9 Mar 2011

قول للجيش يشحن يا بلال

الجيش و الشعب أيد واحدة


يا استاذ بلال فضل الرساله دى متوجهالك بالأساس بما انك اصبحت الأشهر فى سلسله المدافعين عن الجيش بمقالك (1)على المصرى اليوم، انا كبهظ و بتكلم عن وجهه نظرى بحب الجيش و جميله على راسى من فوق و لكنى رافض للهجه الجيش الابوية و إنفراده بالقرار .. كان ممكن ادعم قراراته لو كانت بتصب فى مسار طلبات الثورة بس لحد دلوقتى انا شايف انه بيقابل الثوار و السياسين و بعد كده بيعمل اللى فى دماغه و مطنشنا و ده بيخللى رصيد تعاطفه الشعبى وسط شباب الثورة بيخلص و الشواهد بالنسبالنا كتيره

1- الجيش لمده شهر تقريبا سايب أمن الدولة تعيش براحتها فى البلد بدل ما ينفذ إقتراحاتك و يبتدى يحدد إقامتهم من أول يوم لغاية ما نعرف الكويس فيهم من الوحش ... سابهم شهر لغاية ما حرقوا ملفات و شوهوا سمعت ناس و ابتدينا نتكلم فى الثورة المضاده و حاله الوحده المصريه اللى كانت فى التحرير ابتدت تنتهى بنشرهم للفتنه الطائفيه و كل ده ذنب الجيش و الثوار من الاول رافعين مطلب حل أمن الدوله و القبض على قياداته

2- الجيش لغاية دلوقتى سايب اسامة سرايا و ممتاز القط على رئاسة تحرير الصحف القومية (الأهرام و الاخبار) ينشروا اشاعات و يبلبلوا عقل المواطن ...كلنا بنطالب بالعدالة ولازم نحقق معاهم بالعدل قبل ما يتاخذ فيهم قرار بس برضة هم ناس مشكوك فى ولائهم للوطن أساسا فلازم نمنعهم من التحكم فى عقول ناس كتير .. نفس الكلام ينطبق على التلفزيون الحكومى ... و أظن باين جدا الأشاعات اللى عملوها عملت اية فى الناس

3- الاصرار على تعديل دستورى و الاستفتاء عليه فى زمن قصير جدا هيؤدى الى أن الناس هتصوت بنعم لأن الأستفتاء أصبح على هل توافق على إعاده الامن أم لا توافق ... بغض النظر التعديلات دى مكتوب فيها أيه لان اساسا الناس ملحقتش تقراها و لا تقرا شروحات القانونيين ليها.

4- عدم إستجابته لمطلب مجلس رئاسى معناه انه عايز ينفرد بالحكم لمده الست شهور اللى جاية و ده يخلينا نتسائل هل الطلب ده قريب بشكل ما من طلب مبارك فى اول خطاب ؟؟؟ و هل وجود طنطاوى على رئاسه الجيش بيأثر على وطنيه الجيش
كل ده بيقلل من رصيد الجيش اللى ابتدى يستهلكه و انا كده مقولتش حاجه بالمقارنه باللى قاله مايكل(2) و عنده حق .. فلو سمحت قول للجيش يشحن رصيد .. إزاى؟
يرجع تانى جيش محايد و مالوش دعوة بالسياسة... حياد الجيش هو اللى بيخليه يكسب رصيد ... يجيب مجلس رئاسى إنتقالى أعضائة مش هيترشحوا للرئاسة بعد كده ... و يكونوا بشكل ما بيمثلوا ثوار مصر .. لان الثوره لا تكتمل إلا بتوليها السلطة و ده مش حاصل و ساعتها طلباتنا تتوجه للمجلس الرئاسى و وجود الجيش كمتفرج و داعم لطلبات الثورة هيديله رصيد تانى
على فكرة مطلب مجلس رئاسى و إعلان دستورى بدل التعديلات ده مش مطلب شخصى .. فى كتاب كتير(3) و شخصيات عامة على رأسها البرادعى (4)- اللى انت بتنحاز الية (5) - بيطالبوا بده


إذن مجلس رئاسى مكون من شخصية مدنية و شخصية عسكرية و شخصية قضائية .. الشخصية المدنية اللى يكون عليها توافق (حد زى شرف) و شخصية عسكرية من المجلس الأعلى و شخصية قضائية و انا اقترح للشخصية المدنية دكتور حسن نافعة و للشخصية القضائية المستشارة تهانى الجبالى و الجيش يرشح شخصية عسكرية وياريت يكون الراجل اللى ورا عمر سليمان

5 comments:

أنا - الريس said...

رغم كدا أنا قلقان ، مش نتيجة سيطرة الجيش والمجلس القيادة اللي مرفوض يكون فيه مدنين ولا مفيش .

أنا قلقان لأن الإضرابات سواء بتاع الموظفين والعاملين بالدولة هتبدأ تأثر فعلا علي الدولة .. والجيش له قدره والخوف ان تحدث مواجهه حتميه بسبب أصابع معلومه للجميع تحاول أن تجر شكل الجيش والشعب .

Unknown said...

فولة قال أحلي هتاف علي موضوع الجيش والشعب ده
الجيش حاطط إيده في طيازنا ... يبقي ماحدش حايبعبصنا

Anonymous said...

المجلس ارئاسى هو اللى هيضمن ان الامور تتعدل بشكل يخلى الحال يستقر بطريقة اسرع من وجود المجلس العسكرى اللى بيماطل بشكل واضح

Moataz Mahmoud said...

اولاً تسلم ايدك علي البوست الرائع المرتب
قلت ولخصت كل شيء تقريباً ..
لكن موقفك وموقفي وموقف كتير غيرنا دلوقتي بيفكرني ببيانات امريكا إبان الثورة ..
تحس انها موجهة لناس مش فاضيين لها .

Anonymous said...

الحمد الله في حد في مصر فاهم الجيش يا سيدي حابوس أيدين خلق الله عشان يفهموا إللي جابوني الجيش مش معاناالوثيقة 08CAIRO2091
09CAIRO549
09CAIRO1377
دي أرقام لوثائق ويكيليكس إللي بتتكلم فيها سعادة السفيرة مارجريت سكوبي عن الجيش أمريكا أصلا كانت عملة حسبها أن الراجل حيموت نصوص البرقيات بتاعت ويكي ليكس بتقول أن الجيش نفوذه في البلد لسة قوي ,الجيش بيقبض على المتظاهرين ويبقض عليهم ليه يا جماعة نفسي بس تفهموا عشان الجيش والشعب مش إيد واحدة يمكن مصالح مؤقتة واحدة فجتالهم السلطة على الطبطاب.