22 Apr 2006

لون رمادى فاتح

فتحى شاب مصرى من حلوان , كان تاجر بانجو و تاب و طوُل دقنه و بقى يقول " كله بأذن ربنا" بين كل جمله و التانيه, أمنيه حياته أن شقته اللى كان الشباب بيجوها يتزاولو فى البانجو يجوها بعد كده يتزاولو فى ربنا , بس لسه مش عارف انه يبطل يصطبح بعد ما يصلى الفجر
,,,,,
جورج من عزبه النخل بيتطوع فى الكنيسه كل يوم جمعه و بيقرا للاب حنا بسطويس و لما راح اسكندريه الاسبوع اللى فات و حصل اللى حصل طلع فى المظاهرات يشتم فى المسلمين كلهم و لو شاف حد من أصحابه ساعتها ما كانش حصلهم خير
,,,,,
عماد ضابط شرطه ... بس بيحب المسرح , الصبح مع عساكر الأمن المركزى حوالين الكليات علشان الطلبه و لاد الهبله لو عملوا مظاهرات و بالليل فى بروفات المسرح مع فرقته بس فى السر لحسن يترفد من الشغل
,,,,,
أوسا من الدنمارك و بتدرس علاقات دوليه و بتدّرب فى السفاره و بتضطر تكدب على أى واحد أول مره تشوفه و بتقوله أنها من أمريكا
,,,,,
بوبا أمريكى أسود من أوكلاهوما و نفسه يعمل عمليه يبقى أبيض لانه زهق
,,,,,
فاطمه مسلمه من مالطا بتلبس حجاب و جيبه مايكرو و تعرف عن الإسلام أنها ماينفعش تشرب خمره و أن الراجل ممكن يتجوز أربعه و عايزه تسافر فرنسا تدرس الإسلام
,,,,,
أبراهيم مهندس مصرى بيحضر دكتوراه فى التشيك و بيموت فى الستات التشيكيات
,,,,,
هنيه من العراق عايزه أيد صناعيه بدل اللى خادتها الحرب
,,,,,
ساره من فرنسا من اب أصله جزائرى و بتشتغل فى موسسه أجتماعيه لمساعده المهاجرين العرب
,,,,,
أحمد من السعوديه ... وسيم من تونس... جوجا من صربيا..و...و...و
------------------------------------------------------
خلاص ... فنيتو.... ماعدش اللون الاسود أسود ولا اللون الأبيض أبيض ...التقسيم الحاد للالوان من طبائع المراهقه , و الانسانيه عدت المراهقه من زمان , بس أحنا فى مصر لسه مراهقين , سبع تلاف سنه مراهقه , لازم بقى نشوف الاسود رمادى غامق و الابيض رمادى بس فاتح ,,, و كفايه بقى تعميمات ,, أتخنقنا
----------------------------------------------------
.أعذرونى الصنف المره دى جايب على كأبه
البهظ

15 comments:

HIMZELF! said...

كحل يا بهظ

ياجدع انت كدة بتعمم الرمادي
!!!

4thH said...

صح ..حلو قوي يا بهظ

أمنيه حياته أن شقته اللى كان الشباب بيجوها يتزاولو فى البانجو يجوها بعد كده يتزاولو فى ربنا "

ضحكتني !!
:-))))

Solo said...

الصنف المرة دى جايب على صراحة
بس و الله جامد يابنى و دماغك منظمة

AZ said...

الجغرافيا مش بتفرق.. علم الاجتماع واحد... انا مبحبش الجغرافيا.. ولا علم الاجتماع... وكفرت بعلم النفس
فلتحيا سياسة الخازوق الموجه ونظرية كرتونة البيض

Bahz.Baih said...

Animal
تقريبا انا نسيت أقول أن للرمادى درجات , دوول عملوا من اللون ده أحلى الافلام

jar el kamar
والله الكلمه دى اتقالت ادامى بالنص و هى اللى خليتنى أكتب البوست ده

solo
فىالحته دى احنا ( لانى اسكندرانى) تلاميذك يا استاذ

AZ
برضه خوازيق ... انا مش مسئول عن أى سوء فهم هيحصل و مش مسموح بمسح الكمنت المره دى

HIMZELF! said...

ساعات كتير كنت اقعد افكر هي لية الشجرة لونها اخضر ومش بنفسجي أو اسود مثلا

الدنيا دي فيها الوان ومهياش ابيض واسود علشان نعرف نفرق بين الحجات ونميزها ويبقي ليها دلالات ومعاني
وعلشان اللون الاسود أو الابيض..لوحدهم..مملين زيهم زي الدايرة
!!!

قول يابهظ

AZ said...

بالنسبالنا احنا يا اهل الالوان (بما انى ديزاينر يعنى) الرمادى هو الى ممل واللون الوحيد اللى مالوش معنى لانه متعادل... اما الابيض والاسود هم اكتر لونين يسمحولنا نحكم على قيمة الاشياء بصورة مجردة... يعنى اما كنا نحبنعرف التصميم موزون والا لا نعمله ابيض واسود

HIMZELF! said...

بالظبط..الحركة دي مش كل الناس فاقساها
بس انا قلت
الأبيض أو الأسود
لوحدهم
يعني الأبيض لوحدة أو الأسود لوحدة

وبعدين متنكريش ان الالوان هي اللي بتدي روح , وماينفعش تعملي ثري دي كل كتلة ابيض أو اسود بس
وكمان علشان هما مملين بيبقوا خلفيات للألوان علشان بظهروهم.. أو خلفيات لبعضهم زي الصورة بتاعتك كدا
طول ماهما مختلفين طول ما نعرف نميزم اكتر
لو رمادي يبقوا ساحو علي بعض واختلطوا ومتعرفيش تميزي اي حاجة
لازم يبقي في اختلاف وتنوع علشان نعرف نميز

وعلي فكرة بقي انتي بتفهميني غلط
وبتتطهيدينيي
انتي بتبني آراء مسبقة علشان انا اسمي انيمال يا بت انتي
!!!

قبل الطوفان said...

هؤلاء هم نحن.. بدرجة لونية ما!

كتبت عن شخصيات تتأرجح بين الألوان.. ألسنا جميعاً كذلك.. على الأقل في لحظة ما؟!
أما اللون الذي اخترته واحتجت عليه يوماً خالدة الذكر لطيفة فغنت له "يا أبيض يا أسود.. لكن مش رمادي"..فأقول لك إنه أصبح اللون المفضل عند عشاق التناقض..
أشخاص من عينة بائع الكبدة "حسن" الذي أصبح اليوم صحفياً لامعاً ونجم سهرات. مهمته الوحيدة كانت تصوير الحفلات الخاصة ليلاً قبل أن يصلي الفجر في الحسين.. واليوم أصبح كاتم أسرار و"ألوان" النجوم الحقيقية
.. وعجبي

Zeryab said...

مبروك يا وحش على المدونة
مساء الخييييييييييييير

S H E B A K said...

الصنف ده جامد مووووت
مرحب يا بهظ بييييه
بالمناسبة : مهلبيين فيين المرة دى ؟
:-)

Bahz.Baih said...

زرياب و شباك
الف شكر يا شباب للدعم اللوجيستى

ياسر
ماكنش قصدى من البوست اننى اتكلم عن الوان الاشخاص اد ما كان قصدى ان الناس تبتدى تبص على الوان الاشخاص من غير احكام مسبقه و من غير تعميمات , يعنى ما ينفعش نقول ان كل الدنماركيين بيكرهوا الاسلام و لا كل المصريين اللى بيدرسوا بره عباقره و ان كل ف6رد مسئول عن افعاله مش مسئول مسئوليه كامله عن افعال الفئه اللى هو فى اطارها .
مش قضيه الوان و ابيض و اسود رمادى .
بس كده يا سيدى و حسن المصوراتى صاحبك اكيد فيه حاجه غير كل المصوراتيه .و يلا باى

Anonymous said...

أنت عميل للغرب و بتسفسط و عاوز تتوه الناس و تضللهم و بتتهرب من معرفة الحقيقة المطلقة مع أنها واضحة قدامك لأنك متلون و بتهرب من الإجابات..و..و..و..و

(ما عدا السهو و الخطأ)

Bahz.Baih said...

الف
ممكن أعرف أنت منين جبت تهمه العماله دى , رغم الجرح الاليم الا اننى لا اود ان اكون ضدك لا لجبن انما لرغبه صادقه فى المعرفه, أحب أعرف أيه هى الحقيقه المطلقه فى وجهه نظرك
تانى حاجه و هى دى اساس المقال على اى اساس بتعرف الغرب و ايه التعميم الفظيع دة
ارجو انك بعد كدة تتكلم بهدوء و بدون اتهامات مسبقه و حاول تخللى الحوار بناء بدل الاتهامات اللى مالهاش لزمه, انت لغايه دلوفتى ماتعرفنيش خليك فاكر دى و ده مش تهديد ده تذكير بحقيقه انت تجاهلتها

و شكرا

Anonymous said...

عندك حق الحياه بقت مقرفه