27 Dec 2006

التجاريه مالها و ماعليها

كشاب مصرى عادى ... أكيد بتروح قهاوى ، والقهاوى أنواع يعنى فى قهاوى بلدى ، قهاوى شبابى " ولادى يعنى " والتجارية.

البلاستيك هى الكافيهات زى اللى فى المولات والأماكن الراقية .. هى مناسبة للبنات والولاد يتقابلوا ويتبادلوا الرنات والهيافة.

أما بقى البلدى فدى دايما جنبها عربية فول أو كبده وتلاقى الطبقة العمالية بتروحها حيث الشاى أبو نص جنيه وحجر المعسل أبو ربع جنيه وعادة بتشتغل فى الصباحات المبكرة ، وفى الليل بتهش وبتنش.

ما علينا .. تعالى بقى نمسك قهاوى الشباب ، زى الكيخة والصباحى دايما تلاقى فيها اللى ماسك الشيشة هو حبيب الشباب ، وهتلاقى دايما نسخة مكررة من عم على الراجل العجوز المليان طاقة ورزالة بيصدرها فى أول وش للزبون الجديد بس بعد ما تعرفه تلاقيه طيب زى الخساية.

كل دى مقدمة لنروح تانى من القهاوى اللى أنت متعرفهاش ، التجارية ، قهوة المثقفين والفنانين والتنمويين والأجانب هى شكلا وسعرا قريب قوى من القهاوى البلدى بس على المستوى الفكرى والانسانى " كلام مثقفين " مختلفة تماما" والحاجة الرئيسية اللى بتتعمل هى الكلام ، يعنى لا فى دومينو ولا فى مزيكا ولا تليفزيون ، يعنى تقعد تتكلم ، والغريبة انك ممكن قاعد والترابيزة اللى جنبك ناس صوتهم عالى بس صدقنى ما بتحسش بيهم.

وفى التجارية الناس أشكال وألوان ، فى المحاسب أبو دقن وشعر طويل ، وهو مالوش دعوة بحد ، بيجى يطلع ورق كتيير ويقعد يكتب ويكتب والشيشة فى بقه والشاى فى ايد والقلم فى الأيد الثانية وهاتك يا كتابة .

وفى شلة الفنانين المسرحيين ، تلاقيهم قاعدين صوتهم عالى ، بيناقشوا مشاكل المسرح الحديث والمعاصر والدراما عند أرسطو و شكسبير ، ولما حد فيهم يعمل مسرحية يروحوا يتفرجوا ويرجعوا يقطعوا فروة أمه.

وفى شلة التنمويين ، دول بقى فاكرين ان الدنيا وردى ، يقعدوا يحلموا ويحلموا وفى الأخر ياخدوا المقلب المتين ، فأتجهوا أخيرا لأنهم يدوا المقالب لبعض.

أما بقى الفنانين ، فدول ناس فلة عماليين يفكروا فى ازاى يجيبوا تمويل للمشروع الجديد ، وبيكرهوا بتوع المسرح زى كرههم لاسرائيل، بس بيقولوا قدامهم العكس.
وفى التجارية تلاقى الأجانب كتيير ، بييجوا يتفرجوا وياخدوا رمان ولمون وبرتقان

آه نسيت أقولكم ان ما فيش فى التجارية حاجة ساقعة بيبسى – هما بييجوا يدردشوا مع الفنانين والأجانب اللى زيهم, و التجارية مجتمع زعيمه عم محمد ، وأتباعه ، مليان حوارات وناس أشكال وألوان ، مكان كده عامل زى محطة القطر ناس بتيجى وبتمشى وناس قاعدة مش لاقية حاجة ، ربنا ينتعنا منها بالسلامة.

20 comments:

Anonymous said...

كويس والله انا رحت التجاريه مره مع اخويا الجميل بيانست
دى كانت اول مره اروح قهوه اصلا وكنت مكسوفه اوى واحمد اقنعنى انها مش قهوه بالمعنى الدارج هيا مكان جميل ممكن تلاقى فيه من كل مله ولون
وعجبنى
*******
للبوست اللى قبل دا على فكره انا كنت باخد من الجهاز بتاعك الحجات اللى بتعجبنى زمان ههههههههه
ايوه من جهازك انت متستغربش
وعندى فعلا سى دى مليان اقوى برامج الهاكرز ومبعرفش استخدمو ودا فعلا لان اللى بيجى بالساهل بيروح بالسهل ومعرفتش اتعلم منو حاجه والغلطه بطير هارد وويندوز

Anonymous said...

و انت من مين فيهم ؟ سامحنى ده اول بوست اقراهولك لكن مشدوده اتعرف على الباقى
و سؤال كمان ايه رئيك فى قهوة كريستال؟ لو تعرفها تصنفها من انهو نوع

youssef said...

نسيت الطلبة كنت بحس ان التجارية مكتبة جامعية مجمعة , كنت تلاقى زبون من كل كلية.كمان مكنش فيها نسكافية و مع احترامى للجميع انا بكرة النسكافية نقطة سوداء فى تاريخ القهوة و دة زود حبى للتجارية ,و تحيى للمقر الاول قصر الشوق

Bahz Baih said...

عزيزتى عيون القطه
انا
أولا كنت عامل جهازى شيرينج لكل الناس فىالشبكه علشان صاحب السيبر طلب منًى ده لما جالى البيت...أساسا كان فى موقف كوميدى جدا لما هو جه عندى البيت القديم كنت انا و اشرف اللى كان قاعد معايا كاتبين على الحيطه أو بصراحه نغرقينها فلما جه أخينا أتسمر قدام الحيطه و معملش الشغل فقلتله انا هصورك الحيطه و أحطها على الكمبيوتر و أشيرها... بس لما عرفت من بيانيست الصدفه العجيبه اللى انت تعرفينى بيها فطست على روحى من الضحك.. يلا مسيرنا نتقابل مره فى التجاريه

هبه
مش هقولك حاولى أنت تعرفى عندك البلوج فيه كل المعلومات الاساسيه و لو عرفتى تعالى زورينا فى التجاريه

يوسف
انا ذاكرت فى التجاريه قبل الامتحانات تلات سنين متواصله سقطهم جميعا .. فمش عايز أروج للفتنه دى

S H E B A K said...

جميل يا بهظ .. موضوع جامد .. بس انا متأكد انك ممكن تكتب عن التجارية سلسلة كتب مش بس بوست
:)
اشطة يابييه .. اقابلك هناك بقى

G said...

خسئت

و الله إنك أبخست التجارية حقها .. و إن لفي التجارية ما لا عين رأت ولا أذن سمعت ولا خطر على قلب (مثقف) من مثقفين وسط البلد

Pianist said...

يابني التجارية مش كده
بس حلوة فكرة البوست اوي
بس
فيه تفاصيل اكتر من كده بكتير
علي العموم
انت بوستك اداني فكرة كتابة في اسكندرانية
هحاول اكتب عن التجارية في اسكندرانية
بكل تفاصيلها
بس لو عرفت اكتبه يعني

هبة:
الكريستال قهوة مثقفين بس من النوع التقيل اوي علي القلب
الكريستال حلوة الصبح
خصوصا الترابيزة اللي جنب الشباك اللي في الركن

Solo said...

آه يا لذيذ يا رايق
:))
جامدة كييك و عنوان البوست فشيخ جداً يا بهظ بيه
التجارية لما خلقت له فعلاً , الكلام و الاسترسال لغاية ما الناس تموت مخصية .... ما عدا عم محمد طبعاً
الراجل دا بيوحشنى و النعمة

Bahz Baih said...


عماد و جيفارا و سولو و بيانيست حته واحده
لا فى حاجه غلط حصله.. انا شامم ريحه مؤامره..بس بجد مرسى كتير لتعليقاتكم أد أيه كل واحد فيكم جو نفسه حد حقيقى

Anonymous said...

!!!التجاريه
ياله من مكان رائع
وما اقربه من قلبي

بجد بوست جامد عن مكان
اجمد يا اخ...سوري نسيت
المهم

التجاريه دي بجد مملكه
وملكها فعلا عم محمد
ونحن الرعيه التي يبجب
ان يعاد تاديبها-من وجهة نظر
عم محمد-عشان كده هو بيربينا
من جديد

بس انت نسيت تفصيله مهمه
جدا في التجاريه
!!الساعه
الساعه الواقفه
الساعه اللي مصره ان الزمن
وقف خلاص عند الساعه اربع الا
ربع..بس هي عندها حق لان
التواجد في التجاريه بينسينا يعني
ايه زمن وساعات ودقايق
الوقت في التجاريه
is not money


انا بحب التجاريه وكل رواد
التجاريه
so i should say
i really love you all


دعاء

Aoossa said...

كل سنه وأنتم طيبين
وعمار يا سكندريه
كيرستال بلاش تروحوها باليل
بصراحه ولا بالنهار
صباحكم احلى على التجاريه

محمود ماجد said...

سؤال من اسكندراني جاهل

هي فين التجارية دي ؟؟
انا اعرف البورصة التجارية اللي في سيدي بشر ورا حي المنتزه بس اكيد مش دي يعني ...

انا عارف اني عار على الأسكندرانية بس معلهش

change destiny said...

بسمع عنها كتير بس عمري ما روحتها

بسمع انها قهوة المثقفين و الأوغاد :)

المهم , انت قعدت تصنف في البني ادمين دي كلها .. انت بقى مين ؟ و بمعنى اصح ازاي تربط دول بالهيافة و دول بالثقافة و دول بالمقالب ؟ ما كلنا بني ادمين فينا من دة كله

حتى لو كنت شفقتهم من بعيد او من قريب , مفتكرش انك رسمت صورة صح عنهم مش من حقك تحكم عليهم

اصل الراجل مش بس بقهوته

Bahz Baih said...

change destany
كلهم زباين عندى بيشتروا الكيف و كل واحد له التعميره المناسبه
و زى مانت قولتى الراجل مش بس بقهوته لأ بالشيشه اللى بيشربها

محمود ماجد
التجاريه تقع فى قلب الاسكندريه و بس كده علشان الأعلانات المدفوعه الأجر

Anonymous said...

طب والله كويس..عندكوا وسط بلد برضك :)

Anonymous said...

يا بهظ بيه كلنا فى الهوا سوا

و الكييف ما يعايبش عالكييف

تنموى بقى , فنان , وغد , بهظ

كلنا فى الهلاهؤا يا معلم

بس عموما انت بتحاول تشوف التجاريه بضمير

عداك العيب يا معلم

ابقى خد العيب اللى بعده

Anonymous said...

بارمى التماسى يا بهظ بيه يا أصلى ياللى مافيش منك اتنين
شكرا للزياره و المره الجايه اعمل معاك واجب من البنى اللى مافيش زيه
بس معلش سامحنى و النبى انا قاهرى بس ده مش ذنبى....هههههههههه
و عموما دولة اسكندريه الشقيقه ليها فضل عالكل , و اللى ينكر ده يبقى لا مؤاخذه الكيف اللى متعاطيه مضروووووووووب
شكرا مره تانيه

Anonymous said...

التجاريه؟
أنا كنت زبون قديم جدا من زباينها
لكن نقلت على عمر الخيام قدام محطة الرمل من فترة قبل ما اسيب اسكندريه ومصر كلها
أعتقد أن الجيل اللى فاتته الكريستال قبل ما تتقسم لقهوتين فاتته تجمعات رائعه للأغلبيه العظمى من فنانيين وكتاب وسياسيين الأسكندريه
كانت مكان رائع
عادى جدا تلاقى فى ركن مجموعة تشكيليين غرقانين فى أسكتشاتهم خصوصا عبدالله صبرا وعمرو هيبه ومدحت الكريونى الله يرحمه
أو حوار ساخن بين كتاب وشعراء زى علاء خالد واسامه الديناصورى وماهر شريف أو مجموعه مسرحيه بتعمل بروفة ترابيزه
كنا تقريبا مش بنروح منها
رغم فقرها وانها كانت مش بتقدم غير 5 مشاريب بالعدد
شاى وقهوه ويانسون وبيبسى وعناب سخن صيف شتا
الله يرحم دى أيام
وشكرا انك فكرتنى يا بهظ

Anonymous said...

و الله التجارية تستاهل كلام كتير يا بهظ و انت عارف ان مر عليها تاريخ طويل اوي علاقات اتكونت وعلاقات انتهت و شلل اتجمعت على بعضها ويا يارت تخصصلها اكتر من كدة لاني بجد من عشاقها و نسيت تتكلم عن عمر الشامي الراجل اللي بييجي كل يوم السواق يوصله بالعربية و يدخل للترابيزة اللي محجزاله و يشرب القهوة في الفنجان المتعقم و ياخد الشيشة بتاعته و يمشي بكبرياء من غير عم محمد ما يجرحه بكلمة طبعا لانه بيديله بقشيش كبير اوي ومن اهم مميزات الراجل ده انه دايما بييجي في نفس الميعاد و لا الوانه اللي بيلبسها يا خرابي عليها و كمان نسيت تتكلم عن بار الشيخ علي اللي قريب من التجارية وبقى جزء لا يتجزأ من حياة التجاريين و نسيت كمان تتكلم عن ان فيه خطر بيواجه التجارية اليومين دول وهو قهوة الوطنية اللي قصداها و ان فيه ناس كتير اليومين دول بنسحبوا من التجارية و بيروحوا يقعدوا هناك و ده بسسب عم عادل القهوجي بتاعها راجل زي العسل وبصراحة يا جماعة انا واحد من اللي كانوا انسحبوا من التجارية و راحوا الوطنية وبس رجعت تاني لان التجارية ليها سحر خاص حيرجعك تاني ليها
و على فكرة يا بهظ الفنانين مش بيخبوا على المسرحيين انهم بيكرهوهم اسال اي واحد مسرحي حيقولك انهم عارفين ان الفنانين اللي بيقعدوا في التجارية بيحتقروهم
و بعدين انت ليه مرضتش على الناس اللي بيسالوا انت تصنيفك ايه تسمحلي ارد بدالك و اقول انك من التنمويين وفي وجهة نظري انا وانت عارف كويس انت بياع
و للناس اللي بتسال التجارية فين هي في المنشية ع البحر قبل الجندي المجهول بشوية حتلاقوها خضرا كدة و اعتبروا دي دعوة عامة للتجارية وعلى راي عفاف راضي فاتك نص عمرك ياللي ماشفت التجارية
مودي

غادة الكاميليا said...

لما نزلت اسكندريه السنه دى مع زمايلي أكتر حاجه شدتنى بصراحه القهاوي كنت هموت لو رجعنا ومقعدتش على قهوة المهم بعد إلحاحات كتير ودونى قهوة الريحانى الصبح بدري بس مكنش فيه ناس كتير كان في واحده بتشرب شيشه بصراحه اتكسفت أطلب قهوة وطلبت فيروز أهى مننا وعلينا برده وعملناها قاعدة مثقفين وقعدنا نتكلم عن أمل دنقل كنا كام واحده بقى بنتين بس بس بصراحه لما هنزل تانى كل يوم هروح قهوة وهطلب قهوتى المظبوط المرة الجايه ومش هتكسف