31 Oct 2007

الثقوب السوداء

ماهو كان ممكن جداً أعمل حاجات كتير من اللى بشوفها بتتعمل ... كان ممكن جداً أخليها تنبهر بيا بشكل غير عادى ... أكلمها مثلاً عن مغامراتى فى الكليه و إزاى غيرت بشقاوتى لائحه النظام الاساسى للكليه ... و لا عن أبحاثى فى تطوير التعليم أو الشغل فى المجتمع المدنى و شله المخدرات بتاعه أعدادى و اللى معظمهم فى أمريكا دلوقتى... ممكن جداً أكلمها عن السفريات اللى طلعتها سواء بولندا و لا تركيا و الناس اللى شفتها و اللى رغم ثرائهم و إستعدادهم لإقامه أشد العلاقات خصوصيه بين البنى أدمين معرفوش يأسرونى و يشدونى لحياتهم زيها...كتير قوى يتمنوا حياه فى نص الثراء الى فيه حياتى .. و ده مش غرور انا اتمنى حياه ناس تانيه برضه ... بس الواقع إن حياتى ثريه بمعنى الكلمه واحد عايش فى إسكندريه بعيد عن أهله بيشتغل فى حاجه كده فى النص مابين العمل الاهلى و الفن و يعرف بشر الله ... مشهور نوعاً ما فى العديد من المجتمعات و يعرف نص البنات الاجانب للى فى أسكندريه - و اللى رغم حلاوتهم مالقيتش عندهم نفس التفاصيل الصغيرة اللى فى تدويره و شها و لا فى صوتها الشقى و هى بترد على التليفون- بيشتغل فى مجال جديد مبهم و صعب الادراك ... بدون مبالغه شخصيه ظريفه و ذات حضور و بتعرف تتفاعل مع الناس و تعبر عن نفسها ... ياترى أيه اللى ناقص شخصيه زى دى علشان يعرف يعلق البنت اللى هو مشدود ليها..!!؟

القضيه مش إنت بتعمل أيه و لاتعرف إيه ... القضيه هى بتبيعه إزاى ... منطق السوق و الماركتينج اللى مسيطر على كل حاجه فى حياتنا و اللى انت ذات نفسك بتستخدمه بمهارة فى إقناع واحد إنه يفتح بلوج و لا ينضم لقضيه إنت مؤمن بيها... إزاى تبيع لوحه الرسم للطلبه فى الكليه ... القضيه إنك تخللى الزبون دايما محتاجلك و عايز منًك اكتر " الطفل اللى بيلعب فيديو جيم .. أول ما يخلص لعبه يزهق على طول و يبطل يلعبها و كذلك الناس لما تعرف اللى جواك ببساطه هتبطل تشتريك ... السر إنك تعمل فيها غامض ... ثقب أسود

ياترى أيه سر جمال الثقوب السوداء... لو إن البشر يعرفوا يتحدوا الجاذبيه الشدبده على أطراف الثقوب السوداء و يقدروا يخشوا جواها و يطلعوا ... كانوا هيبطلوا يهتموا بيها و لكن لأن مفيش قوه على الارض تعرف تروح و تقول فى أيه بعد الثقوب السوداء هبفضل دايما العلماء بيحاولوا بعرفوا اللى جواها و يفضل الادباء بيحاولوا يتخيلوا ايه اللى بعديها... أصل فضول العلماء عامل زى فضول البنوته الصغيره أم ضفاير ... تموت فى الشاب اللى يتجاهلها و تفضل تديله فى إشارات و طول ماهو غامض بالنسبالها أو تقيل فى ترجمات أخرى تفضل هى مشدوده ليه .. ياترى بيفكر فيا ؟ ... طب و رأيه عنُى أيه ...؟ هو قال إنه عاجبه ابتسامتى .. يكونش معجب بيا... لا مستحيل دة كبير أوى .. بس و تفضل تهرى هيا فى نفسها و لما توصل لإجابه تزهق على طول و هو ده الفرق بين النضج و المراهقه

الناضج شخص حاسس بقيمه نفسه و خلاص وصل لمرحله إنه مش محتاج يعمل العاب ... هو بالعكس هادى و بيعبر عن مشاعرة بصراحه .. وده مقبول بين الناضجين ... لأنهم زهقوا من الألعاب.. بس المراهقين بيشوفوا ده ممل ... مش جديد و مبهر ... رغم إن له متعه خاصه

مش عارف بصراحه ... ماهو انا لو عارف كنت عملت شويه مقالب عبيطه ... كنت إتعاملت معاها كأنها زبون أو متدرب تحت إيدى ... كنت هجتذبها و انا واثق من ده و بسهوله ... و لكن لأنى فضلت اتصرف بشكل تقدر تقول عليه نقى و مقبلتش بمنطق السوق و فضلت أكون صريح مع نفسى مشاعرى شويه ... فحصل إنى فقدت البريق اللى فى عنيها... يظهر إن التعامل النقى مش كفايه.

لذا فوداعاً لبهظ بسيط ... منفتح ....و نقى

و ليبدأ عصر الثقوب السوداء

11 comments:

ماشى الطريق said...

إحكيلها يا بهظ عن أبورحيم لما كنت فاكره فنى المعمل و قعدت تحكيله عن الدكتور اللى محدش بيحضرله ولا بيفهم منه حاجة و إن كل الناس بتنقل الشيتات اللى هو بيطلبها و مفيش حد بيحلها بنفسه
و الراجل شيل اللمادة لنص الدفعة فى السنة دية
:)
يا عمى خليك على طبيعتك سواء كنت ثقب أسود أصلاً ولا حتى ثقب مخطط أخضر فى أزرق متتعبش نفسك
بس أنا عهدى بيك ثقب أبيض يا خويا بهظ
:)

Bahz.Baih said...

يا عم ماشى الطريق انت فين من زمان و الله ليك وحشه كيك
يا سيدى كونك ثقب ابيض مع ناس متلوثه هيخليك مش مفهوم حتى لو لثقب ابيض تانى
بص انا مش عارف انا كاتب ايه بس انا بس مبسوط بالزيارة

Ya Di Elneela said...

لأ يا بهظ مش وداعاً لبهظ النقى و البسيط.
مش ده بهظ اللى نعرفوا
حاول تانى يمكن هى مافهمتش صح أو يمكن هى فهمت صح بس هى حست ان كميتكوا مش ماشية مع بعض ..ز عادى بتحصل لأحسن ناس بس مابيحسوش العيب فى نفسهم
يمكن لو اغيرت و لقيت واحدة تانية تكون بتحب البساطة و الصراحة ساعتها حتعمل ايه ترجع تانى ده انت كدة تبقى زى الاستيك اللى حيهرهر من كتر ما تشده و ترجعه
البنى ادمين مش ثقوب سوداء

علا من غزة said...


بغض النظر عن رأيي في الموضوع , لأني مش في وارد اديك نصايح دلوئتي !!

بس الموضوع مكتوب بمزااج

عجبتني اوي الجملة دي

"كذلك الناس لما تعرف اللى جواك ببساطه هتبطل تشتريك ... السر إنك تعمل فيها غامض ... ثقب أسود"

وفي رأيي انك تسيب حتة غير مكتشفة في شخصيتك مش معناه ابدا الغموض !! ده في وجهة نظري
لأنك مش معقول تحكي كل حاجة حصلت في حياتك مرة وحدة ,, لازم على مراحل وإلا الناس هاتفتكر انك بتدّعي او بتألف قصص ومغامرات علشان تلفت النظر
انا بفكّر كدة

مش باب غموض , وانما من باب ان الحاجة لما تيجي مناسبة حاتكلم عليها

بس كدة

تحياتي :)

Bahz.Baih said...

يادى النيله
معبره قوى الجمله دى و انا برد عليكى يا ماهى.. بصى عايز أقولك حاجه
المشكله مش انى اكون استك .. اصل عمرة ما هيحصل عارفه ليه
لأنى لغايه دلوقتى ملقيتش البنى ادمه اللى مستتعده متنبهرش و ده عيب فيا انا دايماً واضح بشكل بيخلينى متوقع و علشان كده انا لازم اتغير سواء هى او غيرها رغم انها جامده جداً و نفسى اكون واخدها فى ايدى كده مرة اعرفك عليها إلا إن الاسلوب اللى انا بتعامل بيه مع الناس يخليهم يقولوا اه بهظ انا اعرفه ده جميل جدا تحس انك تعرفه من زمان
بس ده مش كويس خالص صدقينى ... و مش معنى ان مفيش بهظ نقى انى هبقى كداب و شرير .. لا مش انا بس بكل بساطه هبتدى اتأمر و أطبق قوانين السوق حتى فى الحب زى ما علا قالت هخللى حاجه لسه غامضه جوه الناس عايزة تكتشفها
بس يا ستى بالنسبالك هفضل بهظ بتاع زمان و راجع فى برطمان

علا
موافك على كل اللى بتقوليه و مبسوط ان البوست عجبك و هو فعلا مكتوب بمزاج قوى
على فكرة انا من الناس اللى بتحب بلوجك و متابعه رغم قله تعليقاتى فيه

Anonymous said...

يا دى السواد
يا دى الهباب
يا دى القطران

ده انت من الناس القليله النقيه اللى ممكن اتكلم معاه من غير قلق لانه مش حيقول لحد
انت اكيد مش طبيعى انا حاسس بكده من فطره بس ماشى عارف انك مشغول ووراق 1000000 حاجه بس كنت مستنى الوقت المناسب عشان نتكلم
تحب اه معاك جدا طبعا
تنضم للاخوه اللى وقعوا بعد طول رفض للحب معاك لانى بقيت منهم
لكن تتحول للثقوب السوداء لا و 10000
لا

عارف يعنى ايه لا

وبعدين انت معرفتش توصلها اللى انت عايز تقزله او وصلها وبتتقل او محصلش تلاقى فى نقطه مثلا اسال الخبراء من امثالى او اللى قاعد جنبه على الكنبه هناك لكن تتحول لا
عارف ليه عشان هيا عرفتك بنقاءك يمكن تحولك يبعدها عنك اكتر
او متفهمكش او تستغربك

طبق القوانين الجديه للعبه الحب الشهيره بس متتغيرش من جواك

بص اعمل زى حبها وقول لها انك بتحبها وسيبهامن غير ضغط (اذا اردت شيئا بشده فاتركه فان عاد لك فهو ملكك وان لم يعد فهو لم يكن اصلا لك)



وتحولك للثقوب يقذف بك الى الهالات الغير معروف تماما كما يحدث فى الفضاء


شوف يا احمد بيه مش حتتحول ومن هنا اعلن انا صاحبك ان لو حصل كده
سوف يتم انشاء رابطه منع بهظ من التحول وحنعمل جروب على الفيس بوك
وسنوقف هذه المسئله

ا ع

عـسـل مـرمـر said...

حلو اسلوبك ف سرد جزء من ثقوبك اللى انت بتحاول تضلمها طول الوقت مع انها الباب الرئيسى منك و اليك
حياتك مليانه مغامرات و سفريات و مشاريع و شقاوه و الاعيب و حركات .. ممكن احسدك ؟

أميره

Sara Swidan said...

لأأأأأأأأأأأأأأه ..
بلاش يا بهظ تتغير بأه ...

خليك ف النضوج دة .. على فكرة انت حطيت تعريف للنضوج قريب أوي ، و بيوصَّل المعنى بالظبط تقريباً ..

بجد يعني ...

أقف مكانك خليك زي م أنت ..
خلي عندك صبر شوية إيه دة ..


شكل البلوج الجديد ... هايل .. و كلمة بهججة مكتوبة ب احساس كدة . مش عارفة!!

على فكرة البوست دة كشف عنك حاجات ... معاملتي القليلة معاك ماتقولش عنك زي البوست دة ما قال كدة !!

كفاية كدة بقى تعبت

Salma El Banna said...

بص انا حقولك على حاجة - عارف القهوة بتطلع حلوة اد ايه لما توطي النار عليها اوي او تعملها على سبرتاية - برغم اني مبشربش قهوة تركي الا اني بحب اوي اعملها على نار هادية بيقولوا طعمها احلى - اعمل كده
خللي فيه ثقوب سودا برده بس نورها واحدة واحدة -البنات برده متحبش الضلمة على طول - بس برده متحبش المدلوق من اول نور -
النار الهادية احسن طريقة لاحلى طعم
"اصل انا طباخة قديمة "

عارف -ده يديلك برده فرصة لذكريات بينكم اكتر واحلى
وابقى احكيلي عن الطعم بقى

Anonymous said...

Dear Bahz Beih,

Do you know that when stars die whether they become cold stars without energy or vigour, or they become black wholes as you explained in your article, orrrrr they explode as Supernova the supernova can create life and scientists even say that our earth was created out of a supernova... all this to say that i can't imagine you as a black whole because you are full of erergy and can give birth to life you are a supernova :")

your sister

Shaker said...

من اكتر البوستات الى فى البلوج بتاعك الى كل ما اقراها و اخلصها ارجع اقراها تانى
مش حقدر انصحك باى نصيحة ولا اقدم اى تعليق على كلامك لان الموضوع ده بالذات انا مش عارف الصح فيه ايه
بس حاسس انى حبقى مش مسامح نفسى و انا بتعامل باى شكل غير ما تمليه عليا عفويتى و
بس