8 Jun 2006

نورت مصر

نورت مصر يا معلم...نورت مصر... نورت مصر... نورت مصر
------------------------------------
متنساش لما تيجى تشرب من ميه النيل علشان ترجع مصر تانى ... ترفع قضيه على الحكومه اللى ملوثه النيل... و نورت مصر
------------------------------------
السجاير الكيلوباترا فخر الصناعه الوطنيه... متتخضش من الخشب اللى فى السجاير ... دى مسابقه كل ما تجمع خشب أكتر فرصتك فى الفوز تكتر... و نورت مصر
------------------------------------
مصر هو بلد الهرم... (المقصود شارع الهرم) ... لو بتلبس جلابيه بيضا و بتدفع بالدولار يبقى كل شئ تحت أمرك... و نورت مصر
-----------------------------------
مش معاك باسبور اجنبى... لو مصرى دايقك فى مصر و لا يهمك ... جزمتك أنضف منه حتى أسأل البوليس ... أنت هنا ملك... مش بقولك نورت مصر
----------------------------------
مصر... بلد الأمن و الأمان و الأستقرار... و حط خطين تحت الأستقرار دى... ماتخافش من البوليس لو قافل وسط البلد... دى علشان الأستقرار... و نورت مصر
-----------------------------------
نورت مصر يا معلم... و ياكش تولع... مش بقولك نورت مصر

19 comments:

HIMZELF! said...

ايه يا بهظ هما لحقوا يهلوا

السهروردى said...

مصر من كتر ما نورت الفيوزات ضربت و النور إتقطع و مصر رجعت مضلمه تانى
فيقولك أن رئيس مصحلة الكهرباء سأل النائب احمد عز ....و لا بلاش دى قصة طويلة أبقى أحيكهالك بعدين

بس انت قول ورايا كده
نورت مصر
نورت مصر
نورت مصر
أو قولها بالعكس كده
مصر نورت
مصر نورت
مصر نورت
قبل الأكل و بعده خمسين مرات و قبل النوم و بعد ستين مرة
و انت حتبقى
تمااااااااااااام قوى بإذن الله

Anonymous said...

مصر بخيـــر

هشام علاء said...

تمام يا بهظ ياخويا
بس انت كده جيت ع الجرح
لان زمان كان فى مقولة بتقول ان
"مصر منورة بأهلها"
و لكن للاسف اتضح فى الفترة الاخيرة ان
"مصر مولعة بأهلها"

وسلم لى على السياحة

Anonymous said...

نورت مصر,شعار الحمله الجديده للتسويق السياحى.يا جماعه المشكله مش فى السياحه ولا فى البلد .المشكله فينا احنا,الحكومه المفروض تغيرنا,ده احنا عالم كفره علاطول بنشتكى,ايه المشكله لما الاسعار تزيد ما الدنيا كلها غلا,ايه يعنى لما الجرنال زاد ربع جنيه,ايه يعنى لما تشترى مركب وتغرق الناس وتخلع بره,ايه المشكله لما نتكلم مع بعض بالجزمه.عادى ........و....نورت مصر

Kareem said...

هما مش لاقيين شعار يثبتوا عليه ليه ؟؟
السنة اللى فاتت كانوا بيقولوا إبتسامة مصر ماتتنسيش ...
السنادى .. نورت مصر ..
طيب ...
على الأقل شعار السنة اللى فاتت كان فى صالحنا حبتين ... بمعنى إن إحنا موضوع الشعار .. إبتسامتنا ما تتنسيش .. عندنا بنات حلوة ... رمال شواطئنا ناعمة ... المية نضيفة .. الخ ...
إشمعنا المرادى بيخاطبو ود الأجنبى ...
يعنى هى مصر مش منورة بأهلها زى ما بيقولوا ...
بصراحة شعار السنه اللى فاتت على الرغم من كل الإعتراضات الهبلة عليه إلا أنه كان أفضل مليون مره من الشعار التعبان ده ..

Anonymous said...

فعلا يا بهظ بيه
من كتر تكرار نورت مصر
نورت مصر
نورت مصر
حسيت اني لمبة قلاوظ

Anonymous said...

نفسي مصر تبئى بلد الجمال والحرية والفن والثقافة مش بلد فساد وشحاتيين وتطرف وفتاوي القهاوي والفقر والنفاق
في بلاد كتير سبقونا مثل تونس ولبنان ودبي منهم لله اللي كان السبب

Salma El Banna said...

حاسة انه من كتر النور.. حيحصل ماس كهربائي..لان الناس كلها حتنور.. فحتحصل قفلة لان الفولت حيعلا..
ياجماعة تعالوا شوفوافي اسكندرية // حتلاقوا ان الشعار المناسب للسياحة هنا/// ازحمها ازحمها هي تنور و احنا نولع ..// من كتر الزحمة ..بفكر اروح القاهرة!! حتكون افضى .. الطلبة مش كلهم خلصوا امتحانات ومع ذلك اسكندرية ... (مولعة زحمة
)...
((والنبي ناولوني الولاعة عايزة اولع روما بحالها.. انا مستعجل عندي اذاعة ......مش فاكرة الباقي............!

Bahz.Baih said...

يا مرحبا يا مرخبا...نوركم يا جماعه غطى على الكهربا
أنيمال
يا عم انا مش هاستناهم لنا يجوا ..أصل بصراحه الأعلان مستفز قوى
السهرودى
و النبى و اللى نبى النبى نبى لانت قايل يا شيخ يه حكايه أحمد عز دى
أحمد
نورت البلوج...:)
fay
انا مش معاك فى اللى بتقوله...يعنى أيه المشكله فينا...بتهزر يادتك...شكلك بتهزر...أه بتهزر
كريم
بلا شعار السنه اللى فاتت بلا شعار السنه دى...دى كلها يتنجان يا معلم
أحمد عبد العليم
مش ناوى تبلوج و لا أيه يا عم أنت
يسرا
زى ما قولت لكريم كده ده كله بتنجان.. وكوسه علشان خاطر الفساد
Anonymous
و الله وانا كمان...كلنا... بس أزاى
مرايات
ولسه يا بنتى لما يجى شهر سبعه.. أتفرجى على المسخره

Zeryab said...

ههههههههههههههههه
نورت مصر عشان مصرمضلمة بأهلها
هههههههههههههههههههههههه
اتضامن مع هذا البوست لأنه ذكر عذابى الأكبر فى الحياة الدنيا
السجاير الكليوباترا

Veeeva said...

في معدل اكتئاب عالي هنا.... و بعدين هو مفيش حاجة عاجباكو خالص؟ جتكو القرف مليتو البلد! علي فكرة ده هزار

abderrahman said...

اللي انت كاتبه ده ممكن يتكتب على ضهر الإعلان بتاع الحملة الإعلانية (بالحبر السري).
واللي نيته سليمة حيعرف يقراه
:)

islamventura said...

نورت مصر
هل يسرا و مصطفى فهمى و ...........و غيرهم اشخاص تستحق بان تقوم بعمل دعوة لاى بنى ادم ؟
اظن نحن محتاجين الاجانب هم نفسهم الذين يعلنوا عنا ؟
و بذلك فهم الشخصيات المذكورة عاليه اجانب بالفعل لا يشعروا باى شىء مما اشعر انا به و تشعر انت به
الشعب الطيب جداجدا
اللى قام بنفسه بتلويث مياه النيل العظيم
و السجاير التى من الممكن ان تجمع طقم صفرة او غرفة نوم من خلال تجميعك لكم الخشب اياه
و شارع الهرم الذى تبيع الناس نفسها فيه للسياحة
و الله لو معاك الجنسية المقدونية له كرامة فى البلد دى عن اى مصرى

Anonymous said...

احلى حاجةفي مصر النقاب و99 % حجاب عادة طبعا والدعارة ازاي التلاتة مع بعض معرفش
بلد خازوفقققققققق

Anonymous said...

yousra and hussein fahmy is an elegant face for an ugly country
that's the matter

Anonymous said...

نوررررررت مصر....طبعا نورت مصر!!؟*
واولا لما بتيجى مصر طبعا بتشرب ميه معدنيه ومجربتش ميه النيل ففكك من البهظ هو بس طمعان فى ميه النيل فعشان كده بيقول عليها وحشه وكخه عشان محدش يشرب منها
**لما بتيجى مصر طبعا بتشرب مستورد عشان انت مستورد فمالكش دعوه بالاشعات على الكليوبترا الى هو البهظ اصلا مبيشتريهاش بيشحتها
*** اساسا الهرم ده شويه طوب ففكك واذا كان الكلام على شارع الهرم فده معمول لسعادتك لما تيجى عشان عارفينك راجل زواقه للرقص الشرقى العفيف وده اهتمام بنشكرك عليه اما عم البهظ مبيقدرش ده
****اولا الموضوع مش موضوع وبس لاكن المرتبط بالبسبور طالما معاك بسبور يبقى انت راجل صاحب قضيه ترفيهيه فرفشنيه افشخنتيه فلازم البوليس يحترمك اما ولاد الكلب الى معاهم بطايق دول مش صحاب قضيه دول نفسهم قضيه فكبر دماغك واستمر فى نضالك الافشخناتى
*****طبعا بلد الامان والاستقرار بذمتك انت لما بتيجى مصر مش بتحس انك مستقر كده عايز تاكل بتاكل عايز تشرب بتشرب عايز تقلع بتقلع عايز تلبس بتلبس مش هو ده الى اسمه الاستقرار ولا انا غلطان تانى حاجه وسط البلد ديه حته حابسين فيها الناس الوحشين فمتروحش هناك عشان البوليس خلاص عمل حوليها سور وعملها معتقل كبير محدش يطلع منه فامفتكرش انك عايز تدخل للناس الوحشين الى احنا حابسنهم عشان خاطر محدش فيهم يعض حضرتك لما يلقيق بتاكل سندويتش كبده وهو مابيكلش الا ضررررررررب من ساعه مااتولد
******* بتعب والله كده ست نجوم يامعلم
********وكده السبع نجوم عشان تبقى فعلا نووورت مصر وايااكش احنا والى جابونا والى حنجبهوم بعدينا نووووووووولع

Polka Dotted said...

enta hayel ya bahz ya sadiki



fi ta3lek kont 7abe eny a2olo...bas a7eb a2olholak privately :D

ma 3alina... nice post man

MAKSOFA said...

أدخلوا مصر أن شاء اللة أمنيين
واللة أنتم لو عشتم خارج مصر حا تعرفوا قد أية أن مصر دي بلد جميلة بكل القرف اللي فيها
وبعدين بصراحة العيب موش في الوطن العيب في الناس اللي ساكنة الوطن ماتظلموش مصر احنا شعب عايز يتربي من أول وجديد