12 Jan 2008

تلاتين يوم إسلام

حد فيكم سمع قبل كده عن مورجان سيبرلوك ... ده يا سيدى مخرج فيلم supersize me فيلم وثائقى بيتكلم عن الأضرار اللى ممكن تحصل لما تاكل ماكدونالدز تلاتين يوم ورا بعض

الراجل ده بعد النجاح اللى حققه مع الفيلم لدرجه انه قدر يغير صناعه الفاست فود بيعمل برنامج فى التلفزيون قايم على فكرة التعايش و التواصل .. بكل بساطه بيجيب واحد من معتقد أو من فئه و يقعده مع عائله من فئه تانيه خالص ... يعنى يجيب أمريكى مسيحى متشدد يقعده مع شاذ أو واحده لا تؤمن بالله يقعدها مع عائله مسيحيه.

تكنيك تنفيذ البرنامج ناجح جداَ فى القضاء غلى الستريوتايبس أو التنميط و القولبه بلغه التنمويين ... يعنى أنك تصنف شخص فى كاتيجورى أو تصنيف معين من غير متحاول تعرفه.

على السايت الجامد ده اتفرجت على حلقه من برنامج مورجان تلاتين يوم و اللى فيه جاب واحد أبيض مسيحى من ويست فيرجينيا الى حى مسلم فى أمريكا و هناك عاش مع عائله مسلمه لمد تلاتين يوم بشرط انه لازم يلبس زيهم .. ياكل أكلهم ... يصلى علشان ربهم ... و يبقى كمان شكله زيهم ... فربى لحيته و لبس جلابيه و سافر للحى ده.

الحلقه جامده جدا و اللى عايز يتفرج عليها يضغط هنا ... ابقوا ارجعوا نتكلم عن رأيكم فى الفيلم

5 comments:

عـلا - من غـزة said...


مرحبا يا بشمهندس ازيك وكيف حالك

والله الفيديو رهيب رهيب رهيب
بجد الراجل كان تغييره ايجابي جدا واخد انطباعات كويسة اوي عن الاسلام ... بتهيألي واحد زي ده وارد جدا انو يسلم بعد كدة ..
اكتر حتة ضحكتني كانت في الجزء الي بيتعلم فيه نطق الحروف العربي ههههه
وطبعا الحتت الي كان المخرج بيسأل الناس في الشارع عن المسلمين والاسلام بجد تحزن ... شئ مؤسف .. الحمد لله هنا الناس اقل رعبا من المسلمين من امريكا .. على الاقل متعودين على منظر المحجبات ..
فكرتني اني لازم ابقى اكتب عن الموضوع ده في بوست مفصل
يلا سلام
وتحياتي :)

Sara Swidan said...

إيه؟؟

فين الراجل بتاع البلالين؟

ليه شلته ؟ لـــــــــــــــيـــــــــه؟؟

إنت فين يا واد ؟ تشيكوسلوفاكيا؟

قللي يا بهظ لو في أي حفلات ف اسكندرية أو ورش أو أي نيلة على دماغي ، عايزة أعمل أي حاجة ف حياتي
!

بس خلاص

coffee break said...

مدموازيل علا من غزة
ماعتقدش القضية هو هيسلم و لا لاء
الفكرة تتمحور فى ان الواحد لو عاش وسط من يرفضهم اكيد فكره هيتغير عنهم
يعنى زى ما نجيب حضرتك نقعدك فى بيت يهودى شهر تصلى زيهم و تكلى زيهم

Bahz Baih said...

علا
اسف على التأخير فى الرد بس انت عرفه الشعره .. ساعه تروح و ساعه تيجى
الراجل ده مشكله يا علا و لو شفتى فيلم سوبرسيز مى اللى حاططله لينك هتقدرى فن الأفلام الدوكيومنترى
بس انا معتقدش ان الراجل ده ممكن يسلم بعد كده لسبب بسيط .. هو ان الخطاب الدينى عندنا لسه مركز على فكرة دين الدوله و اللى بالنسبه للأمريكانى العادى ده ش صعب للغايه فى حين التوجه فى الخطاب لدين الفرد و الضمير ممكن يجيب نتيجه أعلى من كده بكتير .. بس يلا أكتبر عن الحياه فى بلجيكا انا متشوق أقرا ده

سارة سويدان
صباح الخير !!!؟

أستراحه القهوه
أحم .. هو انا متفق معاكى ان القضيه مش انه ممكن يسلم و لا لسه .. بس عارفه أحيانا التعصب بيحصل فى الأتجاهات المضاده ... فستريحى كده و خدى نفس و بلاش تشنج
على فكرة البلوج بتاعك حلو .. لو تبطلى تاخدى المواضيع علىصدرك

السـيد شبـل said...

و الله انا شايف ان الراجل ده ف طريقه للاسلام بجد
الطريق اللى هو بيمر فيه قريب من الطريق اللى بيمر فيه اى شخص قبل دخوله الاسلام