27 Dec 2007

لما الشتا يهد الرجال

و أدى الشتا عاد من تانى ... كان زمان للشتا أحاسيس مختلفه عندى ... يعنى كنت بحب أوى البلوفرات و اللبس الشتوى عامه ... لسعه البرد مع كوبايه النسكافيه ... المشى فى محطه الرمل بعد المطرة (الشتا بالأسكندرانى) ... الأفلام و أنت تحت البطانيه.

لكن الملعون من ساعه ما نقلنا فى الشقه الجديده نسانى كل ده... بقى الشتا عباره عن ريحه نتنه شاممها و عارف أن انا مصدرها و بعمل نفسى مش واخد بالى ... الشتا دلوقتى يعنى قشف الأدين ... الشتا بقى لما يدق الباب أفتكر معاه أن حمامنا من غير سخان.

أصعب حاجه و أنت واقف قدام الدش ... زى ما نزلت من بطن مامتك و بتبص للميه اللى انت عارف انها عمرها ما هتسخن ... كأنك بالظبط هتخلع ظفر من أيدك ... تطلع بره الحمام ... تلبس هدومك كلها من غير ما تستحمى ... و تفضل تفكر .. و ذكائك ميسعفكش .. مالهاش حل ... ياتفضل نتن .. يا تستحمل و تستحمى ... تعرف ليه القطط بتخاف من الحموم ... تبتدى تفكر ... و تلاقى نفسك من غير ما تاخد بالك أبتديت تلحس دراعك ... يييييييع أيه القرف ده ... لا لا لا ... لازم تستحمى يا واد يا بهظ .

تدخل المقبره تانى ... تقلع تانى هدومك ... تمد أيدك برعب ... تصرخ ... و تسمع بلال بيضحك ... هو السخان بكام يعنى ... انا بعد الحمام ده هنزل أشترى سخان وش ... تمد أيدك كلها ... شويه ميه يجوا على صدرك ... بررررره.... اللعنه .... تراجع نفسك .. والله الريحه الوحشه مش وحشه قوى .... لا ... ماينفعش .. مش بعد ما بليت أيدك ... تمد كعب رجلك ... عادى ميفرقش .... تدوس فى الميه و تبتدى تيجى على فخدك .... أااااه ... تفهم معنى انا الحكومه بتاعه أحمد السقا فى فيلم الجزيره ...شجاعه فجائيه و روح زورو تلبسك ... يلا مبدهاش ... هوووووووووووووب ... تختبر لحظات الموت لثوانى ... كفايه كده ... تخرج من تحت الدش و انت ناسى انك تحط صابون أو أى حاجه و تجرى على السرير .... تحت اللحاف .. جميله بقى اللحظه دى ... مش لازم سخان خلاص انا أستحميت ... تبص على ضوافرك ... ياااه لسه وسخه ... طب أبقى أغسل ايدى .. اهم حاجه الريحه راحت .... تصبحوا على خير بقى.
-----------------------------
بلال بقى بيقول :
هييييه دنيا...رجعت ايام الشتويه يا بهظوظ

بجد بقى ومش تريقه الاستحمام فى ظروف خطرة زى ال بنمر بيها انا والسيد بهظ كأنه قفزة ايمانيه فى الخلاء لانك بتحتاج خطوة واحده للتحرك تحت طاولة الدش خطوة صعيبه بتشد فيها كل جلدك شهقة حد بيمارس لحظه انتشائيه مفاجأه او تعذيب مباغت واذا كان ده هيحصل فى بداية النهار يبقى اليوم هيبتدى برجة عنيفه بتكتسب لذه منها أو صدمه تخليك تمشي باستغراب

هو فى ايه ...مالها الناس ماشيه كده ليه ...انامين !!!؟هى الميه الساقعه عملتى أيه!!!؟

وتحس احيانا انه خالص لازم تلم الجاكت عليك شويه وانت ماشي كأن حد انتهك عرضك ولا حاجه وانت نايم متخدر ...وتبتدى تبص فى وشوش الناس انا ايه ال حصلى ...انا مكنتش كده ...ده مش جلدى ...ده جلد فرخه مسلوخه...طب رجعونى لامى ...اناعايز ماما تحمينى ...والناس متعزركش ...متقدرش انك اترميت تحت دش ساقع وبارد وتنح اوى ...وتبتدى تعاملك هلى انك اهبل نوتردام ...معلش يا حبيبي البس القميص ده...وتحط كفوفك جوة القميص ويشدوها بقسوة

تصرخ ...تصرخ ...تصرخ... لالالالالالالالا

انا مش مجنون انا مش واحد مستحمى ...انا كنت داخل احلق دقنى و النداهه ندهتنى وقالت الدش يا واد الدش....وتنشأ بعديك حركه جديده فى الادب الروائي الاستحمامى ويكون من اشهرها..روايات زى

المسام النتنه الضيقه...لبركليز

مائة عام من الجرب ...لحمص

مش عارف اقول ايه ...انا مستحمى حالا

-----------------------------------

انا زودت تعليق بلال علشان هو بيشاركنى المأساه اللى إحنا فيها فمش قليل عليه يشاركنى البوست و بصراحه التعليق أجمل من أنه يتساب فى الكومنتات كده و مات الكلام... يلا العواف

4 comments:

zeroeffect said...

هههههه
جربتها كتير و انا بدرس فى جامعة بره إسكندرية
كنت بفضل واقف قدام الدش عشر دقايق بشاور عقلى و بعدين مره واحده ادخل تحت المياه
احس انى دماغى حتقف
بس لازم استحمى .. كنت بلف حوالين نفسى بسرعة عشان اسخن نفسى و أعد لغاية 60 و اطلع من تحت المياه جرررررررررررررىىىىى
كفاية دقيقة اوى فى العذاب ده ... ربنا معاكوا lol

Anonymous said...

و ليه تعمل كده ف نفسك و الكوز موجود ؟ كل ما عليك إنك تسخن حلة مية كبيرة و تبردها في أراوانة محترمة و تغرف من الكوز و تاخد أحلى دش

و متنساش تكب أخر شوية مية من الأراوانة مباشرة و إبقى إدعيلي :)

Anonymous said...

يا عيني ... انتوا صعبانين عليا انا عندي سخان غاز و بفضل تحت الدش ساعه و الاغاني شغاله علي الموبايل لدرجه ان رقبتي بقت بتوجعني من كتر الوققه تحتيه . و علي فكره يا بهظ انتا بقيت تنفض للقومينتات روح شوف البوصط اللي فات و تعالي بسرعه وليد برضو

Bahz Baih said...

تأثير الصفر
أنت الوحيد اللى حاسسنا لغايه دلوقتى يا زعيم... و ربنا على الظلم و المفترى
انا عرفت انت ليه دلوقتى مسمى البلوج بتاعك تأثير الصفر ... من اللى شفته يا ولداه

المجهول
واشح انك محتاج تقرا أكتر عندنا علشان تعرف ان احنا اساسا معندناش بوتجاز

وليد
انت جاى تزلنا بقى ... ها ... جاى تغيظنا ... مانا فى البيت فى مصر عندى بدل السخان اتنين ... بس ميستحماش هناك علشان احافظ على مبادئى
بالنسبه بقى لموضوع الرد على الكومنتات اللى فاتت .. يا وللى ... انا بالعافيه بلاقى وقت أخش على البلوج و البوست الجديد بيخليك ترد على كومنتاته الأول وكده ... متحبكهاش يا سيدى .. الدنيا اسهل من فتل الأبره... خليك فريش كده ...
احنا فى بلوج

معلومه .. ممكن تحط اسمك تحت زى
nickname
و بعدها تحط اى يو ار ال ... جوجل مثلا و بكده يظهر اسم وليد