4 Feb 2007

نقابها

بما أن الناس متعوده أن البلوج ده شخصى و انا بكتب فيه عن حكايات شخصيه من غير حذق أو كلكعه فانا عايز المره دى أتكلم عن أختى
صلوا على النبى... أختى دى أصغر منُى بسنتين و عنديه كيك دماغ من حجر ... أول ما أتولدت و هى فى المنخل ضربتها و انا كان عمرى سنتين ... بابا كان بيصور طبعا الاحتفاليه بقدوم مولود جديد للحياه يحمل أسمه و انا بغبائى ضربتها ... هاها بعد كده بعشر سنين و احنا عيال فى أبتدائى كنا بنتفرج على الشريط اللى صوره بابا و هى شافتنى بضربها و أصرت أنها تضربنى ... و انا ركبنى الف عفريت لا... ما تضربنيش و هى تعيط... لا يا ماما هو ضربنى و انا ماخدتش حقى لازم تاخدولى حقى ... انا فاكر انها ماسبتنيش الا لما ضربتنى ... و انا مسخسخ على روحى من الضحك بس دى كانت أول علامه على الروح الناريه حداها
أختى و هى فى خامسة أبتدائى لبست الحجاب رغم أن ماما كانت رافضه الموضوع - و هى أساسا محجبه- علشان البنت متاخدش قرار هى مش مدركه أد أيه هو كبير ...ساعتها ماما قعدت معاها و قالتلها أن القرار ده كبير و انها هتبقى مسئوله عن قرارها ده و هى وافقت و فعلا مقلعتش الحجاب من يومها
فاكر برضه لما ماما ماتت كنت انا فى تانيه ثانوى و هى فى أعداديه قبل الامتحانات بشهر و كام يوم ماما قالت و هى بتموت انا مش خايفه على البنت بس خايفه على الواد نفسى يدخل هندسه ... كان عندها حق ... أصل أختى كانت دايما الاولى ... مره فى رابعه أبتدائى طلعت التانية ...يووووة عملت مناحه فى البيت ...انا كنت بستغرب أزاى بتجيب تلاتيم من تلاتين فى العربى مع وجود حاجه أسمها التعبير... المهم ماكناش عارفين أزاى نقول لأختى أن ماما ماتت ... انا حسيت يومها أن انا راجل و مسئول لأول و لأخر مره فى حياتى (بصراحه يعنى) انا فاكر ان انا أخدتها فى حضنى و هى قعدت تعيط...بعد كده بصتلى و قالتلى لازم يا بهظ تدخل هندسه ... بصراحه بقت هندسه هدف حياتى ...و عملتها علشان خاطر ماما و أختى و دخلت هندسه و طلعت هدف زباله ...ماعلينا ... نرجع تانى لأختى هى طبعاً كملت و جابت فى ثانويه عامه مجموع خرافى مش عارف ميه و كام فى الميه و كانت من التلتميه الاوائل على الجمهوريه و قررت انها تخش طب علشان تبقى زى ماما ...من هنا انا و هى أفترقنا انا دخلت هندسه أسكندريه و هى طب القاهرة و بابا كان طاير بينا فى السما ... هى فضلت عايشه مع بابا و انا فى أسكندريه ... انا أتأثرت بالتيارات الثقافيه فى أسكندريه و هى بالتيارات السلفيه فى القاهرة ... بعد سنين الجامعه ما عدت... فجأه و على حين غره أكتشفت أن انا و أختى على النقيض تماما ...انا بحب المزيكا و حفلات الجزويت.... و هى مقتنعه أن المزيكا حرام ... انا من أنصار تحرير المرأه و هى من أنصار النقاب و هوب لقيناها أتنقبت... كانت صدمه ليا ... أصل تخيل انت معايا كده لما كل اللى انت مقتنع بيه بيتك على عكسه تماما ... بنينا بينا حاجز وهمى من الثقافه المختلفه .. انا بجيب الدستور و هى بتجيب مجله التوحيد ... انا بقرا لديل كارانجى و هى للشيخ محمود المصرى ... بقا الحوار بينا مستحيل و بيقلب دايما لخناقه و فى أخرها ندعى لبعض بالهدايه أحنا الاتنين
أختى من كام يوم جالها عريس و كلمتنى تعالى قابل العريس .. انت أخويا و لازم تقوللى رأيك ... حيص بيص يا معلم و عرق و بهدله .. و انا هحكم عليعه أزاى ده بقى!!؟ ... المفروض هى اللى تحكم و تقول و ترفض و تقبل ... انا مش مستعد أبقى مسئول عن أختيارها لحياتها ... لأول مره كان عليا الالتزام بمعايرها ..و ها ياستى انت عايزانى أعرفلك عنه أيه و أقيس أيه بالضبط؟... بص يا سيدى انا عايزه أرهابى.. راجل كده دقن أييه و ملتزم بيصلى كل الفروض فى الجامع ... طيب لو هو مش بيصلى كل الفروض فى الجامع مانت ممكن تخليه يصلى فى الجامع ... بص انا عايزه راجل يعينُى على الخير مش واحد انا أعينه على الخير ... راجل كده يصحينى فى نص الليل يخلينى أصلى القيام ... و المهم لازم يكون حافظ قرأن أكتر منُى ... انا حافظه عشرين هو لازم يكون حافظ أكتر
منظرى و انا قاعهد قدام الواد يفطس من الضحك انا ببص للحيته و هو بيبص لدقنى هو بيقول فى سره أيه البيت ده.... الواد حليق و انا طبعا لو فى أى موقف تانى كان ممكن أفضل أجادله للصبح ... المهم الواد جاى عن طريق شيخ بس مشهور قوى و أختى و الواد بيعتبروه علاُمه عصره ..و اللواد الصراحه أرهابى أرهابى.. بس عنده أبتسامه هايله ( أكتر حاجه بحبها فى السلفين أبتسامتهم اللى من جوه دى) متصالخ مع نفسه بدرجه رهيبه مهندس و كده قمر... بصراحه دخل قلبى من أول مره
أول مره أشوف الدنيا بمنطق أختى ... هو فى أيه!!؟.. أم الواد شافت أختى و قالت عليها حلوه و أحنا شفنا الواد و عجبنا و الاتنين راضيين عن دين بعض و الميزه أنهم لو أتجوزوا هيلاقوا أساس يرجعولوا لما يختلفوا... أصل الدنيا مش فارقهمعاهم.. هم همهم ما بعد الدنيا
بصراحه كل مفاهيمى أتزلزلت ... ماهى حاجه حلوه أهى و مش مستاهله نحاربها فكريا ... بصراحه انا مش متصور نفسى أتجوز كده عميانى بس هى مفرقيتش معاهم .. و معتقدش أنهم زعلانين...طب ليه أحنا ( كمثقفين مثلا) قارفينهم و ليه هما قارفينا طب ما نقبل بعض ... زى مانا و اختى عايشين هى تحطلى شريط عمرو خالد أسيبلها على الكمبيوتر أغنيه لفيروز ... تسيبلى كتاب لبن باز أسيبلها كتاب لباولو كويلو... و أهى الدنيا ماشيه

17 comments:

بلال حســــنى said...

احلى حاجه انها بكل قناعتها وطريقة تخطيطها انها مرتاحه وروحها مش قلقانه شبهك او شبه اى حد ايماناته ( عارف انت ) ايماناته مش ( ال هي يا واد ايماناته كده تبقى ...افهم انا قصدى
ايماناته
ايمانات ايمانات يعنى
يا بخت اختك وخطيبها
عارف لو يقضو الهانى مون ف افاغنستان مثلا
يبقى رائع
السلام عليكم
اه
شفاك الله وعفاك

www.blogs4arab.com said...


يسعدنا تشريفك
www.blogs4arab.com

Anonymous said...

طب هي معندهاش بلوج نقرا فيه وجهة نظرها في العريس و فيك ؟

Anonymous said...

أنا أحسدك
أنا احسدك
أنا
أ
ح
س
د
ك

Anonymous said...

هى الدنيا كده كده ماشية على فكرة
المشكلة مش فى كده خالص...
المشكلة بأى انك ((لو)) راضى عن نفسك فى كلتا الحالتين ازاى نخلي احساسنا بالرضى ده يدوم ويدوم ويدوم و.............

Anonymous said...

As long as people’s choices concern them and bring them happiness as they see it then it should not be something to fear and nobody should interfere. However, in Egypt we still do not have a clear demarcation between the personal sphere and the public sphere. The personal spheres where everybody can do as he/she wishes and follow any beliefs he/she has. The public sphere where general norms and laws must be respected by everyone. For example, if your sister declines to treat a patient in a nonlifethreatening situation because he is a male and ask him to look for a male dr. or if your brother in law protests a Christian, or an atheist, boss at work be cause Muslims only should lead Muslims. Or if god blesses them with a baby girl and then they mutilate her genitals because the prophet condoned this practice in a hadith. In these cases, and many others, the same believes that bring peace and happiness to your sister and her husband will deny other indivduals the same things.

همس الليل said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

همس الليل said...

على فكره الكى بورد معلقش فى الكومنت بتاعى الاول
انا كنت بضحك اوى اوىىىىىىىىى


اصل يا بهظ يا خويا طلعت شبهى اوى حتى فى حياتك

انا اختى الصغيره وعيلتى ماما واخواتى البنات كلهم كدا
وبالذات اختى الصغيره اللى خلصت كليه ودلوقتى بتشتغل من كام شهر فجئتنا بلبس النقاب
وطبعا انا اول واحده كنت معارضه الفكره على اساس انها لسه متخطبتش وازاى العريس يشوفها والخيابه دى

المهم انى الوحيده فى البيت اللى مش محجبه حتى اصلا
ومش كدا وبس ولبسى كمان استايل وشعر ملون وبتاع حاجه كدا على النقيض تماما

المهم اننا فعلا فى البيت هما فى وادى وانا فى وادى مشمعننى كدا نى مش بحب ربنا
لا بسعايشه ازدواجيه
شايفه اختى فى راحه نفسيه عجيبه والله
بجد بتصلى وبتروح تحفظ القران وبتضحك من قلبها
وانا عايشه بين كتابه وحب لمكتبه اسكندريه وبين اغانى فيروز وكمليا والحجات دى
واوقات اكتئابى اكتر من فرحى


انا فعلا عايشه حاله ازداواجيه الشخصيه دى ونفسيا اتزلزلت من جوايا من اول تحول اختى للنقاب طبع اامى لابسه خمار اصلا
بس ملمستش حاله التخبط دا بين الصح والغلط الا لما اختى الصغيره لبست النقاب فى الصيف اللى فات رغم محاولات اثنائها عن لبسو


بينا اختلاف طبير
بس انا عارفه انها صح وانى فى يوم من الايام برغم شطحاتى فى التفكير الا انى هوصل لربنا فى النهايه
وانى هلتزم زيها فى يوم

لان الحياه بتاخد الراحه النفسيه اكتر ما بتدى السعاده

معلش الكومنت طول منى اوى بس اصل حكايتك دى يا بهظ فكرتنى بحليتى اللى بعيشها دلوقتى اوى
وعارف هتخيلنى اكتب نفس الموضوع دا فى البلوج بتاعى بردو عن اختى والتخبط بينى وبينها والازدواجيه اللى بعيشها وعن حاله الزلزله اللى حصلتلى فى معتقداتى ومفهوم الراحه عندى

بجد انت شبهى كتير هههههههه
ربنا يهدينا ان شاءالله لحد ما نوصل

Unknown said...

بسم الله الرحمن الرحيم
الحجرات (آية:13): يا ايها الناس انا خلقناكم من ذكر وانثى وجعلناكم شعوبا وقبائل لتعارفوا ان اكرمكم عند الله اتقاكم ان الله عليم خبير
صدق الله العظيم

Anonymous said...

اتمنى تسمحلى بهظ انى اعلق على تعليق همس..
فى الحقيقة همس الليل انا وقفت كتير عند تعليقك وشايفة ان مافيش اى تشابة اطلاقا
بين الى بتقولية عن نفسك والى بيقوله بهظ ده اذا كنت فهمت بوست بهظ صح!!

مع ترجمة استنتاج بهظ فى سطورة الاخيرة مافيش اى مشكلة ان يكون على مكتبى كتابين واحد لباولو كويلو والتانى لابن باز
او انى استمع لشريط عمرو خالد وبالليل انام على صوت فيروز
ومش معنى انى اقرا لابن باز انى ارهابيه ولا معنى انى بسمع لفيروز ان الدنيا لاهيانى...
انا احب الوسطية فى كل شيء
واعتقد ان اختلاف الهوايات والرغبات و الافكار والى نحبه ومانحبوش ده شيء عادى جدا
كمان بعد بهظ عن الجو الاسرى وجو الشغل الى لاهيه ممكن ينسيه فروض مايصليهاش
او انه اخر مرة مسك فيها القرآن عدت (الاسبوع) فده شيء وارد ...ممكن يقضى عليه الاستقرار
لكن الى مش وارد ولا منطقى اطلاقا همس الليل انك تكونى عايشة فى بيت كله صح
وانتى لوحدك غلط وبتعترفى بده؟؟؟ خصوصا فى معتقدات مش رغبات ولا هوايات ولا طريقة تفكير
ده حجااااب !!!
الانسان بيعيش عمره كله مستنى حاجة صح تشده ليها وانتى قدامك الفرصة ومش عارفة تستغليها!!!
وبعدين لفظ الازدواجية الى بأى مرتبط فى زهنى باسم همس الليل ما اوجدش علشان نوصف بيه نفسنا فى حالتين
واحدة فيهم بنحب ربنا والتانية بعاد عنه.... لان حب ربنا ايمان غير قابل للتجزئة ولا الوسطية

عموما انا فى انتظار بوستك الى اتكلمتى عنه علشان الصورة توضحلى اكتر وافهم تقصدى ايه بالتشابه ده؟؟
اتمنى يكون تعليقى اتفهم صح..

bluestone said...

يا عم بهظ
المشكلة مش مشكلة اختيارات. يعني مش انك مثقف او متحرر او ليبرالي او انها اختارت شكل معين للالتزام الديني
الفكرة كلها في قبول الاخر مع عدم الاقتناع به.
يعني بعض الناس اللي يبناخد شكل الالتزام الديني النقاب والدقون وغيرها
وانا لا اقول التدين ولا الالتزام ولكن اتخاذ شكل معين
بعض الناس دي عندها استعداد تكفر المختلف معاها .. يعني ممكن اختك مثلا تشوف انك مش متدين وانك مش ملتزم وربما كافر كمان لانك ما اخترتش الشكل اللي اختارته لنفسها
وده مش صحيح
ممكن تكون بتسمع مزيكا وبتقرا شعر وبتروح حفلات الجزويت لكن ده لا يمنع انك تكون متدين وبتصلي ...إلخ
دي حاجة في الاول وفي الاخر تخصك ولا تخص حد تاني

حاجة مهمة كمان انهم يكونوا فاهمين ان الشكل الوحيد للتدين هو الشكل بتاعهم يعني اي واحد مش ملتحي يبقى مش متديتن وده مش صح
ده احتكار للدين

نقطة مهمة كمان وهي السبب في المظهر ده يعني هل ترتدي الفتاة النقاب لانها شايفة ان جسمها عورة مثلا ..ثم نتحول بعد كده لتحريم المزيكا والفن والشعر
وكده يبقى دخلنا في نطاق التطرف

احيانا الليبراليين او المثقفين او المتحررين لا يحبون التعامل مع الناس اللي بتتخذ هذا الشكل من التدين لانهم يخشون عدم قبولهم وتكفيرهم من قبلهم

في النهاية رأيي ان الاعتدال هو مفتاح الحل في هذا الوضع

همس الليل said...

انا اسفه يا بهظ
مش عارفه مع انى مبحبش ارد على تعليق حد وانا فى مدونه حد تانى
بس اصل الاخت دودو فهمتنى غلط تماما
معرفش هيا بتقول مفيش وجه تشابه خالص بين كلامى وكلام بهظ
معرفش تقصد ايه اصلا محدش كوبى من حياه حد ومقصدتش انى هحكى موضوع يخصنى عباره عن استنساخ من كلام بهظ اكيد فى اختلاف يعنى واكيد هو لما هيقا هيفهم انا اقصد ايه بوجه التشابه بالظبط لان الحاله بتاعتنا متشابه فى اختلاف الاخوات برغم عيشتهم فى ظل بيئه واحده دا وجه التشابه فى المضووع اللى انا قصدتو اصلا
اما باقى كلامى اكيد فى اختلاف
وموضوع الحجاب انتى فهمتى غلط انا حتى فى اخر كلامى قلت انى اكيد هوصل زيها ان شاء الله وبتمنى كدا
ووصفى انى مش محجبه وذكرى للموضوع اصلا انى مش محجبه وكدا بوصل مدى الازدواجيه فى حياتى مش اكتر مش معنى كدا انى بقول مش عايزه اتحجب او انى معترضه على الحجاب مين قالك كدا اصلا لو وصلك من كلامى كدا فاكيد دى غلطه انك مفهمتيش قصدى ايه من كلامى واتسرعتى بالرد عليا فى الوقت اللى انا قصدت ان اللى يفهمنى هو الانسان اللى فى نفس الظروف دى عشان هو قال ان اختو منقبه وهو عايش حياه غي كدا
لكن لا نقدت الحجاب ولا حاجه ازاى انقضو واهلى كدا
وبعدين انا مكتبتش باستفاضه لان دا مجرد كومنت يعنى مش هحكى فيه عن حياتى بالتفصيل وانى مش عايشه معاهم فى نفس البيت طبعا انتى اصلا مش فقاهمه ازاى انا مش عايشه معاهم عشان دى تفاصيل مش هقولها فى كومنت فى بلوج مش بتاعى واصدع ناس اصلا ملهاش انها تسمع صداعى

بعدين الازدواجيه فى كلامى معناها انى بعيش بتفكير ونمط حياه غي اللى اهلى متبعينه ومش معنى كدا انى على كيفى
بس ليا حجات بحبها مش بيحبوها
دا معنى الازدواجيه اللى قصدتها من كلامى
اما اسمى همس الليل ايه الازدواجيه اللى تقصديها فيه يعنى مش فاهمه
وكونى بقول انى عايشه بمنطق معين مش بالضروره يكون غلط وبردو مقصدتش ان اهلى هما اللى غلط
للاسف فهمتى كلامى غلط وهو كان موجه لبهظ فى حاله معينه هو اكيد فاهم ايه وجه التشابه فيها
ولو فهمتى انى بنقض الحجاب وبمدح فى منطق عيشتى بردو انتى غلط دا مش قصدى من الكلام
انا بجد مكسوفه من بهظ لان ميصحش ارد
على كومنت فى بلوج مش بتاعى
انا بجد بكر اسفى على الفهم الغلط من تعليقى وعلى تعليقى على كومنت فى البلوج بتاعى
ممكن بعد ما الاخت اللى وضحتلها تقرا كلامى تبقى تمسحو
بكرر اسفى

Anonymous said...

همس الليل (بعد الاعتزار االشديد على المساحة الى شغلتها فى مدونتك يا بهظ بيه )

اولا لو تعرفى مدى ترددى قبل ما نزل تعليقى ده خوفا بس من انى اتفهم بالشكل ده كنتى عرفتى مدى اسفى دلوقت..
ثانيا انا مش حاعلق على تعليقك بس حابة اوضحلك الى اقصده بارتباط لفظ الازدواجية باسمك..
انا دخلت مدونات كتير ومنها طبعا مدونتك واسعدنى ان اقرالك مواضيع وتعليقات كتير ولفت انتباهى تكرار لفظ الازدواجية واصفة بيه نفسك ...


وده ان دل فيدل على ان اسلوبك شاددنى لدرجة انى اعلق على تعليقك.
ملحوظة: انا عندى سبب وجيه لعدم تعليقى فى مدونتك رغم رغبتى الشديده فى ده لو اسعدنى الحظ واتعرفت عليكى اكيد حاقولهولك
عموما مازلت فى انتظار البوست الى اتكلمتى عنه عندك

(الاخت) دودو
________________

ياريت تمسح تعليقى الى قبل ده انا كمان بهظ بيه

Bahz.Baih said...

الاختين الحلوين دودو و دعاء
هنتكلم أولا فى حته التعليقات .. انا عمرى ما بتضايق من التعليقات بل بالعكس تماما انا فرحان بالحوار ده جدا و عايز أعلق عليه فمفيش داعى للاعتذار ثم نقطه ان حد يرد على حد فى كومنتات بلوج حد تالت شئ طبيعى جداً و صحى كمان و يدينى مؤشر ان البلوج و البوست أثار عندكم تساؤلات و فهم مختلف و خلاكم تتحاوروا مع بعض عليه علشان كده انا عمرى ما هزعل و بالتالى مش هشيل كومنات و لو حد راجع البلوج هيلاقينى عمرى ما شيلت كومنتات

ثانياً بقى بالنسبه لردى على التعليقات اللى هقوله موجه لهمس الليل و دودو و أمجد
انا كنت زمان متفق مع أمجد فى وجهه نظره و شايف أن النقاب زياده فى التطرف بس لما عشت التجربه مع حد قريب منُى زى أختى أختلف شعورى تجاه النقاب مش بقول أن هى صح و لا انا اللى صح بس اللى اساسا عايز أقوله انك لما تكون مضطر تفكر بطريقه و منهج حد تانى ممكن تعرف أزاى تتقبله أنا بجد حسيت أد أيه أختى مبسوطه مع حياتها بالنقاب و الواد راضى جداً على حياته باللحيه... هما شايفين أن حياتهم لابد لها من الاستقرار فى حين أن انا حياتى معتمده اساسا على التقلب الفكرى و هعتبر أن انا مت لما أوصل لشاطئ معين .. زى البحار اللى ميعرفش يعيش غير رحال بس مش معنى كده أن مالوش علاقات بالناس اللى على الشاطئ بالعكس تماما

فهمتوا الفرق بقى انت بتفكروا لسهمن وجهه نظركم حد حاول يفكر من وجهه النظر التانيه

Bahz.Baih said...

بلو ستون... انا متفق معاكى فى أستنتاجك أن الاعتدال حلو بس بأنهى مفهوم ماهو برضه اللى لابسه النقاب برضه شايفه أن هو ده الاعتدال و ان الليبرالين دول متطرفين فى المعصيه... الموضوع نسبى بحت... أهم حاجه هو القبول كل واحد يقدر يعيش مع التانى

أعتقد بجد أن اللى فاهمنى بجد هو بدرى

Ya Di Elneela said...

حاحكيلك حاجة شبه ديه فى عليتنا بس بالعكس
أنا ليا عم ارهابى زى ما \انت بتقول حاجة كدة دقن و فظيع حافظ القران كله من الاخر احتمال 99.999% يدخل الجنة.
و عمة تروتسكية علمانية مادية يعنى بالنسبة لناس كتير ملحدة.
هو شايف ان الحجاب هو الحل و هى مع حرية المرأة
كانوا قاعدين لبعض على الواحرة هى كافرة و هو رجعى ودة كان امتى فى السبعينات أيام ما كان كل تيار بخيره
المهم عمتى دى عاشت و ماتت فى القاهرة حياة نضالية بحتة
و هو اتجوز جوازة زى اللى انت بتحكى عليها و كانت أفشل جوازة فى الكون.
يوم لما عمتى ماتت وقف على قبرها و قال جملته الشهيرة أنا مش موافقك على كل اللى بتعمليه بس اكتشفت انه مش وحش و مش غلط
من الاخر كل واحد حر يعتنق اللى يعتنقه منغير مايشوف ان كل اللى غيره ما بيفهموش
المهم انه يكون بيعمل ده عشان مقتنع و يكون حاطط فى دماغه مصلحة الناس

Veeeva said...

1- the stupid word verification thing prevented me from commenting here...on ur blo :(
ya rab el mara di tnfay3

2- my siblings r like ur sis, and they r trying to make me their mirror image....but we still have good conversations...


u don't have to have the same opinions of ur sis to be able to communicate with her...

btw i loved the way she trusts ur evaluation of guys.. its not a small thing i'm telling u... and God luck to ur sis !! (so2al 3abeet kda, heyya 3amlt est7'ara?)