5 Sept 2009

تلك المخلوقات الفضائية المسماة كذبا بالنساء

اليوم النهارده كان عجيب بدرجه رهيبه ... يوم خزعبلي من نوعيه الأيام اللي ممكن تخللي الحجر يكتب ... يوم مش عارفله اول من أخر ... ربما يكون أسعد يوم فى حياتى و ربما يكون أسوأها .. انا هحكي و أترك الحكم لكم

القصه من البدايه ان في بنوته قموره عجباني جدا ... هى مرشحه بالنسبالي بنسبه 60 فى الميه انها تكون "ذا وان" .. بس بالتأكيد هى أكيد "سم وان" ... بنوته ناجحة و طيبة و اجتماعيه و مؤدبة و ليبرالية بالتأكيد ... البنوتة دي انا عرفتها فى ظروف كانت مضطراني إني أكون قايم بدور المدير فى الشغل كان حاطط عليا لوود رهيب انني لازم أكون حيادي (بالنسبه للمثل و الأخلاقيات العليا اللى بأمن بيها) و إنني مستغلش النوع ده من السلطه فى جذب الانتباه .. المهم بعد ما خلص الشغل اللى بينا بقينا أصدقاء و ليا ذكريات جميله فى خروجات معاها مش ممكن أنساها ... المهم ان انا حسيت (و يمكن غلط) انها بترسل إشارات و ده طبعا بعد ما انا ارسلت إشارات (لا استبعد انها كانت غير مفهومه حتى لا أتعرض للإحراج) ... و قولت جه الدور على الخطوة التانية ... انني اتكلم جد شوية ... اننى أقولها ايه اللي أنا حاسس بيه (اللى هو حقيقة مشاعري كما فى لغه الستينات ) ... رتبت معاد معاها ... و على اساس انى أقابلها كصديق و إن يكون معانا اصدقاء تانيين و هى وافقت و تمام التمام ... رحت قابلتها و كضفدع بشري متمرس (كنايه عن الجراءه) قولتلها اللى انا بفكر فيه و انا كلًي سعادة و انشكاح

كان ردها بالرفض الصريح المباشر... بم بم بم باااااااه ... انها مش مستعدة للعلاقات دلوقتي حتى لو سيريس ... و انها عندها اولويات تانيه غير الدخول فى علاقه فى الوقت الحالي ... كان رفضها قاطع ... و وضحتلي انها كانت بتعاملني كأخ و صديق و ان جايز ده اللي خلاني افهم اشارات غلط.

انا فاهم وجهه نظرها و مقدرها تماما بس هو الاحساس بالرفض ربما يكون أسوأ الحاجات اللى في الدنيا .. أصل انا شخصيا كبت نفسى كتير عن الدخول فى علاقات علشان انا مكنتش مستعد بس دلوقتى انا مستعد نفسيا و ماليا و كل حاجه (واد مخلص يعنى) و طالما انا مستعد يبقى من العدل ان ألاقي اللي انا بدور عليه .. برضه مش ده المهم ... المهم عندي انني احلل اللى حصل .. انا كل حاجه عملتها زي الكتاب ما كان بيقول .. و اصعب حاجه على الراجل انه يعيش دغف مش فاهم ...ايه اللى بيحصل و الاهم طب ليه ده حصل؟!!!

المهم رحت القهوة و قعدت مع صحابي و شربنا تومباك و صدري اتسفلت منه (التومباك هو حجر شيشه بس بدل المعسل محطوط عصارة التبغ الصافى الملفوف على وراك العذارى) و قعدنا نقول نكت و نضحك لما بطنى اتشقلبت من كتر الضوحك.

و لما كل صحابي مشيوا انا كنت مضطر اقعد على القهوة لغايه الساعة سبعة لحد ما يجي ميعاد القطار المسافر الى القاهرة ... و فضل واحد صاحبي قاعد معايا .. طبعا انا سرحت لما هو جاتله مكالمة ... و للأسف فيها برضه مقدمات الرفض من البنت اللى هو سيكو سيكو يعنى... الموضوع اتفتح و حكيتله على اللي حصل معايا و احساس المرارة و احساس الجهل و هو حكالي عن احساسه بالغباء الشديد من غلطاته

قعدنا نحلل شوية بشوية هذا المخلوق الفضائي المسمى كذبا بالمرأة من خلال عقليه رجاليه اقل تقدما ... البنات عادة بتقول انها عايزه شخص ناجح ... شخصيه قويه ... قائد ... أسد ... حنين ... طيب و بيخاف عليها ... وسيم ... مثقف ... مبدع...و ليبرالى !!!

المشكلة إن حتى لو الشخصية الهندية دى توفرت فى الحقيقة ... فالبنت مش بتحط لوود كبير فى تقييم الشخص بناء على العوامل دي .. بالعكس تماما ... خمسين فى الميه من سكوور الولد بيعتمد على ثقته فى نفسه و "البادي لانجويتش" بتاعته و خاصه فى أول انطباع ... المشكله إن لو هو شخصية قويه بس حنين فطبيعى انه يكون بيتكسف و بالتالى بيكون اول انطباع عنه مش سيكسي خالص و بالتالى هيترفض ... لكن هو لو فاشل و مع ذلك عنده ثقه غير مبررة بالنفس ... هتلاقيها وقعت على بوزها ... و بالنسبه لعقل الراجل ده شيء غير مفهوم ... انتوا بتطلبوا طلبات انتوا مش عايزنها و يمكن علشان كده البنات سيئة للغايه فى لعبه الاستيميشن ... ميعرفوش يطلبوا يا بيه !!!... طب فين السر!!! .. يعنى انتوا عايزين ايه بالضبط .. لما تلاقوا اللى انتوا دايما تتكلموا على انكم عايزينه بتجيبوا مارشدير .. ليه بقى !!!
وده السؤال الابدي اللى مفيش راجل عارف يفكه بالعقل .. فتلاقى اعظم مفكري العالم فاشلين مع النساء فى حين أغبى الرجال ممكن يكون ناجح معاهم.

القصة دايماً بتبدأ مع الراجل فى انجذاب جسدي ... فى حين الست بتدور على انجذاب عقلى بالدرجة الاولى .. هي عايزة واحد كده بومبو يعرف يفلفلها ... يخليها دايما بتفكر يا ترى هو عايز إيه بالضبط ... مش متوقع و الأهم واثق فى نفسه لدرجة مستفزة ... درجة تخليها تقول فى نفسها هو عنده إيه الراجل ده ... و زى ما معظم الرجاله بتهدى لما تشوف المستخبى تحت الهدوم .. معظم الستات بتهدى لما تشوف اللى جوه الدماغ

ممكن بعد كده تيجى مراحل التعود و الألفه .. اللي هو خلاص شاف اللى عايز يشوفه و هى عرفت اللى عايزه تعرفه و خلاص الاتنين مبسوطين مع بعض
المشكلة هى ان علشان توصل لمرحله إنك راضي عن الشريك .. لابد انك تبتدي تعدي على مرحلة الانجذاب و طبيعى علشان تعدى على المرحله دى لازم تكون بومبو كده فى نفسك
المهم أنا و صديقي قعدنا للصبح جنب محطة القطار حيث أكتب هذا الموضوع منتظرا القطار ليأخذني لمغامرة جديدة في القاهرة.

و حمدالله على سلامتي

20 comments:

AZ said...

lolllllllll allah ye7ezzak ya bahz.. te3ish we takhod 3'erha ya man
allak fi 3 mabeyfhamoush le set: el saby wel shab wel sheikh :D
y3ni men abu akher law bet7awel tefham le setat... ensa ya 3amr

Anonymous said...

اعتقد ان الحل لكلا الطرفين انهم يبطلوا يشوفوا الطرف الاخر على انه مخلوق غريب غير مفهوم قادم من الفضاء الخارجي

لو حاول كل واحد انه يفهم التاني كـ"أنسان" وليس رجل او امرأه

مهما كان فيه من تركيبات وتعقيدات وتناقضات ، فجميعها انسانية ليست نسائية او رجالية

لو بطل كل طرف انه ينظر للاخر على انه "اخر" قادم من معسكر النساء \ الرجال

لو وصلنا لمرحلة ان الانجذاب مابين الطرفين يكون انجذاب جسدي وعقلي معا ومتبادل ومتساوي من كلا الجانبين

ساعتها بس وجود طرف اخر في حياتك هيخليك تفهم نفسك وتفهم الناس اللي حواليك قبل ما تفهمه هو ، وتفهم ان اي اختلافات وفروق في الشخصيات هي مجرد فروق فردية طبيعية كالموجودة بين الاصدقاء من الجنس الواحد وليست اختلافات فضائية خزعبليه سببها انك قادم من كوكب وهو قادم من كوكب تاني

هتقدر تفهم نفسك وتفهم بقيت الناس لان العلاقات العاطفية من اكثر انواع العلاقات اللى بتسمح للناس انها تقرب من بعض وبالتالي كل ماتقرب (وانت مش شاغل نفسك بأنك تفك شفرة الكائن العجيب اللي قدامك ده ولا حاجه) كل ما ده هيديك خبره اكتر في العلاقات الانسانية بشكل عام وهيساعدك بالتالي انك تفهم نفسك وتفهم الشخص اللي معاك

Sara said...

7agten yegawbo 3ala as2eltak di kolaha:

awalan 7aga basita gedan esmaha "elnasib" or destiny elly momken to2af odam 7aga m3 en kol el shorot motawafera.

tany 7aga, mesh ma3na en el bent elly 7adedet heya 3ayza eh fl ragel belzabt, awel matla2y el mowasafat di, te2bal 3alatotl. why? 3ashan bkol basata fi akid aktar mn shakhs wa7ed mawgood fih el mowasafat di heya ableto aw te3rafo, yeb2a m3na keda hat2oul 7ady bady w tekhtar? akid hatekhtar elly heya shayfa enaha bet7ebbo w fih el mowasafat elly te2dar tet3ayesh m3aha, wel 7ob da 7aga mn 3nd rabena, m7desh 3ando option ydos 3ala zorar masalan bta3 el 7ob wel kobol!

Anonymous said...

maybe u used the wrong book to follow..
maybe u were not clear enough..
maybe u didn't show u r really serious..
sometimes the way questions r asked forces the person to give different answers..
maybe the "No" u heard wasn't that definite..
maybe u can just give it another try..
Good Luck

Marwa Rakha said...

:)you made me laugh ... nice note

Haythem Basha Kamel said...

أيها البهظ ، من إمتى أصبحت العلاقات الإنسانيه تقاس بالفكر السياسي أو الإقتصادى أو الإجتماعى
يعنى بكره نقول دى عيله ليبراليه و دى عيله شموليه ، أما العيله دى لينينيزم ، والشارع ده كله يسارى والميدان ده يعيش فيه رأسماليين

أنا أعرف واحد صاحبى متخلف أول مواصفه فى اللى عايز يتجوزها إنها تكون أهلاويه

بهظ ، إنت برجوازى

Sarah Zaaimi said...

you know what is the problem in what happened after deep analysis. you adopted the wrong approach. you were very bahzian with the girl most of the time but when it comes to relationships you were very classical and boring! how often does a nice beautiful girl hear in her lif " i like you, have feelings for you and would like to build something together "? well lots and lots of times but I think that if you just invited that girl to bakuuss or al 3atariin, didn't compliment her the whole day, and all of a suddent stop her in a corner and tell her straight in the eyes "I decided that me and you should start dating on the spot" and don't give her space to answer??? she will be surprised, confused and would say at least: you are crazy = which means maybe in the women language!
Bahz darling always remember that women like to be impressed! and impressed nowadays goes beyond tha classical dinner with candles and the red flowers loool

moustapha achraf said...

Girls Like Aliens But at least you can understand what aliens wants

wa7ed 7'alass 7ayetgwez

Unknown said...

Sarah, U rock!!! i totally agree with you, but also sometimes it's just Interest, maybe f3ln she can't see him 3'eir Bahzooz. It's always the approach men use i agree, but it has also to be built on a Base from the girl's side ...

Haythem Basha Kamel said...

صقفه كبيره للأخت ساره
إتعلموها بقى ، مليتوا البلد
مع تحياتى

الكونتيسة الحافية said...

اعتقد ان المشكلة هي انك بتقيم البنت من خلال القياسات الذكورية اللي بتكون عادة عملية مادية. الانثى بطبيعتها قياساتها جوانية غير مادية وبالتالي لما بتيجي تحط لنفسها معايير مادية في اختيار شريك حياتها ده بيعملها لخبطة لان معيارها الحقيقي اللي يمكن هي في كتير من الاحيان مبتقباش واعياله هو فطرتها أو الرادار الداخلي بتاعها... اللخبطة دي هي اللي بتسبب حيرة للراجل وبتخليه حاسس انه الست مش عارفة هي عايزة إيه. من الآخر الانثي بتعرف راجلها بمناخيرها... ولما بيكون راجلها فعلا....:))

Orthpaedic surgeon said...

بص انت تقولها انا قررت ارتبط بيكي واهو اكسب فيكي ثواب

تيجي هي ترد تروح انت ملاحقها في الكلام
بس خلاص انا قررت خلاص وكل سنة وانت طيبة

وممكن برضو
تقولها ايه رأيك في لقب مدام بهظ؟؟
هتكست هيا شوية
تقولها بتفكري ايه ،اكيد لقب حلو
اتعودي عليه بقى عشان انعمت عليكي ونزلت مرسوم ملكي اني اديهولك
وطبعا الفرمانات الملكية مفهاش رجوع

محمود محمد حسن said...

صدقت يا بهظي بيه ، مخلوقات فاضائية مسماة كذباً بالمرأة،

شفت مرات كتير بتبقى البنت مرتاحة لولد جداً ، وفيه ما بينهم تقارب غير عادي ، الطبيعي من الولد إنه مادام كده انه ياخد خطوة .... وبيتقدم ، بيكون الرد انت زي اخويا .. ودايما اسأل نفسي طيب ليه طيب ؟؟ .. ما تفهمش ،

المشكلة الأكبر إن التباين بين البنات وبعضها في موضوع العلاقات ده تباين شاسع وغير تقليدي ، يعني مش ممكن يتحدد له نموذج ونقول البنت عملت كذا علشان كذا ... مفيش اي مقياس نقدر نقيس عليه تصرف الرفض من البنات إطلاقاً ...

تحياتي ،

على جنب ..
بتعجبني لغتك السلسة ، ما تبقاش تطول الغيبة كده

محمود محمد حسن said...

صدقت يا بهظي بيه ، مخلوقات فاضائية مسماة كذباً بالمرأة،

شفت مرات كتير بتبقى البنت مرتاحة لولد جداً ، وفيه ما بينهم تقارب غير عادي ، الطبيعي من الولد إنه مادام كده انه ياخد خطوة .... وبيتقدم ، بيكون الرد انت زي اخويا .. ودايما اسأل نفسي طيب ليه طيب ؟؟ .. ما تفهمش ،

المشكلة الأكبر إن التباين بين البنات وبعضها في موضوع العلاقات ده تباين شاسع وغير تقليدي ، يعني مش ممكن يتحدد له نموذج ونقول البنت عملت كذا علشان كذا ... مفيش اي مقياس نقدر نقيس عليه تصرف الرفض من البنات إطلاقاً ...

تحياتي ،

على جنب ..
بتعجبني لغتك السلسة ، ما تبقاش تطول الغيبة كده

blAck icE said...

أخ ايه وصديق ايه يا بهظ بيه... ده حركات بنات يا معلم... كلهم بيقولوا كدا في الأول ويعملوا نفسهم متفاجئين وكإن اللي بتقولوا ده ما جاش في بالهم من اساسه وبعدين كل ده يتغير لما يجيلهم مزاج... تقول ايه بقى كلهم مجانين وعلى رأيك فعلا مش عارفين هما عايزين ايه

وعلى فكرة البوست جاااااااااااااااااااااااااااامد

Nancy Signal said...
This comment has been removed by the author.
Nancy Signal said...

القصة دايماً بتبدأ مع الراجل فى انجذاب جسدي ... فى حين الست بتدور على انجذاب عقلى بالدرجة الاولى

الجملة دي مقنعة جدا و لو قريت كتاب الرجال من المريخ و النساء من الزهرة حتفهم العقليات دي كويس

إن شاء الله ربنا حيرزقك ببنت الحلال اللي تصونك و تفهم بهظاويتك قريب ما تستعجلش و لا تدايق نفسك , كله نصيب

Nancy Signal said...
This comment has been removed by the author.
نون said...

طب حمدالله ع السلامة :D

Nada Rady said...

BAHZ, walahi wahashteni w wa7ashni ur bahzian crazy style :)))