22 Oct 2007

سعيد...!!؟


فى ناس كتير قضيت عمرها كلٌه و عمرها ما حست بالانبساط ، كانت دايماً قلقانه ... خايفه بتفكر و تعمل الف حساب، فى حين إنها و الله ما مستاهله ... انا قلت بقى اساعدهم بشويه تمرينات بتعمل دماغ ... بس دماغ سعاده فى الحلال يا معلم
------------------------------
دماغ رقم واحد
درب نفسك على الأبتسام ... فاكر إعلانات كلوس أب ... أيوه هى دى... الابتسامه أم سنان قدمانيتان زى الارانب... الابتسامه بتيجى بتخللى حاجات حلوه تحصلك ، بص معايا على المعادله دى

حاجه حلوه = سعاده نفسيه = أبتسامه
يبقى أكيد لو عكسنا المعادله وحسب قوانين الرياضه يبقى
أبتسامه = سعاده نفسيه = حاجه حلوه

يبقى أضحك و انت هتلاقى حاجات حلوة بتحصلك، و لو مش مصدقنى أضحك برضه مش هتخسر حاجه
------------------------------
دماغ رقم أتنين
إتجنن عشر دقايق كل يوم... بمعنى أعمل حاجه مجنونه كل يوم لمده عشر دقايق حاجه متخجلش منها و متتصورش نفسك بتعملها، إمشى مثلا على البحر حافى ... جمع مجات نسكافيه ... أستحمى بميه ساقعه فى عز الشتا و انت بتغنى

الحاجات المجنونه دى هتخليك تكسر روتينك اليومى و ترفريشك كده زى الديسك توب بتاعت الويندوز ... بعد الكليك اليمين تلاقى الويندوز عمل كده زى الكلاب و هى طالعه من الميه . بررررره رفريش.

على الأقل هتلاقى حاجه تحكيها من وقت لأخر بدل مانت عايش فى حكايات غيرك
-------------------------------
دماغ رقم تلاته
إدهش نفسك من وقت للتانى... و دى سهله كيك... حضر شويه مفاجات لنفسك هبله و إندهش لما تيجى... مثلا إشترى بوكيه ورد و إدى العنوان لبتاع الورد و أقوله جيبه فى أى يوم من الاسبوع اللى جاى براحتك علشان انا عايز أندهش... هتقعد تخمن و بعد كده هتنسى فلما يجى البوكيه هتندهش

لما تخش مطعم خللى فى ساندويتش أو طبق على حسب مزاج الشيف و متخليهوش يقولك عليه ... انا و بدرى عملناها مره فى حلوان و بدرى بعد كده بقى يعملها على طول ... فى حاجه تانيه بعملها بما إننى تربيه قهاوى ... كل شويه كده أخللى اللى بينزل الطلبات هو اللى يختارلى اللى هشربه و بمزاجه و يجيبهوللى و اشربه و اندهش ... حتى لو شاى

الاندهاش ده أصله إحساس طفولى جداً مرتبط بالحاجه الجديده ... فالاطفال بيشوفوا كل حاجه جديده بس الكبار مش كده... علشان كده بقولك بص لكل حاجه كأنك أول مره تشوفها و هوب أندهش.
------------------------------
دماغ رقم أربعه
تأمر من أجل إسعاد حد تعرفه... ياسلام لو بتحبه.... انا عارف ان فى دماغ عندنا فى الشر و المؤامرات متتوصاش... وجه قدراتك التأمريه علشان تسعد حد بتحبه أو عزيز عليك ... حطه فى دماغك و أفضل نخور ورا الحاجات اللى بتخليه مبسوط أعملهاله... و لو لقيت حاجه بتسعد بنى أدم ايا كان أعملهاله ... دى صدقه روحك اللى هتطهرها

و رغم أن مهمتك الاساسيه ف ى الدماغ دى هى إسعاد الاخرين إلا ان ده هيخليك انت كمان تنبسط... هتلاقى نفسك كده مش انانى و رزل ...لأ عبيط و مبسوط و كمان الناس بتحبك

مثلا انا بابا بيحب اللى يوفر علشانه ... أقوم انا مثلا عايز ميه جنيه أطلب ميه و خمسين و لما اجيب اللى عايزه ... أقوم راجعله و أقوله ... بابا بابا... انا وفرت خمسين جنيه علشانك.... ينبسط ... ساعات كتير يبقى مش فارق معاه يقوم يقوللى حلال عليك.
------------------------------
دماغ رقم خمسه
حط فى دماغك ان اللى حصل حصل يلا بقى نستمتع بيه.. أسمع دى و صلٌى عللى يشفع فيك*

بابا يا سيدى كان متضايق قوى من أختى و جوزها قبل الدخله علشان طلبوا فلوس كتير علشان جهازها و هو ياعينى الفلوس كانت على القد بالضبط فجهزها و قعد على الحديده... و بقى خلاص مش طايقهم و أفتعل خناقات كتير معاهم من غير سبب واضح ... لحد يوم الدخله عملنا الفرح و الناس جت و مشيت و هو قافش و ماسك العكاز مالوش دعوة بالبشر... جبت تاكسى علشان نروح ورا الزفه للبيت ... وصلنا و بابا طلع يشوف بيتها لأول مره ... على السلم قلتله بابا خلاص اللى حصل حصل و اللى اندفع اندفع ... انبسط بقى و عيش اللحظه ... ابويا أساسا راجل مسخرة ... فلما طلعنا فوق و دخلنا أوضه الصالون و العريس و ابو العريس و ام العريس و كده قاعديين بابا بيحط ايده على الارض و بيحسس على السجاده.

مش هى دى السجاده أم الفين و سبعمايه يا هبه .. و الله فخمه .. لا تستاهل ... قومى يالا فرجينى أوضه النوم ... يخش يقعد على السرير ... و يهز .... لا جامد يستحمل يا حماده و يكلمنى .. خلاص يا بابا مالوش داعى ... طيب المهم خرجنا و احنا خارجين بص لأختى و لجوزها و قالها ... بقولك ايه تسمعى كلام جوزك و أوعاكى تزعليه ... و قام بص لجوزها كده بصه من فوق لتحت قال يعنى هيخوفه و يقوله نصيحه ... و سكت شويه علشان يكتسب كلامه أهمي زائقه ... و قاله و انت ابقى طاوعها

بس كده يا سيدى أعمل دماغ براحتك على رواقه.



LOVE IS IN THE AIR - More free videos are here
-----------------------
*رب السما و الأرض شايفك يا قليل الذكر على رأى مجاذيب أبو العباس

9 comments:

عـلا - من غـزة said...


هههههههه
نصايح هايلة بجد والله !

خاصة حكاية الخمسين جنيه بتوع التوفير :)
ذكاء خارق اهنيك بصراحة :))

بخصوص موضوع الاندهاش .. صدقني انا بمارس الحكاية دي دايما .. بفرح اوي لما توصلني مسج .. ولا الاقي فيلم بحبه في التلفزيون حتى لو كان مكرر .. لدرجة ان صحابي احيانا بيندهشوا اني مندهشة ,, بيقولوا عليا زي الاطفال

ححاول ازيد من كمية الابتسام .. اجرب المعادلة دي اللي بتقول عليها :)

ياللا سلامات

Bahz Baih said...

علا
دى أول الخطوات فى أتباع المذهب البهظى فى الحياه المعاصرة
و لسه ... فى بقى ازاى تتعامل مع الحزن و الاكتئاب
كويس انه عجبك موضوع الابتسامه .. انا شايفه مهم جداً لان البشر بقت بجد كشريه

اما الاندهاش فدى مهاره و كويس انها عندك لان إكتسابها صعب قوى .... عايز يصفيه روح صعبه

Sara Swidan said...

لأ أحلى حاجة لما قعد يحسس على السجادة ...
قال يعني السجادة بنشتريها عشان ننام عليها مثلاً . لحاف.


قشطة يا بهظ ...

بكرة فيلم الواد بلال ... لازم أشوفك هناك يابن الناس...ربنا يستر .


يللا ، رب السما و الأرض شايفك ياللي مش ناوي تيجي الفيلم ف الجيزويت ...

ميرسي كمان..

Anonymous said...

انت عارف انى مش متشائم بس انت شايف ان فيه اى حلجه تساعد على الفرحه
ممكن نبتسم بس فى ثوانى تلاقى اللى يعكنن على اللى خلفوك

اللى عايز يتبسط صحيح يا يسافر يا اما يقفل ام الموبايل

الاجندة

مـخـطـوبـه said...

يا رايق !

Foxology said...

جامدة جدااااااااااا والله احلى طرق للدماغ فعلا

انت عبقرى يا بهظ بيه والله :)

With Myself said...

ضحكتني وأنا متضايق :))

بس إتكاسة حركة الـ 150 جنيه دي!

أخبار أختكو جوزها إيه دلوقت؟ ;)

With Myself said...

ضحكتني وأنا متضايق :))

بس إتكاسة حركة الـ 150 جنيه دي!

أخبار أختكو جوزها إيه دلوقت؟ ;)

Bahz Baih said...

سارة
أظن الرد وصل فيس تو فيس خلاص

الأجنده
مش صح لأن السعاده حاله داخليه كتر منها خارجيه فى رأيى و من الممكن خلقها ... يمكن علشان كده ربنا أمرنا بالذكر اللى فى تفسيرى مالوش أى فايده لى الانسان إلا روحيا إنه بيخليه منتعش كده و مزقطط

مخطوبه
و الله إنت اللى رايقه

fox
ياعم أخجلتم تواضعنا... شكراً يا باشا

مع نفسه
لحمد لله عرفت أوصل الرساله و أضحكك و انت متضايق
أختى و جوزها فى شهر العسل لمده أسبوع دلوقتى :)

مع نفسه تانى
بما إن الكومنت هو هو
يبقى الرد برده هو هو