميه ميه و اللى ماكنتش قادر أبصله من الهاله اللى رسمتهاله طلع بنى أدم ... أى والله بنى أدم, مش ملاك و لا بنت حوريه

فقعدت أفكر ... هو التدوين أيه غير بلكونه فاتحها على روحك... يأما أنت مجملها علشان الناس و الله أعلم باللى فى النيه... يأما هى منشر علشان روحك تبقى نطيفة و مكويه

مبقتش عارف أحب أو أكره شخصيه أفتراضيه , ياخى أم التكنولوجيا على أم فناطيس العولميه

ياريت ياللى مانتاش عارف شخصيتى الحقيقيه...قوللى...بلكونتى فيها أيه؟... أصل مرايتى مطفيه!!!؟

7 Jul 2006

القط و الفار

من أمتى كان الفار حيوان محبوب , تتعاطف معاه أدام القط ...أقولك انا ... من ساعة ما عملوا توم أند جيرى..طب بص معايا كده على فيلم أسبيدر مان.. يخلى العنكبوت حيوان بطل ..طب بلاش.. كاسبر..هو فيه بزمتك شبح لطيف.
دى يا جماعه أساليب الثقافه الامريكيه...و من غير أتهامات بنظريه المؤامره و تعالى نحليلها ... السعله الامريكيه محتاجه مش بس دعايه.. لأ و كمان قبول... بمعنى أنه لازم يخللى الجلبيه.. ياى.. حاجه بيئه علشان البنطلون الجينز يبيع و يكسب...الفول كوخه.. علشان خاطر البرجر... بكل بساطه بيعمل الامريكى على خلخله القيم اللى فى المجتمع لزرع قيم جديده..و معاها سلع جديده
بس دى برضه مايعنيش أنهم أشرار... هم برضه وحدوا لغه العالم على الانجليزى ... عملوا العولمه فمجالات الاتصال و فى النهايه لو أنت أمريكانى انت عايز بلدك تبقى أحسن بلد.
طب أحنا المفروض نتصرف أزاى؟؟؟
مش عارف و الله و ما أقدرش أقول ان انا عارف بس و الله فى شعوب رغم كده لسه بتقاوم عن وعى سيطره الثقافه الامريكيه علشان تحتفظ بثقافتها زى الشعب الفرنساوى و الالمانى
و برضه شعوب زى اليابانين و الكوريين أستسلموا للغزو و الجيل الجديد دلوقتى أمريكانى طحن و مع ذلك شعب متفدم
برضه أحنا نعمل أيه... مش عارف بس المهم نتحرك و الا هنبقى لون حائل تراه من أعلى نقطه فى العالم

1 Jul 2006

القافلة


كنت أعبث فى مكتبة جدى عندما وقع فى يدى هذا الكتاب , لكم بهرنى صفار أوراقة و تخيلت اننى سأجد فيه الحكمة المفقوده و غاية العلماء و عندما فتحت صفحاته تصببت عرقا خوفا ًمن تمزيق صفحة أو هامش ما.
كان كتاب أحاديث و لكم أعجبنى أسلوب الكاتب و أن كان ينتمى لزمان غير الزمان الا أن المضمون مناسب جدا لوقتنا هذا و اليكم أهدى هذه الصفحات
------------------------------------------
الفصل الثانى عشر- كتاب الركوب

أصطلح العلماء و أتفق معظمهم بأختلاف أبن سيرين و القذفى على أن القافله هى كل صندوق معدنى يتحرك على أربع فى مسار محدد سلفا من قبل عسكر الدرك

عن أبن مسعود الزهرى عن أبيه عن جده قال: حدثنا الشمعى عن حديث البويصرى عن أداب ركوب القافله قائلا: اذا ما جلست فتيسر لتفسح المجال لأخيك المتيمن و أياك و القلاب فأنه مهلكه لك و لرجولتك و اذا ما أردت ان تنزل فعليك بالتصفيق للحادى قبل المكان بمكان و الا نابك من السير ما لا يحمد عقباه و أياك و اللهو فى القافله فانه من الفواحش و ساء سبيلا"

وعن أبن اللوزى قال سمعت عيسى الحادى يحدث صبيانه فقال:" الحادى هو رأس القافله فلا يجب أن يدع أحداً يعترض عما يفعل و أذا ما رأى زبونا فى قارعة الطريق فليغتم الفرصه فأنما هو ربع دينار و كل أربعه منه بدينار... و لكن لا تدع زبونا يتملك منك فأذا ما رأيت علامات الشباب باديه فى وقفته فلا تقف له فأنه من المفيد مشيه ...و لتشدو كما تريد و بما تريد و على المتضرر ترك القافله فأنما أنت الحادى و لا حادى للطريق غيرك"

تعليق الفقير الى الله كاتب هذه السطور

ويل للعالم أذا ما تحكم فيه حادى وأصبح الكل رهين قافله
ويل للعالم أذا أصبح العلماء كلاباً تنبح و القافله تسير

و كما قال الشاعر

و كأننا حائط كتب الزمان عليه
هنا يأيها المزنوق ترتر
--------------------------------------------------------------------------------
نقلاً عن " دخان الكلام فى غرزه بهظ الفنان

17 Jun 2006

تنويعات على فنجان قهوه

لكم كرهت تلك التدوينات التى تتحدث عن فقدان القدره على الكتابه, و لكن عندما أصبحت غير قادر على الكتابه أنتابتى مثل هذه الافكار , و لكننى نبذتها على أعتبار أنها رجز من عمل الشيطان, و لكن عندما جلست مع هذا الصديق على المقهى و لم نجد أيا من أصدقائنا قررنا أن نلعب لعبة على أد لحلفك فكان هذا الناتج من السخام الفكرى الذى أنصحكم ملياً بعدم قرائته على العموم انا كتبت بالأزرق و صديقى كتب بالاحمر
---------------------------------------
كان جالساً فى المقهى يحتسى القهوه الخاليه من السكر...مشروبه المفضل...وحيداً , و كانت هى فى المائده المقابله له ترمقه بدون أهتمام منشغله فى أفكارها الدائره فى رأسها الصغير
---------------------------------------
هو لا يهتم لوجودها...ربما لا يلاحظها تماماً و إن كانت عيناه مثبتتان عليها الأن بعد أن فارقتا فنجان قهوته...ربما نسى قهونه و صارت عيناه تشربان الفتاه المقابله بدلاً من أستكمال القهوه
---------------------------------------
أشٌرف فنجان القهوه على النفاذ و قرر الرحيل بعد أن أنتظر طويلاً ظهور محبوبته...لكم تذكر كل لحظاتهم معاً ...حضنها الدافئ عندما يستيقظ من النوم
---------------------------------------
ربما هو لا يتذكرها لأنه يفتقدها بحق هو يشعر أحياناً أنه بحاجه لتذكر شيئاً ما ...يحب أن يشعر أنه أمتلك يوماً ما..شيئاً ما ...كان قد قرر الرحيل من المقهى...لكنه لم يرحل
--------------------------------------
لكم كرهت هى تلك المقابلات التى يطلبها منها رب عملها ...يريد أن يقابلها فى المقهى حتى ينفرد بها بعيداً عن أعين الزملاء..تعرف غرضه و لكنها لا تقاومه
--------------------------------------
ووسط ضجرها من كل هذا...لاحظت شئ من الأستمتاع بنظرة الغريب على المنضده المقابلة, هى نظره لا تحمل أعجاباً أو أنجذاباً ...كأنها نظره ضلت الطريق الى شئ...ثم أنتهى بها المقام على وجهها المرهق...أرتبكت جداً...لكنها لم تتضايق أو تغير المنضده
-------------------------------------
يقترب منه طفل أشيب الفودين يحمل مناديلاً و كما هائلاً من متاعب الحياة يعرض عليه أن يشترى مندايل و لكنه لا يكترث له..و لاحظت هى كل هذا, و بعد أن فرغ منه الصبى تنادى هى عليه
-------------------------------------
هى لا تريد شيئا بحق من الصبى ...و لا تعلم تحديداً لماذا نادته ...ربما لأنها أرادت أن تصنع بينهما وهم شئ مشترك حتى إن كان هذا الشئ هو صبى يبيع مناديل...و يحمل متاعب الدنيا... و فودين أشيبين
------------------------------------
تأخذ منه المناديل و تعطيه نصف جنيه و بعد أن يبتعد خمس خطوات تقرر أن تنادى عليه و تكتب على منديل منهم الساعة بخمس جنيهات و تسأله أن يعطى المنديل للرجل على المنضده المقابله
------------------------------------
لا يكاد الطفل يبتعد خطوتين حتى تناديه مره أخرى و تأخذ منه المنديل ذو الرسالة...و تراجع ماكتبته فى دهشة, لا تعلم لماذا تفعل ذلك...هى ليست عاهرة أو مغامره أو باحثه عن متعة سريعة ...ربما أرادت أن ترتكب فعلاً و جنوناً يكسر إيقاع اليوم الرتيب و بمجرد أن تأخذ المنديل و تمزقه ...تلاحظ أن نظرته فى أتجاهها إكتسبت شيئاً من الأهتمام وإن لم يبدو عليه أنه من هذا النوع الذى يبادئ امرأة لا يعرفها بالكلام
------------------------------------
فينادى هو على الولد الصغير و يقرر شراء مناديل هو الأخر بدون أن يدرك الداعى إلا لتحقيق رغبه تملكت منه...فقط سيفعل ما عليه و يشترى مناديل
-----------------------------------
فتنشأ اللغة فى لحظة...وربما تصبح لغة ذات قواعد (و هنا يقاطعنا دخول صديق أخر مما يضطرنا الى أنهاء اللعبه بأسرع وقت ممكن )و يقرر القيام من مكانه ليفاتحها الكلام و لكنه يرى صديقته على باب المقهى فيسقط جالساً و تقوم هى راحلة تصحبها
نظراته

-----------------------------------

و حرصاً منٌى على مشاعر الصديق الذى شاركنى اللعبه و تبرأ مما كتب... لم أذكر أسمه و اللى يعرفه ما يقولش لحد بقى هشششششششش

8 Jun 2006

نورت مصر

نورت مصر يا معلم...نورت مصر... نورت مصر... نورت مصر
------------------------------------
متنساش لما تيجى تشرب من ميه النيل علشان ترجع مصر تانى ... ترفع قضيه على الحكومه اللى ملوثه النيل... و نورت مصر
------------------------------------
السجاير الكيلوباترا فخر الصناعه الوطنيه... متتخضش من الخشب اللى فى السجاير ... دى مسابقه كل ما تجمع خشب أكتر فرصتك فى الفوز تكتر... و نورت مصر
------------------------------------
مصر هو بلد الهرم... (المقصود شارع الهرم) ... لو بتلبس جلابيه بيضا و بتدفع بالدولار يبقى كل شئ تحت أمرك... و نورت مصر
-----------------------------------
مش معاك باسبور اجنبى... لو مصرى دايقك فى مصر و لا يهمك ... جزمتك أنضف منه حتى أسأل البوليس ... أنت هنا ملك... مش بقولك نورت مصر
----------------------------------
مصر... بلد الأمن و الأمان و الأستقرار... و حط خطين تحت الأستقرار دى... ماتخافش من البوليس لو قافل وسط البلد... دى علشان الأستقرار... و نورت مصر
-----------------------------------
نورت مصر يا معلم... و ياكش تولع... مش بقولك نورت مصر

2 Jun 2006

ليه ندون أقل لما ممكن ندون أكتر

لو سمعت عن التدويين فى الدستور أو من حد من أصحابك و عايز تعرف هو أييه , ركز فى الايميل ده لأخره و فضى نفسك علشان تتابع اللينكلت و تستكشف العالم الجميل للبلوجرز ( المدونيين) أما بقى لو سعادتك مش فاضى فياريت تقفل الايميل ده دلوقتى و تبقى تفتحه لما يكون عندك عشر دقايق على الأقل... أو أقولك كمل قرايه و بعدين أفتح اللينكات.... يلا بينا

البلوجينج أو التدوين عباره عن مواقع شخصيه بتوفرها مواقع متخصصه بس بتتميز بسهوله التعديل و التنسيق و بتعتبر هى و الأيميل أكتر الحاجات اللى بتتفتح على الأنترنت... لأنها ببساطه بتتكلم عن أى حاجه و كل حاجه و بتعبر عن رأى صاحبها... البلوجات فى منها الشخصى و السياسى و الدينى و اللى بالى بالك .. بمعنى أصح البلوجات مالهاش سقف حريه أو رقابه و كمان من الممكن تحافظ فيها على سريه شخصيتك

طب أيه الفرق بين البلوج و الجريده ... البلوج شخصى و حميمى يعنى تحس كده أن اللى كاتب المقال واحد بيكلمك كده... وشه فى وشك مش زى الجرنال تحس أن لجنه هى اللى كاتبه المقال... كمان البوستات ( التدوينات) أقصر و أكثر أختصاراً و فيها أسترسال غير عادى لدرجه أنك ممكن تتسحل فيها تلات أربع ساعات متحسش و كمان التدوينات تلاقيها مترتبه أوتوماتيكى فى البلوج من الأخر يعنى أخر تدوينه تلاقيها فى أعلى الصفحه و هتلاقى أرشيف للتدوينات اللى فاتت... بس اللى جامد هو السايد بار ( الحته اللى فى الجنب) دى مساحه كل بلوجر حاطط فيها لينكات للمواقع و البلوجرز اللى هو بيروحها فمن الأخر لما تخش بلوج واحد تقدر تبحر بمعنى الكلمه فى بحر البلوجينج.

طب انت تعرف هو فى كام بلوج فى مصر لوحدها ... طبقاً لموقع
Technorati Blog (http://technorati.com)
مصر كان فيها حوالى خمسمائه بلوج زادوا فى أخر ست شهور و وصلوا لألف بلوج و لسه بيزيدوا أما بالنسبه لموقع الشامل فى المدونات العربيه http://arabblogcount.blogspot.com/
فبيقول أنهم حوالى 300 بس دول النشطين اللى سجلوا و يعنى تقدر تقول أن هو ده العدد الواقعى للناشطين على البلوجسفير

يلا بقا نبتدى ... علشان تعمل بلوج أحسن سوفت وير هو
http://blogger.com
و ده أسهل واحد و كمان بوردد ( مدعوم ب) محرك بحث جوجل يعنى جرب تعمل بحث كده عن بهظ هتلاقى المدونه بتاعتى أول حاجه تطلعلك ... و لو عايز تعرف بالتحديد أزاى تعمل مدونه فى واحده أسمها بنت مصريه http://bentmasreya.blogspot.com/
عامله مدونه أسمها ألف باء تدوين و ده اللينك بتاعها
http://bmadvice.blogspot.com/

لغايه هنا أنت ممكن تروح مع نفسك لمدونه الشامل فى المدونات العربيه و تفتح اللينكات و تتفرج على البلوجرز كلهم و كمان تروح للمدونه اللى فاتت و تعرف أزاى تعمل مدونه لنفسك ... لأن فى الجزء اللى جاى هاتكلم عن أشهر البلوجرز المصريين و على فكره دا رأى شخصى بحت و براحتك تعرف مصلحتك -_-
------------------------------------------------
http://hadouta.blogspot.com/
حدوته (رحاب بسام) انا باسميها الأستاذه و فى رأيى الشخصى أروع من كتب خواطر شخصيه هى فاتحه البلوج بتاعها من زمان و يوستاتها تستحق أوسكار البلوجات خاصه رز بلبن لشخصين و تنويعات عينيه على مقام ليه الكبير لازم تقراها قبل أى حاجه
------------------------------------------------
http://sam7oni.blogspot.com/
سامحونى ماكانش قصدى (غاده) حسب تعبيرها البلوج عباره عن تراهات شخصيه لكن حكايه ... غاده بتكتب عن الأفلام اللى بتحبها فتخليك تتفرج عليها و لما بتتكلم عن المزيكا تحس أنك عمرك ما سمعت مزيكا قبل كده هى نص يابانى نص مصرى و النصين أحلى من بعض أول مره دخلت عندها فضلت أقرا ست ساعات ورا بعض تخيل
--------------------------------------------------
http://tawasol.blogspot.com/
أحمد نصر (تواصل) واحد من أقدم البلوجرز و سر تميزه أنه أتكلم عن أخلاقيات التدوين اللى انا باعتبرها دستور الكتابه فى البلوجات
-------------------------------------------------
http://jarelkamar.manalaa.net/
جار القمر (هيثم) هو مراسل البلوجات الصحفى قى الاسكندريه و صاحب السبق الصحفى فى أحداث شارع خمسه و أربعيين و الفتنه الطائفيه لدرجه أن العدد اللى بعد كده من الدستور نشر تدوينته بالكامل فى الصفحه التانيه أسلوب أييه... كلام أييه هيثم بجد ...أيييييه حكايه
----------------------------------------------------
http://garad.blogspot.com
http://karakeb.blogspot.com
http://alkalema.blogspot.com
جيفارا و سولو و بيانست الثلاثى الاسكندرانى ... جيفارا أكئب أنسان على وجه الارض بس أسلوبه ساحر و سولو دون جوان البلوجات بالكاس و السيجاره فى أيد و بنت أموره فى الأيد التانيه و بيانست نموذج الانسان الحساس اللى بيعرف يلقط التفاصيل...و غير أنهم كل واحد بيكتب فى مدونته عاملين مع بعض مدونتين جامدين مووت ... روايه على أد لحافك و دى كل واحد فيهم بيكتب فصل و مش عارف اللى بعده هيكتب أيه عملوا لغايه دلوقتى 8 فصول و موتوا فى التامن البطل و على حد قولهم أن كده الروايه أبتدت... و التانيه جزمه حريمى اللى بيتكلموا فيها عن نظرتهم للستات ..و فى وجه نظرى أجمد بوست فى جزمه حريمى واحد أسمه يا لعبك يا فايزه لما تكونى عايزه لسولو... بس بوست كلللللللللب
----------------------------------------------------
http://keesfeshar.blogspot.com
كيس فشار (عماد شباك و زنجى و سولو) بيتكلموا فيها عن السينما هتلاقى فيلم بيتعرض ده معناه أنهم مستلمينو نقد و أفيش فيلم جاى و ده معناه أنك تلحق تتفرج عليه قبل العرض علشان تستمتع بنقدهم للفيلم عرضوا لغايه دلوقتى
fight club
Taxi Driver
Troman Show
الحق بقى شوف الفيلم اللى جاى قبل العرض
-------------------------------------------------
http://eskandaranaya.blogspot.com
مدونه أسكندرانيه بيعرفها جار القمر ب" هذه مدونة نمارس فيها ما نخفي من عنصريه وشوفينيه وحب الذات.. نحن حليقو رؤوس سكندريون .. نؤمن اننا شعب الله المختار .. و معمرو ارضه بعد فناء ابنائه .. مجموعه اثنيه لا تقبل من هم خارجها و لا حتى من هم داخلها وليسوا منها .... نتميز بالمياه المالحه و الوجوه الكالحه..."
-------------------------------------------------
http://fan6azya.blogspot.com
فانطازيا ( ماشى الطريق) واحد من أروع كتاب السيناريو فى مصر ...جوهره مدفونه لازم تقرا عنده شيكولاته و لا فيلم أبراهيم وياسمين التسجيلى رغم أن بوسطاته طويله بالمقارنه للعادى بتاع البلوجات الا أنك ما تقدرش غير أنك تكملها للأخر
------------------------------------------------
http://zeryab.blogspot.com
تياترو صاحب السعاده للعارف بالله (زرياب).. التياترو بيقدم فقرات رائعه و أحلى حاجه التقليد الجميل اللى هو عامله أنه بيستضيف حد من المدونين يكتب فقره كل عشر فقرات ... بعتبر أحد علامات الشهره أن واحد زى زرياب يستضيفك ده معناه أنك جامد
------------------------------------------------
http://taranim.wordpress.com
الله الوطن فاطمه( يحيى مجاهد) زى ما فى قيس و ليلى و عنتر و عبله فى دلوقتى يحيى و فاطمه ... البلوج فيه حاجات كتيير... سياسه على أمور شخصيه بس المهم هو الاسلوب و الاسترسال اللى عنده اللى مخليه ضيف دائم على كل السايد بارس
------------------------------------------------
http://elshare3-seyasa.blogspot.com
الشارع السياسى (عبد الحق) واحد بيحب الحق و بيكتب عنه ... من أقوى المدونات السياسيه عبد الحق برضه بيكتب قى الشارع الادبى
-----------------------------------------------
http://digressing.blogspot.com
طق حنك ماشفتش أقدم منه و لا أحلى من تحليلاته السياسيه ... برضه الخبره ليها دور
-----------------------------------------------
http://baheyya.blogspot.com
بهيه ... مدونه بالاتنجليزى بس بتنقل لكل مراقب أجنبى اللى بيحصل فى مصر معظم الاجانب بيقروها لجمال اللغه و سلاستها و نقلها بجد لنبض الشارع المصرى... يكفى أن تعلم أن هيكل بيقراها بأنتظام زى ما قال فى حلقه الجزيره عن المدونيين
---------------------------------------------
http://www.bahgaga.blogspot.com
بهججه (البهظ بيه) دى بقى مدونتى الشخصيه و مش هاعرف أتكلم عنها روحوا أنتم و أحكموا ...
---------------------------------------------
http://heshamwords.blogspot.com
http://7areef.blogspot.com
كلام هشام و عايش منصور دول زى حلاتى لسه باديين مبقالناش غير شهرين مع ناس تانيه كتيير بس الاتنين دول أكتر جداد عحبونى شخصيا و متوقع ليهم مستقبل فى الكتابه
-------------------------------------------
يلا انا طولت عليكم أبعتوا الميل ده لأى حد أنت مش طايقه و عايز تخلص منه و صدقنى الوصفه دى متجربه
بهظ بيه


31 May 2006

أى حال هذا...أ.ح.ه

دعنى أستعير أحاتك يا سولو لأشدو بها سيمفونيه غضبى و يأسى وأحباطى, علها تطفئ قليلا من نار بيضانى
-----------------------------------------
أحه أو لا كده على الأدب و المؤدبين و اللى عايزيين يتأدبوا فى بلد شعبولا و بوسى سمير... أحه لكل أخلاق ضاعت و قيم أندفنت و راحت مع اللى راحوا فى سبعة و ستين... لكل حد فاكر أنه ممكن يعيش محترم فى البلد دى أهديله أول أحاتى
----------------------------------------------
أحه على التعليم و اللى بيتعلموه و اللى بيعلموه و اللى مكتوب قى الكتب و اللى محفور الراس و اللى فاكر نفسه فهلوى و اللى فاكر نفسه أكاديمى فى جامعة مشالى و ابن مشالى و مشالى ده دكتور و أبنه ده حمار حصاوى شغال معيد و زغرطى ياللى انت مش غرمانه و سلام مربع للتوريث
-------------------------------------------
أحه خاصه لكل سواق ميكروباص شايف الناس أربع جنيهات ماشيه فى الشارع ...كل أبن ستين فى سبعين بيفرض عليا زوقه العقيم من شرايط هابطه لمواعظ برضه هابطه ... لرغبه ملحه عند سعادته انه ينصب على الواحد فى الباقى بأى طريقه ... عالم بنت كلب تخاف ما تختششيش
-------------------------------------------
أحه عليا انا شخصيا... انا فاكر نفسى ميين !! هاغير الدنيا... أم الحلم البمبى اللى انا عايش جواه ... أحه عليك يا مودى أنت اللى خليتنى أتمسك بحلم بمبى...أحه على المستقبل ... أحه عليك يا بابا ... أنت لسه فاكرنى راجل
------------------------------------------
أحه على التنميه و التقدم و العمل الاهلى و الزمالك و اللى فاكر نفسه هايعمل حاجه... أحه على الصبر
------------------------------------------
أحه على لغه ضاعت كل حروفها فاستوردنالها حروف و لما مأضيتش كملناها بشويه أرقام
----------------------------------------
أحه على جيل أتظلم...أطحن.... أداس و أندفن ...لما قالولوا اتكلم بقى يهوهو ... جيل تلت تربعه على القهوه بيناضل على رنه موبايل
--------------------------------------
...أحه على وقتى اللى فاكره ثمين
انا أسف لكل صاحب بقالى كتير ماشفتهوش
انا أسف لكل بنت حبيتها و لاقولتلهاش
انا اسف يا نفسى ... انا اللى جبان
--------------------------------------
أحه على لحظات اليأس لما تغرق الواحد... فيشم طعم المجارى فكل لون , تتكحل الدنيا بلون العفره و تبقى الابتسامه لزجه, وطبطبه الصديق بتبقى شحنه كهربيه بتنفض الواحد و تبعده
----------------------------------
أحه رقم 16 مش كفايه علشان المخزون اللى بقاله 25 سنه و شويه فكه كاتم على نفسى يطلع ...لسه محتاج أكتر من كده أحات
-----------------------------------
أحه على التدوين اللى جابلى الفكر و الأكتئاب ... كان مالى و ماله
أحه على السلبيه...أحا على المشاركه الايجابيه
أحه على وطن أتسرق مننا على غفله وأحنا نايميين بقالنا سبع تلاف سنه
أحه عليك يا أمل
أحه عليكى يا مصر بأم الدنيا
و على رأى عبد الموجود .....طز
سامعيين الصوت ده ......تششششش

18 May 2006

ملعون أبو الثقافه

المزاجنجى بعد يوم طويل من الشغل راح الغرزه و أخد كيفه التمام و طلع يتمشى على البحر بس البحر كان هايج فطلبت مع أخينا أنه يقف و يتفرج على البحر, و لأانه مشعشع حبتين قام قاعد على السور و بأعلى صوته قال : أنت هايج ليه يا بحر
البحر رد: مانت اللى مصدرلى المسائل يا عم مزاجنجى
--------------
المزاجنجى مصدقش ودانه و قام باصص للسما و حواليه مالاقاش حد فدورها فى دماغه يمكن علشان انا شارب و بيتهيألى

-------------
البحر: لا يا روح خالتك مش يتهيألك انا البحر فى أحشائه الدر كامن
مزاجنجى(مندهشا) : كامن...!!؟
البحر: أااااه كامن يا جدع و أنت مال أهلك و بعدين مالك كده مغيبب و حالك مش عاجبنى
المزجنجى(سارحا): و الله يا بحر مش عارف أقولك أيه بس ... أنا مش لاقى فايده فى البلد دى و عايز أهج منها بس مش عارف و نفسى أعمل حاجه علشان أصلحها بس مافيش فايده هيفضل الشعب بتاعنا زى ما هو..شعب أبن
البحر (مقاطعا): ياعنى انت بروح امك عملت أيه؟
المزجانجى(غاضبا): مالكش دعوه بأمى أولا... ثانيا انا باكتب بلوجات... و بانزل المظاهرات و أصحابى راحوا المعتقلات و باساند القضاء
البحر: طز... باقولك عملت أيه...؟
المزاجنجى: ياعنى انت مش عاجبك كل ده
البحر: و انت ياعنى اللى متوقع انك تغير حال البلد دى باللى انت بتعمله و بس... يابنى يا حبيبى... يا حبيبى يابنى انا موجى بيروح بلاد كتير و قليل ... شوفت بلاد فيها العجب بس ماشفتش أعجب منكم
المزاجنجى: ماهو ده اللى باقولك عليه ...الشعب عندنا مش فاهم حاجه و مش عايز يتغير
البحر: ياله... ماتسبقش الكلام و أسمع و أتعظ و انا لسه كملت... بلدكم مشاكلها أقل من بلاد كتيير يعنى مشاكل الطائفيه عندكم هتيجى حاجه جنب المشاكل الطائفيه اللى كانت فى أندونسيا سنه 81 و مع كده حلوها ... مشاكل التعداد هتيجى حاجه جنب الصين و مع كده هم كمان حلوها... مشاكل الفقر هتيجى حاجه جنب كوريا فى الستينات و مع ذلك حلوها... و لسه أمريكا اللاتينيه و أوروبا الشرقية و دول كتيير حلت مشاكلها... الا بلدكم
المزاجنجى: و أشمعنى بلدنا...؟
البحر: مشكله بلدكم الاراده و الصبر... مشكلتكم الرئيسيه هى الفساد فى كل حاجه حتى فى هممكم و عزيمتكم يعنى كام واحد فى البلد بيدافع بصدق عن مشاكلها و لا حتى مشكله منها ... هتلاقيهم يتعدوا على الصوابع ,تانى حاجه مافيش تحديد للاولويات عندكم يعنى انت معارض أقنعت كام واحد بوجهه نظرك و حاولت تخلى هدف حياته البلد و الناس
المزاجنجى(ينظر إلى الارض): طب مانا باكتب بلوجات زى ما قلتلك ...(ويرفع رأسه مره أخرى) و انا كمان بكتب فى حاجات يمكن تصدم الناس بس علشان أفوقهم
البحر: جميل جدا ... طب تعال نشوف كده علاء و منال محدش يقدر ينكر أنهم ناشطين جامدين قوى بس مع ذلك ناس كتيير بتشتم فيهم ...ليه؟ علشان حسسوا الناس أن هم أحسن منهم أو انهم مختلفين عنهم ... ده مجرد مثال أزاى النخبه أنفصلت عن مشاكل الشعب نتيجه للأرتقاء الفكرى
المزاجنجى:أحيه...أيه اللى بتقولو ده يا بحر يا عم انا مافهمش فى الكلام ده انا سباك يابا ( مع الاعتذار لحمو و أسامه و لحظى و ماما و نينا و خالو محمد و طنط شكريه اللى بتبيع فجل على قمه الشارع.... و كل سباكين المنطقه)و ياريت لخص و تجيب من الاخر
البحر: يا مزاجنجى يابنى ... أهم حاجه علشان تصلح البلد دى انك تقنع الناس بانك بتحارب علشانهم و تضمهم لصفك و ده بانك تكون واحد منهم من غيير ما تتنك عليهم و تكلمهم عن حاجات تصدمهم حتى لو كانت مهمه خدها واحده واحد ... أنزل شويه علشان تاخد بأديهم.
المزاجنجى: يا عم بلاش نصايح و شعارات و يلا من هنا انت فاكر نفسك أيه
--------------------
و تاتى موجه عاليه تغرق المزاجنجى ليجد نفسه مفترشا الرصيف نايم على الكورنيش و الدنيا صبح و الناس بتقول يا صبح
-----------------
لمزيد من الحوار روح لجار القمر و لجيفارا

16 May 2006

كلام محششين

ننتقل الآن إلى استوديوهات البهظ لنستمع معا إلى أحلى و أعلى كلام و نترك الميكروفون إلى أصدقائنا المحششين
------------------------------------------
.كييف: مش انا و مستكيف بقينا بهائيين يا ميدو
.مستكيف : با راجل...أه صحيح
.ميدو: يعنى أيه بهائيين دى
.كييف: ده دين جديد نزل السوق
ميدو: يعنى أيه دين جديد ؟.... و ده مين رسوله بأه...؟
.كييف: الحاج بهاء الدين بن سلطان
...مستكيف : أه صحيح
ميدو: مين... اللى بيغنى؟
.كييف : أيوه هو ده
ميدو : والبهائيين دول ليهم كتاب...!!!؟
.مستكيف: لا... شريط كاسيت
.ميدو : مش فاهم ... مش هو الرسول بتاعنا هو أخر نبى
.كييف: ماهى دى بقى التركه... مش الرسول بتاعنا أخر نبى .. أهو معجزه سيدنا بهاء بقى أنه جه بعدة
----------------------------------------
من هنا بقى بتبتدى أى أشاعه ... بمعنى أن كلام مالوش معنى زى اللى فات ده ممكن يكون أصل اشاعه تدمر تاريخ واحد زى بهاء سلطان على سبيل المثال , زى ما بيتقال على أبو مازن رئيس وزراء فلسطين , أه و الله أتقال عليه أنه بهائى و بالطبع أنا مش عارف مدى دقه المعلومه لأنها لو أشاعه مش هتعرفلها مصدر بس اللى مصدقئها هيرجع الامور لنظريه المؤامره و يصدق حتى و لو كان الكلام غلط و منافى للواقع
----------------------------------------
مستكييف : مش الحكومه ناويه تمد فتره التجنيد لعساكر الامن المركزى و تخليها خمس سنين
ميدو: و أنت عرفت منين ياخويا
مستكييف: ماهو جوز بنت عمى اللى بيقوللى يا خالو سمع من مأمور قسم بنها الحكاية دى
ميدو: و الله... دة بجد بقى
---------------------------------------
طبعا اللى فات دة ما حصلش بس حصل زيه قبل كده و أتمردت عساكر الامن المركزى و شالوا فيها وزير الداخليه ساعتها أحمد رشدى و كل ده بسبب أشاعه
---------------------------------------
بهظ: مش هيلغوا النص جنيه و الربع جنيه و يبقى الجنيه كده زيه زى الربع جنيه
مستكييف: أااااه مش برضه هيخلوا الجنيه كوينات كده زى بتاعه البلاى أستيشن
---------------------------------------
أهى دى بقى معلومه صحيحه بس اللى قبلها فطشه , بس الاشاعه اللى تطلع من أصل صح ال صح- تبقى بريزيدون – تبقى أشاعه أقوى

طب أية الى بيخلى الاشاعه تنتشر , ببساطه لان الانسان الطبيعى بيحب يحس بالاهميه فلما بيسمع معلومه تبان مهمه يبتدى يكبرها و يعمل منها خبر يكون شكله بيه اللى عارف اللى بيحصل ورا الكواليس

وده أية فايدته ... هى كلها أساليب تأثير على الرأى العام فى منها اللى مقصود اللى مش مقصود بس المقصود منها عاده بيبقى شغل مخابرات و اللذى منه , أو أمن دوله زى مثلا لما أتقال على سعد الدين أبراهيم أن أمه يهوديه علشان يكرهوا الرأى العام فيه
-------------------------------------
كييف : ما تيجى يا مستكييف نعمل أشاعه على رجاله الامن المركزى نخليهم يتمردوا على الاوامر و أهى قذاره بقذاره مع الحكومة
مستكييف: يعنى نقول أيه
كييف : زى ما قال البهظ تعال نقول أن الحكومه على شهر سبعه هتلغى الربع و النص جنيه و هتخللى الجنيه عمله فضه
مستكيف: و دى ننشرها أزاى
كييف: بسيطه... المظاهره اللى جايه نعمل نفسنا بنتكلم مع بعض أدام شويه عساكر و سيب الذكاء الجماعى يشوف شغله
مستكييف: أأأأأاااه ....يابن الحرام
كييف: و يا سلام بقى لما ينزل الجنيه الفضه نبطل ناخد أربع و أنصص من الميكروباصات و ندفع جنيه كامل بدون مناقشه و نقول أن الربع أتلغى هو و النص و أبقى قابلنى لو سواقيين الميكروباصات سابوا السبوبه دى
مستكييف: دى هاتبقى ميغه... قشطه عليك يا باشا وبالمره نقول على أم حبيب العادلى يهوديه... و لا أستنى كده دى ما تنفعش لانها نعلومه صح مش أشاعه
هاهاهاهاها

30 Apr 2006

صباحك حليب

...طيور تغرد... حدائق مزدهره... بنت أموره... ناس نظيفه فى الشوارع... عربيات ماشيه فى حاراتها... فلوس فى جيبى
-------------
أستيقظ من النوم, قمه فى السعاده بعد ثمانى ساعات من النوم و هو ما لا يتحقق فى كثير من الاوقات , شعور غامر من اللذه ... أتمدد فى السرير و أحاول الوصول الى أقصى أستطاله ممكنه فى جسدى , شهيق عميق تعقبه زفره تحمل فى طياتها كل الطاقات السلبيه و أعود نظيفاً
----------
سباق محموم بين كيانات دافئه للوصول الى جسدى و انا أقف تحت الدش منتظرا وصول المياه ليشعر جسدى بقشعريره تعقبها احاسيس ارتياح غامره, ثم أبدأ فى الوضوء أستعدادا لصلاه الصبح
--------
أقف الان بين يدى ربى – و لا أزعم أن هذا يتم يوميا – و لكن فى هذا الصباح أحسست بالحاجه الى مناجاه ربى ... و قفت اليه متضرعاً أرجو رحمته و أسأله التوفيق
--------
أضع قليلاً من العطر و أنزل الشارع... و يالهول الصاعقه ... ما الذى حدث فى الحياه... لماذا أختفت كل الغيوم فجأه ... لماذا تجاهلت أذنى ضحيح السيارات و شتائم سائقى الميكروباصات... ليت شعرى هل هذا عم صابر بائع الفول أم انه رجل أعمال فى البورصه... لماذا تغرد الطيور على انغام ميتاليكا ...!!!؟
---------
شعرت أن الكون يبتسم لى يومها ... شعرت بحلاوه الحياه... مددت يدى الى الموبايل
Message
Write Message

Good Morning
Send to many

و هكذا بدأت فى أرسال هذة الرساله الى كل من مضى على أخر أتصال بيننا أكثر من سته أشهر من أصدقائى
----------
و كأن الرساله على قصرها حملت كل أحاسيس اليوم
-----------
...حسن: صباح الخير يا بهظ عامل أيه ياد ... شكراً على الرساله... عايزين نشوفك
...طه: أييييييه يا عم ... أنت فين... ماداهيه لاتكون بخير... يالا خلينا نشوفك
مودى أرسل رساله
Good Morning…Why!!!?
Da men aweloh yom ebn 60 fe 70 … bas shokran

و الللى أفتكرنى برنه و اللى بميل و اللى طنش...
...بس كان يوم حلو
--------
ختام...بهظ

27 Apr 2006

مكرونه بالبصل لشخصين

لعمل طبق مكرونه بالبصل مطلوب الكثير من التركيز و الدموع ( لزوم البصل)...عزيزى المجروح فى الحب لعمل هذه الوصفه عليك بأحضار بصله كبيره و كيس مكرونه الجوهره و علبه صلصه هاينز, و هذا بافتراض تواجد مستلزمات المطبخ الاساسيه من وملح و فلفل و شطه و زيت و سمن الهانم

هذه الوصفه بعكس الكثير من الوصفات الاخرى تتطلب الذهاب الى صديق أنتيخ و يستحسن فى شقه صديق يكون اول حرف من أسمه أشرف

...أبدأ بغلى الماء مع رشه ملح و مقدار ملعقه زيت
و فى أنتظار الماء ليغلى لتدع صديقك يختار لك أغنيه على مزاجه لتحسين حالتك النفسيه , على سبيل المثال أغنيه يا حلو لمحمود عبد العزيز

يا حلو بانت لبتك
اول ما دابت اشرتك
تحرم عليا محبتك
و راح اتوب عن سكتك

الان لتبدا وحدك بالتعايش مع جو الاغنيه و تذكر كل الفرص الضائعه واللى مش ضائعه

خللى بالك الميه بتغلى ... أبدأ يلا بوضع المكرونه و ليقوم الصديق بالتقليب و قم انت بتقطيع البصل, و لتتذكر كل الهفلطه التى فعلتها و دع الباقى للبصل

القلب منك مليان جفا
و الصبر من قلبى اتنفا
و ضاع معاك كل الصفا
ضيعته بعندك يا قفا

و بعد أن تستوى المكرونه أجلس الان و بمساعده البصل أحزن فى صمت منتظرا المكرونه و ليقوم صديقك بتحمير البصل مع الصلصه و الكثير من الفلفل السود و الشطه و ذكره انه يكتر السمنه

وفى خضم احاسيس الغضب و الرغبه العارمه قى الانتقام ابدا الاكل بكل نهم الدنيا و بدون أن تدرك وجود حبتين الصراصير اللى حطهم صاحبك الأنتيخ

...أه يا قفا... أه يا قفا... أه يا قفا... أه يا قفا

و أبقى قابلنى لو أفتكرت بعد الطبق دة أى حاجه من اللى حصلت... و روح يابنى انت خلاص خفيت من الحب و أدمنت المكرونه بالبصل

بهظ

الاغنيه المصاحبه "يا حلو بانت لبتك" لمحمود عبد العزيز من فيلم الكيف
فكره البوست مستوحاه من بوست
ارز بللبن لشخصين من مدونه حواديت لرحاب بسام و اليها نتوجه بالشكر و التقدير

22 Apr 2006

لون رمادى فاتح

فتحى شاب مصرى من حلوان , كان تاجر بانجو و تاب و طوُل دقنه و بقى يقول " كله بأذن ربنا" بين كل جمله و التانيه, أمنيه حياته أن شقته اللى كان الشباب بيجوها يتزاولو فى البانجو يجوها بعد كده يتزاولو فى ربنا , بس لسه مش عارف انه يبطل يصطبح بعد ما يصلى الفجر
,,,,,
جورج من عزبه النخل بيتطوع فى الكنيسه كل يوم جمعه و بيقرا للاب حنا بسطويس و لما راح اسكندريه الاسبوع اللى فات و حصل اللى حصل طلع فى المظاهرات يشتم فى المسلمين كلهم و لو شاف حد من أصحابه ساعتها ما كانش حصلهم خير
,,,,,
عماد ضابط شرطه ... بس بيحب المسرح , الصبح مع عساكر الأمن المركزى حوالين الكليات علشان الطلبه و لاد الهبله لو عملوا مظاهرات و بالليل فى بروفات المسرح مع فرقته بس فى السر لحسن يترفد من الشغل
,,,,,
أوسا من الدنمارك و بتدرس علاقات دوليه و بتدّرب فى السفاره و بتضطر تكدب على أى واحد أول مره تشوفه و بتقوله أنها من أمريكا
,,,,,
بوبا أمريكى أسود من أوكلاهوما و نفسه يعمل عمليه يبقى أبيض لانه زهق
,,,,,
فاطمه مسلمه من مالطا بتلبس حجاب و جيبه مايكرو و تعرف عن الإسلام أنها ماينفعش تشرب خمره و أن الراجل ممكن يتجوز أربعه و عايزه تسافر فرنسا تدرس الإسلام
,,,,,
أبراهيم مهندس مصرى بيحضر دكتوراه فى التشيك و بيموت فى الستات التشيكيات
,,,,,
هنيه من العراق عايزه أيد صناعيه بدل اللى خادتها الحرب
,,,,,
ساره من فرنسا من اب أصله جزائرى و بتشتغل فى موسسه أجتماعيه لمساعده المهاجرين العرب
,,,,,
أحمد من السعوديه ... وسيم من تونس... جوجا من صربيا..و...و...و
------------------------------------------------------
خلاص ... فنيتو.... ماعدش اللون الاسود أسود ولا اللون الأبيض أبيض ...التقسيم الحاد للالوان من طبائع المراهقه , و الانسانيه عدت المراهقه من زمان , بس أحنا فى مصر لسه مراهقين , سبع تلاف سنه مراهقه , لازم بقى نشوف الاسود رمادى غامق و الابيض رمادى بس فاتح ,,, و كفايه بقى تعميمات ,, أتخنقنا
----------------------------------------------------
.أعذرونى الصنف المره دى جايب على كأبه
البهظ

21 Apr 2006

الهرم المقلوب


إذا سمحتم اريد أن أشارككم بعض الذكريات المحببه الى قلبى و إذا لم تسمحوا متقروش اللى جاى و أحب انوه ان البوست طويل حبتيين
--------------
تررررررن تررررن ....ألو
هى: أيوه يا بهظ... بقولك أيه أنت بتفهم فى الفن و مهندس
بهظ: و بعدين
هى: عايزه علاقه بين خط مستقيم و دايره
بهظ: أشمعنى
هى: علشان تبقى زى مووديل لرساله الدكتوراه بتاعتى
-------------
المتحدثه يا ساده هى صديقه عزيزه من أنجلترا كانت فى فتره تدريب فى نفس المكان اللى أنا شغال فيه و كانت رساله الدكتوراه بتاعتها عن حاجه أسمها
"Transnational learning in Mediterranean"
-------------
بهظ: طب يعنى أيه مووديل دى
هى: يعنى أعمل أسكتشات لاى حاجه فى تصورك
بهظ: مش فاهم
هى: بص لو قلنا أن الخط المستقيم بيمثل المجتمع الاوروبى بكل ما يحمله من تحديد لاهدافه و نوعيه الحياه الملتزمه التى لا تعترف الا بالاهداف الواضحه , أما الدايره فبتمثل المجتمعات الشرقيه بكل المؤثرات اللى بتخليهم كل مل يروحوا لهدف يرجعوا يلاقوا نفسهم عند نقطه البدايه.
بهظ: نعم نعم يا أختى تقصدى أيه ... لا دا أحنا ساعت الغلط بنطرطش زلط... (طبعا مقدرتش أفهمها معنى الأفيه نتيجه للترجمه و أختلاف الثقافه).
هى: أنا قصدى المجتمعات الاوروبيه أهتمت بالماديات و نسيت الروحيات فدا أصدى بالخط المستقيم أما المجتمع الشرقى لسه محافظ على الروحيات.
---------------------
طبعا ارتسمت على وجهى أبتسامه صفراء بمعنى (روحيات أنت لسه عايشه فى الوهم ده... قشطه).
و طبعا نسيت كل حاجه عن الحوار ده و كملت فى اللى كنت بعمله
----------------------
ترررررررررن ترررررررن .... ألو
هى: أيوه يا بهظ عملت أيه فى الى قولتلك عليه
بهظ: ها اللى قولتى عليه... أه يعنى... كل خير .
( طبعا لم تدرك اننى أتهرب من الاجابه لاننى لم أفعل شيئا و أعتقدت أننى كعادتهم بدأت العمل ... الحمد لله).
هى: طب أنا جايه كمان ربع ساعه
بهظ: تنورى
---------------------
غارق الى أذنى فى العديد من الرسومات التى لوسألتنى ما مغزاها لن أجيبك بمنطقيه و لكن سأتعامل
فوبو: بتعمل أيه يا بهظ
بهظ: أبداً.. بارسم علاقه....الخ
(و ينفجر فوبو بالضحك)
فوبو: انت عارف أن فى هندسه عماره فضلنا ندرس العلاقة دى بالذات خمس شهور كل يوم نروح للدكتور فيشتمنا و يقطع اللوح... كان مجنون أبن 60 فى 70
بهظ: طب حل عن قفايا أنا المفروض أحلها فى ربع ساعه
فوبو: أوكى بس قوللى أيه الكونسبت بتاعك فى العلاقه دى
بهظ: يعنى أيه .. يا عم كلمنى عربى أنا عجلاتى يا عم الحاج
فوبو: يعنى العلاقه دى مرتبطه بفلسفه معينه و حسب فهمك ليها يعنى لو العلاقة بتمثل الراجل و الست شوف وضع الخط المستقيم مع الدايره يبقى عامل أزاى
بهظ: يا قليل الادب
فوبو: و لازم تعرف أنت هتسيبها فى المطلق و لا داخل أطار و أيه تفاعل العناصر دى مع الاطار
بهظ: أحيييه ( فى أسكندريه أحيييه مش عيب و دى قصه تانيه فكرونى أحكيها).
--------------------
تريرن تريرن
أفتح الباب لأجدها تقول
هى: لقيتها يا بهظ
بهظ: الصابونة
(تكمل بدون أهتمام للدعابه السمجه).
هى: العلاقه المثاليه بين الخط المستقيم و الدايره هى شكل المخروط على جوانبه خطوط مستقيمه و الاصل دائره.
(و أخذت ترسم فى أشكال مختلفه و الله العظيم ما فاهم منها حاجه).
بهظ: بس فى حاجه مهمه انت ناسياها (طبعا انا اجادل لمجرد اثبات الذات) الشكل ده ناقص الاحتياجات الماديه و التى احسن شكل ليها هو الهرم ... و ده يدلل فى اللاوعى عن هرم ماسلو للاحتياجات الانسانيه
------------------
طبعا مش لازم اقولوكم انى مش عارف انا منين افتكرت علم نفس ثانويه عامه بس الانطباع اللى عندها كان الاندهاش و الصدمه و عندى كان فى سؤال واحد فى رأسى (انا جبت الهجص ده منين).
---------------
المهم اننا فضلنا نتناقش
حد: ما ينفعش المخروط يوصل للنهايه لأن النهايه هى الله فى مفهومنا و السوبر نوفا عندكم و .....و
حد: أكيد جوه الهرم مخروط مختفى و جواه هرم تانى و الى ما لا نهايه.....و
حد: زى بالضبط الهرم اللى على الدولار أخره مفصول و فيه عين...و
حد: أم عين....و
حد: بلا بلا بلا بلا بلا...بلا
----------------------
بعد ست ساعات من التحوير وصلنا لاننا ناخد جزيره امام اسكندريه و نحفر فيها هرم مقلوب جواه غرف مربعه تربطها مسارات دائريه تحتوى على مزيج من ثقافات المنطقه و تبقى زى لعبه أولها على النت و المرحله التانيه فى الهرم المقلوب و ممكن نستخدمه كمخبا من الانفجارات النوويه و...و...و...و...و
و من هنا أتعلمت التحوير

19 Apr 2006

نظريه :البهظ و الكرف و المزجانجى

مثل أى نظرية علميه اريد أن أبدا شرح هذة النظريه بتوضيح الغريب من المعانى و المصطلحات
معطيات النظريه

الكرف: هو كل تابع لا يستطيع منجهه نفسه بنفسه و لابد له
من بهظ يدير أمورة ( تضم غالبيه الشعب المصرى)

المزاجنجى: هو الذى يتبع دماغة و مطريها و يعتد برأيه و يتمسك بكونه برنس نفسه

الكيف: هو الكل المادى و المعنوى و العامل على أشباع الرغبه فى ممارسه كم ما بطريقه ما مثل ( الجنس و المخدرات و الحريه السياسيه و الحريه الدينيه و المساواه الجنسيه .... الخ...الخ)

البهظ : هو المسيطر و المحتكر أو المصدر لاحد أنواع الكيف فأينما وجد الكيف كان و حتما وجود البهظ

الغرزه : هى أى مساحه جغرافيه تضم محددات النظريه و تتفاعل معها
-----------------------------
المزاجنجى كشخصيه عنصر نادر فى أى غرزه فى هذه الايام ... فبالفطرة كل أفراد الغرزه مزجانجيه و لكن نتيجه لحتميات عديده تحول البعض الى كرفات لخدمه أهداف و مصالح الغرزة و بمرور الوقت تحول الجميع الى كرف و أصبح المزاجنجى عملة نادره , فهو كشخص معتدل يدرك ما له من الحريه و الى أين تنتهى حريته لتبدأ حريه الاخرين أو بمعنى أخر يدرك المغزى من مفهوم أن الكيف مناوله مش مقاوله, و يعمل المزاجنجى عاده على دماغة لتكبيرها بدون أن يفقد معنى المسئولية , فهو كفرد فى الغرزه يقوم من دافع أحساسه بالمسئوليه على حمايه الولعه و ضمان أستدامتها مع المساهمة فى شعللتها , لتنسأ حاله من التطور فى الغرزة.
و على النقيض منُه شخصيه الكرف و التى نشأت بالاساس لغياب الامان عن الغرزة من أحتملات كبس البوليس و الاضطرار للتبول على الولعة, فكانت الحاجه الى الكرف لمراقبه الطريق و جلب المعلوم و السرفسه على القعدة و الخ الخ من الاعمال الدونيه , و الكرف عاده لا يستطيع أن يكون بهظ نفسه وإنما يحتاج على الدوام الى بهظ خارجى يدله على أصول الكار و بدون تفكير أو تحليل يعمل الكرف على تنفيذ الاوامر .
و الكرف دوما ناقم على عيشته و على البهظ و المزاجنجى و يلقى باللوم عليهما بدون أن يعمل على تحسين أوضاعةأو برنسة نفسة , كمثال سائق التاكسى الذى لولا تواطئ المجتمع لكان رئيساً للجمهوريه.
و كنتيجة طبيعية لندره عنصر المزاجنجى فى الغرزة يصبح من الساهل أن يتولى كرفاً منصب البهظ و هنا تكون الكارثة الكبرى ... حيث يصبح الكرف مسيطراً و يعمل تلقائياً على إخراج الكلاكيع النفسية داخله على أقرانه الكرفنجيه و يتحرش بالمزجانجيه لتبدأ سلسله من الكلكعه (القهر) لتحويل كل مزاجنجى الى كرفاً أما بكسر العين أو لوى الدراع أو الضغط على لقمه العيش و للحق فالكرف غاية فى الابداع و الابتكار فى هذه العمليه الجهنميه, و تتحول الغرزة فى النهايه الى خرابه كبيرة يقعد الكرف على تلها.

فالبهظ كمنصب حساس لابد أن يتولاه واحد مزاجنجى , يبرنس نفسه و الاخرين من حوله و خاصةالكرفات من تحته فى تسلسل هرمى و يقبل بتوزيع السلطات و تقسيم المسئوليات و يجعل كل كرف تحته مزجانجيا من داخله يشعر بالانتماء للغرزه و الملكيه لها و يحافظ على بقاء نوع المزاجنجى سليماً نقياً .

حد فاهم حاجه... المهم أن كل منا ساعات بيكون بهظ و ساعات بيكون كرف بس لازم على طول نحافظ على المزاجنجى اللى جوانا من غير ما نتأثر بمحاولات الكرف لتغييرنا و كرفنتنا .
و علم فى المتبلم يصبح ناسى .

أخوكم البهظ الاصلى

18 Apr 2006

حواوشى .......و حشيش...... و سجاير

قد لا تجتمع هذه العناصر الا فى ليله كهذة , ليه تصنف من الليالى ذات الحواوشى و الحشيش و السجائر.
-----------
هى كانت راحلة وسط فيض من المشاعر الحزينه و الامل فى الرجوع المختلط بالرغبه فى الاستمتاع باخر لحظلت التلاقى بدون افساح المجال للحزن لسرقه اللحظة منا جميعا.
-----------
" تعرفى أن الميت اللى روحة حلوه أهلة يضحكوا لما يكونوا فى العزا" جمله قالتها خالتى لمرات خالى ليلة رحيل جوز خالتى التانيه يوم العزاء
-------------
ما هى اكثر العلاقات انسانية بين رجل و أمراة , هل هى الصداقه و لا الحب ؟
-----------
We are neither Friends nor lovers we are brother and sister regarding all the biological factors.
-----------
هل الاخت هى من ولدتها أمى فقط أم أن هذا المفهوم أوسع من هذا ؟ و لحد أمتى هتبفى البنت فى حياتى مجرد أخت!!!!؟
-------
You have to continue fighting my little yellow worrier; deliver your theories and sprit the word.
-----------
أعزائى القارئين انا فعلا مش عارف انا فاتح البلوج دة ليه و ليه سميًت البوست دة حواوشى و حشيش و سجاير يمكن علشان اشرح شويه نظريات من اللى عمال اؤلفها لنفسى ولا علشان أشتم فى الحكومة و لا علشان اكلمكم على الكلاكيع النفسيه اللى عندى ولا حتى اهيس عليكم و لا علشان اضيف اسم بلوج جديد على لسته البلوجات.
اللى انا أعرفه ان انا عايز أتكلم و دة المهم.
----------
بسم الله الرحمن الرحيم ... أعزائى المستمعين فى برنامج بهججه اليوم نطرح العديد من الموضوعات الساخنة ذات الطعم اللاذع و اللتى تتطلب الكثير من التركيز و الهدوء للاستمتاع بالطعم المصرى المتميز.
موضوعنا اليوم الحواوشى كوجبة مصرية بكل ما تمثلة الثقافة المصرية من عوك و ليًس كله كويس .
بص معايا كدة على كميه البصل اللى فى ساندوتش الحواوشى صباح النصب .. أمال هى فين اللحمة لغز عايز المغامرين الخمسة علشان يحلوة... يعنى لو الحكومة كانت حطت رقم واحد صح فى ميزانيتها ..بدل كل الارقام الملغبطه الكتير اللى بتحطها ماكانش الجزار سرق فى اللحمة ولا.. لو كانت الناس فاهمه يعنى أيه نظافة ما كنش الفرن يبقى وسخ كدة... هيه دنيا.
---------
لية لما باشرب حشيش بابقى عايز أتكلم كتير...
دة تاثير الزيت على لسانك... بيخلى لسانك بياكلك مش عارف تسكت ... و إلا هاتبقى لسان بس.
لسانك حصانك أن صنته صانك و أن هنته .... ناااااااااا... ها ها ها ... و الحدق يفهم
--------------
اللى مستنى لسة إننى أتكلم على السجائر أحب أقوله... ها ها عليك واحد.
--------
لو عاجبك البلوج قشطه و لو مش عاجبك برضة قشطه و قشطه سافرت و كفائه مات فى خناقه... و خليك مبسوط