بعض أسباب البهجه

حبيب قلبى حسن

بما أنك عايز تدخل مجال العمل الأهلى فخلينى أديك شويه سببورت علشان تعرف تدوس فى المجال صح بما انك لسه جديد فى كار التنمية , بص يا سيدى و صلى عللى يشفع فيك.
أولا أيه هيه تعريف مؤسسه مجتمع مدنى , هى كل مجموعه أو تنظيم (غير سرى يا حلو) يقع بين الأسره و الدوله (يعنى نقابات , جمعيات ,منظمات حقوقيه, هيئات مانحه..الخ) قائم على العضوية و غير هادف للربح (يعنى أستبعد الشركات) يسعى الى تحقيق المنفعه العامه (جمعيات التنمية) أو منفعه فئات خاصة ( زى عمال السكه الحديد مثلاً) بشرط عدم تصارع المصالح و ده للى يطلع الأحزاب لأنها تسعى الى مصلحه و سلطه

بص يا سيدى التعريف اللى فات ده أتفق العالم عليه بعد عناء و إن كان لسه عليه خلاف ... أصل فى فترة التسعينات و لغاية دلوقتى كان فى مؤتمرات كتير عايزه توصل لحلول لمشاكل العالم و من هنا ظهرت كلمه العولمه و التنمية المستدامه و أبتدت المصطلحات دى تبقى مفهومه بعض الشئ و نتج عنها برامج تمويل كتيره لدول العالم كلها,علشان تحاول تصلح أوضاعها ... لدرجه أن العالم أتفق على اهداف الالفية الانمائيه ... تخيل أهداف محدده يحاولو يوصلولها ... و أتجهه التمويل كله ليها ... و بقت زى هدف الكل يحاول يوصله

فى أم الدنيا مصر .. الوضع مختلف"قرفصاء يعنى" ...لسه الجمعيات عندنا معظمها شغال فى كفاله اليتيم و تقديم المعونات .... و ده يعتبر الشكل البدائى للعمل الأهلى...مش معنى كده أن ده وحش ... بس ميبقاش 99.9999999 فى الميه من الجمعيات فى مصر كده و الباقى ما بين منظمات حقوقيه و جمعيات تنمويه و جمعيات رجال أعمال ... هو ده بالتالى بيخللى العمل الميدانى للتنمويين سهل لقله المنافسه بس هو غلس إن مافيش أتجاه صح للتنمية رغم توافر الأمكانيات البشرية

طب أيه أهميه المجتمع المدنى ( أنت شكلك كده مش مقتنع) بص يا سيدى , المجتمع المدنى بيعمل على سد الفجوات فى خطط التنمية (يعنى التطوير و الأعمار و التنظيف) اللى المفروض تقوم بيها الدوله و يسعى الى تشكيل الراى العام و تنمية القيم المجتمعية المطلوبه زى الأنتماء و الفاعليه ... لأنه بيعتمد على كونه مجموعه من الكيانات الصغيره القادرة على التأثير بفاعليه و فى العمق من غير بطء حركه المؤسسات الحكومية العملاقه أو أنتظار قرارات فوقيه... هى مؤسسه صغيره عندها هدف و تسعى الى تحقيقه مباشره ... زى ماتكون عايز تجوز بنت خالتك بتعملولها جمعية و تقبضوها الأول لغاية ماسم النبى حارسه يقدر يجيب شقه و الخ.. تقريبا نفس المفهوم .... هو بالأساس بيعمل على صياغه الرأى العام للطبقه المتوسطه علشان تقدر تغير ... ماهى الطبقه المتوسطه هى أساس و محورالتغير فى أى مجتمع صحى.

عرفت بقى ليه أتجهت للعمل المدنى ... أصل لغاية أمتى هفضل معترض على حاجه من غير ماقدم حلول ... بالعكس الفرصه قدامى بس مش لاقى وقت أعمل كل اللى فى دماغى تخيل... فى أفكار كتير عايز أعملها بس مش ملاحق... و الله الباب مفتوح مش زى ما بيقولولك ... بس الجدع اللى يقدر يصد.... أخوانا البعدا (أمن الدوله) معندوش مانع تشتغل على الوعى السياسى بس متشجعش حزب على التانى و هى دى بالضبط رساله المجتمع المدنى المحايد ... أنا كفرد ممكن يكون ليا أتجاهات سياسيه بس كجمعية ( شخصيه أعتباريه) لازم أكون محايد و مليش مصلحه الا مصلحه الناس ككل ... و إلا مش هاكل عيش.

ما أصل مصلحتى أن أعمل مشاريع تنموية أكتر علشان أكسب أكتر كفلوس .. و مش نهب و كده لا بالحلال و على قد شغلى... أينعم فى ناس وكلاها والعه ... بس الزهد مايعنيش أن أموت من الجوع... دى حتى ربنا خصص للعاملين على الزكاه جزء منها

طب أنت يا حسن كشاب تخش أزاى المجال... بص معظم الجمعيات الاهليه متشبعه ناس على قد حجم برامجها و البحر يحب الزياده... أنت فى العاشر من رمضان ... أبتدى الأول زود معلوماتك ... يعنى مثلا أقرا عن أداره العمل الأهلى و التطوعى هنا

و بعد ما تفهم المجتمع المدنى بيشتغل أزاى ... أبتدى أقرا عن مشاكل بلدنا فى تقرير التنمية البشرية لمصر و تقرير التنمية البشريه للعالم ... و تابع بقى التقارير المنشوره فى كل حته ... هتفهم هنا يعنى أيه تنمية و العالم رايح فين..

طب و بعدين ... بعد ما تكون حصيله معرفيه ... مش محتاج أكتر من سيرش كويس على النت ... أبتدى بقى جمع معاك كام شاب كده لطيف غير مشكوك فيهم أمنيا و أبتدى أشهر جمعية و هتلاقى مليون حد يساعدك لو دورت صح... فى جمعيات كتير أبتدت كده زى جمعية مشوار و التنمية المستدامة ... و الجمعيات دى أشهرت ما يسمى بالتحاد النوعى للجمعيات الشابه يعنى بتشتغل للشباب و على الاقل 25 فى الميه من أعضاء مجلس أدارتها شباب , مع جمعية تهضة المحروسة

بص يا سيدى الموضوع فيه قراية كتير ... بس صدقنى يستاهل ... انا أعرف نماذج كتير خصصت حياتها على الموضوع ده و يارب أبقى زيهم فى يوم من الأيام... كل ده غير الأستفاده اللى هتعم عليك ...هتبقى كده فاهم مجتمعك ماشى أزاى و حلوله أزلى ... أصل مشكلتنا أننا بنفتى عمال على بطال ... من غير معلومات و من غير دراسه ... بالضبط زى الكوره كلنا فاكرين اننا لما نكون مدربين منتخب وطنى هنجيب كاس العالم ... فى حين هو مدرب واحد بس و على الباقى أنه يتفرج و يحرق دمه... طب مانلعب بقى و كفايه فرجه... سورى أشطب كفايه لحسن نتحبس

و سلام بقى

أخوك البهظ

ملحوظه اللينكات اللى فى المقال ده مهمه فشخ

http://www.un.org/esa/
http://en.wikipedia.org/wiki/Globalization
http://www.un.org/esa/sustdev/documents/agenda21/index.htm
http://directory.google.com/Top/Society/Philanthropy/Grants/Grant-Making_Foundations/
http://www.un.org/millenniumgoals/
http://www.grameen-info.org/
http://www.civicus.org/new/default.asp?skip2=yes
http://www.undp.org.eg/Arabic/Publicationsss/NHDR.html
http://www.un.org/arabic/esa/hdr/2005/
http://econ.worldbank.org/WBSITE/EXTERNAL/EXTDEC/EXTRESEARCH/EXTWDRS/0,,contentMDK:20227703~pagePK:478093~piPK:477627~theSitePK:477624,00.html
http://www.egyptngosupport.org/
http://www.meshwar.net/
http://sda-web.org/
http://www.nahdetmasr.org/
http://www.ashoka-arab.org/

دستور الارهاب

تلألأ الدمع فى عينية و هو يقرأ فى الجرائد أخبار أنتصار الأرادة الحاكمة على أرادة الشعب و إقرار الدستور الجديد ، بكل ما يحملة أفراد الاجهزةالامنية من إنتشاء، إنفطر قلبة حزناً و هو يرى أمين شرطه حقير ينتفخ من عظمة السلطه الموكله اليه على رقاب العباد و هو يحمل هرواته البلاستيكية ، بلع ريقه الماً و مراره عاجزاً عن الفرح الواجب و هو يرى موريتانيا تخوض غمار أول تجربة ديموقراطيه حقيقية...أتجه الى الفراش و نام حالماً بأسوأ الكوابيس

---------------------------

يؤسفنى أن أرى جموع الناس تتحرك فى الاسكندرية غير عابئة بما يحدث ، و كناشط فى المجتمع المدنى أشعر بأنعدام جدوى ما نفعله كأننا كلما دفعنا خطوة الى الامام تزيحنا الى الوراء يد عملاقه لا ندرك أبعادها ، تتشبث أظافرنا فى الارض الرخوة مخلفة وراءها دمائنا الكحولية التى سرعان ما تتبخر... هل أصبح الرحيل واجباً أنسانياً

----------------------------

فجأه أجتاح البشر مرض غريب، أصبحوا يقضون الساعات الطوال فى دورات المياه ينقشون على فضلاتهم أشعارهم الحزينه ، و سرعان ما يبتلعوها...أختفى الدم من عروقم ...الكل خائن ، الكل مدان ... الكل فقد الشعور ... فقدوا الألم و فقدوا النشوة ...رغم كل ما يتركه الأيلاج من ألتهاب , تلبدت المشاعر و تحجرت الدموع فى القلوب ...فتيبست ... فماتت ... و صمت العالم

-----------------------

أبحث الان عن حفره هادئه يعلوها حجر منقوش عليه...وابلداه

ما لسه بدرى

انا عايز أكتب عن أيه يا بلال ؟ ماتستغربش كده ... انا عايز أكتب عن أيه؟... بهظ أنت عايز تكتب عن الملل
بس دى فكره ممله قوى أنك تكتب عن الملل و الحاجات اللى ملياك و مش مخلياك تعرف تعبر
بص انا هتكلم عن بدرى
بسم الله الرحمن الرحيم
بدرى فى ترتيب الاصدقاء اللى عملوا ساين أن فى حياتى هو أجدد واحد أشترك فى الخدمه ... بس البروفايل بتاعه عندى ليه أكبر عدد من الهيتس اليوميه
هو كده عامل زى شغله ... سيستيماتيك زى الويندوز سريع زى البنتيم فور منطقى التسلسل زى البيزك
طبعا اللى مش عارف زمانه عرف ... بدرى بيشتغل فى الكمبيوتر ... طبعا هو مش بالسذاجه اللى تخليه يشتغل فى الصيانه و الشبكات ... لا هو بجد إبهار بيعمل حاجه مش موجوده فى مصر ... بيعمل تطوير للمؤسسات ... يعنى يشوف المؤسسه و يدرسها و يقوم مشقلبها على حد تعبيره و ياعينى ماحدش فى مصر فاهم طبيعه اللى هو شغال فيه و السوق لسه مش مستوعبه ... بس انا واثق أنه هيوصل فى يوم للى هو عايزه علشان الواد ده دماغه ناشفه
بس سيبنا من بدرى الفنان و خلينا فى بدرى الأنسان... بدرى درس فى الأزهر و أشتغل و هو فى تالته أعدادى و نزل السوق بس فضل مع ده طيب زى الفطير ... سخن زيه ... متلاقيهوش قاعد على بعضه فى مكان الا لما يدرس المكان ده يتشقلب أزاى و يوصل لنتيجه ...غير كده يفضل يغلى فى أفكار و يعصر دماغه لغايه لما يوصل

بدرى جالى أسكندريه يقعد معايا شويه بيحاول يفتح لنفسه سوق فى أسكندريه ... أصل هو قاعد أصلا فى جحيم الله على أرضه المسمى حلوان... المهم انا عملت اللى عليا و أخدته التجاريه و تقريبا دى كانت غلطتى ... أصله مش بتاع أنك تقعده فى مكان و زى ماتيجى... لأ لازم تحطله خطط منطقيه و ترسمله فلو تشارت أحنا هنقعد فى التجاريه تلاته و خمسين دقيقه و نطلع نتمشى على البحر لمده 15 دقيقه هناقش فيها وضع تكنولوجيا المعلومات فى العالم الثالث بين النظريه و التطبيق... و بالتالى كل الفنانين اللى هو قابلهم على التجاريه مكانوش كونفيجر معاه ... سموه ذهنى... و واكل دماغه بالافكار

و صادف فى الايام اللى بدرى قاعدها معايا فى الاسكندريه أن عيد ميلادى يكون وسطيها... يوميها أحنا انا و بدرى و بلال و أنطونيو قررنا اننا هننزل السينما ... قشطه انا نزلت و رحت التجاريه أقابل ناس و هما ولاد الخبيثه حبوا يعملوا عيد ميلاد مفاجى ليا ... المهم انا أكلمهم يا جماعه مش هنروح السينما يلا بينا انا مستنيكو فى التجاريه و بدرى راسه و الف سيف لازم أرجع ميامى أخده و نروح مع بعض... طبعا هو عايزنى أجى علشان عيد الميلاد و انا و لافاهم... المهم انا ضيعت الوقت مع رشاد فى التجاريه و رجعت انا و هو على البيت علشان نهزء العيال ولاد الكئيبه دولا على أنهم مانزلوش و طلعنا البيت الساعه أتناشر و خمس دقايق لقيت بدرى نايم و بلال و أنطونيو فى السايبر كلمتهم يطلعوا و بحاول أصحى بدرى و هو مش راضى يرد عليا ... طبعا انا أتنرفزت عليه .. أنتوا عيال صغيره لازم أجى أخدكم و هو مابيردش لغايه ماطلع أنطونيو بالتورته و هنا أنفجر بدرى فى وشى .... يامعفن أحنا كنا عاملينك عيد ميلاد و انا نظفت البيت علشان لما تيجى تنبسط و انت أصلا معفن ... و انا أحاول أتأسف بس مفيش بدرى هنج عليا و لقيته مطلع ليا أجنده صغيره و قاللى خد مع أنك ماتستاهلش ... الجزمه جابلى هديه و أحرجنى

بدرى بقاله حوالى شهرين قاعد معانا ... ماليانين تفاصيل و حكايات بس برضه لسه مش كفايه لسه مشبعتش منُه... بس هو عايز يمشى خلاص علشان يشوف مستقبله فى حته تانيه... ربنا يوفقه ... بس المهم أن اللحظة دى من عمر الزمن اللى هو قضاها معانا و قضيناها معاه غيرت فينا و غيرت فيه متتنسيش... الكنبه الحمرا و أغصان الزيتون المحروقه و كورس البحث العلمى و المشاريع العملاقه و سندوتشات الفلاح و المغامرات مع عم سعد و الست الامريكيه اللى تحتنا و الحمام اللى من غير سخان.... كل ده يفضل عندنا ذكرى لايام هباب عدت و يارتها ترجع تانى

مع السلامه يا بدرى

-----------------------------

تحديث

يبدو أن خلو بيتنا من القلل هيخلينا نكسر الكابينيه اللى لسه فاكينه فى محاوله يائسه لأنهاء الصراع الدائر فى ساحه الكومنتات

جزر جمع جزيره

جزر جمع جزيره مش جمع جزره ده عنوان فيلم المخرج الشاب الموهوب السكندرى الصاعد الواعد محمد صلاح
محمد مخرج متميز و ده تانى عمل له بعد سيكوتين 8 مج ... محمد مش محتاج يلتزم بقيود تحد من العمليه الابداعيه عنده.. علشان كده عمل سيزون لوحده ..لاعيد صغير و لا عيد كبير و لا نص سنه و لا أى من القيود السخيفه الاخرى... من الاخر بمزاجه و فى الوقت اللى يريحه
انا كان لي شرف العمل مع محمد فى فيلمه الاول كمنتج مساعد... يعنى بتاع مشاوير روح يا بهظ تعالى يا بهظ ... حاولت أعمل فيها فذلوك و مسكت السيناريو أقراه و عدوك مفهمتش حاجه ... كلام مكلكع و عسكرى بدراع خشب فى رجله وناس بتجرى و ناس بتقف بعلامات ممنوع التدخين فى الفجر وحركات كده.. بس لما كمل مونتاج الفيلم.. فهمت
المهم مش هو ده موضوعنا محمد بيعرض فيلمه الجديد جزر فى مركز الجزويت الثقافى لأول مره بمصر بعد عرضه فى فرنسا فى مهرجان كده معرفوش

المهم

الساعه 7،30
يوم 1 مارس
مركز الجزويت الثقافى الاسكندريه
مده العرض 60 دقيقه

انا هحاول أنزل برومو للفيلم على البلوج قريب
ملحوظه للجهله أمثالى برومو يعنى تيزر و هما قالولى كده

The idiots guide

1st Tip If you have this travel addiction, you are going to see different people from what so ever parts in the world, and you probably will have a pre-expectations about the place and the people you are visiting, take care this is the first mistake in your trip, the media is your source to build this expectations and it is not always true, people are not like what you see on TV, not all the Chinese are tuff and cold machines, and you don't have to get sex in the first moment in Poland, Africa can be heaven on earth, just if you ready to see it like that.

2nd Tip Search for the nearest artist or writers forum, it could be a bar in Malta, an oriental café in Alexandria or a friend house in Malaysia, this is the thing you have to visit instead of monuments, what makes the pyramids so beautiful is those Egyptians who build it. Search for the spirit of the place, it could be a chat with an ignorant Taxi driver, a taste of milk in a Turkish coffee in a small coffee shop in Syria, just keep your eyes open.

3rt Tip Always remembers, the world is not what you see, it is what you don't see, so keep your mouth shut and listen to me till the end.

4th Tip Do not categorizes people. Ghandhi was wearing bed sheets and a broken glass, Bob Marley stinks, and so does Bahz. There is a tiny little wonderful thing in the people mentality you need to discover to build your own brain, make your mission to discover it.

5th Tip Civilized people are not hose in Air condition's offices, they are not those whom used to lock them selves in a certain class society, they are those people whom are willing to learn, to live like idiots.

Ultimate Tip Live like an idiot, but live happily

نقابها

بما أن الناس متعوده أن البلوج ده شخصى و انا بكتب فيه عن حكايات شخصيه من غير حذق أو كلكعه فانا عايز المره دى أتكلم عن أختى

صلوا على النبى... أختى دى أصغر منُى بسنتين و عنديه كيك دماغ من حجر ... أول ما أتولدت و هى فى المنخل ضربتها و انا كان عمرى سنتين ... بابا كان بيصور طبعا الاحتفاليه بقدوم مولود جديد للحياه يحمل أسمه و انا بغبائى ضربتها ... هاها بعد كده بعشر سنين و احنا عيال فى أبتدائى كنا بنتفرج على الشريط اللى صوره بابا و هى شافتنى بضربها و أصرت أنها تضربنى ... و انا ركبنى الف عفريت لا... ما تضربنيش و هى تعيط... لا يا ماما هو ضربنى و انا ماخدتش حقى لازم تاخدولى حقى ... انا فاكر انها ماسبتنيش الا لما ضربتنى ... و انا مسخسخ على روحى من الضحك بس دى كانت أول علامه على الروح الناريه حداها

أختى و هى فى خامسة أبتدائى لبست الحجاب رغم أن ماما كانت رافضه الموضوع - و هى أساسا محجبه- علشان البنت متاخدش قرار هى مش مدركه أد أيه هو كبير ...ساعتها ماما قعدت معاها و قالتلها أن القرار ده كبير و انها هتبقى مسئوله عن قرارها ده و هى وافقت و فعلا مقلعتش الحجاب من يومها

فاكر برضه لما ماما ماتت كنت انا فى تانيه ثانوى و هى فى أعداديه قبل الامتحانات بشهر و كام يوم ماما قالت و هى بتموت انا مش خايفه على البنت بس خايفه على الواد نفسى يدخل هندسه ... كان عندها حق ... أصل أختى كانت دايما الاولى ... مره فى رابعه أبتدائى طلعت التانية ...يووووة عملت مناحه فى البيت ...انا كنت بستغرب أزاى بتجيب تلاتيم من تلاتين فى العربى مع وجود حاجه أسمها التعبير... المهم ماكناش عارفين أزاى نقول لأختى أن ماما ماتت ... انا حسيت يومها أن انا راجل و مسئول لأول و لأخر مره فى حياتى (بصراحه يعنى) انا فاكر ان انا أخدتها فى حضنى و هى قعدت تعيط...بعد كده بصتلى و قالتلى لازم يا بهظ تدخل هندسه ... بصراحه بقت هندسه هدف حياتى ...و عملتها علشان خاطر ماما و أختى و دخلت هندسه و طلعت هدف زباله ...ماعلينا ... نرجع تانى لأختى هى طبعاً كملت و جابت فى ثانويه عامه مجموع خرافى مش عارف ميه و كام فى الميه و كانت من التلتميه الاوائل على الجمهوريه و قررت انها تخش طب علشان تبقى زى ماما ...من هنا انا و هى أفترقنا انا دخلت هندسه أسكندريه و هى طب القاهرة و بابا كان طاير بينا فى السما ... هى فضلت عايشه مع بابا و انا فى أسكندريه ... انا أتأثرت بالتيارات الثقافيه فى أسكندريه و هى بالتيارات السلفيه فى القاهرة ... بعد سنين الجامعه ما عدت... فجأه و على حين غره أكتشفت أن انا و أختى على النقيض تماما ...انا بحب المزيكا و حفلات الجزويت.... و هى مقتنعه أن المزيكا حرام ... انا من أنصار تحرير المرأه و هى من أنصار النقاب و هوب لقيناها أتنقبت... كانت صدمه ليا ... أصل تخيل انت معايا كده لما كل اللى انت مقتنع بيه بيتك على عكسه تماما ... بنينا بينا حاجز وهمى من الثقافه المختلفه .. انا بجيب الدستور و هى بتجيب مجله التوحيد ... انا بقرا لديل كارانجى و هى للشيخ محمود المصرى ... بقا الحوار بينا مستحيل و بيقلب دايما لخناقه و فى أخرها ندعى لبعض بالهدايه أحنا الاتنين

أختى من كام يوم جالها عريس و كلمتنى تعالى قابل العريس .. انت أخويا و لازم تقوللى رأيك ... حيص بيص يا معلم و عرق و بهدله .. و انا هحكم عليعه أزاى ده بقى!!؟ ... المفروض هى اللى تحكم و تقول و ترفض و تقبل ... انا مش مستعد أبقى مسئول عن أختيارها لحياتها ... لأول مره كان عليا الالتزام بمعايرها ..و ها ياستى انت عايزانى أعرفلك عنه أيه و أقيس أيه بالضبط؟... بص يا سيدى انا عايزه أرهابى.. راجل كده دقن أييه و ملتزم بيصلى كل الفروض فى الجامع ... طيب لو هو مش بيصلى كل الفروض فى الجامع مانت ممكن تخليه يصلى فى الجامع ... بص انا عايزه راجل يعينُى على الخير مش واحد انا أعينه على الخير ... راجل كده يصحينى فى نص الليل يخلينى أصلى القيام ... و المهم لازم يكون حافظ قرأن أكتر منُى ... انا حافظه عشرين هو لازم يكون حافظ أكتر

منظرى و انا قاعهد قدام الواد يفطس من الضحك انا ببص للحيته و هو بيبص لدقنى هو بيقول فى سره أيه البيت ده.... الواد حليق و انا طبعا لو فى أى موقف تانى كان ممكن أفضل أجادله للصبح ... المهم الواد جاى عن طريق شيخ بس مشهور قوى و أختى و الواد بيعتبروه علاُمه عصره ..و اللواد الصراحه أرهابى أرهابى.. بس عنده أبتسامه هايله ( أكتر حاجه بحبها فى السلفين أبتسامتهم اللى من جوه دى) متصالخ مع نفسه بدرجه رهيبه مهندس و كده قمر... بصراحه دخل قلبى من أول مره

أول مره أشوف الدنيا بمنطق أختى ... هو فى أيه!!؟.. أم الواد شافت أختى و قالت عليها حلوه و أحنا شفنا الواد و عجبنا و الاتنين راضيين عن دين بعض و الميزه أنهم لو أتجوزوا هيلاقوا أساس يرجعولوا لما يختلفوا... أصل الدنيا مش فارقهمعاهم.. هم همهم ما بعد الدنيا

بصراحه كل مفاهيمى أتزلزلت ... ماهى حاجه حلوه أهى و مش مستاهله نحاربها فكريا ... بصراحه انا مش متصور نفسى أتجوز كده عميانى بس هى مفرقيتش معاهم .. و معتقدش أنهم زعلانين...طب ليه أحنا ( كمثقفين مثلا) قارفينهم و ليه هما قارفينا طب ما نقبل بعض ... زى مانا و اختى عايشين هى تحطلى شريط عمرو خالد أسيبلها على الكمبيوتر أغنيه لفيروز ... تسيبلى كتاب لبن باز أسيبلها كتاب لباولو كويلو... و أهى الدنيا ماشيه

تدبسه ...نوبة صراحه

فى نوبه صراحه عارف أننى هندم عليها بعد كده قررت أننى أرد على التدبيسه دى , فى محاوله لأصلاح ما تبقى من برستيجى بعد ما جار عليه الزمن ، يلا تابعوا معايا ردود التدبيسه
اية اللي حيحصل لايميلك لما تموت ؟
بصراحه مش عارف أصل مش من الحاجات اللى تتورث حسب الشرع و ماعتقدش أن العلماء بحثوا أمره فطبيعى ياهوو و جيميل و هوت ميل هتورث أيميلاتى... ثم أيه أصله ده .. أيه السؤال الغبى ده

اديت لباس وورد لحد قبل كده؟
يووه كتير بس دايما كنت بغيرها بعد كده

لو اه كانت طبيعةعلاقتك بيه اية؟
دايما بيبقى صديق أو زميل شغل

اسمك؟
أحمد يسرى محمد أحمد

اسم الدلع المشهور في وسط اصحابك؟
فى أسماء كتير, أولها فى ثانويه عامه كان أسمى شرموط هولمز, ثم فى أعدادى و أولى كليه بقى أسمى بقلظ و لما كبرت سمونى بهظ و بقى ده الاسم الرسمى و فى بقى دلع لبهظ بازوكا , باهابيظو . بهظتى , بهوظ , بهيظ فى بقى وصف لأفعالى " أفعال بهظيه" فلما حد و مش لازم انا يعمل حاجه بهظيه يبقى قلدنى

عمرك؟
بما أنك هتقرا البوست ده بعد كده فعمرى هيتغير , فمن الافضل أقولك تاريخ ميلادى و بالمره تبقى تفتكر و تجيب هديه " 8 فبراير 1981

برجك؟
الدلو يا أستاذ.... الدلو الدلو الدلو و الراجل الدلو يحب الدلو

مجالك او مجال دراستك ؟
مجال عملى هو الجمعيات الاهليه من أداره برامج تنمويه و مشاريع غير هادفة للربح أما مجال دراستى فهو الهندسة المدنى و دى انا مش طايقها أصل مش قادر أتصور فكرة أننى بعد عمر طويل كل اللى عملته فى الدنيا هو شوية مبانى

شخصيتك نوعها اية؟
انا على طبيعتى " وده زى مانا شايف نفسى" بمعنى لو طقت فى دماغى حاجه بعمله ... طيب لدرجه العبط ... الا هو مش عيب حد يتكلم عن شخصيته أصل عمره ما هيبقى صادق .... فيا حته كده خبث فلاحين بس و الله بعبط مقفوش ... بس بيجيب سكه مع أبويا

السفر بالنسبة لك؟
و الله السؤال ده صعب انا نفسى أسافر بس علشان أرجع تانى ... ممكن أسافر علشان أتعلم بس الاصل أن انا أفضل هنا

المود بتاعك؟
دلوقتى و لا أمتى ... فى العموم انا مش فارقه معايا ... بس مثلا فى مواسم للأكتئاب زى مواسم الامتحنات و دخول الشتا و أول الخريف و أخر الربيع و مع تصريحات الحكومه المستفزه و مع طلوع النتيجه و بس لكن فى العادى مبسوط و منشكح

وقت فراغك بتعمل فيه اية؟
هو فين وقت الفراغ ده ... هو تقريبا يا ببلوج يا بقرا قصه .. أحيانا بلعب جولف " صراحه بقى و انا مش هتكسف" يأما بهوبس على الفوتوشوب

الاكلة المفضلة؟
الحواوشى و البسله بالجزر و الشاورما

الصفات اللي خدتها من بابا؟
ماعرفش بس هو كومبنيشن من الفهلوه على الفشل

الصفات اللي خدتها من ماما؟
الطيبه المبالغ فيها و حمل كلام الناس عى الصدق دايما

اكتر 6 حاجات بتكرهها؟
الكدب رغم ان انا بكدب
الجبن " الحمد لله مش جبان قوى"
التسلط
الظلم
العند
السبانخ

اكتر 6 حاجات بتحبها؟
صحابى حسن و عيسوى و كريم و بلال و بدرى و مودى و شيكو
القعده الحلوه
البلوج
الجمعية
البنات
الشاورما
الشغل بالنسبة لك؟
هدف فى حياتى عايز أحققه عايز شغلى يبقى هو الحاجه اللى بحبها

اية الكومبيوتر والانترنت بالنسبة لك؟
حاج زى أى حاجه بفرغ فيها طاقه

عايزيني امرر التاج دلوقتي لحد
بدرى و اللى عايز

فراشة

تنجو اليرقه من الشرنقه

إذا ما وثقت يا عزيزتى

من أنها يوماً ما ستكون

فراشة

-------------------------------

بالنسبالى ده أحلى كومنت كتبته لحد على كلام حسه و قاله

أنصحك تقرا بغير علم الوصول

أرتجال

سأمحو بقلمى كل ما كبته فى قلبى من أحاسيس صماء... سأفتعل لنفسى شخصا و سيولد حبك فى قلبى كالعنقاء.... لن يضرنى كل من حاول أن يطردنى من جنتك بجهل أو بغباء... لأنى سأظل لأجلك محارباً فى بوتقه الفقراء ...لا أقول أنى راهب فلست من صنف العباد فسأمل يوما أن أراكى فى سمو العظماء .... وسيقولو عنًى أنى من فئه البلهاء ...لأنى لا أرجو مالاً فانا أعلم أن المال أل الى زوال... و لكنى أرجو أن أكون ترساً ف حراك البسطاء
يا من وهب الاقدمون اليكى حياتهم و لم يضرهم النسيان... أسأل الله أن يمن على بنعمه النكران
كيلا أغفو عن حبك يوماً وتذرنى رياح الأنسان ...لأنى بك أكبر من مجرد كونى أنسان

بلدورة رصيف

اليومين دول بدى ترينينج فى منطقه على حدود أسكندريه أسمها أبيس... نادى شباب أسمه السبعات... حاجه كده أيييييييييه مقولكش فى الجحيم تحس انك سافرت فى الزمن الى ما وراء التاريخ... المفروض ان انا متكلمش عن اسرار الشغل ... علشان كده مش هتكلم عن تفاصيل الغباء الادارى و لا سوء التنظيم ولا اي حاجه من الكلام ده... انا بس اللى غايظنى هو ان القرى دى - من خلال سؤال الناس اللى عايشه - كانت زى الفل من قيمه 30 سنه فى أوائل السبعينات... القرى نشأت علشان المهاجرين من مدن القناه بعد 67 و المكان مولت الولايات المتحده أياميها تكاليف ردم الملاحات و انشاء قرى و اراضى زراعية ... كانت متقسمه الى تلات بلوكات ايه و بى و سى فمن هنا جت تسمي ابيس ...من الابجديه الانجليزى ... و كانت الشوارع ستة متر عرض و نظيفه و... الخ من مميزات أى مكان جديد متخطط صح... المهم شويه و أهالى القرى كل واحد يسرق من الشارع متر فى كمان متر و جاره يوازية لغاية ما الشوارع بقت متر على أستاندرد عرض الجاموسة.... و اللى زاد و غطى ان نص ابيس تبع الاسكندريه و النص التانى تبع البحيره
انا بجد مش غايظنى غير المحافظ اللى فالح يهد رصيف و يبنى غيره فى حين تكلفه الرصيف تحل مشكلة بيت و بدل ما يهتم بالغلابه بيدور على حجاب مدفونله تحت بلدوره رصيف