4 Nov 2007

جعلونى بهظاً

كتير عرفتهم فى حياتى و يمكن بعد سنين بقوا يسألونى انت أسمك الحقيقى أيه* ... أصل بقالى كتير و محدش بينادينى غير بهظ و الموضوع ده مش مرتبظ بالمدونه لأن الاسم طلع عليا تقريباً سنه 2000 و لأنى زهقت من السؤال المكرر قررت أنى أحكى الحكايه هنا و أبقى أحط اللينك على الكارت بعد كده.

فى سنه 1998 بعد ما خلصت ثانوية عامه جالى التنسيق على هندسه أسكندريه و بفرق 4 درجات عن هندسة القاهرة اللى كنت كاتبها أول رغبه ... كان ليا قريب من بعيد أكبر منًى بسنه و فى هندسه أسكندريه و قلت خلاص هقعد معاه ... كنت كتكوت خالص ... وش طفولى وصغنن كده و لسه مطلعتليش لا دقن و لا حبوب فسمانى صحابى بقلظ.

كنت طفل غرير و أتضحك عليا كتير و أتنصب عليا أكتر من شباب الكليه و لأنى كنت عايش مع شباب كله من القاهرة فحملت فى اعماقى كره للأسكندرانيه و أستخسار المدينه دى فيهم فى الأول أتغير بعد كده لما عرفت منهم الشباب الحلو ده.

كطالب هندسه كنت فاشل تماماً و ده لأنى مبذاكرش خالص بس كنت شاطر جداً فى الرسم الهندسى و الوصفيه و كل المواد المتعلقه بتشغيل الدماغ مش الحفظ و متفتكرش ان هندسه مفيهاش حفظ ... لا هى فيها من كل لون يا بطسطا ... المهم جت سنه أولى و دخلت هندسه مدنى و معايا فيزيا من اعدادى و مجموع يادوبك 52 فى الميه و كذا ماده مقبول و ضغيف ماعدا الرسم و الوصفيه أمتياز.

فى سنه أولى كان عندنا ماده رسم مدنى و فيها بنرسم كل أسبوع لوحه كانت بتاخد تقريبا فى المتوسط من ساعه و نصف الى ساعتين ... بس انا كنت بخلصها بسرعه فى تقريبا ساعه او ساعه الا ربع ... المهم جه يوم و واحد من زمايلى القاهرويه سألنى انى أعمله لوحه علشان هو هيسافر مصر .. قلت له أن اللوحه بخمسه جنيه على سبيل الهزار ... المهم لما جه تانى يوم اديته اللوحه و رحنا نشترى كتاب المساحه و مكانش معايا الا 15 جنيه و هو بعشرين فأستلفت منًه 5 جنيه على أساس إنى أردهم قام قالى أعتبرهم تمن اللوحه.

المهم بعد كام يوم جالى واحد من الأسكندرانيه اللى نصبوا عليا فى أول سنه و طبق نظاره اديداس كانت غاليه عليا قوى ... أصلها كانت الحاجه اللى بتمنظر بيها فى الدفعه... جالى الزبون و كان مزنوق فى أربع لوح علشان التسليم و مش عارف يعمل أيه فسأل مين ممكن يعمل اللوح دى و لو بفلوس قام صاحبى الأولانى قاله ده بقلظ بيعمل لوحات بفلوس... انا كنت شايل منًه طحن و قلت فى نفسى اللى يجيى منًه أحسن منًه و عملتله اللوح ... كانت العشرين جنيه منًه ليها طعم تانى ... المهم هو راح يسلمها و الدكتور مرضاش يستلمها منًه و حاول يرجعهالى و كنًا فى أزحم حته فى الكليه و فى أزحم وقت و هو بيقوللى أرجع العشرين جنيه و انا بقوله بالفصحى عفوا يا أستاذ البضاعه المباعه لا ترد لا تستبدل.

اليوم ده ناس كتير عرفت أن بقلظ بيعمل لوح و أبتدى ناس كتير تحاول تشترى منًى لوح... و كنت سمعت عن ترابيزه الفونسه و دى أختراع بسيط هو ترابيزه قزاز و تحتها لمبه نيون و تفرد عليها اللوحه الأصل و اللوحه الفاضيه فوقيها و تشغل اللمبه و بس يا معلم تبتدى نقل ... اللوحه اللى بتاخد ساعه و نصف بتاخد بالفونسه 10 دقايق بالضبط "انا كنت حاسبها" شغلى بقى.

طبعا التجارة دى كانت ممنوعه فعلشان كده بقا أصحابى اللى يعرفونى يقوللولى بقلظ بس و انا مببعش لوح للناس اللى معايا فى السكشن و بتجنب أن حد يشوفنى ببيع اللوح رغم أن الكل عارف.

فى شهرين و شويه من الترم الاولنى و بعد الميد تيرم جه دكتور المساحه فى محاضرة يوم الأثنين طلب حل مسأله فى لوحه ... المسأله كانت صعبه جداً ... لما روحت البيت لقيت شيكو "واحد من صحابى عامل اللوحه " عنيا قلبت فجأه دولارات .. قلتله لو عملتلى منها أربعين نسخه هبعهملك بكرة هوا .. مرضاش و شكك فى قدراتى التسويقيه ... أتفقت معاه انا هروح بكره أنشر الخبر و أرجع بالعدد المطلوب و هو يعمل اللوح ... انا هشترى منًه اللوحه بـ 5 جنيه و أبيعها بـ8 جنيه... و حصل فعلا يوم الثلاثاء أتفقت على أربعين لوحه و رحت وزعتهم يوم الاربع و اتفقت على أربعين كمان و رحت وزعتهم الخميس الصبح و من الساعه 10 صباحاً لحد الساعه أتنين ميعاد المحاضرة بقيت أستقبل طلبات لعمل اللوحه و كنت عامل حسابى و واخد موبايل "جو" و شيكو واخد موبايل سفسوفه وكل ما أرن لشيكو يعمل لوحه و جه علُى ميعاد المحاضرة و وزعنا اللوح.

كان الشغل فى الموضوع ده متقسم تقريباً عليا انا و شيكو و كام عمليه كده عملها الناس اللى ساكنه معانا ... كان مجهود جبار إنى أفضل فى الكليه طول اليوم و شيكو يفضل يعمل لوحات ... بس الناتج كان يستحق.... 100 لوحه أتباعوا فى ثلاثه أيام بصافى ربح حوالى سبعميه و خمسين بعد خصم تمن اللوح و الأقلام "كنا بنجبها مدعمه من الكليه " ... انا و شيكو عملنا إحتفال بالمناسبه دى و عزمنا شله مصر كلها و كام واحد من صحابنا السكندريين و جبنا من بيتزا هت 3 بيتزا سيسيليان الكبيره دى و ربع وقيه حشيش "انا والله بطلت بعد كده " و أجرنا فيلمين فيلم لجيم كارى و أتحدى إن حد فى اللى كانوا قاعدين يفتكرة أصلاً و فيلم الكيف ... بتاع الكيمى كيمى كا ... محمود عبد العزيز و يحيى الفخرانى و جميل راتب.

طبعاً الفيلم كان مؤثر جداً فى حالتنا دى .. فطلعنا أسامى على بعض من عين الشكروط لمزجانجى و الكرف ... و انا كان من نصيبى إنى أكون البهظ بيه ... تاجر اللوحات ... مصاص فلوس الطلبه.

كل الأسامى أتنست بما فيها بقلظ و فضل البهظ بيه كأسمى و لقبى ... بيه و بيبيع لوحات ... بس الدنيا شالت و حطت و العيال سافرت و أتجوزوا و انا سبت الهندسه و أشتغلت فى التنمية و بقيت أكتب فى بلوج تحت أسم البهظ بيه بس مش بببيع لوح خلاص انا ببيع سعاده :)

-----------

*البوست إهداء الى من سألتنى هذا السؤال قريباً جداً و وعدتها بالأجابه من خلال البلوج

24 comments:

dodo said...

دايما بيكون عندى احتمالين لتفسير شيء ما
ودايما برضة باختار الاعقد فيهم
وده الى وصلتله بعد ما افصحت عن اصل كلمة بهظ وسببها

تصدق عنده حقه الى قال ان الحياة بسيطة اوى ...
و (انا)الى بعقدها

Soooo said...

بهظ بيك
الحدوته حلوة مووووت وفكرتني بايام الكليه وطلسقة المشاريع والفونسه
اصل محسوبك خريج فنون تطبيقيه .. والحياه عندنا كلها كانت رسم مش مادتين تلاته بس

بس مشكلة الفونسه يابرنس انها بتتفقس لو رفعت اللوحه في الشمس
ولما الدكاتره عرفو اننا بنفونس عاديك على اللي عملوه فينا

يااااه
فكرتني بايام كانت حلوة والله

عموما فرصه سعيده يابهظ بيه ..
وسلامووووووووووز

Bahz.Baih said...

دودو
عندك حقك الخياه بسيطه ززز حتى بصى اهى بسيطه خالص... انا سايب ايدى اهوه

سوووووووووو
و الله افتكرتك سوسو فى الاول يا باشا معلش غلطه مطبعيه
بس يا زعيم احب اقولك انكم فى فنون جميله عزيمتكم رغوه ..ز يعنى ايه دكتور يهرش لوحه ... ده كان على جثتى لو عمل كده
فى طرق سهله لمعالجه المشكله دى... اولا وسخ اللوحه الاصليه و هى تحت فلما ترسم تطبع على ظهر اللوحه الصوره

ثانيا بعد ما تخلص فونسه مشى حرف التى بالعرض على اللوحه و قبل ما تشيلها

لما اللوحه تتوسخ تبقى طبيعيه

بس يا سيدى اى خدمه

Sara Swidan said...
This comment has been removed by a blog administrator.
Sara Swidan said...

ماشي يا عم الحج !!

كان ممكن أوي تختصر و تقول صحابي الحشاشين هم اللي طلعوه عليا تحريفاً لاسم بقلظ ..

و أكيد يا كوك كا كله حيفهم يعني إيه بقلظ!!

قلّي... إنت كنت طخين؟؟

سؤال برئ جداً و الله ، المهم إنك مسفرت و رفيع دلوقتي يعني !!

:)

أنا ماكنتش أون لاين وقتها ... يمكن أكون لسة ردة على التعليقات .. بس أنا وقتها بكون مش فاتحة ال ماسنجر

Bahz.Baih said...

سارة
هو انا ماكنتش طخين بس خدودى هى اللى كانت مكلبظه و على العموم انا عمرى ماخفت من التخن ابداً بالعكس انا بحب كرشى الصغنن حتى انا مره كتبت نص كده بس منشرتوش عن علاقتى بكرشى و ازاى هو مفيد فى سند الايد و انه بيخللى البنطلون ميقعش و شكله حلو فى البدل مش بخاف فى الهالوين من التخن و مابكلش سكر مثلاً

على العموم نورتى رغم ان كيبوردك مسحوب من لسانه يا كوكو

Anonymous said...

اول حاجه نصيحه لخدمة الفئه تحت سن التخرج, علاج موضوع ان الفونسه تتهرش ده علاجه انك تلزق اللوحه الأصل تحت لوح القزاز, فهيكون القزاز مابينها و بين اللوحه الجديده....و بعدين عليك بالتحابيش(بري رصاص من الطاحونه, كام خط عمل في الأونطه...الخ).
وعسي ان تعم الفائده جموع المفؤدين والمفقودين من المهندسين, بس متهيألي الفونسه موضه قديمه, المفروض في حاجات تكنولوبيا دلوقتي ,اصل الواحد ساب الكليه من زمن ما كا الاوتوكاد
13

- البهظ الاصلي(وده مش معناه انك تايواني, دا انت فخر الصناعه المحليه) كان صياد قروش, و مش لازم تقول والله العظيم بطلته على الحشيش, وان كان لابد_لو كان البلوج متراقب_ خللى الموضوع عايم على وزن شرف لا ادعيه و تهمه لا انكرها_ والكلام ده, علشان ما تبقاش صدمه لزباين الدكان من محبي المهمشه.
اخيرا تسلم ايدك يا معلم بوست عسل كالعاده

Bahz.Baih said...

black & ankh
و الله انت اللى عسل يا زعيم... بالنسبه للتطور التكنولوجى فى انا اخر اختراع عملته لما كنت احب افونس و معنديش ترابيزه هو انى كنت بفونس بالبرجل .. احط اللوحه الاصل و تحتيها اللوحه الفاضيه و افضل بسن البرجل اخرب عند نفق التقاطع و بعدين ابقى اوصلهم ببعض... معرفش تطور بعد كده بس على حد علمى دلوقتى فى الكليه الناس بتحل الشيتات بالاوتوكاد ... و طالما دخلت التكنولوجيا فالنصب حلال و سهل يا معلم
هو انا بطلت حشيش و ده صحيح ... بس مش معنى كده انى بطلت تهييس يا باشا

نورت الغرزه

علا من غزة said...


هههههههه

حشيش ! ياللهول

حلو اختراع الفونسة ده بجد حاجة عبقرية
مش عندنا الحاجات دي ..

بس عنجد يعني الموضوع كتير حلو
انا اساسا بحب المواضيع السخسية الي زي كدة

يالا كويس .. حليت لي لغز من الالغاز الحقيقية بما يخص معنى اسمك

بالذمة مش بقلظ احلى :p

عـسـل مـرمـر said...

يا الواناتك يا بهظوظ

حبة حاجات (ايمان) said...

متهيالى االاسئله دى كلها كلنا سالناها لنفسنا قبل كدا
ولسه هنفضل نسال

تحياتى ليك على مدونتك واتمنى انك تنورنى

Foxology said...

كان نفسى اعرف من زمان سبب التسمية :)

اكتر جزء عجبنى كان >>>

((بقيت أكتب فى بلوج تحت أسم البهظ بيه بس مش بببيع لوح خلاص انا ببيع سعاده ))

وعندك حق الهندسة فيها على كل لون يا باطيسطة العبد لله خريج هندسة برضه

يلا سلام يا بهظ بيه :)

tona said...

عارف






هو اسمك واسم البلوج نفسه مرح لدرجه بتخليني ابتسم لمجرد اني اقراه



يعني انت فعلا بتسبب حاله من السعاده

Unknown said...

ألذ حاجه لما بكون قاعد معاك واعرفك بإسمك الحقيقى ويجيى الشخص ده ينادى عليك وانت تنفضله وتقوله معلش اصل ماحدش بينادى عليا بيه والكل بيقولى يا بهظ. ببقى عايز اديك عشرين قلم على سهوة.
طالما انت هتشوف التعليق ده وانت هنا يبقى حمد لله على السلامة

Anonymous said...

يا ثلام عليك ي بهظي بي اثتاذ والله العظيم اثتاذ ثفت بقا ادي اخر الللهبثه واللوللوا اديني نثيت حرف السين والشين ايه اخبار الكرف لثة بيدور عالبت بتاع الحثيث لو اه قله حثيث حاجه تيجي كده اهدا حبيبي كده وارجع زي زماااااااااان ميا مثا عليك يا احلى ثرنجاتي basha

Bahz.Baih said...

أولا انا أسف على التأخير فى الرد... و ده بسبب السفر و حاجحات تانيه بس يلا بينا و خلينا نبتدى بالجميله علا

علا إختراع الفونسه قديم للغايه من أول ما فتحوا كليه هندسه ... هو أكيد عندكم بس أنتى متعرفهوش علشان أنت بنمت شطورة بتذاكرى و بتطلعى من الاوائل و بقيتى معيده ... أسألى الطلبه عندك هتلاقيهم عارفينه.

و مبسوط بجد إن الموضوع عجبك

مخطوبه
دى بعض ما عندكم يا ستى و إحنا إيه من غير نفسكم فى البلوج معانا

إيمان
تحياتى ليكى إنت كمان و إن شاء الله هزور البلوج بتاعك على طول

باشمهاندس فوكسولوجى
أديك يا سيدى عرفت سبب التسميه ... يا ترى هما مسمينك فوكسولوجى ليه بقى

تونه ...تونه... تونه

هو ميرسى .. و على فكرة إنت كحماتن إسمك مرح.. صاحى كده و بيلعب

سى زفت
مانت عارف الزهايمر و عارف البلد فيها كام أحمد ... لو ركزت مع كل حد هيقول لأحمد مش هخلص... ثم مانت عارف الكلام ده .. هو اللى هنقوله نعيده و اللى نعيده نقوله .... يابنى المثل بيقولك الباب اللى يجيلك منه الريح ... ركبله قبنورى

عم انونيموس
ماثى

zordeak said...

هههههههههه والله انت جامد

يا عزيزى البهظ بيه

ما الدنيا الا شنكااااح كبيييير

فلتغترف اذن من منابع السعادة وتعطينا بعضا من البهججة المجانية

واحنا علينا الحشيش


:p

Bahz.Baih said...

عزيزى زورديق
صحيح ... ما الدنيا إلا شنكاح كبير

إلا يعنى أيه دنيا

With Myself said...

الله يجازي شيطانك يا بهظ بيه :D
بجد أنا بضحك بقالي 5 دقايق

Anonymous said...

انا برده ليا اسم طلع عليا بس مش في قاعده حشيش والحمد لله طلع بالصدفة حلو

JAMICA said...

بهـــظ بيه !!

اللــي اقدر اقولهولك ان الظروف لما نفسها بتيجي بتخـلو الواحد هو هو
حتــى و لو اتغير المكـآن و الزمان


ف اول حكايتك انا كنت بشووف نفسي ف السطور دي
عشان هي نفس الظرووف ما عدا موضوع بهظ بيه ده و العزومة الكبيرة اللي عملتها


بس هو هو

هندسة

سافرت مكان غير مكانك

حفظ قليل و تشغيل مخ فـ الاخر و بتعدي
مزاكرة مفيش

ساعة الا ربع بتاعت اللوحة

فونسة

كــل دي هي الظروف اللي بتخلينا نعملها

و بالمناسبة مشكلة الفونسة علمائنا اخترعولها حل

و ده تحت عنوان
" الديك الفصيح فـ البيضة يصيح "

بيقولك انك تحط ورق شفااف بين اللوحة المرسومة و اللي انت هترسمها

و عيش و خلي غيرك يعيش

Unknown said...

تعتبر معادلة كلية الهندسة افضل المعادلات و اكثر من شهادة تدعم وصول الطالب وتهيئه لكلية الهندسة و هي متاحة لجميع الطلبة من طلاب المدارس الثانوية الصناعية نظامي الثلاث و الخمس سنوات حيث يتم التدريب على معادلة هندسة باحدث تقنيات و وسائل التدريب المختلفة الخاصة فى معادلة كلية هندسه لذلك تواصل معنا الان فهذه فرصتك الذهبية

mo3adla said...

سارع الان بالتواصل معنا مع افضل العروض والخصومات العالمية التى لا احد يقدمة الان من معادلة هندسة حيث اننا نعمل على تقدم افضل انواع وطرق الرائعة الان من معادلة كلية الهندسة بمصر الان وباقل التكاليف المختلفة التى نقدمة الان من معادلة كلية هندسه الان فى جميع المحافظات بمصر

Unknown said...

يمكنكم الان من خلال موقعنا الحصول علي افضل المنتجات المتيمزه كود خصم نمشي 15 و توفير افضل العروض و الخصومات المتيمزه من موقعنا و الذي يعتبر الافضل في توفير افضل كود خصم نمشي 2019 المنتجات المتيمزه من خلال موقعنا تواصلو معنا