16 Nov 2007

بابا

بابا راجل غريب طحن ... عصبى بشكل غير طبيعى معايا و مع أختى ... هادى جداً مع الناس ... جرب كل أنواع الحياه و هو صغير و مع ذلك لسه على نياته ... راجل عنده 64 سنه و مبيبطلش حكايات.

الذكريات عند بابا ليها طعم خاص ... رغم أن انا شبعت من القصص اللى هو بيقولها لأنى سمعتها أكتر من مره ... لما بيكلم عماتى ولا فى التاكسى مع السواق اللى مش هيعرفه لأكتر من مده المشوار ... إلا إن عنده دايماً اللى يحكيه.

لما تقعد مع بابا هيبتدى يحكيلك عن الايام فى السعوديه و أزاى إن ظابط الجوازات مصدقش إنه مسافر سنه 72 و ان بابا كان نفسه يخش الجيش بس نظرة مأسعفوش رغم إنه دخل مدرسه عسكريه فى السيده زينب و كان بيلعب ملاكمه و سباحه و كان من المتفوقين ... و يحكيلك عن نور الشريف اللى كان زميله فى المدرسه و بقى نجم بعد كده .... يتنهد و يقولك انه كان ممكن يبقى نجم سينمائى بس الحاجه مرضيتش تخليه يكمل و انه طلع فى مشهد مع فريد شوقى فى فيلم جعلونى مجرماً ... طبعا هيقولك عارف مشهد الدكتور لما اداله الحقنه و هو فى المستشفى أهو ده بابا ... كان مشهد كومبارس متكلم ... كان اياميها بابا شغال فى مصلحه الضرايب و طالب بكليه التجارة و لما جدى مات و كان زميل عبد الناصر فى الجبهه عبد الناصر بعت مندوب شخصى يحضر الجنازه ... بعد الجنازه راح هو و عمى نبيل و وقعوا فى سجل التشريفات.

باباه حكاياته لا تخلو من العنصريه ... يعنى مثلا مبيحبش الفلسطينين عموما ... أصل اتبهدل منهم فى السعوديه و بعد كده فى مصر ... لما أجر منه المحل واحد فلسطينى و بقا يتأخر معاه فى الأيجار... أفضل أقاوح معاه يا بابا مش كل الفلسطينين زى الراجل ده ... يقوللى لأ... أقوله لأ يا بابا انا أعرف فلسطينين كويسين ... بس هو راسه ناشفه.. جميل بابا فى العناد.

بابا عنده حكايات كتير خاصه... انا عارف انهم محصلوش كده بس هو بيحب يحشى الحكايه بشويه بهارات و يفضل يحكيها منتشى بمتعه السرد ... والله بابا كان ينفع حكاء .

أكتر حاجه بتبهرنى فيه هو أزاى بيبتدى الحكايه من لا شئ و يتفرع بيها لحاجات مالهاش دعوه و بعد كده يوجدلها دعوه ... عندك مثلا جوز أختى أول مره جالنا البيت ... المفروض اننا نتعرف فيها على الولد ... بابا أخد تلت تربع مساحه الحوار فى تفسير سوره يوسف من منظورة الشخصى ... هو مصدر معلوماته الوحيد إذاعه القرأن الكريم و الواد اساسا دارس تفسير .. وانا اللى معرفش حاجه عارف ان بابا بيهجص ... ماهو أصل سيدنا يوسف منفش ف القميص علشان يبعتوه لأبوه... بابا مصر انه نف فى القميص .. جوز اختى كان صايع مشاها نف فى القميص و بابا بعد كده بقى يقول انا أختبرته فى تفسير القرأن و لقيته فاهم علشان كده خليته يتجوز البنت ... ماهو أصل الرسول قال من جائكم ترضون دينه و ماله فزوجوه و إلا تكن فتنه فى الأرض و فساد كبير .. أقوله يا بابا مفيش ماله ديه ... يقوللى لأ و ماله يعنى انا أجوزها لواحد فقير.

بابا دلوقتى مصدر حكاياته هو العبد لله ... مانا كل أسبوع لما أنزله مصر لازم أقعد أحكى معاه ... عن أى حاجه ... عن مشكله التصحر و لا تغير المناخ... التدوين أو العمل الأهلى ... بيسمى الأنترنت طقطقه ... فيقوللى طقطق كده على الكمبيوتر أبو خمس تلاف جنيه و قوللى الاخبار بتقول ايه .. طبعا الكمبيوتر ده من خمس سنين بنتيوم 2 ... و مافهوش كارت فاكس و لا كارت نيتورك و مبيوصلش على النت اساسا لأن مفيش وصله فى بيت مصر ... و كل مرة أقوله كده و هو مالوش دعوه ... جميل بابا فى العناد

لما رجعت الأسبوع اللى فات من فنلندا .. قام مقعدنى معاه فى البلكونه و قاللى ... ها أحكى ... انا فضلت أحكى عن فنلندا و السقعه و أزاى هم أبتدوا يعملوا سخانات تحت الطرق علشان يدوبوا الجليد ... مفيش انا خلصت الحكايه و هو رفع سماعه التليفون و أتصل بعمتى ... اااه الواد رجع بالسلامه من فنلندا ... أه دى سقعه جداً ... تصدقى يا ناريمان ... دول بيعملوا سخانات تحت الأسفلت علشان يدوبوا الجليد .... أه و الله ... يكمل كلام شويه و يقفل السكه و يبصللى .. اللى قوللى يابو حميد ... هى السخانات دى غاز و لا كهربا

جميل بابا فى عناده و حكاياته

25 comments:

علا من غزة said...


نشكر لكم تعاونكم :))

انا عارفة والله انو في ناس كتير فاضحانا في كل مكان :p

بردو كالعادة .. موضوع مكتوب بمزاج .. اسلوبك في السرد ممتع ومرح :)

تلاقيك ماخد الحكاية دي من والدك :D

salamat

Bahz.Baih said...

شكرا يا علا انك بتقدرى المزاج فى الكتابه.. انا فعلا بحترم فى بابا قدرته على الحكى المتواصل و يمكن شويه واخد دى منه
نورتين يا علا و الله و ياريت تفضلى تزورينى كده على طول حتى بعد ماتروحى بلجيكا و تبقى محاميه قد الدنيا

شمعى أسعد said...

تصدق

شوقتنى اتعرف على باباك وعليك

انا هاوصلك عن طريق هيثم جار القمر

او عن طريق احمد عصمت

بتاع اليكس اجندا

حلوة الخطة دى

وللا يمكن نتقابل فى الجيزويت

انا دايما هناك

بساطة وجمال اسلوبك

مغرى بالسعى لمعرفتك

Bahz.Baih said...

أسعد شمعى
بجد انا اللى اسعد بمعرفتك يا أسعد ... أسمك حلو قوى كله سعاده... أسعدت يومى و رفعت روحى المعنويه على الصبح يا أسعد السعد

Sara Swidan said...

شوف يابني الدنيا بتلف ازاي و الأدوار بتتغير...


حسة إنه راجل حبوب أوي ... بحب أوي الناس الكبار لما يفضلوا يحكوا عن اللي عملوه ف حياتهم ..

بس بخاف لما أكبر أنا (لو كبرت) ملاقيش حاجة أحكيها ... تكون كل الحاجات اتنست .. أو أصلاً كانت حاجات عادية !

:)

اشطة عليك يا بهظ

Bahz.Baih said...

سارة
المشكله مش إنك تلاقى حاجه تحكيها ... المهم بتحكيها إزاى حتى لو عاديه... ماهو ايه مثلا الجديد فى إنك تحبى المجات و لا الكاسات و السوائل ... ماهو كل الستات بتحب الكاسات و ادوات المطبخ ... المهم بتعرفى تحكيها و لا مبتعرفيش... سارة أنت كويسه بس لو تبطللى الخوف من كل حاجه بتقابلك ف حياتك التخن .. الادوار العاليه .. انك متلاقيش حاجه تحكيها ... بصى أبتدى التمرين ده ... أطلعى فوق سطوح العمارة و أقفى على السور و قوللى بعلو صوتك ..ز مننننننننك لله يا بهظ

Jasmine said...

بجد روعة
اسلوبك
وباباك اروع

موقف جوز اختك فكرني بموقفي مرة مع ناس كده...
بالش احكي دا انا داخلة باسمي لا تبقي فضيحة

بس السكوت بينجي و بيعدي


ياريت تتصرف و تخلي باباك يطقطق معانا

Ahmed Shokeir said...

عندما تكتب التدوينة وبتلقائية ومن القلب تذهب مباشرة إلى القلب

Post of the day

Foxology said...

بهظ بيه اولا حمد الله ع السلامة من دولة فنلندا الشقيقة

ثانيا احب اقولك انى والدى تقريبا نفس تيمة والدك

ثالثا اللى سمانى فوكسولوجى الولا ايهاب ابن خالتى وسمانى كدة ف لحظة تجلى ع القهوة فى يوم حر ما يعلم بيه الا ربنا :)

تحياتى يا بهظ بيه

dodo said...

قريت لاخويا البوست ده وعجبة اسلوبك جدا بس نفسة يستفسر من والدك عن موضوع النف فى القميص ده
هو مش ازهرى بس مش مصدر معلوماتة الوحيد اذاعة القرآن
غلاسة منى انى اوجه استفسارة بس انت طبعا فاهم انه من حق اى مواطن يستفسر حتى عن شيء واضح ;)

اهنيك على روحك الحلوة , عجبنى البوست جدا

Unknown said...

ههههههههههههههه
يا خبر ابيض يا جدعان
ده توأم واحد قريبى برضه بيقولوا انه ابويا
بس انا زيك كده بموت انى اقعد ارخم واغلس عليه ونحكى سوا وافكره بحكاويه دايما
ربنا يخليه ليكوا يارب
اسعدتنى جدا بالبوست ده اللى عرفته من عند استاذ شقير وبمدونتك

أُكتب بالرصاص said...

تحياتي للسيد الوالد


الواحد من دلوقت بيفكر

ياترى ولاده هايكتبو عليه إيه .؟؟

والله فكرة..
هأروح اسألي عيالي....واخليهم يكتبوا وانشر ارائهم فيا من دلوقت

تحياتي يا بهظ

Amira said...

مدونتك صادقه و ممتعه جدا

أحييك

و أشكر احمد شقير أن لفت نظري اليها

Fatma Emam said...
This comment has been removed by a blog administrator.
Bahz.Baih said...

ياسمين
انا و الله نفسى أخلى بابا يبلوج بس هو مبقاش يشوف كويس بعنيه فمش هيعرف يبلوج و لكن ممكن تدعيله بالشفا

أحمد شكوير
يا باشا شكراً بجد على الكومنت و الكتابه عندك ده شرف ليا انك تختار احد بوستاتى بوست اليوم بالنسبالك

فوكسولوجى
الله يسلمك يا باشا
اوكويس انكتبت عندى ده بس ياريت لو تكتب القصه كامله عندك

دودو
على أخويك انه يبحث بنفسه عن السبب الحقيقى للخلاف بين العلماء فى موضوع النف لأنى بصراحه مصدق جداً انه هياس من بابا

لماضه
انا أكتشفت ان باب شبه باباهات كتير و انا اللى كنت فاكرة متفرد على العموم مرحب بيك دايماً ضيف على البلوج

قلم رصاص
أكيد يا باشا الولاد ممكن يكتبوا عنك طول مانت غنى ..طول مانت موفر ليهم مثل فى الحياه على غنى النفس و عيش يا مان

فريده
اشكرك لثقتك فى البلوج و أعجابك بالموضوع
و انا كمان اشكر احمد شقير انه لفت النظر لينا

Anonymous said...

ربنا يخليكم لبعض

:))

بس سؤال


هي السخانات طلعت غاز ولا كهربا :D

lol God bless him indeed :)

Ya Di Elneela said...

اخيراً عرفت انت جايب القدرة على اللت منين
بس و الله و الدك شكله لطيف
على الأقل بيربط حاجات ليها دعوة ببعد مش يربطلك بين ال0900 و الجواز العرفى

Sara Swidan said...

حد تاني يا بهظ كان من نصيبه إنه يخاف م الأدوار العالية ...

لكن أنا مش هكسفك ... تخلص النوَّة دي بس.. و أطلع فوق السطوح ، و تسمع صوتي من راس البر عندك ..

شكراً

نصف اخضر نصف يابس said...

تعرف
انت فكرتنى ببابايا هوا كمان عنده اسلوب جميل اوى و شيق فى سرد الحكايات و بفتكر و انا صغيرة انه هوا اللى كان بيحكيلى حكاية قبل ما اانام مش مامتى و ان انا كنت بحبها قوى و ابقى مستنياها و دلوقتى لما كبرت و بقيت مشغولة و ماعنديش وقت للحكايات ساعات بكون زهقانة قوى و ما عنديش وقت اسمع بس ضميرى بيانبنى بعدها على الشعور دا و بقول لنفسى كلمة الرائع عبد الوهاب مطاوع ان المفروض ان نتمتع بوجوه الاحباب طول ما احنا معاهم لان ماحدش عارف بكره مين فينا يغيب و مين يكون موجود ربنا يديهم كلهم آباءو امهات الصحة و طول العمر و يمتعنا بيهم

عـسـل مـرمـر said...

انت ازاى تحجر على خيال باباك الفنان ؟ انت مش بتقدر الفن ؟ يا ريتو كان دخل الجيش بأه كنت حتشوف الفن اللى على حق .. و ف الجيش بأه يا معلم محدش شايف حد .. كان حيطلع الإبداع كلو !!!!!!!!!!!!!

السينيور said...

الصراحة يا بهظ انت دماغك عاليه اوي واسلوبك حلو وتلقائي

اكيد طالع لباباك

وهتبقي حاجة جميلة اوي لو باباك كتب كام بوست كده عشان نستمتع بحكاياته

تحياتي ليك ولدماغك المتكلفة دى

Bahz.Baih said...

شكرا للناس اللى علقت مبدئيا و اعتذر فى التأخير بسبب ظروف السفر
ياجماعه و هتعرفوا البوست اللى جاى... نرد بقى على الناس الحلوه اللى عبرتنا
Epitaph
بالنسبه للسخانات هى حسب الطريق
يعنى شويه غاز لما يبقى الطريق ملون و كهربا لما الطريق يبقى بيتمسى عليه
بس اكيد انـها بتسخن

يادى النيله
كل واحد مننا عنده حاجه وارثها من اهله يا ماهى انا اراهن انك برضه جايبه الثوريه دى من اهلك يمكن باباكى... على العموم خليكى معايا على الخط

سارة
أولا عفواً
ثانيا انا رجعت و النوه خلصت و برضه مسمعتش حاجه

نص اخضر نص يابس
انا بيجيلى نفس الاحساس و الله لما بكون محتاج انزل و معنديش وقت اسمع و هو يبقى عايز اتكلم زى دلوقتى و انا بكتب الكومنت ده

مخطوبه
انت عارفه كويس انى بقدر الفن حتى لو مش حلو بقدر اللعبه الحلوه و الدليل انى بقعد لأخر الحفله بتاعتك

شاب مصرى مفروس
مفروس ليه ماعلينا ... صكراً يا بيه للتقدير... بص انا ليه قايله على البوست و على تعليقاتكم الجميله و هحاول اخليه يملينى حاجه اكتبهالكم قريب.. اعتبر ده وعد

البنت الشلبية said...

مساء الخير
عجبانى اوى مدونتك والبوست دمه خفيف
كل ما افتكر باباك وهوا بيقول لاختك مش دى السجادة ام الفين جنيه بجد بضحك حتى لو انا ماشية فى الشارع
ربنا يخليلك باباك يارب
ودايما حسه فى الدنيا
ومدونة رائعة

Darine said...

عندى إحساس قوى إنى ف خلال 20 سنة كدة ان شاء الله هبقى زى باباك ...ده لو ربنا مد ف عمرى اساساً

Anonymous said...

one of your best posts because between the lines there is so much emotions! did you tell your dad about the naked people in the mixed Saunas? ;-)