7 Jul 2006

القط و الفار

من أمتى كان الفار حيوان محبوب , تتعاطف معاه أدام القط ...أقولك انا ... من ساعة ما عملوا توم أند جيرى..طب بص معايا كده على فيلم أسبيدر مان.. يخلى العنكبوت حيوان بطل ..طب بلاش.. كاسبر..هو فيه بزمتك شبح لطيف.
دى يا جماعه أساليب الثقافه الامريكيه...و من غير أتهامات بنظريه المؤامره و تعالى نحليلها ... السعله الامريكيه محتاجه مش بس دعايه.. لأ و كمان قبول... بمعنى أنه لازم يخللى الجلبيه.. ياى.. حاجه بيئه علشان البنطلون الجينز يبيع و يكسب...الفول كوخه.. علشان خاطر البرجر... بكل بساطه بيعمل الامريكى على خلخله القيم اللى فى المجتمع لزرع قيم جديده..و معاها سلع جديده
بس دى برضه مايعنيش أنهم أشرار... هم برضه وحدوا لغه العالم على الانجليزى ... عملوا العولمه فمجالات الاتصال و فى النهايه لو أنت أمريكانى انت عايز بلدك تبقى أحسن بلد.
طب أحنا المفروض نتصرف أزاى؟؟؟
مش عارف و الله و ما أقدرش أقول ان انا عارف بس و الله فى شعوب رغم كده لسه بتقاوم عن وعى سيطره الثقافه الامريكيه علشان تحتفظ بثقافتها زى الشعب الفرنساوى و الالمانى
و برضه شعوب زى اليابانين و الكوريين أستسلموا للغزو و الجيل الجديد دلوقتى أمريكانى طحن و مع ذلك شعب متفدم
برضه أحنا نعمل أيه... مش عارف بس المهم نتحرك و الا هنبقى لون حائل تراه من أعلى نقطه فى العالم

7 comments:

سامية جاهين said...

موضوع مهم جدا يا بهظ! فكرتني بصديقة لي كانت بتعمل دكتوراه في أمريكاعن أفلام ديزني وكان من الاكتشافات اللي جننتها إن ما فيش ولا أسرة بمعالمها الطبيعية في شخصيات ديزني الأساسية. يعني لا يمكن مثلا تلاقي ميكي وميمي أو زيزي وبطوط متجوزين. وسوسو وتوتو ولولو مش أبناء بطوط. لو فكرت فيها فعلا مش حتلاقي ولا علاقة "أسرية" طبيعية -من منظورنا-. وده برضه بيعكس اللي انت بتقوله، وهو إن في النهاية الثقافة دي اللي هي الأكثر انتشارا في العالم دلوقتي بتبيعلنا القيم بتاعتها و"السلع" بتاعتها في ورق سيلوفان.(لو قرأت رواية صنع الله ابراهيم القصيرة "اللجنة" فيه جزء شيق ومهم جدا عن زجاجة الكوكاكولا وكيف دخلت مصر) وزي ما انت قلت برضه ده مش معناه خالص إن كل اللي بيجيلنا منهم كده. بس لازم الواحد يبقى واخد باله. أما بالنسبة لسؤال "نعمل إيه"، فاحنا ممكن نستفيد من اللي بيحصل في العالم حوالينا. كثير من شعوب العالم دلوقت بتقاوم للحفاظ على هويتها وبتحاول تقوي نفسها قدام هذه القوة العظمى اللي هاجمة عليها من كل ناحية. مش عارفة انت قريت المقال ده ولا لأ بتاع عبد الحق عن "الوطنية وهل انتهى عمرها الافتراضي". هو أي نعم بيتكلم أكتر في النقاط السياسية مش الثقافية، بس أنا رأيي إن الاتنين بيصبوا في نفس النتائج

Anonymous said...

مجرد خيال

Anonymous said...

سبحان الله شوفت بقه ...!!!!! السعله الامريكيه)(وشعب متفدم)ياسلام ياسلام ياسلام
حسن خطك شويه
وبعدين خلخله وقيم وكاسبر ومش اشرار
..وبعدين تقول مش عارف والله ايه بقه هاه ايييييييييييه......؟!؟
طلب صغير زود او على الاقل خلى
ال ب ه ج ج ه دايما موجوده اشطه
سيكومولوجى

Guevara said...

الكلام ده أنا سمعته فين قبل كدة؟

Polka Dotted said...

mmmmmm

Eman M said...

هوة احنا مضيعنا حاجة غير تقليدنا لهم، لازم ناكل زيهم و نلبس زيهم و نعيش زيهم .. و نفكر زيهم

Solo said...

ممكن تلاقى يا بهظ الجلابية و القفاطين و العمم بتتباع فى شوارع امريكا فى يوم من الأيام لو طلعت موضه
المهم الفلوس
ممكن يبيعوا بلاليص مش لو هاتجيب فلوس

يقدروا يبيعوا الخصائص الثقافية لكل شعب على الأرصفة و يفرغوها من قيمتها و محتواها ... دا الأمريكان نفسهم بيبعوا صور جيفارا و بيكسبوا منها ملايين