أمبارح كنت فى القهوه و معجبتنيش، معرفش ليه مجاليش أحساس أن لازم أقعد فيها ، كتير من صحابى سافروا بره و فى رمضان ده القهوه فاضيه، بس ياترى هروح البيت ليه بدرى... و مفيش تلفزيون ، الكمبيوتر بايظ ، قررت أنى أتمشى شويه على البحر لوحدى.
البدايه من المنشيه حيث القهوه و الأتجاه شرقا الى مدى لا يعلمه الا الله مش عارف هوصل مشى و لا هقف فين علشان أركب المهم حاليا ان انا أبتديت المشى ، انا فى عادتى لما اتمشى لوحدى أغرق فى أحلام اليقظه , و المرة ده الحلم كان متوهج.
انا هقدم على طلب للبنك يمول مشروعى الجديد ... يرد علًى مشروع ايه المرة دى!!!؟... انا هفتح فى الصحرا الغربيه محطه توليد طاقه كهربائيه من الطاقه الشمسيه .... يا سلام !!!... شايف محطه الرمل منوره أزاى ... و بعدين يا سيدى أبيع الطاقه دى للحكومه و هى هتشترى الطاقه و كمان توفر أنبعاث فتبيعه حسب معاهده كيوتو ... و انا بقى أكسب فلوس... انت شايف ان اللى بتقولله واقعى ... و انت حد قاللك اسمع ... طب أعمل أيه اذا كنت انا انت و انت انا.... خلاص بقى يا تبنى معايا على الحلم يا تخرص خالص... ماشى يا سيدى.
أه يا رجلى ... الجزمه ديقه قوى كده ليه
انا اصلا نفسى أعمل المحطه دى يابنى كمقدمه لمركز أبحاث طاقه شمسيه... هركز على تكنولوجيا تعبيه الطاقه فى بطاريات و تحويل العربيات اللى شغاله بالينزين انها تشتغل بالبطاريات دى.
حلوه قوى البنت دى ... هو انا فين .. اه دى مكتبه الاسكندريه ... رجلى هتموتنى
بس ده صعب قوى انت كده لازم تغير المواتير و تحط بدالها مواتير جديده علشان تشتغل بالكهربا ... أيوه كده انا احبك و انت بتبنى على الفكرة بدل ماتهدلى امها .. و ماله نحط المواتير الجديده و نخليها شبه المواتير القديمه و بتتوصل بنفس الكيفيه و نخللى دواسه البنزين بتوصل على مكثفات فتدى تيار أعلى و كده اللى سايق حاسس بالتحكم.
بص بقى انت لازم تشوفلك حل فى الجزمه احنا فى الشاطبى و الموضوع بقى أزمه.. ياعم لا أزمه و لا حاجه انا هقلع الجزمه و خلاص هنكمل مشى.... يأخى كأن الجزمه دى كانت واقفه فى زورى ... سجن بينى و بين التفكير ... هو مبدئيا انا تفكيرى أشتت فى ان انا دلوقتى حاضن أسكندريه و لامسها .. حاسسها بتترج رجه خفيفه على صدرى بعد نوبه أغتصاب حاده الفترة اللى فاتت.. الله اد ايه البحر كان جميل الليله دى ... حلوه قوى البنت دى ... شكلها كده 16 او 17 سنه ... علشان تشوفوها معايا هى لابسه بنطلون جينز محزق قوى و من فوق بتاع كده شبه الفساتين هو عامل زى فساتين شاكيرا طويل من ناحية و قصير من الناحية التانيه و مالوش كمام بس هى معوضه ده ببدى لونه بيج قال كأنه لون الجلد .. و ماسكه ايس كريم و عماله تقرب منًى و بتبصللى و انا ببصلها ... طز فى العيله اللى معاها.... لحد ما جينا جنب بعض... قرب منى و كأنها خلاص هتلمسنى و همست و قالتلى ... يأهبل
هنا أكتشفت أن انا ماسك الجزمه فى أيدى و ماشى على الرصيف ، قعدت أضحك من كل قلبى و خاصه أن انا ابتديت أركز أن الناس فعلا بتبصللى نظره أستغراب ... بس طز... انا هرجع تانى للحلم
عارف لو عملنا موضوع العربيات ده احنا ممكن نبيع نحول كام عربيه ... ملايين ... و هنبيع كام بطاريه ... قول تقريبا البطاريه هتكلفنا أنتاج 2 جنيه و هنبيعها بعشرة و نحول العربيات مجانا للناس علشان يستعملوا البطاريات بتاعتنا... هعمل أعلان بقى مفتكس... هنجيب صوره بنت حلوه و بعد كده نشيلها و بعدين صوره شط و بعدين نشيله و بعد كده خلفيه بيضا و مع كل ده صوت أحنا بنعمل أعلان من غير بنات و من غير شط و حركات .. كلامنا على ميه بيضا... علشان احنا هنكلمك بالمنطق بص يا سيدى احنا عملنا بطاريه بتمشى العربيات بالطاقه الشمسيه و ده يخللى العربيات توفر فى أستهلاك الطاقه و متطلعش عادم ... يعنى تخيل كده القاهرة من غير دخان الشكمنات ... بس علشان نعمل كده أحنا محتاجين نغير موتور عربيتك ... هنعملك ده ببلاش و الموضوع ده مبياخدش ساعتين زمن تيجى تشرب فيهم شاى معانا و تسمع كام نكته و تتوكل على الله ... و لو انت ميكانيكى هات خمسين زبون و أحنا نديلك دورة مجانية عن صيانه العربيات اللى من النوع ده ... بص ياسيدى الفاضل انت هتوفر هتستفيد و تفيد البلد و العالم ..حد يكرة ... بهظ بيه .. صاحب الفكرة و صاحب الشركه.
ايه ده انا على كوبرى أستانلى ... طب لما أقعد أخد سيجارة... ياه قد ايه البحر مليان اسرار ... ياترى الحته الهاديه اللى قدامى دى تحتيها فيها ايه ... هوب جه فى بالى فيلم عمليه أنقاذ نيمو السمكه ... ضحكت و وقعت منٌى السيجارة فى البحر ... قررت أنٌى أكمل تمشيه.
عارف ياد يا انا الموضوع ده ممكن يجيب كام ... عارف لو بكسب فى البطاريه الواحده تمانية جنية ... العربيه ممكن تحتاج تستهلك بطاريه كل ميه كيلو ... انا هعوض اللى دفعته فى تحويل لعربيات فى ظرف سنه ونص مثلا و بعدين يبتدى المكسب ... دانا ممكن يبقى معايا قد ميزانية مصر كلها... أأه ساعتها هعمل اللى نفسى فيه ... بص انا اول خطوه ههروح لجمال مبارك ... ماهو ساعتها هيبقى الريس ... و انا بقى واحد من أهم رجال الاعمال ... هعرض عليه ان يبيع الليله... بص يا جيمى انت اقلبها ديمقراطيه و مالكش دعوه بيها و انا هشيلك ... انت لو قلبت ميزانية البلد هتطل بكام يعنى .. كلام فاضى ... بص يا سيدى انا هزبطك عندك شويه خطوات تعملها تبقى بطل قومى و التاريخ هيسبح بحمدك .. انك تبقى قلبت البلد ديمقراطيه و سبتها ... اول حاجه تخرج المعتقلين و دى تمنها 2 مليار... تدعو لتغيير الدستور 3 مليار ... (مجموعه المواد الخاصه بالحريات كل ماده بمليار) المهم تطبق نظام تعليم بجد و متقوليش مفيش حلول ... انتوا بس مكنتوش بتحاولوا تحلوا لأن أى حل نظيف يعتمد على أن الطالب يبقى عنده حس نقدى و ده كان ضد سياسه الدوله... المهم يا جيمى... تخللى شيخ الأزهر بالأنتخاب... تخللى منصب العمده بالأنتخاب.. المحافظ ... كل دى مناصب بالأنتخاب.
بص يا سيدى هتطلع من الليله دى باللى كنت هتطلع بيه من مصر طول حياتك ... هديلك 5 أضعاف ميزانية مصر بس سيبها بقى تفوق... انت اصلك مجربتش تركب ميكروباص من رمسيس الساعه 3 العصر ... و لا تطوق فى قطر لأن مفيش حجوزات ... و لا تطلع ورقه من السجل المدنى... الا قوللى انت معاك بطاقه .. طلعتها أزاى!!!؟
أشتريت شويه ترمس من راجل واقف فى لوران على البحر... قعدت أقزقز شويه و أشرب سيجاره و عديت عليا شحاته عجوزه مش عارف حد فيكم عارفها .. هى بتمشى بكرسى معوقين قدامها وة بتحط فيه ورد... أشتريت منها ورده و أديتها سبجارة و فلوس المواصلات اللى كان المفروض أركبها
تخيل كده لو معاك فلوس أد ميزانية مصر مرتين مثلا ... مبدئيا همول جمعية زى أيكو جرين اللى بتعمل تمويل للمشروعات اللى بتبدأ بس .. و هعمل كمان كماله لمشروع توشكى ... بفلوسى حد له دعوه ... هنعمل فرع للنيل يمشى لغايه منخفض القطاره فيعمل بحيرة القطاره و يكمل لمرسى مطروح.... و نعمل على ضفاف النيل الجديد عشر مدن كل واحده تشيل خمسة مليون ... ناخدهم بس من القاهرة و الاسكندريه فى الاول ... نصفصف القاهرة على 3 مليون ... و نعمل عمليه أعاده بناء ... نهد المقابر اللى قدام القاهرة القديمه و نعمل فيها أحياء نظيفه و ننقل فيها كل اللى ساكنين فى القاهرة القديمه و نعملها محمية تاريخيه ... و نخلص على العشوائيات و نعمل مواصلات بجد متحضرة و نهد التلت أدوار كبارى الل بنيناهم و نعمل مدينه منظمه و سهله و نظيفه.
و نعمل مسابقه فى الريف لأكتر قريه طبيعيه .. يعنى البنا بطريقه حسن فتحى و استخدام طاقه شمسيه و الخ ... و نجيب ليها سياحه بس بشروطنا ... مش بشروطهم ..سياحه للى عايز يفسى دماغه مش للى عايز دعارة و الخ.. واحد يروح الريف يصطاد فى الترعه و يسهر بليل على الراكيه يقرا كتاب .. بتاع ... ياكل مشلتت و عسل أسود
انا ريقى جرى .. هانت انا خلاص فى سيدى بشر .. خمس دقايق و أوصل البيت ...اااه .... مسمار مصدى ... رجلى ... تيفود ... أحلامى ... يالهوى ... حد قالك تمشى حافى ... صيدليه
يا أستاذ ده مجرد خدش ... بس متزعلش منى انت محتاج تغسل رجلك كويس
17 comments:
الف سلامة على رجلك
وحمالله بالسلامة من احلامك الوردية
ربنا يحقق احلامك اه لو اتحققت
يبقى انت حتحل مشاكل المصريين كلها
المشوار جميل
مشيته معاك
مرة عملتها مشيت من شارع النصر حتى سيدى بشر انا وماما المشوار اخد 3.5 ساعة بس كانت ماشية رائعة فكرتنى بيها اشكرك
ولك تحياتى
شكراً يا عصمت
يارب مايكونش المشوار كان طويل عليكى
دانا كان فيه شويه حاجات تانيه فكرت فيها بس لقيتها كتير و حرام أكتبها علشان الناس متزهقش
مرة تانيه شكرا على السبورت
يمكن رجليك محتاج تغسلها
لكن دماغك لأ ابدا .. خليها كده بأحلامها .. اللي رغم انها مستحيلة جدا
الا انها
واقعية جدا
عزيزتى الحجر الأزرق... بحس و انا بكتبلك انى بكتب فى مدونه هارى بوتر ما علينا
انت عارفا انا عمرى معرفت أغسل دماغى من الافكار اللى زى كده ... يووه دانا مره وحدت العالم العربى و أنتصرت على أسرائيل و مره تانيه أستصلحت المريخ .. و كله بالمنطق
و هو ده اللى مخلينى عايش و بتنفس... بتنفس أفكار :)
بهظ بيه
كل سنة وانت طيب
بما ان خيالك ماشاءالله جامد كده عايزاك تحلملنا كده مثلا بانك قدرت توحد الاقطار العربية كلها وتخليها كلها دولة واحدة وياسلام بأى لو عملتلها موقف مخصوص كده زى موقف رمسيس ولاعبود الواحد مثلا يروح ياخد تاكس او ميكروباص لقطر ولا البحرين ولا الاردن وبالمررررره الامارات;) وطبعا مش هايفوتك توحد تسعيرة المكالمات لكل المناطق التابعة لدولتك
يعنى مثلا الواحد يرفع سماعة التليفون ويكلم اى دولة كده عادى كأنة بيكلم السوبرماركت الى تحت ويطول فى المكالمة كده وماتطلعلوش واحده تقوله عفوا لقد نفذ رصيدكم ولا التانية الى بتقولة باقى من الزمن واحد دقيقة :( هو طبعا حلم بسيط خالص مقارنة باحلامك الجامده ماتبخلش علينا بيه بأى
الا على فكرة هى اسكندرية كلها كده بنات حلوة مافيش واحده نص نص كده من باب التنويع :)اللهم لا حسد يعنى
رمضان كريم
ألف سلامه علي رجلك
دودو
انت تأمرى يا ستى
هو الجلم ده بالتحديد أخد منًى كتير و فكرت فيه بأكتر من طريقه من أول ثورة شعبيه عربيه لغايه انى أترع سلاح و اخطف الحكام العرب و بتاع بس لسه عايز سويه تفكير
و بالنسبه لبنات الاسكندريه هما طبعا فيهم الجلو و الوحش بس انا عيى متدربه انها تشوف البنات الحلوه بس
جوستين
الله يسلمك
مساء الخير يا سيدي؛
التمشية بتاعتك دي فكرتني بايام زمان لما كنت لسه شاب "يافع" في اسكندرية واحلام اليقظة عندك ارجو ان ياتي يوم تُصبح فيه حقيقة علشان المحروسة تستحق اكتر من اللي فيه الآن ورنا يستر اهل مصر جميعا
تحيات إسكندراني في بلاد الله الواسعة
يا أسكندرانى
هيجى يوم كل اللى بنحلم بيه يصبح حقيقه... بس ياريت نكون عايشين
هنولع شمعه وسط ظلام الفساد بأدينا
بس علله مانتلسعش
و انا كل اللى اقدر عليه اننى احلم
و ياريت اكون عرفت ارسم بسمه صغيره وسط تكشيره كبيره
و هو ده اللى ممكن يخلينا نعيش
تحياتى يا اسكندرانى
كلامك دقاته متسارعة
am-in-love
you only feel this because you are in love
عزيزى بهظ بك,,
احلام سعادتك اوامر اوعدك ان شاء الله لما ابقى رئيس للجمهورية ابقى اعمل كل اللى انت بتقول عليه ده واكتر بس طبعا بعد ماستشير المجلس :-)
انا ياخى مستغرب جدا هو انت مسبتش حلم انا حلمته الا وحلمته.. وكله كوم وموضوع الفرع التالت بتاع النيل ده اللى كوم تانى كنت متخيل ان انا لوحدى اللى بحلم بيها اتاريها حكاية قديمة وكل الناس عارفاها
انا عايز اعترفلك بحاجة.. انا حاولت انفذ الاحلام دى فعلا,, عارف فين؟؟ فى لعبة sim city ولعبةage of empiresوحققت معظمها وانتصرت على اسرائيل كمان
بس فى حلم احب اضيفه.. كنت قريت كده من فترة كبيرة مش فاكر قد ايه ان الارض والمريخ هيبقوا فى اقرب مسافة بينهم وبين بعض وبفعل الجاذبية محور الارض هيميل شوية اقل من درجة ,,حاجة صغيرة كيك يعنى بس الموضوع ده هيعمل تغيرات فظيعةلان طبعا انت شكلك كده راجل دارس فزيا وفاهم ان الميا السخنة كثافتها اقل وبتطفو فوق الميا الساقعة.. هو ده بالظبط اللى هيحصل فى المحيط الهندى عند شرق افريقيا حول خط الاستواء.. ولما الميا تبقى سخنة معدل التبخر هيزيد ومعدل تكوين السحب هيزيد وبالتالى الامطار فى اثيوبيا اللى فى الاخر بتجيلنا لحد عندنا نكون احنا عاملين الفرع التالت وجاهزين بقى ونملى منخفض القطارة ميا عذبه فى خلال الخمس سنين قبل ما المريخ ياخد بعضه ويمشى بالسلامة
يلااااا .. الاحلام مش بفلوس.. والنبى يابنى لو انا موت وانت عمرت الصحرا وبقى معاك فلوس قد ميزانية مصر كام مرة ابقى حققلى الحلم ده وبوسلى المريخ من هنا ومن هنا
والسلام عليكم ورحمة الله وبركاته
حلو جداً البوست يا بهظ بيه ... مشوار طويل أوي ، تلاقيك روَّحت نمت زي القتيل ..
على فكرة أنا عارفاها الست بتاعة الورد دي... بحبها جداً ، ساعات كدة لما ورد الجناين اللي بتقلبها بيخلص ... بتحط ريحان ،
باريسية جداً الست دي
تفتكر بطاقة جمال مبارك مكتوب فيها المهنة ايه؟؟
او حسني مبارك نفسه؟؟
هو اللي بيدخل في رجله مسمار بيجيله تيفود
يا راجل دة انت كنت هتخليني اشاركك و أمولك في المشروع دا ،وقلت شكلك فاهم يا بهظ
طلعت مش عارف التيفود من كيس الترمس
عموما اسمه تيتانوس
أه... على فكرة البوست حلو
وانا على فكرة بتابع مدونتك من فترة كبيرة ،وتقريبا هي الوحيدة اللي بتابعها في الوقت الحالي ،بعد ان اختفت مدونة القطط العمياء
عم توهان
حلوه حركه المريخ دى مكنتش عارفها...على فكرة انا قريت فى احد تحقيقات الاخرام ان فى عالم من اصل مصرى فى مريكا اقترح موضوع فرع تانى للنيل بس يتعمل انابين و يعمر الصحرا بس مش فاكر مين و امتى بس من الواضح الموضوع عاجب الناس
ساره
اعتقد ان حسنى مبارك بطاقته مكتوب فيها رئيس جمهوريه
اما جمال فأمين عام لجنه السيايات بالحزب الوطنى... منكقى مش كده
رجل الشرف
هو انت عندك حق انا فعلا مبفهمش فى الطب نهائيا و كل محاولاتى لفهم او ختى حفظ اسماء الادويه و الامراض بائت بالفشل اصل بعيد عنك قفت قوى من درس البلهرسيا فى اولى ثانوى و كانت اول و اخر مره ادرس فيها احياء... ياراجل انا نجحتها بالعافيه فى اولى ثانوى ... بس انا كنت محتاج اقفل البوست بحته سسبينس ... اصلى لو قلتلك ان انا روحت كده و خلاص مكانش هيبقى حلو زى ماقطع الافكار مره واحده بحادثه تعيدنى للواقع .... بس الحقيقه ان كل ده حصل ماعدا المسمار
عملتها من سنتين بس كانت من قايتباي للمندرة :))
أخدت مني 4 ساعات بس كانت من أحلي التمشيات اللي مشيتها في حياتي خصوصاً انها كانت في الشتا والدنيا برد وخارج من قصة حب ;)
ياااااااه ده الموضوع من زمان قوي :)
Post a Comment