اليومين دول بدى ترينينج فى منطقه على حدود أسكندريه أسمها أبيس... نادى شباب أسمه السبعات... حاجه كده أيييييييييه مقولكش فى الجحيم تحس انك سافرت فى الزمن الى ما وراء التاريخ... المفروض ان انا متكلمش عن اسرار الشغل ... علشان كده مش هتكلم عن تفاصيل الغباء الادارى و لا سوء التنظيم ولا اي حاجه من الكلام ده... انا بس اللى غايظنى هو ان القرى دى - من خلال سؤال الناس اللى عايشه - كانت زى الفل من قيمه 30 سنه فى أوائل السبعينات... القرى نشأت علشان المهاجرين من مدن القناه بعد 67 و المكان مولت الولايات المتحده أياميها تكاليف ردم الملاحات و انشاء قرى و اراضى زراعية ... كانت متقسمه الى تلات بلوكات ايه و بى و سى فمن هنا جت تسمي ابيس ...من الابجديه الانجليزى ... و كانت الشوارع ستة متر عرض و نظيفه و... الخ من مميزات أى مكان جديد متخطط صح... المهم شويه و أهالى القرى كل واحد يسرق من الشارع متر فى كمان متر و جاره يوازية لغاية ما الشوارع بقت متر على أستاندرد عرض الجاموسة.... و اللى زاد و غطى ان نص ابيس تبع الاسكندريه و النص التانى تبع البحيره
انا بجد مش غايظنى غير المحافظ اللى فالح يهد رصيف و يبنى غيره فى حين تكلفه الرصيف تحل مشكلة بيت و بدل ما يهتم بالغلابه بيدور على حجاب مدفونله تحت بلدوره رصيف
6 comments:
هو أنا بقى ما لفتش نظري في ده كله غير إن أمريكا كانت بتساعد عبد الناصر
وكماااااااااان بعد هزيمتنا؟
الحياة بقى لونها غامضي
انا عجبتنى المعلومه بتاعه اسم ابيس جاى من ايه اصلا
معلومه جديده
انا اسفه اوى ان لينك مدونتى القديم اتغير
http://amoag-sa2ra.blogspot.com/
دا اللينك الجديد بتاعى
اصلا انا متشكره جدا انك عاملى لينك عندك
ياريت تغير اللينك القديم وتحط الجديد
ميرسى لزوقك بجد
معلش تعليقي مش في صميم الموضوع
لكن ابيس اسمها ابيس نسبة للاله ابيس
اله عند الفراعنه
وكان بيرمز له بعجل
موجود له تمثال كبير هناك في ابيس لكن مش عارفه فين بالظبط
العجل ابيس ده رمز لاله فرعوني
مياسه السمره
و الله جايز كلامك بس أبيس من تلاتين سنه كانت ملاحات و أتردمت
و الله ممكن بس مش هو ده لب موضوعى و على العموم أشكرك على المعلومه
همس الليل
هو انا جبت غير همس الليل يابنتى انا شرف ليا ان مدونتك تبقى فى ليستتى
هاى بست جبهه
امال الدنيا مهيسه ليه يعنى ؟؟
بهظ بيه هو حجاب سيادة المحافظ ده متعود يخرج بره اسكندرية؟؟
اصل عندنا بقالهم فترة بيفحتوا ويرجعوا يردموا تقريبا بيشتبهو فى وجودو عندنا!!
تصدق انا كنت متخيلة الموضوع ده طقوس مصرية :)
دودو
المشكله مش فى المحافظ و العمل معموله فين
المشكله فى الدجال ابن الكلب اللى عمال يعمل لكل محافظ فى كل بلد عمل
و المشكله الاكبر فى الشعب الاهبل اللى مصدق الدجال و نظريه الاستقرار
Post a Comment