16 Oct 2007

كائنات درجه تالته تتغذى على البن




من الغرور يمكن أو الأنشغال الواحد مبقاش يقرا بلوجات جديده ... بقيت أكتفى بتصفح بعض و ليس كل البلوجات اللى عندى على السايدبار... لكن من يومين كده أقتحم حياتى
بلوج جديد و كاتبه أكثر من رائعه لسه عمله البلوج يادوبك من شهرين ... رجعتلى أحساس كنت فقدته ... من كتر الكتابات السيئه اللى الواحد بقى يشوفها فى حتت كتير ... و مش معنى كده ان انا كاتب رائع و لا حاجه ... بس فعلا فى حاجات بشوفها مالهاش لازمه تتقرى ... يكمن ده اللى جاب لى زهق من البلوجات ... لكن ساره ليها أسلوب كده يفكرك بالبلوجات القديمه و نوستالجيا الكتابات المعجونه بالذاتيه الشديده اللى تخليك تحس من أول لحظه جمال شخصيه الكاتب ... و هى تقدر تعتبر ده غزل لو حبت ... بس انا حبيت هنا أوثق لحظه معرفتى بشخص فقط من خلال كتاباته من قبل ما أقابله يمكن بعد كده نبقى أصحاب و يمكن لأ... المهم هحاول فى السطور اللى جايه أديكم لمحه من البلوج

أول حاجه تشد أنتباك فى البلوج هو الصور ... هى واخده الصور بعدستها مش جايباها من حته تانيه ... بس الغريب أن الصور معظمها مهزوزه ... بس لما تكمل قرايه تلاقى بوست "
معرفش ليه " و اللى سارة بتتكلم فيه عن التصوير عن الحيره اللى جواها لما بتصور و ده اللى بيخللى الصور مهزوزه


الشيء الحزين في التصوير إنه بيعزلك تماما أي جمال نفسك تشوفه في الحقيقة ؛ يعني مرة كنت بتفرج على راجل بيصطاد سمك على البلوكات ، كنت مستمتعة جدا و انا بتفرَّج عليه ، لكن في نفس الوقت نفسي أصوَّره. لما بّبُص ف الكاميرا مش بشوف نفس الجمال خالص...الحيرة بقى . أصوَّره ، و لاّ أتفرَّج عليه (غالبا بعد الصورة ما بتتلَقَط ، حتى لو من غير فلاش , اللى بيتصَوَّروا بياخدوا بالهم مش عارفة ازاي)...فوصلت لمرحلة مع نفسي ، بعنف كدة بقولها : "يا تبصي بعدسة الكاميرا يا تبصي بعينيكِ؟؟

انا شايف سارة كاتبه عفويه و تلقائيه و أراهن أنها مبتراجعش البوستات بتاعتها قبل ما تنشرها على البلوج... هى بتكتب كده و ده يمكن سر جمال كتاباتها هديلك مثل تانى فى بوست بلوفر موهير و حته سيراميك هى بتوصف سعر برطمان النسكافيه بأنه بخمسه جنيه و خمسين قرش كده :5.50 قرش" مع إنه لما تكتب رقم زى ده التعريف يبقى للجنيه يعنى المفروض يتكتب "5.50 جنيه بس ساره فضلت انها تكتب زى ما بتحكى أو بتتكلم

عايز بقى تقرا بجد حاجه رائعه أدخل أقرا عند سارة أزاى الست بتطبخ فى بوست
أندهى للبواب اللى خلانى أشتاق لمامتى بجد ... هو بوست عائلى جداً ...مامتها كاتبلها فى الكومنتات و أصحابها ...و المؤثر جداً احساس الست بالمطبخ حتى لو بتعمل بيض أومليت

إبشري البصلة و ادعكيها بالملح و الفلفل قبل ما تَسقطيها ف الشربة ... ماتحطيهاش صحيحة ، عشان طعمها يبقى أحلى
الأمومة تبدأ من المطبخ . مع أول ريحة طبيخ تطلع من المطبخ و أنا واقفة فيه ، مع أول معلقة شوربة دقتها عشان أشوف ملحها أد ايه ، مع أول لسعة على إيدي ... عرفت إن هوه دة سحر الأمومة بجد ، إني أدوِّب لأهلي حبي ليهم ف الأكل ، و أأكلهلهم بالمعلقة

اسلوب سارة فيه أسترسال فظيع فجأه تلاقى نفسك داخل من بوست على التانى و من غير متحس بتفتخ الكومنتات و عايز تكتب لها " أنت مجنونه... كفايه بقى ... حرام عليكى هموت من الضحك"

مش مصدقنى أقرا ليها بوست
خسارة و على ضمانتى.

صحيح... كائنات درجة تالتة ، متعددة الوظائف ، ضعيفة الذاكرة ، تسكن الخرصان ، و تتغذَى على البُن

4 comments:

Sara Swidan said...

ايـــــــــــــــــه؟
من ناحية إيه يعني؟ إزاي يعني مش فاهمة ...

أنت كمان عجبك البلوج ... مش كفاية إنك دخلت عليه أصلاً ...
أنا قلت إنك حتقول عليه بقى بلوج عبيط بقى و مولات و حفلات و بخور و تخلُّف ...

شوف يا عم بهظ ... أنا صحيح لسة بلوجي جديد ، إنما جبر الخواطر على الله ...

إحنا مش محتاجين حاجة من حد .. إحنا لا بنشحت ولبا بنقول لله. معايا مشط فلاَّية يطلَّع الدكر و النتاية و صلي على رسول الله ...

أنا إيه إللي أنا بقوله دة ، أنا إتجننت باين عليا!!

ميرسي بجد يا بهظ ... مش عارفة أقولك إيه..

فرحانة جداً

Sara Swidan said...

كمان في حاجة ..

مش كل الصور بتاعتي ..

في و في ..
:)

فل

Bahz Baih said...

ساره... انا قصدت أكتب كده لأنى أعجبت بأسلوبك بجد و لأنى لسه معرفكيش قررت أننى أوثق من الفعل دوكيمنت اول مغرفه بالكاتب من غير ما تتدخل المعرفه الشخصيه فى كده ... على سبيل المثال انا مقدرش أحكم بصوره موضوعيه عن كاتب زى بلال لأنه ببساطه صاحبى... و أراء الواحد بتتأثر كتير بنوعيه حكمه على الكاتب لو كان يعرفه و لأنك بلوجر فى نظرى جامد و انت عايشه فى أسكندريه فأنا متوقع ان اكيد هعرفك فى يوم ... فقبل ما أعرفك سواء كانت المعرفه دى بنتيجه سلبيه أو إيجابيه ققرت أوثق أفكارى عن أسلوبك الكتابى ... بس فاهمه حاجه... مش مهم
كمان فى حاجه شدتنى فى كتاباتك... ان انا و انت بنكتب زى بعض أوى... نفس الجنان و الأفكار الذاتيه ... انا بعتبر أحلى البوستات اللى كتبتها هى الذاتيه منها و شايف ان بوستاتك فيها نفس الروح ... غير كل ده و ده انا فعلا كنت بسخسخ على نفسى من الضحك و انا بقرا البوستات بتاعتك... مما معناه ان انا اكيد تذوقتها و بالتالى لابد ان ابدى أعجابى بيها
ثالثا و ده الاهم ... انا يابنتى شخص عبيط بطتب فى بلوج على جنب لانا هيكل و لا بلوجى ده هو الاهرام و لا الدستور فمش لازم كل مره اسيبلك تعليق و لا حاجه تحسسينى ان انا عملت فيكى جميله... عادى ده المفروض ان انا اللى اعمل معاطى كده ... انت من اللى كتبوا فى أمكنه ... يعنى فى حاجه منشوره بأسمك ورق ... انا لو الكهربا قطعت عن الدنيا مش هلاقى حاجه من اللى انا كاتبه بس انت لأ.... فيعنى بلاش تنفخى فيا لأصدق بجد ان انا كاتب رائع و بتاع ... ياماما انا عجلاتى

Sara Swidan said...

أيه دة؟؟
انت كمان قريت امكنة؟؟
الله ينوَّر !
و كان إيه رأيك؟؟

كله يقوللي إنه قراها ، و محدِّش يقولي إيه النظام يعني شغالة ؟؟ ولا وحشة و هجص ؟؟ ولا أي حاجة يعني...

قوللي رأيك طيب، هة؟؟