21 Jun 2008

150 جمال عبد الناصر

كان ليا صديق بيقول عليا ان انا بياع كلام ... و أنفع أشتغل فى الماركتينج ... و أنى بعرف أتكلم عن أى قضيه بشكل كويس ... مش عارف بصراحه هو ده صح و لا أيه ... بس اللى انا متأكد منه أنى بعرف أسوق للقضيه اللى انا مقتنع بيها

الدليل على كده أن فى الشغل بتاعى (اللى هو فى 150 جمال عبد الناصر) أقنعتهم بالمدونات لغايه ما عملوا شويه مدونات

إشارة مرور

مدونه أشترك فيها مع أتنين معايا فى الشغل ... إحنا لما عملنا المدونه كان فى دماغى أنها تتكلم عن القضايا التنمويه و الأقتصاديه و المجتمعيه المصريه المختلفه ... بس الموضوع خرج من أيدى و أتحولت لمدونه فضفضة و كلام مختلف شويه ... هيتكلم فيها طوسون زى ما وعدنى عن نظريه كرسى الفرعون و نظريه تناكح الحضارات .. و هيتكلم فيها بوو عن الحاجات الغريبه الى شافها فى بلاد بره... تابعوا المدونه و حطوها على الفيد ريدر بتاعكم و يلا بينا

مدونه صبح صبح

مدونه تانيه عاملها بوجى ( المحاسب و زميلى فى الشغل ) لسه مش عارف هيتكلم عن أيه بس هو على السكه أنه يبقى مدون تمام... برضه حطوا بوجى على الفيد ريدر و تابعونا

مدونه حكى مش فارغ

و دى بقى ليها قصه ... فاكرين لما رحت العين السخنه و قابلت مجموعه من الشباب العربى ... عملنا هناك مبادره أسمها شبكه المدونون الشباب العرب ... و عملنالها ويب سايت و حركات ... بس بصراحه الموضوع فشل علشان المدونين أساسا ضد فكرة التجمع ( و انا نفسى واحد من دول) .... المهم قررنا بعد كده نعمل مدونه مش رسميه قوى زى اللى فاتت نجمع فيها مجموعه من المدونين العرب الجامدين و نتبنى فيها قضايا بتمس العالم العربى و نحاول نعمل تأثير ... المدونه بدايه طريق يارب ينجح ... المهم برضه تحطوا المدونه على الريدر و تتابعوها

----------------------

ملاحظه أخيره: انا بيجيللى فى الشغل متدربين بيساعدونى و انا ابتديت أشرط عليهم أنهم يعملوا مدونات ... فالقايمه لسه فيها مدونات جايه

ملاحظه بعد الاخيره : ده كان إعلان مجانى للمدونات اللى فاتت فياريت متنسوش تحطوهم فى الريدر الهى يكرمكم

أأأه كنت هنسى ... لو معندكش ريدر ممكن تشترك فى خدمه الجوجل ريدر

4 comments:

خمسة فضفضة said...

السلام عليكم ورحمة الله وبركاته
الف مبروك علي المدونات الجديده
اعتقد ان اصحابك بعد نا التدوين يشدهم شويه هاتلاقيهم هما لوحدهم بقوا مدمنين ومؤمنين جدا بالفكره وبيدعوا ليها ناس تانيين بنفس القوه والحماس اللي انت دعتهم بيها

سلام

Saloury said...

Elnharda I'm in..
ba2a ma3ak Blogger gdid
ymkn 7agati katebha mn zaman bs bakasl a7otaha bs 5alas
ana qarart abda2
w belsodfa la2eet el post bta3k dh
lw knt a3raf knt 2oltlk badri 3ashan t3mli e3lan ana kaman
w ba3dain 2oltelk 1000 mara
Google msh mstanya e3lanatk:@

محمد الكومي said...

اهم حاجة الصنف يا بهظ بيه

braveheart said...

وأنا كمان يا بهظوظتى أنت اللى أقنعتنى بفكرة التدوين! وعندى مدونة لسة بادأة وما عنديش خبرة بس يا ريت تشوفها وتساعدنى! أنا اسمى دايما vraveheart بس لية اسم جديد ناس سمونى عجوة حاول تخمن مين عجوة ولو فشلت أحمد عصمت يأوللك! المدونة هى
braveheart-forbetterfuture.blogspot.com