18 May 2006

ملعون أبو الثقافه

المزاجنجى بعد يوم طويل من الشغل راح الغرزه و أخد كيفه التمام و طلع يتمشى على البحر بس البحر كان هايج فطلبت مع أخينا أنه يقف و يتفرج على البحر, و لأانه مشعشع حبتين قام قاعد على السور و بأعلى صوته قال : أنت هايج ليه يا بحر
البحر رد: مانت اللى مصدرلى المسائل يا عم مزاجنجى
--------------
المزاجنجى مصدقش ودانه و قام باصص للسما و حواليه مالاقاش حد فدورها فى دماغه يمكن علشان انا شارب و بيتهيألى

-------------
البحر: لا يا روح خالتك مش يتهيألك انا البحر فى أحشائه الدر كامن
مزاجنجى(مندهشا) : كامن...!!؟
البحر: أااااه كامن يا جدع و أنت مال أهلك و بعدين مالك كده مغيبب و حالك مش عاجبنى
المزجنجى(سارحا): و الله يا بحر مش عارف أقولك أيه بس ... أنا مش لاقى فايده فى البلد دى و عايز أهج منها بس مش عارف و نفسى أعمل حاجه علشان أصلحها بس مافيش فايده هيفضل الشعب بتاعنا زى ما هو..شعب أبن
البحر (مقاطعا): ياعنى انت بروح امك عملت أيه؟
المزجانجى(غاضبا): مالكش دعوه بأمى أولا... ثانيا انا باكتب بلوجات... و بانزل المظاهرات و أصحابى راحوا المعتقلات و باساند القضاء
البحر: طز... باقولك عملت أيه...؟
المزاجنجى: ياعنى انت مش عاجبك كل ده
البحر: و انت ياعنى اللى متوقع انك تغير حال البلد دى باللى انت بتعمله و بس... يابنى يا حبيبى... يا حبيبى يابنى انا موجى بيروح بلاد كتير و قليل ... شوفت بلاد فيها العجب بس ماشفتش أعجب منكم
المزاجنجى: ماهو ده اللى باقولك عليه ...الشعب عندنا مش فاهم حاجه و مش عايز يتغير
البحر: ياله... ماتسبقش الكلام و أسمع و أتعظ و انا لسه كملت... بلدكم مشاكلها أقل من بلاد كتيير يعنى مشاكل الطائفيه عندكم هتيجى حاجه جنب المشاكل الطائفيه اللى كانت فى أندونسيا سنه 81 و مع كده حلوها ... مشاكل التعداد هتيجى حاجه جنب الصين و مع كده هم كمان حلوها... مشاكل الفقر هتيجى حاجه جنب كوريا فى الستينات و مع ذلك حلوها... و لسه أمريكا اللاتينيه و أوروبا الشرقية و دول كتيير حلت مشاكلها... الا بلدكم
المزاجنجى: و أشمعنى بلدنا...؟
البحر: مشكله بلدكم الاراده و الصبر... مشكلتكم الرئيسيه هى الفساد فى كل حاجه حتى فى هممكم و عزيمتكم يعنى كام واحد فى البلد بيدافع بصدق عن مشاكلها و لا حتى مشكله منها ... هتلاقيهم يتعدوا على الصوابع ,تانى حاجه مافيش تحديد للاولويات عندكم يعنى انت معارض أقنعت كام واحد بوجهه نظرك و حاولت تخلى هدف حياته البلد و الناس
المزاجنجى(ينظر إلى الارض): طب مانا باكتب بلوجات زى ما قلتلك ...(ويرفع رأسه مره أخرى) و انا كمان بكتب فى حاجات يمكن تصدم الناس بس علشان أفوقهم
البحر: جميل جدا ... طب تعال نشوف كده علاء و منال محدش يقدر ينكر أنهم ناشطين جامدين قوى بس مع ذلك ناس كتيير بتشتم فيهم ...ليه؟ علشان حسسوا الناس أن هم أحسن منهم أو انهم مختلفين عنهم ... ده مجرد مثال أزاى النخبه أنفصلت عن مشاكل الشعب نتيجه للأرتقاء الفكرى
المزاجنجى:أحيه...أيه اللى بتقولو ده يا بحر يا عم انا مافهمش فى الكلام ده انا سباك يابا ( مع الاعتذار لحمو و أسامه و لحظى و ماما و نينا و خالو محمد و طنط شكريه اللى بتبيع فجل على قمه الشارع.... و كل سباكين المنطقه)و ياريت لخص و تجيب من الاخر
البحر: يا مزاجنجى يابنى ... أهم حاجه علشان تصلح البلد دى انك تقنع الناس بانك بتحارب علشانهم و تضمهم لصفك و ده بانك تكون واحد منهم من غيير ما تتنك عليهم و تكلمهم عن حاجات تصدمهم حتى لو كانت مهمه خدها واحده واحد ... أنزل شويه علشان تاخد بأديهم.
المزاجنجى: يا عم بلاش نصايح و شعارات و يلا من هنا انت فاكر نفسك أيه
--------------------
و تاتى موجه عاليه تغرق المزاجنجى ليجد نفسه مفترشا الرصيف نايم على الكورنيش و الدنيا صبح و الناس بتقول يا صبح
-----------------
لمزيد من الحوار روح لجار القمر و لجيفارا

5 comments:

Polka Dotted said...

Gamed awee ya bahz.. keep it up
fe3lan law el ba7r etkalem....

هشام علاء said...

البحر لخص مشاكلنا يا بهظ
لازم نسمع كلامه و نجاول نطبقه
بس ازاى؟
اليلوجات بداية
بس لوحدها مش كفاية
*************************
سيبك انت
انت مالكش حل
واى حد يضايقك
قل له
ان احنا مابنتقرش
واذا اتقرشنا مانتبلعش
واذا اتبلعنا مانتهضمش

Anonymous said...

beet seneenak essoda

AZ said...

انسالونى انت معانا والا مع الناس التانيين
قلت معاكم
طخونى جقالوا
ماهو احنا الناس التانيين

Kareem said...

أعجبنى هذا الحوار الخيالى ، ودفعنى إلى التعليق جملة إستوقفتنى أوردتها على لسان " البحر " والتى أعتقد أنها تمثل موقفك :-
" البحر: جميل جدا ... طب تعال نشوف كده علاء و منال محدش يقدر ينكر أنهم ناشطين جامدين قوى بس مع ذلك ناس كتيير بتشتم فيهم ...ليه؟ علشان حسسوا الناس أن هم أحسن منهم أو انهم مختلفين عنهم ... ده مجرد مثال أزاى النخبه أنفصلت عن مشاكل الشعب نتيجه للأرتقاء الفكرى "

لا أعتقد أن علاء ومنال قد إنفصلوا عن مشاكل الشعب ، بل ما يحدث لعلاء الآن سببه تفاعله مع هذه المشاكل ، سواء بمشاركته فى التظاهرات والإعتصامات هو وزوجته والناشطين الآخرين أو بكتابتهم عن المشكلات التى نتعرض لها فى مصر ...
ولا يعنى أن بعض الناقمين يصبون جام غضبهم بذاءة وشتما على البعض أنهم مخطئون ، بل المخطىء هو الذى رأى أن إختلاف الآخر عنه فى وجهة نظره أو حتى فى بعض سلوكياته تجعله أهلا للنيل منه وإهانته والزج به فى السجن كما أقرأ تعليقات البعض الذين يتشفون فيه .
أحد أهم الأسباب الكامنة وراء تخلفنا أننا لا نحترم الإختلاف ولا نقدر آراء من يختلفون معنا فى الرأى ووجهات النظر ونلعنهم ونكفرهم وننبذهم ونطالب بعقابهم ..
المشكلة يا أستاذى لا تكمن فى أن النخبة قد إنفصلت عن مشاكل الشعب - كما تقول - فهذا شىء غير دقيق ومخالف للواقع الذى أرى من خلاله أن الشعب هو الذى قاطع النخبة وتقوقع حول نفسه وفضل السلبية والإبتعاد عما يمكن أن يسبب له ( كفرد أو مجموعة صغيرة ) منغصات ، وفى الوقت ذاته نجده يوجه إهتمامه لأشياء أخرى لا تسحق أن تكون ذات أولوية ويجعلها هى غذائه وشغله الشاغل ، بعد أن إستغله بعض من نصبوا أنفسهم متحدثين بإسم الغالبية التى تجمعها هوية دينية - على سبيل المثال - واحدة ، وتم دفعهم إلى إتجاه لن تصل من خلاله سوى إلى حتفها ...
أرجوك لا تلم علاء أو منال أو أى شخص آخر ، ولا تتهمنا أو تتهم الناشطين الذين دفعوا الثمن من حريتهم دفاعا عن كرامة أبناء هذا الوطن ، وسألفت نظرك إلى مقارنة لها دلالة - فى نظرى - أرجو أن تأخذها بعين الإعتبار ، مقارنة بين أعداد المتظاهرين الذين شاركوا فى التظاهرات ضد إستمرار حكم الطاغية طوال هذه المدة ، وبين من شاركوا فى مظاهرات كنيستى محرم بك وشرق المدينة ، الشعب مغيب عن الوعى سواء بالدين أو المخدرات ، فلا تلمنا لأن الشعب لا يريد أن يتفاعل معنا ، حاول بداءة أن توقظ هذا الشعب من غيبوبته تلك ... وبعدها سيكون لكل حادث حديث ..
كريم