21 Apr 2006

الهرم المقلوب


إذا سمحتم اريد أن أشارككم بعض الذكريات المحببه الى قلبى و إذا لم تسمحوا متقروش اللى جاى و أحب انوه ان البوست طويل حبتيين
--------------
تررررررن تررررن ....ألو
هى: أيوه يا بهظ... بقولك أيه أنت بتفهم فى الفن و مهندس
بهظ: و بعدين
هى: عايزه علاقه بين خط مستقيم و دايره
بهظ: أشمعنى
هى: علشان تبقى زى مووديل لرساله الدكتوراه بتاعتى
-------------
المتحدثه يا ساده هى صديقه عزيزه من أنجلترا كانت فى فتره تدريب فى نفس المكان اللى أنا شغال فيه و كانت رساله الدكتوراه بتاعتها عن حاجه أسمها
"Transnational learning in Mediterranean"
-------------
بهظ: طب يعنى أيه مووديل دى
هى: يعنى أعمل أسكتشات لاى حاجه فى تصورك
بهظ: مش فاهم
هى: بص لو قلنا أن الخط المستقيم بيمثل المجتمع الاوروبى بكل ما يحمله من تحديد لاهدافه و نوعيه الحياه الملتزمه التى لا تعترف الا بالاهداف الواضحه , أما الدايره فبتمثل المجتمعات الشرقيه بكل المؤثرات اللى بتخليهم كل مل يروحوا لهدف يرجعوا يلاقوا نفسهم عند نقطه البدايه.
بهظ: نعم نعم يا أختى تقصدى أيه ... لا دا أحنا ساعت الغلط بنطرطش زلط... (طبعا مقدرتش أفهمها معنى الأفيه نتيجه للترجمه و أختلاف الثقافه).
هى: أنا قصدى المجتمعات الاوروبيه أهتمت بالماديات و نسيت الروحيات فدا أصدى بالخط المستقيم أما المجتمع الشرقى لسه محافظ على الروحيات.
---------------------
طبعا ارتسمت على وجهى أبتسامه صفراء بمعنى (روحيات أنت لسه عايشه فى الوهم ده... قشطه).
و طبعا نسيت كل حاجه عن الحوار ده و كملت فى اللى كنت بعمله
----------------------
ترررررررررن ترررررررن .... ألو
هى: أيوه يا بهظ عملت أيه فى الى قولتلك عليه
بهظ: ها اللى قولتى عليه... أه يعنى... كل خير .
( طبعا لم تدرك اننى أتهرب من الاجابه لاننى لم أفعل شيئا و أعتقدت أننى كعادتهم بدأت العمل ... الحمد لله).
هى: طب أنا جايه كمان ربع ساعه
بهظ: تنورى
---------------------
غارق الى أذنى فى العديد من الرسومات التى لوسألتنى ما مغزاها لن أجيبك بمنطقيه و لكن سأتعامل
فوبو: بتعمل أيه يا بهظ
بهظ: أبداً.. بارسم علاقه....الخ
(و ينفجر فوبو بالضحك)
فوبو: انت عارف أن فى هندسه عماره فضلنا ندرس العلاقة دى بالذات خمس شهور كل يوم نروح للدكتور فيشتمنا و يقطع اللوح... كان مجنون أبن 60 فى 70
بهظ: طب حل عن قفايا أنا المفروض أحلها فى ربع ساعه
فوبو: أوكى بس قوللى أيه الكونسبت بتاعك فى العلاقه دى
بهظ: يعنى أيه .. يا عم كلمنى عربى أنا عجلاتى يا عم الحاج
فوبو: يعنى العلاقه دى مرتبطه بفلسفه معينه و حسب فهمك ليها يعنى لو العلاقة بتمثل الراجل و الست شوف وضع الخط المستقيم مع الدايره يبقى عامل أزاى
بهظ: يا قليل الادب
فوبو: و لازم تعرف أنت هتسيبها فى المطلق و لا داخل أطار و أيه تفاعل العناصر دى مع الاطار
بهظ: أحيييه ( فى أسكندريه أحيييه مش عيب و دى قصه تانيه فكرونى أحكيها).
--------------------
تريرن تريرن
أفتح الباب لأجدها تقول
هى: لقيتها يا بهظ
بهظ: الصابونة
(تكمل بدون أهتمام للدعابه السمجه).
هى: العلاقه المثاليه بين الخط المستقيم و الدايره هى شكل المخروط على جوانبه خطوط مستقيمه و الاصل دائره.
(و أخذت ترسم فى أشكال مختلفه و الله العظيم ما فاهم منها حاجه).
بهظ: بس فى حاجه مهمه انت ناسياها (طبعا انا اجادل لمجرد اثبات الذات) الشكل ده ناقص الاحتياجات الماديه و التى احسن شكل ليها هو الهرم ... و ده يدلل فى اللاوعى عن هرم ماسلو للاحتياجات الانسانيه
------------------
طبعا مش لازم اقولوكم انى مش عارف انا منين افتكرت علم نفس ثانويه عامه بس الانطباع اللى عندها كان الاندهاش و الصدمه و عندى كان فى سؤال واحد فى رأسى (انا جبت الهجص ده منين).
---------------
المهم اننا فضلنا نتناقش
حد: ما ينفعش المخروط يوصل للنهايه لأن النهايه هى الله فى مفهومنا و السوبر نوفا عندكم و .....و
حد: أكيد جوه الهرم مخروط مختفى و جواه هرم تانى و الى ما لا نهايه.....و
حد: زى بالضبط الهرم اللى على الدولار أخره مفصول و فيه عين...و
حد: أم عين....و
حد: بلا بلا بلا بلا بلا...بلا
----------------------
بعد ست ساعات من التحوير وصلنا لاننا ناخد جزيره امام اسكندريه و نحفر فيها هرم مقلوب جواه غرف مربعه تربطها مسارات دائريه تحتوى على مزيج من ثقافات المنطقه و تبقى زى لعبه أولها على النت و المرحله التانيه فى الهرم المقلوب و ممكن نستخدمه كمخبا من الانفجارات النوويه و...و...و...و...و
و من هنا أتعلمت التحوير

15 comments:

أحمد said...

يا دماغك العالية
يا سفن - آب

Guevara said...

(((الحقيقة كما لم يعرفها البهظ)))

هي: إسكوووت .. مش أنا و البهظ حنبني هرم؟

أنا: إحم .. و ماله ياختي إبنوا هرم

هي: لأ بجد حنبني هرم قايم على نظرية الخط المستقيم و الدايرة

أقول أنا فيما معناه: ألف لا بأس .. و لو احتاجتي مساعدتي في الموضوع ده مش حتأخر طبعاً

و عبثاً حاولت هي شرح الموضوع لاحقاً بلا فائدة .. و إن كانت تظنّ إلى الآن أنني فهمت كل شيء

:)))))))

Solo said...

طب ماكلمتنيش يابنى ليه بدل الفضايح دى
ينصح باستمرار قبل تعلم التحوير ... محاولة ايجاد علاقة بين الخط المستقيم و الدائرة و لو علاقة مؤقتة
دا ألف باء تحوير يا بهظ

بس سيبك ... الصنف بتاعك المرة دى عالى فحت

Bahz.Baih said...

أحمد
أهم حاجه تخليك أها :))))

جيفارا
يبدو أن للحقيقه بالفعل لها أوجه أخرى لا يعلمها البهظ

سولو
يا زعيم أنت كنت خارج نطاق الخدمه ساعتها

AZ said...
This comment has been removed by a blog administrator.
Bahz.Baih said...

AZعزيزتى
انا جربت الوصفه الهايله دى فعلا على برنامج فلاش بس ليا ملاحظه
عمر الشرق ما هيحس بالغرب طول ما الخط المستقيم ما بيلمسش الدايره, أهم حاجه الاحتكاك للتتولد لذه تلاقى الحضارات ...بس شكرا على التجربه العمليه اللى نقلتنا من التخيلات ثنائيه الابعاد الى الواقع ثلاثى الابعاد

AZ said...

انت فهمتنى غلط.... بس برده مروحتش بعيد.. فى الحالتين الشرق متخوزق

Bahz.Baih said...

AZ

ما أعتقدش أن انا فهمتك غلط لان الفلاش كان واضح بس المهم اننا متفقين على مبدا واحد

HIMZELF! said...

الدايرةلازملها خط مستقيم يتقاطع معاها ويتكسر جواها علشان يدينا احساس بالحركة لأنها كتلة مملة عايزة خط لا مؤاخذة يتفاعل معاها ويمدها ببعض الحيوية ويحدد الفراغات جواها, عاماتان يعني جامدة جدا فكرة الهرم والمخروط دي, علشان شعاع الضؤ بيتكسر جوة المخروط, والهرم المقلوب دة برضوا لية دلالات عميقة , علشان كدة كان لازم يتفحتلوا في الارض

قول كمان يا بهظ
:)
قبيحة قوى الفلاشة دي

AZ said...

سورى اضطريت امسح الكومنت لانه بيتفهم غلط انا كان قصدى حاجه تانيه

HIMZELF! said...

يا بنتي ماتفهمش غلط ولا حاجة.. حقك عليا
دة انا بس اللي خيالي مريض
بجد كنت بتريق علي حالة الشرق..عادي يعني
اللي انتي فهمتية وقلتية والكلام عن تحديد شكل الفراغات جوة الدايرة هو بالظبط اللي بيحصل!

احضرنا يا بهظ

Bahz.Baih said...

أستاذ انيمال
انا والله مكسوف و انا باقولها بس ما علينا.
AZ كان ليها وجهه نظر بس من الواضح ان احنا دماغنا راحت لبعيد فى تفسير الخزوقه و من حقها انها تمسح الكومنت بتاعهابس هى البنت على حسب فهمى قصدها كل خير .
المهم انت يا مان منورنى فى الغرزه المتواضعه بتاعتى و على فكره قبل ما ابقى بلوجر كنت بتابع كتاباتك على طول و كانت عجبانى مووووت.
و أشوفك البوست الجاى
بهظ

HIMZELF! said...

يا بهظ بلاش أستاذ دي وحياة والدك, انا مش متزفلط ولابس كرافت وقافل الزرار اللي فوق

كتابات مين يابني, يا عم انا عجلاتي زيي زيك
!!!

Anonymous said...

متفكرنيش باليوم ده يا بهظ ، ده كان يوم منيل بستين نيله مطلعلوش شمس ولا قمر ولا نجوم و لا سحاب ، و السما كان فيها virus
العلاقه بين الدائرة و الخط المستقيم علاقه غير شرعية اساسا ، و كل المثلثات و المربعات بيتكلموا عليهم و رفعوا قضية فى قسم المستطيل
بالنسبه للهرم ، كلنا عارفينوا اللى الحشيش وقع منه فى فيلم الكيت كات لمحمود عبد العزيز برضه.
الصنف المره دى كله حنا يا بهظ ، زود الملوخيه شوية

mohamed fathi :D said...

صديقى البهظ ... اسمحلى اقولك ان القصة الحلوة اللى زى الووز دى اتحكتلى من اربع سنيين .. و انهاردة بس بجد فهمتها :)