كتابه محرضه

الفترة اللى فاتت قريت روايتين من روايات الخيال العلمى و اللى لأول مرة ميكونش نبيل فاروق هو اللى كاتبهم ... أهميه الروايتين دول تكمن فى أنهم جم فى وقت البلد فيه بتغلى ... و طبعا الواقع بيأثر على الكتاب دول حتى لو بيكتبوا خيال علمى.

الكتاب الأولانى هو " ثورة 2052 ... البدايه" للكاتب محمود عثمان ... الروايه مبدئيا جامده جدا و على حسب كلام العاملين فى مكتبه البلد من أكثر الروايات مبيعا .. و هى بتحكى قصه مهندس مصرى سنه 2023 و اللى هو من الطبقه فوق المتوسطه و اللى بيبتدى يكتشف الفساد فى البلد و مدى إنسحاق الطبقه الفقيره و اللى دايما شايفها من ورا زجاج سيارته .. من خلال إنه بيقابل "غريب" المصور و المدون على النت و اللى بيكشف حقيقه المعاناه اللى بيعشها المصريين.

الكتب التانى و هو روايه "يوتوبيا" لأحمد خالد توفيق ... و اللى هى أكثر تشاؤم و سوداويه و اللى بتاخد التفاوت الطبقى فى مصر لأعلى طبقاته من خلال ان ظهور طبقه من رجال الاعمال الدوليين اللى عايشين فى قريه يوتوبيا فى الساحل الشمالى و اللى حواليها حراسه من المارينز و باقى الشعب المصرى اللى فى الحضيض و أزاى بقى أن هوايات الشباب اليوتوبى هى أصطياد الحيوانات من الشعب المصرى .. القصه عن ولد يوتوبى و صاحبته خرجوا يصدادوا و أتزنقوا وسط الشعب و واحد مثقف حاول ينقذهم ... أنصحك برضه لو مقريتهاش أنك تقراها

المهم بقى و هو أزاى أن كتاب الخيال العلمى فى مصر شايفيين مستقبل مصر بالسوداويه دى كلها ... و بشكل مباشر.. من غير توريه... من إنحلال للطبقات و ظلم إجتماعى و ده إن كان بيدى مؤشر فهو بيشير لحجم السخط المصرى عامه و الرغبه القويه فى التغيير ( كلام معاد و كل اللى بيقراه عارفه) و لكن المهم بالنسبالى إن الكتابين أو غيرهم مقدموش تصور للتغيير ... أخدوا الأمور على إمتدادها و بدل ما يوروا المجتمع تأثير الأشتراك فى عمليه التغيير ... وروه تأثير غياب الأشتراك فيها و كأننا معندناش حلم أو هدف ... بمعنى ليه مفيش تصور لمصر و هى حلوه أو و هى متقدمه أو هى متحده مع الدول العربيه .... كل التصورات سلبيه عن أيه اللى هيحصل لو معملناش حاجه ... ليه مفيش كتابه محرضه إيجابيه ؟؟؟؟

-----------------

تحديث

زودنى الف بتحليل طق حنك عن الروايتين .... تحليل البدايه و تحليل يوتوبيا... لازم تقراهم

الرأسماليه الأنتقائيه

انا بقالى كتير مابكتبش لأنى خلاص فقدت الامل فى الكتابه ... بس ميضرش أقول شويه فسا لحسن بطنى وجعتنى.
---------------------------
مصر من ساعه الثورة كانت دوله إشتراكيه و بعد كده جه الانفتاح و أبتدينا من ساعتها التحول للرأسماليه .... بس بقينا زى اللى رقصوا على السلم .... بمعنى أخدنا من النظام الرأسمالى اللى إحنا عايزينه و سبنا المهم

أقدر أقول و انا حاطط بطيخه ربيعى فى كرشى أن دى أحد أهم مشاكلنا دلوقتى اللى بنعانى منها و اللى بتظهر فى شويه مظاهر.
---------------------------------------------
أن مثلا إحنا لسه عندنا أمل أن الدوله تعين البشر اللى بيتخرجوا من الكليه مع أن الدوله بالنظام الحالى رايحه فى سكه اللى يروح ميرجعش .. يعنى مفيش خلاص تعينات فى عمل فى القطاع الخاص و دة بيشهد عليه أرقام العماله –اللى هى مضروبه فى مصر أصلا- أن العماله معظمها فى القطاع الخاص ... أخدنا من الرأسماليه الخصخصة و سبنا تهيئه السوق فى الأساس للمنافسه من تشجيع الاستثمار و عمل نظام ضرايب محترم .. مش نظام زى الحالى بيساوى باللى بياخد أربعين الف جنيه فى السنه و اللى بياخد ملايين فى السنه.

--------------------------------------------
إنتشار الفساد بصورة منظمه و منهجيه ... لدرجه أن يطلع شيوخ مستقلون ( من التيار السلفى ) و يبيحللوا الرشوه للمضطر ... لأننا متجهناش و بدرجه فعاله لتغيير نظام الرواتب بشكل يشجع المهارات و العمل الجاد ... أخدنا من الرأسماليه إلغاء الدعم و مرفعناش الاجور اللى كانت قليله بسبب الدعم و محطيناش قواعد لنظام المرتبات و المكافئات
--------------------------------------
أخدنا من النظام الرأسمالى حريه السوق و سبنا حريه التجمع الاهلى لحمايه المستهلك ... بأمارة أن جهاز حمايه المستهلك حكومى ...مع إنه المفروض يكون جهاز أهلى ... نابع من الناس
طبعا سبنا الساحه لرجال الاعمال و مسمحناش لجماعات الضغط أنها تظهر و لسه بنعامل المجتمع المدنى ( حكومه و شعب على السواء) على أنهم عملاء

انا شخصيا مش ضد النظام الرأسمالى بس ضد غياب العداله الاجتماعيه ... بس بلا خيبه ... الناس نا عايزه تهلب و خلاص.
-------------------------------
غاظنى قوى اللى حصل فى أسعار السجائر فى أول أيام رفع أسعار السجاير ... اللى حصل أن شركات السجاير منزلتش فى السوق أى كميه لغايه السعر ما يتعرف حجم الضريبه ... فأتجهه التجار و بصوره عشوائيه لرفع سعر السجائر و بصورة عشوائيه و أهى فرصه .. لدرجه أن علبه الفايسروى الاحمر زادت لحد سته جنيه يعنى بنسبه خمسين بالمئه من سعرها الأصلى ... لما أحنا معندناش مشكله نسرق بعضنا ... عايزينا أزاى نقف فى وش اللى بيسرقنا ... انا بعد اللى حصل شايف أن الشعب مش سلبى ... الشعب المصرى حرامى

يارب تولع باللى فيها

تفاحه

على ناصيه حلمى لقيتها واقفه و بتسرح خطوط يومى .... حركت راسها بسهوله و و رسمت بضفايرها شجرة ... أخدت منها تفاحه خضرا و بين كفوفها دعكتها بقت حمرا أمريكانى و أديتهالى و أبتديت يومى.... الحياه من غير بنت تحسسك إنك اله رومانى .... وحشه.

--------------

انا أسف لكل اللى زارنى و ملقاش حاجه جديده .... معلش الحياه كانت رمادى اليومين اللى فاتوا

علشان متنضربش على قفاك

هوه البوست ده علشان تسجيل الحدث و تسجيل المكان الجامد ده
بلوج التعذيب فى مصر نشر الكتاب اللى إتصادر علشان تنضرب على قفاك

فبما ان انا بعتز بقفايا و بدعو الناس اللى بتقرا انها تعتز بقفاها

أقدم لكم علشان متنضربش على قفاك

كل سنه واحنا عايشين بقفا سليم

أخيراً إضرااااااااب

أخيرا لقيت حاجه أكتبها

انا كنت أضربت عن الكتابه من فتره و لكن دلوقتى هضرب عن الحياه .... يااه أخيرا هصرخ براحتى ... هقف فى ميدان محطه مصر .... بعلو صوتى هصرخ

حرام عليكم بقى ... الرحمه يا كفره ... عايز أشارة مرور واحد سليمه ... الرحمه عايز تعليم عدل ... يا جدعان عايز أكل و انا مطمن ... عايز اشتغل من غير حكومه تعطلنى .... يارب توب علينا بقى

عاااااااااااااااااا عايز أتجوز ..... ااااااااااااااااه .... أعيش

الدعوه عامه للأسكندرانيه .... و المكان محطه مصر... و الميعاد 6 أبريل ... و تجنبوا الامن بأى شكل

أشفكم هناك

تحديث

عارفين أحسن حاجه فى اليوم ده ايه ... ان بعد ما نغير تاريخ مصر هيبقى عندنا عطله رسميه جديده فى مصر ... أسمها عطله 6 أبريل ... همتكم معانا علشان يوم أجازه جديد

تلاتين يوم إسلام

حد فيكم سمع قبل كده عن مورجان سيبرلوك ... ده يا سيدى مخرج فيلم supersize me فيلم وثائقى بيتكلم عن الأضرار اللى ممكن تحصل لما تاكل ماكدونالدز تلاتين يوم ورا بعض

الراجل ده بعد النجاح اللى حققه مع الفيلم لدرجه انه قدر يغير صناعه الفاست فود بيعمل برنامج فى التلفزيون قايم على فكرة التعايش و التواصل .. بكل بساطه بيجيب واحد من معتقد أو من فئه و يقعده مع عائله من فئه تانيه خالص ... يعنى يجيب أمريكى مسيحى متشدد يقعده مع شاذ أو واحده لا تؤمن بالله يقعدها مع عائله مسيحيه.

تكنيك تنفيذ البرنامج ناجح جداَ فى القضاء غلى الستريوتايبس أو التنميط و القولبه بلغه التنمويين ... يعنى أنك تصنف شخص فى كاتيجورى أو تصنيف معين من غير متحاول تعرفه.

على السايت الجامد ده اتفرجت على حلقه من برنامج مورجان تلاتين يوم و اللى فيه جاب واحد أبيض مسيحى من ويست فيرجينيا الى حى مسلم فى أمريكا و هناك عاش مع عائله مسلمه لمد تلاتين يوم بشرط انه لازم يلبس زيهم .. ياكل أكلهم ... يصلى علشان ربهم ... و يبقى كمان شكله زيهم ... فربى لحيته و لبس جلابيه و سافر للحى ده.

الحلقه جامده جدا و اللى عايز يتفرج عليها يضغط هنا ... ابقوا ارجعوا نتكلم عن رأيكم فى الفيلم

دعوا الحريه تتكلم

أحباط مزدوج – أهلا 2008

كنت دائما أتجاهل مسببات الاحباط لأجل التمسك بأهداب الامل فى واقع أفضل .. لكن بجد أستفزنى خبر مقتل جندى مصرى تانى على الحدود ... على الأرجح محدش هيتكلم عن الخبر ده فى الجرايد ... المستفز بالنسبالى هو خبر من نوع تانى ... هو أن الولايات المتحده الامريكيه بتطالب الحكومه السعوديه بالافراج عن فؤاد الفرحان ... ياسلام... تحس انهم بيشوهوا اى طلب داخلى جميل بجد للمعارضين .. يعنى دلوقتى اى سعودى على نياته هيقرا الخبر ده و من غير ما يعرف مين فؤاد هيقول ابن كلب عميل ...هو احنا بجد حالنا صعب حتى على الكافر؟؟؟.. حاجه وسخه.
انا مش عارف هو احنا هننزل فى الطين لحد أمتى .. ده حتى موريتانيا الغلابه عندهم أرهاب و الجزاير نازلين تقطيع فى بعض و الكويت أول ماجالهم وزيره تعليم عندها أستراتيجيه ... عملوا عليها أستجواب و شكلها كده هتستقيل زى اللى قبلها .
ده يقودنى الى تساؤل مهم ... هل الديمقراطيه هى فعلا الحل للشعوب العربيه ؟؟؟
أفيدونا أفادكم الله.

قال بقر قال

كان فى نكته كده و كنت بحب أقولها بصراحه زمان و لكن النكته دى خلاص مش هقولها تانى ... النكته بتقول ان صعيدى و سعودى كانوا بيتكلموا فالسعودى قال انتوا المصريين بتاكلوا فول على الفطار فول على الغدا فول على العشا .. ايه اللى يفرقكم عن البهايم .. رد الصعيدى البحر الاحمر.

النكته على قد عنصريتها كانت بتبين قد ايه المصريين بيبصوا للسعوديين بدون إدراك للواقع و على انهم شويه بدو جالهم فلوس .. مع انكار مستمر لأى مثقف وسطيهم .. كان دايما الشيخ بن باز هو الممثل الحقيقى للشعب السعودى فى نظر المصريين .. علشان بس تعرفوا قد ايه كان جهلنا

لكن قريب قريت عن مدون سعودى تم اعتقاله ... قولت لما أدخل اتفرج على مدونته ... مصدقتش نفسى ... قد ايه حكمه و جمال ف الاسلوب و تمكن من اللغه ... هو فيه كده فى السعوديه ... مش ممكن ... اول مره اخرج بجد برا نطاق النظرة الضيقه اللى عندى ... حاسس ان انا عربى ... حاسس ان بجد ممكن نعمل وحده عربيه .. بس مستقله بعيد عن الحكام المعفنين اللى عندنا ... وحده فى الهم .. كلنا فى الهم سوا

كان فى نكته مصريه تانيه بتقول ان مبارك هو اللى وحد المصريين على دين واحد ... لأنه كفرهم كلهم ... متهيألى ان الحكام العرب وحدونا على كرههم ... و اللى يضايقك فى مصر هو اللى مضايق اخوك السورى و السعودى و التونسى و المغربى ... طب ليه نسكت و احنا عندنا المدونات ... ليه نسيب فؤاد يتحبس علشان قال رأيه ... رأى حر بجد ... رأى يخليك تحترمه و تقدرة .

من هنا بعلن انا مع الأفراج عن فؤاد أحمد الفرحان ... الرحمه يا حكام السعوديه ده مقالش حاجه غلط ... سيبوا اللى يقول يقول ... ده هيخلينا اقوى و أحكم ... يلا يا مصريين ... من غير مابقى واخد الامور عل جوه .. اتحركوا ... بانارات علشان فؤاد ... شويه هنا و شويه هناك جايز نفوق و يرجع فؤاد للتدوين تانى و نسجل انتصار تانى لصالح المدونين

أقروا بقا ليه فؤاد بيدون و أستمتعوا

اقروا النص ده لفؤاد عن الحريه

ده بقى موقع الحمله لتحرير فؤاد ... بحب اسميها تحرير مش افراج

لما الشتا يهد الرجال

و أدى الشتا عاد من تانى ... كان زمان للشتا أحاسيس مختلفه عندى ... يعنى كنت بحب أوى البلوفرات و اللبس الشتوى عامه ... لسعه البرد مع كوبايه النسكافيه ... المشى فى محطه الرمل بعد المطرة (الشتا بالأسكندرانى) ... الأفلام و أنت تحت البطانيه.

لكن الملعون من ساعه ما نقلنا فى الشقه الجديده نسانى كل ده... بقى الشتا عباره عن ريحه نتنه شاممها و عارف أن انا مصدرها و بعمل نفسى مش واخد بالى ... الشتا دلوقتى يعنى قشف الأدين ... الشتا بقى لما يدق الباب أفتكر معاه أن حمامنا من غير سخان.

أصعب حاجه و أنت واقف قدام الدش ... زى ما نزلت من بطن مامتك و بتبص للميه اللى انت عارف انها عمرها ما هتسخن ... كأنك بالظبط هتخلع ظفر من أيدك ... تطلع بره الحمام ... تلبس هدومك كلها من غير ما تستحمى ... و تفضل تفكر .. و ذكائك ميسعفكش .. مالهاش حل ... ياتفضل نتن .. يا تستحمل و تستحمى ... تعرف ليه القطط بتخاف من الحموم ... تبتدى تفكر ... و تلاقى نفسك من غير ما تاخد بالك أبتديت تلحس دراعك ... يييييييع أيه القرف ده ... لا لا لا ... لازم تستحمى يا واد يا بهظ .

تدخل المقبره تانى ... تقلع تانى هدومك ... تمد أيدك برعب ... تصرخ ... و تسمع بلال بيضحك ... هو السخان بكام يعنى ... انا بعد الحمام ده هنزل أشترى سخان وش ... تمد أيدك كلها ... شويه ميه يجوا على صدرك ... بررررره.... اللعنه .... تراجع نفسك .. والله الريحه الوحشه مش وحشه قوى .... لا ... ماينفعش .. مش بعد ما بليت أيدك ... تمد كعب رجلك ... عادى ميفرقش .... تدوس فى الميه و تبتدى تيجى على فخدك .... أااااه ... تفهم معنى انا الحكومه بتاعه أحمد السقا فى فيلم الجزيره ...شجاعه فجائيه و روح زورو تلبسك ... يلا مبدهاش ... هوووووووووووووب ... تختبر لحظات الموت لثوانى ... كفايه كده ... تخرج من تحت الدش و انت ناسى انك تحط صابون أو أى حاجه و تجرى على السرير .... تحت اللحاف .. جميله بقى اللحظه دى ... مش لازم سخان خلاص انا أستحميت ... تبص على ضوافرك ... ياااه لسه وسخه ... طب أبقى أغسل ايدى .. اهم حاجه الريحه راحت .... تصبحوا على خير بقى.
-----------------------------
بلال بقى بيقول :
هييييه دنيا...رجعت ايام الشتويه يا بهظوظ

بجد بقى ومش تريقه الاستحمام فى ظروف خطرة زى ال بنمر بيها انا والسيد بهظ كأنه قفزة ايمانيه فى الخلاء لانك بتحتاج خطوة واحده للتحرك تحت طاولة الدش خطوة صعيبه بتشد فيها كل جلدك شهقة حد بيمارس لحظه انتشائيه مفاجأه او تعذيب مباغت واذا كان ده هيحصل فى بداية النهار يبقى اليوم هيبتدى برجة عنيفه بتكتسب لذه منها أو صدمه تخليك تمشي باستغراب

هو فى ايه ...مالها الناس ماشيه كده ليه ...انامين !!!؟هى الميه الساقعه عملتى أيه!!!؟

وتحس احيانا انه خالص لازم تلم الجاكت عليك شويه وانت ماشي كأن حد انتهك عرضك ولا حاجه وانت نايم متخدر ...وتبتدى تبص فى وشوش الناس انا ايه ال حصلى ...انا مكنتش كده ...ده مش جلدى ...ده جلد فرخه مسلوخه...طب رجعونى لامى ...اناعايز ماما تحمينى ...والناس متعزركش ...متقدرش انك اترميت تحت دش ساقع وبارد وتنح اوى ...وتبتدى تعاملك هلى انك اهبل نوتردام ...معلش يا حبيبي البس القميص ده...وتحط كفوفك جوة القميص ويشدوها بقسوة

تصرخ ...تصرخ ...تصرخ... لالالالالالالالا

انا مش مجنون انا مش واحد مستحمى ...انا كنت داخل احلق دقنى و النداهه ندهتنى وقالت الدش يا واد الدش....وتنشأ بعديك حركه جديده فى الادب الروائي الاستحمامى ويكون من اشهرها..روايات زى

المسام النتنه الضيقه...لبركليز

مائة عام من الجرب ...لحمص

مش عارف اقول ايه ...انا مستحمى حالا

-----------------------------------

انا زودت تعليق بلال علشان هو بيشاركنى المأساه اللى إحنا فيها فمش قليل عليه يشاركنى البوست و بصراحه التعليق أجمل من أنه يتساب فى الكومنتات كده و مات الكلام... يلا العواف