لا أعلم تحديداً لماذا أكتب هذه السطور... يمكنك أعتبارها تساؤلات ...خواطر...أرتجال على حدود اللامعلوم
-------------------------
لماذا فى بلادنا يقترن الفقر بالقذارة...؟
هنا أقتبس من صديق لىُ "عندما ذهبت الى الهند وجدت أننا ف حال يدعو الى شكر الله و لكن عندما زرت المكسيك رأيتنا و لاد وسخه..تسائلت لماذا..؟
لقد أمنت أن الفقر و القذاره لا يرتبطان ببعض بعلاقه ما فالبلاد التى ذكرتها كلتاهما فقيرتان و لكن شتان الفارق... ففى الهند كم هائل من القاذورات و روث البهائم و دعك من كل ما تسمعه أذنك عن العبق الهندى الاصيل فما هى الا روائح جلودهم التى خاصمتها المياه... فى حين أن أمريكا الاتينيه و المتمثله فى المكسيك يعانون من نفس الفقر المدقع ,من تدنى للموارد و كثافه سكانيه عاليه و بالرغم من هذا تجد شوارعهم و ملابسهم نظيفه... نعم قديمه و لكن نظيفه... دعك من هذا كله و لن أظلم المصريين بمثل هذه المقارنه ... المغرب ... مسلمين و عرب و أفارقه... و زى الفل... تشعر كأنك فى خمسينيات القرن الماضى فى القاهرة و عليهم نفس الظلم الواقع عليك و لكن للبشر قدرة غريبه على الابتسام
-------------------------
صحيح لماذا لا يبتسم المصرى فى وجه أخيه ...؟؟
الكل هنا يحمل نفس البلاء, نفس الخراء, نفس الهموم و القهر و الظلم و الامعقول... و لكننا كبشر - بعيدين كل البعد عن السياسه -بدلا من أن نتكاتف ... أصبحنا نتصارع فيمن يحمل هموما أكثر و نتفنن فى مضايقه الاخرين... أعرف يا هذا أن الدنيا بصمت عليك طابع الذل ..أعرف أنك تحمل من الهموم ما لا يطيقه بشر ..و أيقن أن جهنم لن تكون أسوأ حالاً و لكن لماذا لا تبتسم فى وجهى ... الا أشاركك نفس وصمه العار, الا أشاركك القهر و الظلم... أقسم لك أننى انام الى جوار فئران المناور... و لكن أعدك أن أتبسم فى وجهك و نحن نقف فى المصلحه الحكوميه ننتظر أحساناً من الموظف المسئول فى جو يونيو الخانق.. أرجوك و أتوسل اليك ... و النبى تبسم
-------------------------
أصحيح أننا السبب فيما نحن فيه من تردى... أعرف صديقاً يمتلك خط فودافون و أخر موبينيل و ثالث أتصالات, و يشتكى من الفاتوره و المكالمات... الا ترى معى أنه أبن وسخه...؟؟؟
هل أصبحت الحلول الفرديه فرض عين, هل أصبحت الهجره ضروريه و هل أصبح الفرار قمه الشجاعه... يالها من ملهاه
القاهرة... صيف 2007
9 comments:
عزيزى بـهـظ
خواطرك منطقية و النظافة شىء مهم و اساسى و يعبر عن حضارة الشعوب و لكن الانكى و الافدح من الوساخة اللى حوالينا هى الوساخة اللى فى الادمغة و العقول
يا بهظ الشعب المصرى دماغه باظت و الناس راايحة فى ستين مصيبة
طبعا انا ما بعفيش نفسى من انى رايح بدرجة ما برضه لان كل واحد فينا بيتاثر باللى حواليه وده بيقودنا للنتيجة الجهنمية اللى انت و صلتلها و التى تبدو الحل السحرى لجميع مشاكلنا و هى اننا نخلع م البلد و نهاجر فى اى بيئة نضيفة و متحضرة
اما صاحبك بتاع التلات خطوط ده فحاجة كن اتنين يا يحط لسانه فى بقه بروح امه و ما يشتكيش م الفواتير
يا يقلب خطين منهم بيزنيس و عندى العيال اللى هتقفلوا بيهم فى محطة الرمل او ع البحر و اهى برضه لقمة عيش طرية
السلام امانة للكرف و مزاجنجى
اخوك هش
شوف ماينفعش تقول مشكلة من غير ما تقول حلها او على الاقل نظرية الحل وتتوجهة الى يقدر يحلها وتخليه يحلها وإلا يبقى مافيش مشكلة.
مش هتكلم بشكل شخصى عليك ولا انك بترمى ورق واكياس فى الشارع وانا بنهيك عن ده إجبارى واقولك يا معفن علشان ما ترميش علبة السجائر الفاضيه فى الشارع وتستحمل شوكها فى إيدك لحد صندوق الزبالة، انا مش هجيب سيرة ده كله .. هكلمك عن نظرية الحل فى رآئى .. فى تجربة فى شارع رايل فى حلوان جنوب القاهرة عند محمد رفعت ما انت عارفه وعارف انه قلب بتاع بينج المهم، فى الشارع بتاعه كان فى صندوق زباله كبير .. الناس تيجى مسافات بأكياس الزباله وترميها جنب الصندوق وتمشى، حاجه تغيظ يعنى خلاص نقش الحنة هيطلع من رجلك على خطوتين كمان لحد ما ترمى فى الصندوق ... وبعدين بالليل قوى واوقات الفجر يجيى عيال بعربيات كارو يدورو فى الزباله على البلاستك والحديد ويطلعوه ، وطبعا اثناء عملية البحث تقريبا بيطلعو نص اللى فى صندوق الزباله بره الصندوق.
الناس بقى بتاعة البلدية لما تلاقى ان الصندوق لسه مش مليان يمشو رغم ان الزباله جنبه على نفس ارتفاع الصندوق، بس التعليمات بتقول الصندوق مش اللى جنب الصندوق...
اختصارا - كعادتى دائما - الناس اللى قريبين من الكارثة دى قررو انهم يشيلو الصندوق من مكانه ويزرعو شجر مكانه ويحاوطوه بحبل، و يتناوب على حراسة المنطقة مجموعة الجيران بالتناوب لمدة اسبوعين.. الناس عملت آيه ؟ بقى كل واحد يحط شنطة زبالته قدام باب بيته، وتيجى البلدية الصبح تلم الاكياس من قدام البيوت، لكن بتسيب الزبالة فى الشارع.. فبقت الناس لما تطلع كيس الزباله لما تلاقى ورقة قدام بيتها تحطها فى الكيس علشان يشلوها بالمرة .. وبعد مرور تقريبا شهرين بقى شارع 9 جامد جدا ونظيف اكتر من الاول بفضل ان كل واحد شال مسؤوليته فى نظافة شارعه لإنها من نظافة بيته.
محمد بدرى من شارع 9 أمام كشك عم دويش
صباح الخير
انا مع بدرى ان مينفعش نقول مشكله من غير حلها.
وبعدين الحال اللى احنا فيه احنا مشاركين فيه وبدرجه كبيره.
احنا مش بنتحرك غير لما السكينه تبقى فوق رقبتنا بمليمتر واحد.
الحلول الفرديه اكيد مهمه بس تتحول بعد كده لجماعه تحاول تطبق وكل الثورات بدأت كده....فكره.
شامم نبرة تشاؤم اعتقد ان هيثم أثر عليك,سفر وحركات,احنا حنعيش هنا ونصلح هنا (ده رأيى لغايه دلوقتى).
بهظوظ الكلبوظ
اعتقد انك محتاج اجازه زى بالظبط لاعادة شحن المولدات.
اليكس اجنده
أيه يا عم بدرى
هو انا لامؤاخذه بتكلم هندى
أظن انا كنت واضح... دى دعوه أنك تبتسم فى وش اللى تشوفه ... حتى لو مجامله.. مش مهم
المهم تتعامل مع الناس زى ما تحب أنهم يعاملوك و انا أحب الناس تضحك فى وشى و تتكلم بذوق... هندى الكلام ده... انت عايز حل لده أزاى يعنى... بص احنا نعمل مسابقه أجمل ابتسامه و نرعاها من كولجيت
:D
عندك حق يا عصمت انا عايز أجازه
بهظ بيييه
بما ان الكلام ماكانش هندى و احنا الى طلعنا هنود
تفتكر ان الابتسامة هاتخلينا شعب نضيييييييف؟؟؟
محاولة للدفاع عن الذات
______
ملحوظة هامة
ثبت علميا ان الفئران سبب رئيسى فى طمس معالم الابتسامة
دى بأى محاولة للهجوم ;)
الانسه دودو
تحية طيبه وبعد
ردا على خطابك الوارد الينا فى بريد البهظ فانى اود ان اجذب انتباهك الى بعض الملاحظات الهامه
لقد ثبت علميا ان فعل الابتسامه يحرك عضلات اقل فى الوجه من التى يحدثها فعل التكشير مما يترتب عليه ارتياح عام فى عضلات الجسد يعقبها افرازات انزيم السوسورلى والذى يقوم بتنشيط الخلايا البنفسجبه فى قشرة المخ ولغير الاطباء ثبت ان الخلايا البنفسجيه هى المسئوله عن التفاعل الكيميائي المصاحب لفعل السعاده ولكى يتباسط المفهوم الى العامه فانه عندما يتظاهر المرء بالابتسام فانه حقيقيا ينشط سيكولوجيا، وليس كما قالت النظريات القديمه انه لكل فعل نفسي رد فعل فيزيائي ولكن حقيقيا لبعض الافعال الفيزيائيه ردود افعال نفسيه
لذا فدعوتى للتظاهر بالابتسام باطنها هو جلب السعاده على النفس البشريه
ثانيا وهذا ليس دفاع عن النفس
فمعروف عنى انى اعمل فى مجال مكافحه البطاله ويأتى القاء الاوراق فى الشارع( والذى هو بالضرورة عمل مشين للافراد العادييين)كنوع من الحفاظ على فرص العمل المتاحه فى قطاع الزباله
_________________________
اما بالنسبه لفئران الهمستر التى نخبئها انا وبلال فى المنور فهما من السلالات النادره والتى قمنا بعد عمليه ناجحه بانقاذها من مختبر يجرى تجارب كيميائيه لاطاله الشعر على هذى الفئران بعاصمة جهنم فى ارضه المسماه حلوان
_______________________
عزيزتى دودو
كما ترين فان اهدافنا ساميه ووسائلنا ناميه ومقاصدنا نبيله
واجابتنا على اسئلتك غايه فى الشفافيه وبدون تلميحات والاختلاف فى الرأى لايفسد للود .....كومنت
مين قال اننا مش بنحب النضافة
احنا بيوتنا نضيفة جدا هى المعضلة بس فى الشارع ومتهيالى احنا مش شعب وسخ واحنا فى اسكندرية لما الحكومة اهتمت بشوية شوارع وميادين الناس كمان كانت بتهتم بنضافتها بس المشكلة اننا معندناش ثقة فى الحكومة وتقوليش بقى نبتدى بنفسنا والكلام ده لاننا ملايين من البشر ونضافة البلد دى محتاجة جهة مسئولة وضخمة كمان عشان تقوم بيها
وبالنسبة لحكاية الابتسام دى فانا كنت بعمل كده والله بس بعد كام كبسة فى وشى خدتها من قاصرها وبقيت اتجنب الابتسام
اولا مين الخنفسه اللى طلعت اول ما فتحت البلوج بتاعك دا
وبعدين ايه اللى نزله عندى على الـــask bar
ما علينا هبقى اجيب الشبشب وارقعه
المهم بعد ما اونيكس اتسرقت مكانسها وسرقو حتى صناديق الزباله وعملوها براميل مخلل للمحلات
عايز تقول ايه على شعب وسخ اخد على الوساخه
لا وكل واحد يكنس ادام بيته ويرمى الزباله على جيرانو
قال كدا الواد نضيف اوى
احنا شعب قذر بطبعو
اه جدعان وطيبين بس كشريين
لما نضحكو نقول اللهم اجعله خير
كان الابتسامه رسول الفقر والنحس
والله احنا الفرحه تشوف وشنا تخلع
معلش كلمتين وقفين فى زورى
ازاى الحر فى مصر هههههههه
Post a Comment