2 Jun 2006

ليه ندون أقل لما ممكن ندون أكتر

لو سمعت عن التدويين فى الدستور أو من حد من أصحابك و عايز تعرف هو أييه , ركز فى الايميل ده لأخره و فضى نفسك علشان تتابع اللينكلت و تستكشف العالم الجميل للبلوجرز ( المدونيين) أما بقى لو سعادتك مش فاضى فياريت تقفل الايميل ده دلوقتى و تبقى تفتحه لما يكون عندك عشر دقايق على الأقل... أو أقولك كمل قرايه و بعدين أفتح اللينكات.... يلا بينا

البلوجينج أو التدوين عباره عن مواقع شخصيه بتوفرها مواقع متخصصه بس بتتميز بسهوله التعديل و التنسيق و بتعتبر هى و الأيميل أكتر الحاجات اللى بتتفتح على الأنترنت... لأنها ببساطه بتتكلم عن أى حاجه و كل حاجه و بتعبر عن رأى صاحبها... البلوجات فى منها الشخصى و السياسى و الدينى و اللى بالى بالك .. بمعنى أصح البلوجات مالهاش سقف حريه أو رقابه و كمان من الممكن تحافظ فيها على سريه شخصيتك

طب أيه الفرق بين البلوج و الجريده ... البلوج شخصى و حميمى يعنى تحس كده أن اللى كاتب المقال واحد بيكلمك كده... وشه فى وشك مش زى الجرنال تحس أن لجنه هى اللى كاتبه المقال... كمان البوستات ( التدوينات) أقصر و أكثر أختصاراً و فيها أسترسال غير عادى لدرجه أنك ممكن تتسحل فيها تلات أربع ساعات متحسش و كمان التدوينات تلاقيها مترتبه أوتوماتيكى فى البلوج من الأخر يعنى أخر تدوينه تلاقيها فى أعلى الصفحه و هتلاقى أرشيف للتدوينات اللى فاتت... بس اللى جامد هو السايد بار ( الحته اللى فى الجنب) دى مساحه كل بلوجر حاطط فيها لينكات للمواقع و البلوجرز اللى هو بيروحها فمن الأخر لما تخش بلوج واحد تقدر تبحر بمعنى الكلمه فى بحر البلوجينج.

طب انت تعرف هو فى كام بلوج فى مصر لوحدها ... طبقاً لموقع
Technorati Blog (http://technorati.com)
مصر كان فيها حوالى خمسمائه بلوج زادوا فى أخر ست شهور و وصلوا لألف بلوج و لسه بيزيدوا أما بالنسبه لموقع الشامل فى المدونات العربيه http://arabblogcount.blogspot.com/
فبيقول أنهم حوالى 300 بس دول النشطين اللى سجلوا و يعنى تقدر تقول أن هو ده العدد الواقعى للناشطين على البلوجسفير

يلا بقا نبتدى ... علشان تعمل بلوج أحسن سوفت وير هو
http://blogger.com
و ده أسهل واحد و كمان بوردد ( مدعوم ب) محرك بحث جوجل يعنى جرب تعمل بحث كده عن بهظ هتلاقى المدونه بتاعتى أول حاجه تطلعلك ... و لو عايز تعرف بالتحديد أزاى تعمل مدونه فى واحده أسمها بنت مصريه http://bentmasreya.blogspot.com/
عامله مدونه أسمها ألف باء تدوين و ده اللينك بتاعها
http://bmadvice.blogspot.com/

لغايه هنا أنت ممكن تروح مع نفسك لمدونه الشامل فى المدونات العربيه و تفتح اللينكات و تتفرج على البلوجرز كلهم و كمان تروح للمدونه اللى فاتت و تعرف أزاى تعمل مدونه لنفسك ... لأن فى الجزء اللى جاى هاتكلم عن أشهر البلوجرز المصريين و على فكره دا رأى شخصى بحت و براحتك تعرف مصلحتك -_-
------------------------------------------------
http://hadouta.blogspot.com/
حدوته (رحاب بسام) انا باسميها الأستاذه و فى رأيى الشخصى أروع من كتب خواطر شخصيه هى فاتحه البلوج بتاعها من زمان و يوستاتها تستحق أوسكار البلوجات خاصه رز بلبن لشخصين و تنويعات عينيه على مقام ليه الكبير لازم تقراها قبل أى حاجه
------------------------------------------------
http://sam7oni.blogspot.com/
سامحونى ماكانش قصدى (غاده) حسب تعبيرها البلوج عباره عن تراهات شخصيه لكن حكايه ... غاده بتكتب عن الأفلام اللى بتحبها فتخليك تتفرج عليها و لما بتتكلم عن المزيكا تحس أنك عمرك ما سمعت مزيكا قبل كده هى نص يابانى نص مصرى و النصين أحلى من بعض أول مره دخلت عندها فضلت أقرا ست ساعات ورا بعض تخيل
--------------------------------------------------
http://tawasol.blogspot.com/
أحمد نصر (تواصل) واحد من أقدم البلوجرز و سر تميزه أنه أتكلم عن أخلاقيات التدوين اللى انا باعتبرها دستور الكتابه فى البلوجات
-------------------------------------------------
http://jarelkamar.manalaa.net/
جار القمر (هيثم) هو مراسل البلوجات الصحفى قى الاسكندريه و صاحب السبق الصحفى فى أحداث شارع خمسه و أربعيين و الفتنه الطائفيه لدرجه أن العدد اللى بعد كده من الدستور نشر تدوينته بالكامل فى الصفحه التانيه أسلوب أييه... كلام أييه هيثم بجد ...أيييييه حكايه
----------------------------------------------------
http://garad.blogspot.com
http://karakeb.blogspot.com
http://alkalema.blogspot.com
جيفارا و سولو و بيانست الثلاثى الاسكندرانى ... جيفارا أكئب أنسان على وجه الارض بس أسلوبه ساحر و سولو دون جوان البلوجات بالكاس و السيجاره فى أيد و بنت أموره فى الأيد التانيه و بيانست نموذج الانسان الحساس اللى بيعرف يلقط التفاصيل...و غير أنهم كل واحد بيكتب فى مدونته عاملين مع بعض مدونتين جامدين مووت ... روايه على أد لحافك و دى كل واحد فيهم بيكتب فصل و مش عارف اللى بعده هيكتب أيه عملوا لغايه دلوقتى 8 فصول و موتوا فى التامن البطل و على حد قولهم أن كده الروايه أبتدت... و التانيه جزمه حريمى اللى بيتكلموا فيها عن نظرتهم للستات ..و فى وجه نظرى أجمد بوست فى جزمه حريمى واحد أسمه يا لعبك يا فايزه لما تكونى عايزه لسولو... بس بوست كلللللللللب
----------------------------------------------------
http://keesfeshar.blogspot.com
كيس فشار (عماد شباك و زنجى و سولو) بيتكلموا فيها عن السينما هتلاقى فيلم بيتعرض ده معناه أنهم مستلمينو نقد و أفيش فيلم جاى و ده معناه أنك تلحق تتفرج عليه قبل العرض علشان تستمتع بنقدهم للفيلم عرضوا لغايه دلوقتى
fight club
Taxi Driver
Troman Show
الحق بقى شوف الفيلم اللى جاى قبل العرض
-------------------------------------------------
http://eskandaranaya.blogspot.com
مدونه أسكندرانيه بيعرفها جار القمر ب" هذه مدونة نمارس فيها ما نخفي من عنصريه وشوفينيه وحب الذات.. نحن حليقو رؤوس سكندريون .. نؤمن اننا شعب الله المختار .. و معمرو ارضه بعد فناء ابنائه .. مجموعه اثنيه لا تقبل من هم خارجها و لا حتى من هم داخلها وليسوا منها .... نتميز بالمياه المالحه و الوجوه الكالحه..."
-------------------------------------------------
http://fan6azya.blogspot.com
فانطازيا ( ماشى الطريق) واحد من أروع كتاب السيناريو فى مصر ...جوهره مدفونه لازم تقرا عنده شيكولاته و لا فيلم أبراهيم وياسمين التسجيلى رغم أن بوسطاته طويله بالمقارنه للعادى بتاع البلوجات الا أنك ما تقدرش غير أنك تكملها للأخر
------------------------------------------------
http://zeryab.blogspot.com
تياترو صاحب السعاده للعارف بالله (زرياب).. التياترو بيقدم فقرات رائعه و أحلى حاجه التقليد الجميل اللى هو عامله أنه بيستضيف حد من المدونين يكتب فقره كل عشر فقرات ... بعتبر أحد علامات الشهره أن واحد زى زرياب يستضيفك ده معناه أنك جامد
------------------------------------------------
http://taranim.wordpress.com
الله الوطن فاطمه( يحيى مجاهد) زى ما فى قيس و ليلى و عنتر و عبله فى دلوقتى يحيى و فاطمه ... البلوج فيه حاجات كتيير... سياسه على أمور شخصيه بس المهم هو الاسلوب و الاسترسال اللى عنده اللى مخليه ضيف دائم على كل السايد بارس
------------------------------------------------
http://elshare3-seyasa.blogspot.com
الشارع السياسى (عبد الحق) واحد بيحب الحق و بيكتب عنه ... من أقوى المدونات السياسيه عبد الحق برضه بيكتب قى الشارع الادبى
-----------------------------------------------
http://digressing.blogspot.com
طق حنك ماشفتش أقدم منه و لا أحلى من تحليلاته السياسيه ... برضه الخبره ليها دور
-----------------------------------------------
http://baheyya.blogspot.com
بهيه ... مدونه بالاتنجليزى بس بتنقل لكل مراقب أجنبى اللى بيحصل فى مصر معظم الاجانب بيقروها لجمال اللغه و سلاستها و نقلها بجد لنبض الشارع المصرى... يكفى أن تعلم أن هيكل بيقراها بأنتظام زى ما قال فى حلقه الجزيره عن المدونيين
---------------------------------------------
http://www.bahgaga.blogspot.com
بهججه (البهظ بيه) دى بقى مدونتى الشخصيه و مش هاعرف أتكلم عنها روحوا أنتم و أحكموا ...
---------------------------------------------
http://heshamwords.blogspot.com
http://7areef.blogspot.com
كلام هشام و عايش منصور دول زى حلاتى لسه باديين مبقالناش غير شهرين مع ناس تانيه كتيير بس الاتنين دول أكتر جداد عحبونى شخصيا و متوقع ليهم مستقبل فى الكتابه
-------------------------------------------
يلا انا طولت عليكم أبعتوا الميل ده لأى حد أنت مش طايقه و عايز تخلص منه و صدقنى الوصفه دى متجربه
بهظ بيه


7 comments:

ماشى الطريق said...

انا متشكر جداً والله يا عم بهظ بيه على الأطراء الجميل ده
الصراحة جه فى وقت محتاج فيه إن حد يرفع معنوياتى

هشام علاء said...

يدوم العز يا باشا
و دى شهادة اعتز بيها

بالنسبة لموضوع اسكندرية فأنا متفق معاك فيه ميه فى الميه و انا بحب اسكندرية حتى النخاع و فى حاجة غريبة مش عارف حصلت معاك ولا لأ ان انا اول ما دخلت مو ضوع البلوجز ده لقيت ان معظم الناس اللى لنا بقرأ لهم و متكيف منهم جدا من اسكندرية و ما اقدرش او صفلك مدى اعجابى بفكرة البلوج بتاع اسكندرية و نفسى انضم له بس مش عارف ازاى؟
لو ممكن تقولى مين صاحب الفكرة الاساسية
علشان لو كده ابعتله ميل اطلب الانضمام

Bahz.Baih said...

ماشى الطريق و هشام
انا ماعرفكمش شخصيا بس قولت اللى انا شايفه و دى وجهه نظرى فيكم و ده علشان انتوا بتكتبوا حلو بجد و الكلام لكل واحد اسمه جه فى البوست انا اعرف ناس فى الحقيقه و ماكتبتش برضه غير اللى انا بحب أقرا ليهم و لو حد فتح الليست من كمبيوتر البيت عندى هتلاقى اللينكات اللى انا قولت عليها بنفسجى (يعنى لسه مفتوحه قريب)و انا كتبت البوست ده علشان أقول للناس انها تاخده كوبى وبيست و تبعته ايميلات للناس لأننا محتاجين ناس أكتر تبقى بلوجرز و تعرف اللى بيحصل بجد و أهو أحسن من الحاجات الفاضيه اللى بتتفرود على الميلات

هشام عايز تبقى عضو فى أسكندرانيه أسأل عماد شباك هو اللى عامل البلوج بس لازم تعدى فى أختبارات الرجوله السكندريه
:)

Salma El Banna said...

انا بقى لسه بلوجرزاية جديدة (لو صح التعبير)............بس عرفت البلوجرز من تياترو صاحب السعادة.. اللي قريته في الدستور...!! شفتوا اللفة .. المهم بدات رحلتي مع البلوجرز مع اني نتاوية قديمة ولي صفحة شخصية .. وبكتب على منتديات كتير اوي.. بس فكرة البلوجرز داخلة دماغي اكتر.. علىاي حال يا (بهظ) باشا شكرا ليك انت هنا عرفتني ببلوجرز كتير .. عجبتني كتابتهم ونفسي جدا اضم لينك البلوجرز بتاعتهم عندي بس لسه معرفش الطريقة .. بس على مين اناوراها والزمن طويل لحد ماعرفها اكتر
شكرا جداااااااااااااااا
سلمى البنا
http://merayat.blogspot.com/

Anonymous said...

احااا
جامد يبني والله :D
استمر وفكك من الناس دي

شغف said...

على فكرة متشكرة قوي
دخلت هنا دلوقتي - اللي هوه ليل التاسع من يوليو 2010 :) - و كنت محتاجة فعلا أقرا حاجة ترجعلي بهجة التدوين القديمة و الإحساس التحفة اللي حسيته أول ما دخلت العالم ده و كنت بأسيب بلوج ساحر لبلوج تاني له سحره الخاص هوه كمان .

شغف said...

..